MATAIO 11

Ko Avefekau mai i a Ioane te Papatiso

(Luka 7.18-35)

1I te palelega o fakatonuga konei ne fai atu ne Iesu ki ona soko e tinoagafulu mo te tokolua, ne tiakina ne ia a te koga tena kae fanatu o akoako atu, kae folafola atu i fa'kai pili mai.

2I te taimi ne nofo ei a Ioane te papatiso i te fale puipui, ne lagona ne ia a te tala e uiga ki galuega a Keliso; uga atu ei ne ia a nisi ona soko ki a Iesu. 3Ne fesili mai a soko o Ioane ki a Iesu penei: “Taku mai ki a matou me ko koe tela ne fai mai ei a Ioane me ka vau, io me 'tau o faka'tali matou ki se isi tino?” 4Ne tali atu a Iesu penei: “'Foki o fai atu ki a Ioane a mea ne lagona kae lavea ne koutou: 5#Isa 35.5,6; Isa 61.1 i tino 'kivi ko ile, tino 'pili ko sasale, ko tino lepela ko 'lei,#11.5:Ko oti ne fai ke 'ma: onoono ki te 8.2. ko tino 'tuli ko 'logo, ko tino ne 'mate ko toe'tu; ko folafolagina atu foki a te Tala 'Lei ki tino ma'tiva. 6Ke amutia a te tino tela e se loto fakalotolotolua ki a au!”

7I te 'fokiatuga o soko o Ioane, ne faipati atu a Iesu ki te vaitino e uiga mō Ioane: “I te otou ologa ki a Ioane i te vao, se a te mea ne lavea ne koutou? Se laumouku e gasuesue i te matagi? 8Se a te mea ne olo koutou o onoono i ei? Se tagata e pei ki gatu gali? A te tino e pei ki gatu pena e nofo i fale o tupu! 9Taku mai ki a au me se a te mea ne fakamoemoe koutou ki ei ke lavea ne koutou? Se pelofeta? E tonu, au e fai atu ki a koutou, e sili atu a ia i se pelofeta. 10#Mala 3.1 Me i a Ioane se tino ne molimau mai ei te Tusi: ‘Kiloke, e uga atu ne au taku avefekau ke mua i a koe, tela ka fakatoka ne ia a tou auala.’ 11E tonu, au e fai atu ki a koutou, e seai se tama ne fanau ne se fafine e sili atu ia Ioane te Papatiso, ka ko te tino tafa se taulia i te Malo o te lagi, e sili atu ia Ioane. 12#Luka 16.16 Kae mai te taimi ne talai atu ei ne Ioane tena talaiga ke oko mai ki te aso nei, a te Malo o te lagi ne logofiofio i puapuaga,#11.12: ko tigaina i fakasauaga; io me ne vau loa mo fakasauaga. mo tino saua foki ne taumafai o fakagata te Malo o te lagi. 13Me i pelofeta katoa mo te Tulafono a Mose ke oko mai eiloa ki taimi o Ioane, ne faipati katoa e uiga ki te Malo o te lagi. 14#Mala 4.5; Mata 17.10-13; Male 9.11-13 Kae kafai e fia talitonu koutou ki te talaiga, me ko ia ko te Elia tela ka oko mai; ko ia eiloa tena. 15Ko te tino e lagona ne ia aku muna, fai la.

16“Nei la, se a te mea ka fakatusa ne au ki ei a kautama o aso nei? Kiloke, e pau latou mo ne tamaliki e saga'saga i te malae, kae ka'laga atu te potukau e tasi ki te sua potukau penei, 17‘Ne fakatagi atu ne matou a pese o fakaipoipoga mō koutou, ka ko koutou e se 'saka! Ne usu atu ne matou a pese o tanuga o tino 'mate, ka ko koutou e se 'tagi. E se mafai eiloa o malie otou loto ki mea ne fai atu ne matou.’ 18Ne vau a Ioane, ne fakalikiliki mō tapuakiga, kae se inu foki i uaina, kae muna mai koutou pela: ‘A ia se tagata e fakavalevale!’ 19Ia, ne vau foki au, ko te Tama a te Tagata, ne kai kae inu, kae toe muna mai foki koutou pela, ‘Kilo mai ki te tagata tenei! A ia se tino gafula kae inu kava, se taugasoa o tino ao lafoga mo tino agasala!’ A te poto o te Atua e fakaasi tonu mai i ana galuega.”

Ko Fa'kai se Talitonu

(Luka 10.13-15)

20A Iesu ne kamata o polopoloki 'mafa ne ia fa'kai kola ne lasi ki ei te faiga o ana vavega, me i tino e seki salamo. 21#Isa 23.1-18; Eseki 26.1—28.26; Ioelu 3.4-8; Amo 1.9,10; Saka 9.2-4 “Kalofa eiloa ia koe e Koasini! Kalofa eiloa ia koe e Petesaita! Moi fai ne fai i Tulo mo Saitonu a vavega konei ne fai ia koutou, penei ko leva eiloa a tino i kona ne pei ki gatu masae'sae, kae asu foki mo lefu ki luga i olotou ulu, e fakailoa atu i ei i a latou ko salamo. 22Kae fai atu au ki a koutou, me kafai e oko mai te Aso Fakamasino, e sili atu te alofa o te Atua ki Tulo mo Saitonu i lo koutou! 23#Isa 14.13-15; Kene 19.24-28 Ka ko koe e Kapanaumi, ne manako koe ke siki ake koe ki luga i te lagi! Kae nei, ka pei 'kini koe ki lalo i Seoli! Moi fai pela ne fai i Sotoma a vavega konei ne fai ia koutou, penei la e tumau eiloa a Sotoma ke oko mai ki te aso nei! 24#Mata 10.15; Luka 10.12 Kae fai atu au ki a koutou, me kafai e oko mai te Aso Fakamasino, e sili atu te alofa o te Atua ki a Sotoma i lo koutou!”

Ko Au e Malo'lo ei Koutou

(Luka 10.21-22)

25I te taimi tena, ne 'talo atu a Iesu ki tena Tamana penei: “Toku Tamana, te Aliki o te lagi mo te lalolagi! Au e fakafetai atu ki a koe me ko oti ne fakaasi ne koe ki tino e seki akoakogina a mea kola ne 'funa ne koe mai tino 'poto mo tino ne akoakogina. 26Tamana, e tonu ne fai ne koe a te mea tenei mai tau filifiliga, ki te mea ne loto koe ki ei.

27 # Ioa 3.35; Ioa 1.18; 10.15 “Ko oti ne tuku mai ki a au a mea katoa ne toku Tamana; e seai se tino e iloa ne ia te Tama, na ko te Tamana, e seai foki se tino e iloa ne ia te Tamana, na ko te Tama, mo tino foki kola e loto te Tama o fakaasi a ia ki a latou.

28O mai ki a au koutou katoa kola ko fita ite mafa otou amoga, kae ka avatu ne au ki a koutou a te malologa.

29 # Iele 6.16 Ke amo ne koutou taku amoga, kae fakaakoako mai ki a au, me i a au e filemu kae loto malalo; e maua foki i ei ne koutou a te tokaga malie otou agaga. 30Me amogofie taku amoga, kae māmā foki.”

Currently Selected:

MATAIO 11: Tusi Tapu

Highlight

Copy