MALEKO 12

Ko te Tala Fakatusa ki Tino Ga'lue i te Togavine

(Mata 21.33-46; Luka 20.9-19)

1 # Isa 5.1,2 Tela, faipati atu ei a Iesu ki a latou i tala fakatusa: “E isi se tagata ne toki tena togavine, kae fakatu foki tena 'pui, kae keli foki te lua mo 'tau te sua vine, kae faite foki ne ia te taoa mō leoleo te fatoaga. Oti, tuku atu ei ne ia a te togavine ki tino ga'lue ke tausi kae fano ki te sua fenua. 2I te okoga ki te taimi e tau ei a te taukai vine, uga atu ei ne ia tena tavini ke fano ki tino ga'lue ke avatu tena vaega mai fua o te fatoaga. 3Ne puke atu a tino ga'lue i te togavine o 'kini te tavini tena, kae uga atu ke foki fua mo te seai o se mea. 4Ne toe uga atu ne te tino e o ia te togavine a te sua tavini; ne pagopago ne tino ga'lue tena ulu kae ta fakamasiasi. 5Ne toe uga atu foki ne te tino e o ia te togavine a te sua tavini, tamate ei ne latou. E pena foki eiloa olotou faiga ki te tokoukega o tino pena, a nisi e kini ne latou, ka ko nisi e tamate ne latou. 6A te tino koi 'toe nei ke uga atu ko te tama fagasele a te tino tena. Tela, uga atu ei ne ia tena tama ki tino ga'lue mo tena manatu penei, ‘Kaati la ka ava mai latou ki taku tama.’ 7Kae ne fai'pati ake a tino ga'lue kona ia latou ake eiloa penei, ‘Tenei te sui tonu. O'mai ke tamate ne tatou, ko fai ei te togavine ma tatou!’ 8Tela, puke atu ei latou ki te sui o tamate, kae 'pei ne latou tena foitino ki tua o te togavine.”

9Ne fesili atu a Iesu ki a latou, “Se a la te mea a te tino e o ia togavine ka fai?” Ne toe tali foki eiloa ne Iesu tena fesili, ana muna, “Ka vau a ia o tamate a tino kona, kae tuku atu te togavine ke tausi ne nisi tino. 10#Sala 118.22,23 E tonu, ko oti ne fai'tau koutou ki muna o te Tusi e penei:

‘A te fatu ne tiakina ne tufuga fai fale me se aoga

Ko fai nei mo fatu sili i te tāua.

11Ne fai te mea nei ne te Aliki,

Ko sei la se gali pela! ”’

12Ne taumafai a takitaki Iutaia o puke fakapagota a Iesu, i te mea ko iloa ne latou me ne fai atu ne ia a te tala fakatusa e faka'tau tonu ki a latou. Ne ma'taku i te vaitino, tela tuku ei ne latou a ia i te koga tena kae olo keatea.

Ko te Fesili e Uiga ki te 'Togiga o Lafoga

(Mata 22.15-22; Luka 20.20-26)

13E isi ne lua Falesaio mo nisi o te kau a Helota, ne uga atu ke olo ki a Iesu o malei a ia ki se fesili. 14Ne o'mai ki a ia, olotou muna: “Te Faiakoga, e iloa ne matou ia koe se tino fakamaoni. E se fia 'saga lele koe ki mafaufauga o tino, i te mea e se fia amanaia ne koe a tino mo olotou tulaga, kae e akoako eiloa ne koe a te mea tonu e uiga ki te loto o te Atua mō tino. Taku mai ake ki a matou, me e tapu i te motou Tulafono o fai lafoga ki te Tupu o Loma? E 'tau o lafo ne matou me ikai?” 15Kae ne matea ne Iesu te lotou togafiti, tela tali atu ei ki a latou penei: “Ai a e taumafai ei koutou o malei au? Aumai se tupe siliva, ke onoono au ki ei.” 16Tela, aumai ei ne latou a te tupe siliva kae fai atu, “E oi te ata mo te igoa tenei?” Ne tali mai latou, “E o te Tupu.” 17Tela, fai atu ei a Iesu, “Ko 'lei la, e 'tau mo koutou o fai te otou tiute ki te Malo, pela foki mo otou tiute ki te Atua.” Ne ofo masei latou i a ia.

Ko te Fesili e Uiga ki te Toetu

(Mata 22.23-33; Luka 20.27-40)

18E isi ne Satukaio ne o'mai ki a Iesu. Ko latou konei e fai mai me seai se toetu. 19#Teu 25.5 Ne fai atu latou ki a ia, “Te Faiakoga, ne tusi ne Mose a te tulafono tenei mo matou: ‘Kafai e mate se tino kae ola tena avaga, kae e se afu la a ia, e 'tau la te taina o te tagata tena o avaga mo te fafine tena, ko te mea ke maua ne tama'liki a laua mō tena taina tela ne mate.’ 20E isi se tautaina e tokofitu. Ne avaga a te tino matua, kae ne mate se afu. 21Ne avaga atu a te tokolua ki te fafine, kae ne mate foki se afu. Ne pena foki te tokotolu, 22ke oko foki eiloa ki te sua tokofa, ne a'vaga katoa ki ei a te tokofitu tautaina, kae ne 'mate katoa se afu. A te fafine ne mate fakamuli ifo. 23Kafai la ko toe'tu a tino 'mate i te aso o te toetu; ko oi la te avaga tonu a te fafine tenei, i te mea ne a'vaga katoa ki ei te tokofitu konei?”

24Ne tali atu a Iesu ki a latou, “Ko oko eiloa i te 'se o koutou! E iloa ne koutou te pogai me ikai? E mafua i te feitu tenei, me e seki iloa ne koutou a muna o te Tusi mo te 'mana o te Atua. 25Kafai e toe'tu a tino 'mate, e pau eiloa latou mo agelu i te lagi, ka ko tagata mo fafine e se a'vaga. 26E seki fai'tau eiloa koutou ki te vaega o tusi a Mose e uiga ki te lakau 'ka tela e fakasino ki tino 'mate ka toetu? E taku mai i te vaega tena i te Atua ne faipati ki a Mose, ‘Au ko te Atua o Apelaamo, te Atua o Isaako mo te Atua o Iakopo.’ 27Ko tona uiga a ia ko te Atua o tino ola, kae se se Atua mo tino 'mate. Ko oko eiloa i te 'se o koutou.”

Ko te Tulafono Sili

(Mata 22.34-40; Luka 10.25-28)

28E isi se faiakoga o te Tulafono ne i kona ne lagona ne ia a te faipatiga tena. Ko se atafai eiloa i te gali o te tali a Iesu ne lagona ne ia ne fai ki te kau Satukaio, tela vau ei ki mua o Iesu kae fai mai, “Tefea te Tulafono e tafasili i te taua i tulafono katoa?” 29#Teu 6.4,5 Ne tali atu a Iesu ki a ia, “Tenei te tulafono e tafasili i te taua, ‘Faka'logo mai e Isalaelu! A te Aliki te Atua, ko ia fua eiloa te Aliki.#12.29: A te Aliki te tou Atua ko ia tokotasi fua te Aliki; io me A te Aliki ko te tou Atua, ko te Aliki tokotasi. 30E 'tau mo koe o alofa ki te Aliki tou Atua mo tou loto katoa, mo tou agaga katoa, mo tou mafaufau katoa, mo tou malosi katoa. 31#Levi 19.18 A te lua o tulafono taua tenei: ‘Alofa ki tou tuakoi e pela eiloa mo koe ki a koe. ’E seai ake se isi tulafono e sili i tulafono konei e lua.” 32#Teu 4.35 Ne fai mai a te faiakoga o te Tulafono ki a Iesu, “Fakafetai te Faiakoga! E tonu au muna, me ko te Aliki fua te Atua kae seai ake se isi atua na ko ia eiloa e tokotasi. 33#Hose 6.6 E 'tau mo te tino o alofa ki te Atua mo tona loto katoa, mo tona mafaufau katoa, mo tona malosi katoa. E 'tau foki mo ia o alofa ki tona tuakoi e pela mo ia ki a ia ake eiloa. E sili te fakalogo ki tulafono konei e lua, i lo o te aumai o manu vaefa o 'sunu i fata faitaulaga ke fai mo taulaga 'sunu ki te Atua.” 34#Luka 10.25-28 Ne iloa ne Iesu te 'lei o tena tali, tela fai atu ei a ia ki a ia penei: “E se 'mao koe mai i te Malo o te Atua.” Mai tua o te mea nei, ko seai eiloa se tino e toe fia fesili ki a Iesu.

Ko te Fesili e Uiga ki te Keliso

(Mata 22.41-46; Luka 20.41-44)

35Ka koi akoako a Iesu i loto i te Fale Tapu, ne fesili atu a ia ki tino penei: “E pefea eiloa o fai mai a faiakoga o te Tulafono i te Keliso e tupu mai i te gafa o Tavita? Ne ulufia a Tavita ne te Agaga Tapu, ke faipati a ia penei:

36 # Sala 110.1 ‘Ne fai mai te Aliki ki toku Aliki:

Nofo i konei i toku feitu fakaatamai,

Ke oko ki te taimi e tuku ei ne au ou fili ke 'nofo mai lalo i ou vae. ’

37Ne fakaigoa a ia ne Tavita ko te ‘Aliki’; e pefea la o tupu mai te Keliso i te gafa o Tavita?”

Ko Fakatonu atu a Iesu ki Tino ke Fakaeteete Latou mai Faiakoga o te Tulafono

(Mata 23.1-36; Luka 20.45-47)

Ne faka'logo mo te fia'fia a te vaitino tokouke. 38I tena akoakoatuga ki a latou, ana muna: “Ke fakaeteete koutou mai faiakoga o te Tulafono, kola e ma'nako o olo saale mo olotou gatu 'loa, ka ke fakaaloalogina foki ne tino i maketi. 39Ko latou foki kona e masani o fakaavanoa a nofoga mo latou i fale tapuaki, mo koga 'lei i faiga 'kaiga. 40E 'fao foki ne latou a mea a fafine ko 'mate olotou avaga mai fale o fafine kona! E fia lavea foki latou i faiga o 'talo loa. Ka sili atu i te masei o te fakasalaga ka maua ne latou!”

Ko te Taulaga a te Fafine ko Mate Tena Avaga

41Ne sagasaga pili a Iesu ki te koga e teu ei a tupe o te Fale Tapu, kae onoono atu ki tino e lafo olotou tupe. E tokouke a tino mauko'loa ne lafo olotou tupe e uke mai i olotou koloa; 42kae e isi se fafine mativa ko mate tena avaga, ne vau kae lafo ana tupe apa e lua, kaati e tusa mo se sene e tasi te aofaki. 43Ne fakamaopoopo ne Iesu ona soko, kae fai atu ki a latou: “Au e fai atu ki a koutou, me e uke atu a tupe a te fafine tenei ne lafo ki te pusa tupe i lo latou. 44Me i nisi o latou ne lafo ne latou olotou tupe mai i te uke olotou mea; ka ko te fafine tenei, e tiga eiloa a tona mativa, ne lafo katoa ne ia ana mea, ne lafo atu katoa ana mea e ola ei a ia.”

Currently Selected:

MALEKO 12: Tusi Tapu

Highlight

Copy