MATAIO 17

Ko te 'Fuliga o te Foitino o Iesu

(Male 9.2-13; Luka 9.28-36)

1E tusa mo te ono o aso ko teka, ne olo ei a Iesu mo Petelu mo te tokolua tautaina ko Iakopo mo loane ki te mauga maluga, ka ko latou ake eiloa. 2Ne ma'fuli foliga o Iesu i olotou mua, ka ko ona mata ko malapulapu mai e pela mo te la; ona gatu foki ko 'kena pakipaki eiloa e pela mo se mainaga. 3Ne lavea atu foki ne latou a Mose mo Elia e fai'pati mo Iesu. 4Tela, fai mai ei a Petelu ki a Iesu, “Te Aliki, e 'lei me ko i konei tatou; kafai e loto koe ki ei, e faite ne au ne fale e tolu, e tasi mō koe, e tasi mō Mose, kae tasi mō Elia.” 5#Kene 22.2; Sala 2.7; Isa 42.1; Mata 3.17; 12.18; Male 1.11; Luka 3.22; Teu 18.15#2Pete 1.17,18 Ka koi faipati a ia, fanake ei te kaumana 'kena i luga o latou. Kae ne vau te leo mai te kaumana penei, “Ko taku Tama fagasele tenei, tela e fiafia au ki ei, ke faka'logo koutou ki a ia!” 6I te lagonaga ne soko te leo, ne to'tuli kae pu'nou ki te laukele, me ko oko eiloa i te lotou ma'taku. 7Tela, fanatu ei a Iesu kae fakapatele atu ki a latou, ana muna, “Tu ki luga kae sa ma'taku!” 8E 'kilo ake nei olotou mata, ko se matea atu ne latou se tino kae na ko Iesu eiloa.

9Tela, olo ifo ei latou ki lalo mai te mauga, kae ne fakatonu atu a Iesu ki a latou: “Mo a e taku atu ne koutou ki se tino a te mea ne lavea ne koutou, ke oko ki toku toetu mai ko te Tama a te Tagata mai te mate.” 10#Mala 4.5 Ne fesili mai ona soko ki a ia, olotou muna: “Ai a e taofi ei a faiakoga o te Tulafono, me e 'tau o vau muamua a Elia?” 11Ne tali atu a Iesu ki a latou, “E mua eiloa o vau a Elia o toe fakatonu a mea katoa. 12#Mata 11.14 Kae fai atu au ki a koutou i a Elia ko oti ne vau, kae e se iloa ne latou. Ne fai foki ne latou ki a ia a mea se 'lei kola ne loto latou ki ei. E pena foki te Tama a te Tagata, ka faka'fita ne latou.” 13Tela, maina ei ona soko i tena faipatiga e fakasino ki a Ioane te Papatiso.

Ko te Faka'leiga o te Tamaliki ne Pukea ne te Temoni

(Male 9.14-29; Luka 9.37-43a)

14I te 'fokimaiga a latou ki te vaitino, ne vau te tagata e tokotasi, kae totuli i mua o Iesu, 15ana muna: “Te Aliki, a koe ke alofa mai ki taku tamaliki tagata! E maua ne te pole, e valea foki tena ulu. E siga saale foki ki te afi mo te vai. 16Ne aumai ne au a ia ki ou soko, kae ne seki mafai ne latou o fai ke 'lei tena masaki.” 17Ne tali atu a Iesu, “Ko seai la se kautama se tali'tonu mo te fai mea 'se penei! Ko leva ne fakatasi tatou, kae seki iloa eiloa ne koutou? E a, e kufaki eiloa au penei ki otou faiga? Aumai a te tamaliki ki konei.” 18Ne fakatonu malosi atu ne Iesu te temoni, tela, fano ei ki tua te temoni mai te tamaliki. I kona foki eiloa, 'lei ei mo te tamaliki.

19Ne o'mai a soko o Iesu ki a ia, ko latou ake eiloa, fesili atu ei penei: “Ai a ne se mafai ei ne matou o afuli a te temoni ki tua?”

20 # Mata 21.21; Male 11.23; 1Koli 13.2 Ne tali atu a Iesu, “A te pogai, ko te se lava o te otou fakatuanaki. Ke masaua ne koutou te manatu tenei: kafai e pau te lasi o te otou fakatuanaki mo te fuaga o te sinapi, e mafai ne koutou o muna atu ki te mauga tenei, ‘Masiki mai konei ki ko’, ko te mea eiloa ko masiki. Me mafai ne koutou o fai so se mea i te fakatuanaki. 21Me ko te 'talo fua mo te fakalikiliki mō tapuakiga, e mafai ei o fai a vaega mea pena.”

Ko toe Faipati a Iesu e Uiga ki Tona Mate

(Male 9.30-32; Luka 9.43e-45)

22I te maopoopoga katoa o soko o Iesu i Kalilaia, ne fai atu a Iesu ki a latou, “A te Tama a te Tagata ka tuku atu ki te pule a tino. 23E tamate ne latou a ia, kae i te tolu o aso e toetu mai te mate.”Ne fanoa'noa lasi ona soko i te lotou lagonaga te pati tenei.

Ko te 'Togiga o Lafoga ki te Fale Tapu

24 # Eso 30.13; 38.26 I te okoatuga a Iesu mo ona soko ki Kapanaumi, ne olo a tino ao lafoga o te Fale Tapu ki a Petelu kae fesili atu, “E a, e 'togi ne te otou Faiakoga tena lafoga ki te Fale Tapu?” 25Muna a Petelu, “E 'togi.” I te vauga a Petelu ki te fale, ne tomua atu a Iesu o faipati atu ki a ia, ana muna: “Simona, se a tou manatu? Ko oi tino e 'togi a tiute mo lafoga ki tupu o te lalolagi nei? Ko tino tonu o te fenua, me ko fakaalofa kola e 'nofo i te fenua?” 26Muna a Petelu, “Ko tino fakaalofa.” Muna a Iesu ki a ia, “Ko 'lei, ko tena uiga ko se lafo a tino tonu o te fenua. 27A tatou e se ma'nako ke fai fili mai a tino ki a tatou. Fano ki te namo o pei tau kafilo ki lalo; ko te ika muamua e maua ne koe, puke o fakamaga tena gutu, kae e maua ne koe i ei se tupe siliva, e lava 'lei eiloa mo fai te ta lafoga ki te Fale Tapu. Kafai ko maua ne koe te tupe, ko fano ei koe o 'togi o ta lafoga.”

Currently Selected:

MATAIO 17: Tusi Tapu

Highlight

Copy