MALEKO 13

Ko Faipati a Iesu e Uiga ki te Fakamalepega o te Fale Tapu

(Mata 24.1-2; Luka 21.5-6)

1Ka koi sasale o fano ki tua a Iesu mai i te Fale Tapu, e tokotasi mai ona soko ne kalaga atu ki a ia penei, “Te Faiakoga, onoono ake i te gali o fatu mo fale!” 2Ne tali atu a Iesu, “E matea ne koutou a fale 'lasi konei? E seai eiloa se fatu o fatu konei e 'toe; e ma'lepe katoa ki lalo.”

Ko Fakalavelave mo Fakasauaga

(Mata 24.3-14; Luka 21.7-19)

3Ne sagasaga a Iesu i luga i te Mauga o Olive, e feagai tonu mo te Fale Tapu, kae o'mai a Petelu, Iakopo, Ioane mo Anitelea ki a ia, ka ko latou ake eiloa, 4olotou muna, “E 'tupu mafea a mea konei? Se a foki a te fakailoga ka iloa ei ne matou a te aso ka 'tupu ei a mea konei?”

5Ko akoako atu a Iesu ki a latou, “Ke fakaeteete koutou, kae mo a ma fakavalea koutou ne se tino. 6E tokouke a tino ka o'mai i toku igoa kae fai ake penei, ‘Au ko ia!’ ko faka'segina ei a tino e tokouke. 7Ke se manava'se koutou, manafai ko lagona ne koutou a leo o tino taua ko pili mai io me ko tala o taua i koga 'mao. E 'tau o 'tupu a mea pena, kae se ko tona uiga me ko oko mai a te gataga. 8E taua te sua fenua mo te sua fenua, te sua malo mo te sua malo. Ka isi ne mafuie i koga valevale, pela foki mo oge. A mea konei, e fakatusa eiloa ki te 'mae o te fafine ka fai o fanau.

9 # Mata 10.17-20; Luka 12.11,12 “E tau mo koutou o fakaeteete. Me ka puke koutou ne tino o 'moli ki te fono. Ka kini foki koutou i loto i fale tapuaki; ka 'tu foki koutou i mua o pule, tupu ona ko toku igoa, i te folafola atu ne koutou ki a latou te Tala 'Lei. 10E 'tau o folafola atu muamua te Tala 'Lei ki tino katoa. 11Kae kafai ko puke koutou ne latou o 'moli ki te fono, sa muamua o manava'se me ne a otou pati ka fai; me kafai e oko mai te taimi, fai'pati fua ki muna e tuku atu ki a koutou. Me i muna e faipati atu ne koutou, e se e a koutou; ne muna e vau mai i te Agaga Tapu. 12Ka tuku atu ne tino olotou taina tonu ke tamate, e pena foki tamana ki olotou tama; ka 'teke foki a fanau ki olotou matua, kae tamate foki ne latou. 13#Mata 10.22 Ka ita tino ki a koutou ona ko au. Ka ko te tino tela e taofi mau ne ia au ki te ikuga, e ola a ia.”

Ko te Mea Fakamataku Faigata

(Mata 24.15-28; Luka 21.20-24)

14 # Tani 9.27; 11.31; 12.11 “Ka matea ne koutou ‘A te Mea Fakamataku Faigata’ e tu i te koga e se 'tau o tu i ei.” E 'tau mo te tino faitau o malamalama i te uiga o te mea nei! “A tino kola e 'nofo i Iutaia e 'tau o 'tele ki koga maluga'luga. 15#Luka 17.31 A te tino e nofo i luga i te tuafale, e se 'tau mo ia o toe fanaifo ki lalo i te fale o puke se mea i ei ke fano mo ia. 16A te tino e nofo i te fatoaga, e se 'tau o foki ki te fale o puke mai tona gatu. 17Ko seai la se faigata pela ki fafine fai'tama, mo failele mo olotou pepe manafai e oko mai aso kona! 18'Talo ki te Atua ko te mea ke se 'tupu a mea konei i aso o te tau 'moko. 19#Tani 12.1; Faka 7.14 Me i te fakalavelave faigata tena, ko te toe fakalavelave faigata eiloa fatoa iloa ne te lalolagi, talu mai te kamataga o faite te lalolagi ne te Atua ke oko mai eiloa ki te aso tenei. Kati e seai ake foki eiloa se mea fakamataku pena e toe tupu. 20Ka ko te Aliki, ko oti ne fakamu'tana ne ia te aofaki o aso fakama'taku kona; moi se fai ne ia pena, e seai lele eiloa se tino e ola. Kae ne ala o fakamu'tana ne ia aso kona ona ko tino filifilia.

21“Tela la, kafai se tino e fai mai ki a koutou, ‘Kiloke, tenei te Keliso!’ io, ‘Kiloke, tela te Keliso!’ sa talitonu ki ei. 22Me ka 'sae mai a Keliso mo pelofeta 'loi. E fai ne latou ne fakailoga mo mea fakaofoofogina o fakaloiloi a tino filifilia, ki te mea e mafai ne latou. 23Ke matapula koutou! Ko taku atu ne au a mea konei, ka koi tuai o oko mai a aso kona.”

Ko te Vauga o te Tama a te Tagata

(Mata 24.29-31; Luka 21.25-28)

24 # Isa 13.10; Ioelu 2.10,31; 3.15; Faka 6.12; Isa 13.10; Eseki 32.7 “A te la ka pouli faeloa mai tua o aso kona, kae se toe 'pula te masina. 25#Isa 34.4; Faka 6.13; Ioelu 2.10A fetu e tatela ifo mai te lagi, ka ko mea ma'losi i te lagi ka gasue'sue foki. 26#Tani 7.13; Faka 1.7 Ko vau ei au te Tama a te Tagata, e vau i kaumana i te 'mana mo te 'malu. 27Ko uga ei ne au agelu ki feitu e fa o te lalolagi o fakamaopoopo mai a tino filifilia a te Atua, mai te sua feitu ki te sua feitu o te lalolagi.”

Ko te Akoakoga e Maua mai te Mati

(Mata 24.32-35; Luka 21.29-33)

28“Ke fai a te lakau ko te mati mo akoakoga ki a koutou. Kafai ko lanu launiu ona kaula kae malu'lu, kae 'tupu ake foki ona lau, ko iloa ei ne koutou me ko pili mai te tau 'vela. 29E pena foki eiloa manafai ko kamata o 'tupu a mea fakama'taku kona, ko iloa ei ne koutou, me ko pili o oko mai aso kona.#13.29: te taimi ko pili mai, ko toka o kamata; io me a Ia ko pili mai, ko toka o vau. 30Ke masaua a te mea nei! E 'tupu katoa a mea konei ka koi tuai o 'mate a tino konei e ola. 31E palele atu te lagi mo te lalolagi; kae e se mafai eiloa o palele atu aku muna.”

E Seai se Tino e Iloa ne ia te Aso mo te Itula

(Mata 24.36-44)

32 # Mata 24.36 “E seai se tino e iloa ne ia a te oko mai o te aso tena mo te itula tena. E oko ki agelu e se iloa foki ne latou. E pena foki te Tama; ka ko te Tamana fua e iloa ne ia. 33Ke matapula koutou, kae ke toka foki, me e se iloa ne koutou me ko afea e taunu ei a mea kona. 34#Luka 12.36-38 E fakatusa a aso kona ki se tino ko faimalaga keatea mai tona fenua ki se isi fenua, kae tuku ne ia ana tavini ke tausi ana mea, kae tofu eiloa a te tavini mo tena galuega e fai; kae fakatonu atu foki te tino tausi te mataloa ke matapulapula a ia. 35Tela la, ke matapula koutou, me e se iloa ne koutou a te taimi e oko mai ei a te pule o te fale. E mafai o oko mai i te afiafi, i te valuapo, mai mua o te vaveao io me ko te taeao pogipogi. 36Kafai e oko fakavave mai, ke se maua mai koutou ne ia e 'moe. 37Ko te muna e fai atu ne au ki a koutou, e tena foki taku muna e fai atu ki tino katoa: Ke matapula koutou!”

Currently Selected:

MALEKO 13: Tusi Tapu

Highlight

Copy