MALEKO 11

Ko te Uluatuga Manumalo o Iesu ki Ielusalema

(Mata 21.1-11; Luka 19.28-40; Ioa 12.12-19)

1Ko pili latou ki Petefake mo Petania ko fakai 'tu pili ki Ielusalema, oko atu ei latou ki te Mauga o Olive, tela uga atu ei ne Iesu ona soko e tokolua ke 'mua i a ia, 2mo tena fakatonuga penei: “Olo ki te fa'kai tena i olua mua. Kafai e oko koulua ki kona, e maua atu ne koulua a te tamā asini e tukau, kae e seki sopo eiloa i ei se tino. ‘Tala ne koulua kae aumai ki konei. 3Kae kafai e isi se tino e fesili atu ki a koulua penei, ‘Ai a e fai ei ne koulua a te mea tena?’ Fai la ki ei penei. E manako ki ei te Aliki,#11.3: te Pule; io me i a ia te mea. e manako ki ei kae ka fakafoki fakavave mai ne ia ki a koe.” 4Ne olo a te tokolua soko kona, kae maua ne laua a te tamā asini i tafa o te auala e tukau ki te mataloa o te fale. Ka koi 'tala ne laua, 5e isi ne tino ne 'tu pili mai ne fesili atu penei ki a laua, “Ai a e 'tala ei ne koulua a te tamā asini tena?” 6Ne tali atu laua e pela eiloa mo muna a Iesu ne fai atu ki a laua, talia mai ei ne tino kona ke ave te asini. 7Ne aumai ne laua a te tamā asini ki a Iesu kae laku olotou gatu ki luga i te tua o te manu, sopo ake ei a Iesu ki luga. 8E tokouke a tino ne 'fola olotou gatu i te auala, ka ko nisi tino ne fati a kaula o lakau ne kati mai i fatoaga kae 'fola a lau i te auala. 9#Sala 118.25,26 A tino kola e olo i mua o Iesu mo tino foki kola e o'mai i ona tua ko kamata o ka'laga ake penei, “Ke vikia te Atua! Ke manuia a ia tela e vau i te igoa o te Aliki! 10Ke amutia foki a te malo tela ka oko mai o te tou tamana ko Tavita. Ke vikia te Atua!”

11Ko oko atu a Iesu ki Ielusalema fano ei ki loto i te Fale Tapu, kae kilokilo sale ki mea katoa. Kae ona ko te mea ko pili o po, toe olo ei mo ona soko e tinoagafulu mo te tokolua ki Petania.

Ko Fetu ne Iesu a te Mati

(Mata 21.18-19)

12I te sua aso i te lotou 'fokimaiga mai i Petania, ko fia kai a Iesu. 13Ne matea 'mao atu ne ia a te lakau ko te mati ko se atafaia i te uke ona lau mo te ola 'lei. Tela, fanatu ei a ia o onoono me e isi ne ana fuaga e maua; kae i tena okoatuga ki ei, ne lau fua e maua atu me seki oko eiloa ki te taimi e 'tau ei o fua. 14Ne fai atu a Iesu ki te mati: “Ka se toe fua eiloa koe!” Ne lagona ne ona soko ana pati kona.

Ko Fano a Iesu ki Loto i te Fale Tapu

(Mata 21.12-17; Luka 19.45-48; Ioa 2.13-22)

15I te lotou toe 'fokiga ki Ielusalema, ne fano a Iesu ki loto i te Fale Tapu, kae kamata o atuli ne ia ki tua a latou kola e fakatau atu mea i loto i te Fale Tapu. Ne 'fuli ne ia ki lalo a taipola a tino 'fulitupe mo nofoga o tino fakatau lupe, 16ne se talia foki ne ia so se tino ke fano mo se amoga i loto i te Fale Tapu. 17#Isa 56.7; Iele 7.11Tela, akoako atu ei ne ia a tino penei, “Muna a te Tusi, ‘Ka fakaigoa a toku fale se fale 'talo mō tino o fenua katoa.’ Kae nei ko oti ne 'fuli ne koutou ke fai mo ana o tino faomea!”

18Ne lagona ne faitaulaga sili mo faiakoga o te Tulafono ana muna konei, tela salasala ei ne latou se auala o tamate a Iesu. Ne ma'taku ki a ia i te mea ko ofo a te vaitino i ana akoakoga.

19I te okoga ki te afiafi, tuku ei ne Iesu mo ona soko a te fa'kai.

Ko te Akoakoga e Maua Mai i te Mati

(Mata 21.20-22)

20I te taeao pogipogi, ka koi sasale latou i te auala, ne matea ne latou te mati. Ko mate katoa eiloa e kamata mai i te taulu i ki lalo i ona aka. 21Masaua ake ei ne Petelu a te mea a Iesu ne fai ki te mati, tela fai mai ei a ia ki a Iesu, “Te Faiakoga, kiloke ko mate te mati ne fetu ne koe!” 22Ne tali atu a Iesu ki a latou: “Ke masaua a te mea nei! Kafai e isi sou fakatuanaki ki te Atua, 23#Mata 17.20; 1Koli 13.2e mafai ne koe o fai atu ki te mauga tenei, ‘Masiki mai i konei, ke pei 'tuki koe ki te tai.’ Kafai e se fakalotoloto lua koe, kae talitonu me i muna kola ne faipati ne koe e taunu eiloa, e fai eiloa pena mō koe. 24Ona ko te mea nei, ko fai atu ei au penei: Kafai e 'talo koutou o fakatagi atu mō so se mea, e 'tau o talitonu koutou me e maua eiloa ne koutou, kae ka tuku atu a mea katoa ki a koutou. 25#Mata 6.14,15 Kafai e 'tu koutou o 'talo, fakamagalo so se mea masei a koutou ne fai ki so se tino, ko te mea ke fakamagalo foki ne te otou Tamana i te lagi otou agasala.#11.25: I naai lomiga e fakaopoopo te faitau e 26: Kafai e se fakamagalo ne koutou a nisi tino, a te otou Tamana i te lagi ka se fakamagalo foki ne ia a otou agasala kola ko oti ne fai (onoono ki te Mata 6.15). 26(Kafai e se fakamagalo ne koutou a nisi tino, e se fakamagalo foki ne te otou Tamana i te lagi otou agasala.)”

Ko te Fesili e Uiga ki te Pule a Iesu

(Mata 21.23-27; Luka 20.1-8)

27Ko 'foki mai latou ki Ielusalema. Ka koi sasale a Iesu i loto i te Fale Tapu, kae o'mai ki a ia a faitaulaga sili, faiakoga o te Tulafono mo toeaina, 28kae fai mai ki ei: “E a ai te pule e fai ei ne koe a mea konei?” 29Ne tali atu a Iesu ki a latou: “Ke taku atu mua ne au te fesili tenei ki a koutou, kafai e tonu te tali a koutou, ko taku atu ei ne au me e a ai te pule e fai ei ne au a mea konei. 30Taku mai, e maifea te pule a Ioane o papatiso: mai te Atua io me e mai tino?” 31Ne kamata latou o fakakinau i a latou eiloa, olotou muna: “Se a te tou tali ka fai? Kafai e tali atu tatou, ‘Mai te Atua,’ ka fai mai a ia penei, ‘Ai a la e se talitonu ei koutou ki a Ioane?’ 32Kae kafai e fai ake tatou pela, ‘Mai tino.”’ Ko ma'taku latou i te mea ko talitonu a tino katoa i a Ioane se pelofeta. 33Tela, tali atu ei latou penei ki a Iesu, “E se iloa ne matou.” Muna a Iesu ki a latou, “E se taku atu foki ne au ki a koutou, me e a ai te pule e fai ei ne au a mea konei.”

Currently Selected:

MALEKO 11: Tusi Tapu

Highlight

Copy