MALAKI 3
3
1 #
Mata 11.10; Male 1.2; Luka 1.76; 7.27 Ne tali mai te Aliki Tafasili i te Malosi penei, “Ka uga atu ne au a taku ave fekau ke fakatoka te auala mō oku. Ka oti ko te mea eiloa ko vau fakavave a au, te Aliki, tela e salasala koe ki ei, i tena Faletapu. A te avefekau tela ne fia onoono koe ki ei ka vau o folafola a taku feagaiga.”
2 #
Ioelu 2.11; Faka 6.17 Ka ko oi te tino e mafai o ola i te aso e vau ei a ia? Ko oi te tino e mafai o sao mafai e vau a ia? Ka pela a ia me se sopu malosi, pela se afi tela e faka'ma ki ei a fiti. 3Ka vau a ia o fakamasino e pela me se tino e faka'ma siliva. E pela mo te tino galue i fiti e faka'ma ne ia a siliva mo aulo, e pena foki a te ave fekau a te Aliki o faka'ma a faitaulaga ko te mea ke aumai ne latou ki te Aliki a taulaga 'lei. 4Tena la, a taulaga kola ka aumai ne tino Iuta mo Ielusalema ki te Aliki ka fakafiafia ki a ia, e pela eiloa mo aso mua.
5Muna a te Aliki Tafasili i te Malosi, “Au ka vau o fakamasino koutou; ka fakamasino ne au a latou kola e fai vailakau, tino mulilua, tino molimau 'pelo, tino kola e fakaloiloi a tino e galue i a latou ki togi se tonu, e pela foki tino kola e fakapuapuaga ne latou a fafine ko mate olotou avaga, tamaliki seai ne matua mo tino fakaatea — tino katoa kola e se āva mai ki a au.
Ko te Togiga o te Tasi Vae Sefulu
6“Au ko te Aliki, kae e se mafai eiloa au o mafuli. Tela la, koutou te gafa o Iakopo e seki galo katoatoa. 7A koutou, pela mo otou tupuga, ko oti ne fulitua ki aku tulafono kae se tausi ki ei. Toe 'foki mai ki a au, kae ka toe fuli atu au ki a koutou. Ne fesili aka koutou penei, ‘Se a te mea e tau o fai ne matou ke toe foki atu matou ki a koe?’ 8Au e fesili atu, me se mea 'lei ma fakaloiloi ne se tino a te Atua? Ikai, e se lei, kae tela la, koutou e o'mai o fakaloiloi au. Ne fesili koutou penei, ‘E fakaloiloi pefea ne matou a koe?’ I te faiga o otou taulaga mo te aumaiga o taki tasi vae sefulu a koutou. 9A te malaia e i luga i a koutou katoa, me i te fenua katoa ko fakaloiloi ne latou a au. 10#Levi 27.30; Nume 18.21-24; Teu 12.6; 14.22-29; Nee 13.12 Aumai te katoaga o te taki tasi vae sefulu a koutou ki te Faletapu, ko te mea ke uke a mea'kai i kona. Tofotofo mai a au, kae ka lavea ne koutou me ka tala ne au a fakamalama o te lagi kae ligi ifo a vaega mea 'lei katoa. 11Ka se tuku atu ne au a manu fo'niki ke fakamasei otou lakau kaina, ka ko otou vine ka mafa eiloa i fuagavine. 12Tena la, ka taku koutou ne tino fiafia ne tino o malo katoa, me i te otou fenua ko fai mo koga 'lei i te nofo.”
Ko te Feagaiga o te Alofa 'Nau o te Atua
13Muna a te Aliki, “Ko oti ne fai ne koutou a muna se 'lei e uiga ki a au. Ne fesili aka koutou penei, ‘Ne a motou pati ne fai e uiga ki a koe?’ 14Koutou ne faipati pela, ‘E seai se aoga o tavini atu ki te Atua. Se a te aoga e fai ei ne tatou a mea e fai mai ei a Ia; se a foki te aoga e taumafai ei tatou o fakailoa atu ki te Aliki Malosi i a tatou ko sala'mo i tou mea 'se ne fai? 15I te motou kilokilo atu, ko tino fakamatamata kola e fia'fia. A tino ma'sei e se gata fua i te maumea, kae e tofotofo foki latou ki te loto kufaki o te Atua kae ne sao latou mai i ei.”’
16Ka ko latou kola e ma'taku ki te Aliki ne sautala i a latou eiloa, ka ko te Aliki ne lagona ne ia olotou pati. E isi se tusi i ona mua tela e tusi i ei a igoa o tino kola e ma'taku kae āva ki te Aliki. 17Muna a te Aliki Tafasili i te Malosi penei, “Ka fai latou mo oku tino. I te aso tela ka fai ei ne au te mea tena, ka fai latou mo oku tino tonu eiloa. Au ka alofa ki a latou e pela me se tagata e alofa ki tena tama tagata tela e fakalogo ki a ia. 18Ka toe kilokilo a mata o oku tino ki te mea ka tupu ki tino amio tonu mo te mea ka tupu ki tino ma'sei; pela foki ki te tino e tavini mai ki a au mo te tino e se fia tavini mai ki a au.”
Currently Selected:
MALAKI 3: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
