MALAKI 2
2
1Muna a te Aliki Tafasili i te Malosi ki faitaulaga, “A te fakatonuga tenei mō koutou: 2E 'tau mo koutou o ava mai ki a au i mea a koutou e fai. Kafai e se faka'logo koutou ki aku muna, ka fakamalaia ne au a koutou. Ka fakamalaia ne au a mea kola e maua ne koutou mō tausi otou olaga. A te tonuga, ko leva eiloa ne fakamalaia ne au a mea kona, me i a koutou seki saga tonu o tausi aku fakatonuga. 3Ka fakasala ne au otou tamaliki, kae nani otou mata ki fekau o manu vaefa kola e ofo mai ne koutou — kae ave koutou ki te fakatūga fekau. 4#Nume 3.11-13 Ka iloa ei ne koutou me ne avatu ne au a te fakatonuga tenei, ko te mea ko taku feagaiga mo faitaulaga, kola mai te gafa o Levi, ke tumau.
5 #
Nume 25.12
“I taku feagaiga, ne tauto au ke maua ne latou te ola mo te manuia ko te mea ke fakaaloalo mai ki a au. I aso kona, a latou ne ma'taku kae fakaaloalo ki a au. 6Ne akoako atu ne latou te mea tonu kae se ko te mea 'se. Ne faka'logo latou ki a au; ne fai ne latou te mea tonu, se gata i ei kae fesoasoani foki latou ki nisi tino ke fakagata olotou amioga ma'sei. 7Ko te tiute o faitaulaga o akoako atu ke iloa tonu ne tino a te Atua. E tau mo tino o olo ki ei o tauloto toku loto, me i a latou ko ave fekau a te Aliki Tafasili i te Malosi.
8“Kae nei, koutou faitaulaga ko kalo keatea mai te auala tonu. A otou akoakoga ko mafua mai i ei te fai amioga ma'sei o tino e tokouke. Ko oti ne ofa ne koutou taku feagaiga ne fai mo koutou. 9Tela la, ka fai ne au a tino Isalaelu ke takalialia ki a koutou me i a koutou e seki faka'logo ki aku muna, kae i te taimi foki e akoako ei ne koutou oku tino, ne seki faka'pau ne koutou a tino katoa.”
Ko te se Fakamaoni o Tino ki te Atua
10E a, e se tasi te Tamana o tatou? E a, e seki faite tatou ne te Atua e tokotasi? Ai a la e ofa ei ne tatou 'tou feagaiga, sua tino ki sua tino, kae ai a foki e ofa ei ne tatou te feagaiga a te Atua tela ne fai mo 'tou tupuga? 11A tino o Iuta ko oti ne ofa ne latou te lotou feagaiga ki te Atua kae fai se mea mataga i luga i Ielusalema e pela foki i luga i te fenua katoa. Ko oti ne soli ne latou te Faletapu tela e fiafia ki ei te Aliki. A tagata ko avaga ki fafine kola e tapuaki ki atua fakaatea. 12A te Aliki ke ave keatea ne ia mai te fakapotopotoga o tino Isalaelu, so se tino e fai ne ia te mea tenei, kae ke mo a e toe kau i taulaga a te motou fenua e ave ki te Aliki Tafasili i te Malosi.
13Tenei te sua mea e fai ne koutou. Ko faka'fonu ne koutou te fata-fai-taulaga a te Aliki ki loimata, o tagi kae ka'laga me ko se talia ne ia a taulaga a koutou e ofo ki a ia. 14Fesili aka me ai a ko se toe talia ne ia. Ko te mea ko iloa ne ia me ko oti ne ofa ne koe tau feagaiga ki te fafine tela ne avaga koe ki ei i te taimi koi tamataene ei koe. A ia ko tou soa, ka ko oti ne ofa ne koe tau feagaiga ki a ia, ka ko koe ko oti ne tauto ki te Atua me i a koe e fakamaoni eiloa ki te fafine tena. 15E a, e seki fai ne te Atua a koulua ke tasi i te foitino mo te agaga? Ai a ne fai ei ne ia te mea tena? Ko te mea ke maua ne koe ne tamaliki kola ko tino tonu o te Atua. Tela la, onoono faka'lei ke mo a se tino i a koutou e ofa tena feagaiga ki tena avaga. 16Muna a te Aliki, te Atua o Isalaelu, “Au e se fiafia ki te avaga mavae. Au e se fiafia manafai e fai ne se tino i a koutou se vaegā mea masei penei ki tena avaga. Masaua ke mo a e ofa ne koe tau tautoga ki tau avaga.”
A te Aso Fakamasino ko Pili Mai
17Ko oti ne fakafi'ta ne koutou te Aliki ki otou pati. Kae ne fesili aka koutou penei, “I te feitu fea ne fakafi'ta ei ne matou te Aliki?” E fakafi'ta ne koutou ki otou pati penei, “A te Aliki Tafasili i te Malosi e manatu pela i tino amio ma'sei katoa e 'lei; a te tonuga, e fiafia a ia ki a latou.” E fesili foki koutou penei, “Tefea te Atua tela e tau o fai te mea tonu?”
Currently Selected:
MALAKI 2: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
