MATAIO 10

Ko Apositolo e Tinoagafulu mo te Tokolua

(Male 3.13-19; Luka 6.12-16)

1Ne kalaga atu a Iesu ki ona soko e tinoagafulu mo te tokolua, ke tuku atu te mana ki a latou o afuli keatea agaga ma'sei, kae fai foki ke 'lei a masaki. 2Konei a igoa o te tinoagafulu mo te tokolua apositolo: ko Simona tela e igoa foki ki a Petelu mo tena taina ko Anitelea; ko Iakopo mo tena taina ko Ioane, ko tama a Sepetaio; 3ko Filipo mo Patolomaio; ko Toma mo Mataio te ao lafoga; ko Iakopo te tama a Alefaio, mo Tataio; 4ko Simona te Kanana, mo Iuta te Isikaliota tela ne fakalata ne ia a Iesu.

Ko te Galuega a te Tinoagafulu mo te Tokolua

(Male 6.7-13; Luka 9.1-6)

5Ne uga atu ne Iesu a te tinoagafulu mo te tokolua tagata konei mo te fakatonuga tenei: “Sa olo ki se fenua fakaatea io me se fa'kai o Samalia, 6kae olo ki mamoe ne 'galo o te fanauga a Isalaelu. 7Olo o folafola atu, ‘I te Malo o te lagi ko pili mai!’ 8Fai ke 'lei a tino ma'saki, faka'tu a tino 'mate, faka'lei a lepela, kae afuli keatea temoni. Ne maua ne koutou a te mea tena e aunoa mo se 'togi, tela la, fakaaoga atu foki ki tino e aunoa mo se taui. 9Sa ave ne koutou ne aulo, siliva, me ne tupe i otou taga; 10sa ave foki ne taga i te malaga, io me ne tilima e lua, taka io me se tokotoko. Me e 'tau eiloa o avatu ki te tino galue se mea e ola ei a ia.

11“Kafai e oko koutou ki se fa'kai lasi io me se fa'kai foliki, fesili atu me isi se tino e loto malie o talia koutou, kae 'nofo foki koutou i ei ke oko ki te taimi e tiakina ei ne koutou a te koga tena. 12Kafai e ulu atu koutou ki se fale, fai atu ki tino i ei: ‘Ke manuia koutou.’ 13Kafai e talia koutou ne tino i te fale tena, fakamanuia atu ki a latou; kae kafai e se talia koutou ne latou, fakafoki mai te otou fakamanuiaga. 14#Galu 13.51 Kafai e isi ne kaiga mo ne fa'kai 'lasi e se talia ne latou koutou, io me se fia faka'logo ki a koutou, tiakina te koga tena, kae tuetue atu a pefu mai otou vae. 15#Mata 11.24; Kene 19.24-28 #Luka 10.4-12 Kae ke manatua ne koutou a te mea tenei! Kafai e oko ki te Aso Fakamasino, e tai sili atu te alofa o te Atua ki tino o Sotoma mo Komolo i lo tino o te fa'kai tena!”

Ko Fakasauaga ka Oko Mai

(Male 13.9-13; Luka 21.12-17)

16 # Luka 10.3 “Faka'logo mai! Ka uga atu ne au koutou e pela mo ne mamoe i va o lafu luko fe'kai. E 'tau koutou o mata'poto e pela mo ne gata, kae ke filemu e pela mo ne lupe. 17#Male 13.9-11; Luka 12.11,12; 21.12-15#Male 13.9-11; Luka 12.11,12; 21.12-15 Ke matapula'pula koutou, me e isi ne tino ka puke ne latou koutou o 'moli ki fono; kae kini foki koutou i loto i olotou fale tapuaki. 18Ka aumai koutou o fakamasino i mua o kovana mo tupu ona ko au, ko te mea ke taku atu ki a latou mo fenua fakaatea a te Tala 'Lei. 19Kafai ko aumai koutou ne latou o fakamasino, sa manava'se, me ne a otou pati ka fai atu, io me ka faipati atu foki pefea ne koutou; kafai e oko mai a te taimi tena, ka fakaasi atu ki a koutou a pati e 'tau o fai atu ne koutou. 20Me ko muna kola ka tavili atu ne koutou, e se ne muna a koutou, ka ko muna mai te Agaga o te Tamana o koutou, tela e faipati i loto i a koutou.

21 # Male 13.12; Luka 21.16 “Ka tuku atu ne tagata olotou taina tonu ke tamate, e pena foki a tamana ki olotou fanau; ko fanau foki ka 'teke ki olotou matua kae tamate foki. 22#Mata 24.9; Male 13.13; Luka 21.17; Mata 24.13; Male 13.13 Ka inosia koutou ne tino katoa ona ko au. Ka ko te tino tela e loto mau ke oko eiloa ki te ikuga, e ola a ia. 23Kafai e fakasauagina koutou i se fa'kai 'tele koutou ki te sua fa'kai. Kae fai atu au ki a koutou, ka koi tuai o palele te otou galuega tena i fa'kai katoa o Isalaelu, ka ko oko mai te Tama a te Tagata ko au tena.

24 # Luka 6.40; Ioa 13.16; 15.20 “E se sili a te tama akoga i tena faiakoga; e se sili foki a te pologa i tena pule. 25#Mata 9.34; 12.24; Male 3.22; Luka 11.15 Tela la, kafai e faifai 'lei te tama akoga e mafai o pau mo tena faiakoga; e pena foki te pologa ki tena pule. Kafai e taku ne latou te pule o te kaiga ko Pelesepulo, ka taku foki ne latou a tino o te kaiga ki ne igoa e ma'sei atu!”

Ko te Tino e 'Tau o Ma'taku ki ei

(Luka 12.2-7)

26 # Male 4.22; Luka 8.17 “Sa ma'taku koutou ki tino. So se mea e 'tao ke galo, e fakaasi, so se mea foki e 'funa, e fakailoa atu. 27Ko mea e taku atu ne au ki a koutou i te pouliga, e 'tau mo koutou o toe taku atu i te mainaga, a mea foki ne lagona ne koutou i a koutou eiloa, e 'tau o taku atu ki tino i luga o tuafale. 28Sa ma'taku ki a latou kola e tamate ne latou te foitino, me se mafai ne latou o tamate te agaga; ka ke ma'taku koutou ki te Atua, me ko ia e mafai ne ia o tamate te foitino mo te agaga i Kena. 29E mafai ne koutou o 'togi mai se avā manu eva fo'liki ki se sene; e seai foki se manu i a latou e to ki te one e se iloa ne te Tamana. 30E pena foki koutou, e faitaugina katoa otou laulu. 31Tela la, sa manava'se koutou; i te mea e sili atu eiloa koutou i manu eva kona!”

Ko te Takutonu mo te Fakafiti o Keliso ne Tino

(Luka 12.8-9)

32“So se tino e takutaku ne ia a au i mua o tino, e takutaku foki ne au a ia i mua o toku Tamana i te lagi. 33#2Timo 2.12 So se tino e fakafiti ne ia a au i mua o tino, e fakafiti foki ne au a ia i mua o toku Tamana i te lagi.”

E se ko te Filemu, ka ko te Pelu

(Luka 12.51-53; 14.26-27)

34“Sa manatu ake koutou i a au ne vau o aumai te filemu ki te lalolagi; ikai, au ne seki vau o aumai te filemu ka ko te pelu, tela ko te 'nofo mavaevae. 35#Mika 7.6 Au ne vau o fakamasei a tama tagata mo olotou tamana, a tama fafine mo olotou matua. Ko avaga a tama tagata mo matua a olotou avaga; 36a fili o te tino ko tino eiloa o tena kaiga tonu.

37“So se tino e sili tena alofa ki tena tamana io me ko tena matua i lo au, e se aoga mō au; so se tino foki e sili tena alofa ki tena tama tagata io me ko tena tama fafine i lo au, e se aoga foki mō au. 38#Mata 16.24; Male 8.34; Luka 9.23 So se tino e se amo tena Sataulo kae se tautali mai foki i a au, e se aoga mō au. 39#Mata 16.25; Male 8.35; Luka 9.24; 17.33; Ioa 12.25 So se tino e atafai a tena ola, e se maua ne ia; ka ko te tino tela e se atafai ki tena ola ona ko au, e maua ne ia.”

Ko te Taui

(Male 9.41)

40 # Luka 10.16; Ioa 13.20; Male 9.37; Luka 9.48 “So se tino e talia ne ia a koutou, e talia foki ne ia au, e talia foki ne ia a te Atua tela ne uga mai ne ia a au. 41So se tino e talia ne ia a te pelofeta a te Atua, me i a ia se tino o te Atua; e maua ne ia te taui fakapelofeta. So se tino e talia ne ia te tino amiotonu i te igoa o te tino amiotonu, e maua ne ia te taui o te tino amiotonu. 42Kae manatua te mea nei! So se tino e avatu se ipu vai 'moko ke inu i ei so se soko e se taulia i oku soko, i te mea se soko eiloa o oku, e maua eiloa ne ia tena taui.”

Currently Selected:

MATAIO 10: Tusi Tapu

Highlight

Copy