MATAIO 16

Ko te Fia Kilo ki se Vavega

(Male 8.11-13; Luka 12.54-56)

1 # Mata 12.38; Luka 11.16 Ne o'mai a nisi Falesaio mo Satukaio ki a Iesu o malei a ia, tela fesili mai ei latou ke fai ne ia se vavega mai te lagi. 2Ne tali atu a Iesu ki a latou, “Kafai e oko ki te afiafi ko muna mai koutou, ‘Ka 'lei te aso, me ko 'kula mai te lagi.’ 3I te taeao malu ko fai ake foki koutou, ‘Ka 'to te vaiua me i te lagi ko kula kae pouli.’ E mafai fua o fakatino te tau o te aso i te kilo atu ki te lagi,#16.3: Nisi lomiga e seai ne muna a Iesu konei e sae i te foaitau 2-3. kae e se iloa ne koutou o tau a fakailoga kola e fakasino tonu ki te vaitaimi tenei! 4#Mata 12.39; Luka 11.29 Ko seai la se kautama masei mo te se fakamaoni penei! E a, e fia iloa ne koutou se fakailoga mai i a au? E seai! A te fakailoga ka tuku atu ne au ki a koutou, ko te fakailoga o Iona te pelofeta.” Ne tuku ei ne ia a latou kae fano keatea.

Ko te Mea Faka'fete a Falesaio mo Satukaio

(Male 8.14-21)

5I te ologa o soko ki te sua feitu o te namo, ne puli i a latou o ave ne olotou falaoa. 6#Luka 12.1 Ne fai atu a Iesu ki a latou, “Ke fakaeteete eiloa koutou i te mea faka'fete a Falesaio mo Satukaio.” 7Fai'pati ei latou i a latou eiloa, olotou muna, “Ne fai ana pati kona i te mea e seai ni o'tou falaoa ne aumai.” 8Ne iloa ne Iesu olotou mafaufauga, fai atu ei ki a latou, “A koutou ko tino e fo'liki fakatuanaki! Ai a e mafaufau ei koutou pena? I te mea e seai ni falaoa i a koutou? 9#Mata 14.17-21 E seki maina eiloa koutou? E se masaua ne koutou a falaoa e lima ki te lima afe, mo tapola foki e fia ne 'fao ne koutou? 10#Mata 15.34-38 Io, me ko falaoa e fitu ki te fa afe, mo tapola foki e fia ne 'fao ne koutou? 11E se maina pefea koutou, i aku pati e se fakauiga ki falaoa? Ke fakaeteete koutou mai te mea faka'fete a Falesaio mo Satukaio!” 12Tela, fatoa maina i ei ona soko, me ne seki fai atu ki a latou ke fakaeteete mai te mea faka'fete falaoa, ka ko akoakoga a Falesaio mo Satukaio.

Ko te Mau a Petelu e Uiga ki a Iesu

(Male 8.27-30; Luka 9.18-21)

13Ne fanatu a Iesu ki te koga fenua i tafa o te fa'kai ko Kaisaleia Filipi, kae ne fesili atu ki ona soko, “Ni a pati a tino, me ko oi au te Tama a te Tagata?” 14#Mata 14.1,2; Male 6.14,15; Luka 9.7,8 Ne tali mai latou, “A nisi tino e fai mai me ko Ioane te Papatiso, ka ko nisi tino e fai mai me ko Elia, ka ko nisi e fai mai me ko Ielemia, io me ko se isi mai te kau pelofeta.” 15Ne fai atu a ia ki a latou, “Ka ko koutou, se a te otou mau me ko oi au?” 16#Ioa 6.68,69 Ne tali mai Simona Petelu, “A koe ko te Keliso, ko te Tama a te Atua ola.” 17Ne tali atu a Iesu ki a ia, “Amutia eiloa koe e Simona te tama a Iona, me e seai se tino ne fakaasi ne ia a te mea tenei ki a koe, ka ko toku Tamana eiloa i te lagi. 18Tenei la, au ko fai atu ki a koe, a koe ko Petelu. E fakatu ne au taku Ekalesia i luga o te papa tenei. E se mafai eiloa ne te malosi o te mate o fakatakavale. 19#Mata 18.18; Ioa 20.23 E tuku atu ne au ki a koe a ki o te Malo o te lagi: a te mea e fakatapu ne koe i te lalolagi, e fakatapu foki i te lagi. A te mea e 'tala ne koe i te lalolagi, e 'tala foki i te lagi.” 20Ne fakatonu malosi atu ei a Iesu ki ona soko, ke se taku atu ki se tino i a ia ko te Keliso.

Ko Faipati a Iesu e Uiga ki ona Puapuaga mo Tona Mate

(Male 8.31—9.1; Luka 9.22-27)

21Ne kamata mai eiloa i te taimi tena o faipati tonu atu a Iesu ki ona soko, me e 'tau eiloa mo ia o fano ki Ielusalema, kae e puapuaga foki a ia i mea e uke mai toeaina, mai faitaulaga sili, mo faiakoga o te Tulafono. E tuku atu foki ke tamate, ka ko te tolu o aso e toetu mai. 22Ka ko Petelu ne kalaga atu ki a Iesu, “Te Aliki, ke alofa atu a te Atua ki a koe, ke mo a e oko ki a koe a mea kona!” 23Ne mafuli ake a Iesu, kae fai atu ki a Petelu,“Satani, fano keatea mai ia au. A toku ala ko 'pono ne koe, ka ko ou mafaufauga, e se ne mafaufauga faka-te-Atua, kae ne mafaufauga faka-te-foitino."

24 # Mata 10.38; Luka 14.27 Tela, fai atu ei a Iesu ki ona soko, “So se tino e tautali mai i a au, ke se mafaufau ki a ia eiloa, kae ke amo tena sataulo, ko tautali mai ei i a au. 25#Mata 10.39; Luka 17.33; Ioa 12.25 Ko te tino e fia fakasaosao ne ia a tena ola mo ia ake eiloa, e se maua ne ia, ka ko te tino e fakamaumau ne ia a tena ola ona ko au, e maua ne ia. 26Kae se a te aoga ki te tino manafai e maua ne ia te lalolagi katoa, kae tela la e maumau fua i ei a tena ola? Io, me se a te mea e tuku ne se tino e sui ei a tena ola? 27#Mata 25.31; Sala 62.12; Loma 2.6 A te Tama a te Tagata e vau mo ana agelu i te 'malu o tena Tamana, kae e taui atu ne ia ki tino takitokotasi a tena mea tela ne fai. 28Au e muna tonu atu ki a koutou, me i nisi o koutou konei e 'tu mai nei, ka koi tuai o 'mate latou, e matea muamua ne latou au te Tama a te Tagata ko vau i tena malo.”

Currently Selected:

MATAIO 16: Tusi Tapu

Highlight

Copy