Maɛ 16

Jusu-ae wlǔh-ɛ

(Matio 28.1-8; Luu 24.1-12; Chɔɔn 20.1-10)

1Juu-a wlè-weɛ̍ sì-aɛ, wɛ̀ Mɛle Makalin ke, Chiin de̍ Mɛle ke Salomi tɛ̀n nɔ̌ chlǎn kaɛn kaɛn u̍h iě i̍h Jusu-a kǔ i̍ tli̍ la̍ gba̍. 2Wɛ̀ u̍h tlùìn u̍h mu̍ dě ɔ̍ gbàlɔ̍ we̍ Sɔnde̍ bla, nɛ̀ jlǔh-a ji̍ kwlǎ wlǔh la̍. 3U̍h-a mu̍-a la̍-ɛ, iě u̍h la̍a̍, “Nyɔ̍ bo ɔ̀ mu̍ sɔɔ̌ gbo̍ nɛ-a dǒ gbàlɔ̍ biě wɔ̍i̍n-ɛ kli̍bo ɔ̀ iě àɔ̀ nyǐ ɛ?” 4Jɛ u̍h iě-ae gbɛ̀n-ɛ, nɛ̀ sɔɔ̌ gbo̍ klaa laa̍ ɛ̍ kli̍bo-ɛ, ɛ̍ sɔ dǒ biě-a chɛ̀ wɔ̍i̍n wɛ̀. 5Wɛ̀ u̍h pa̍ deě, dě u̍h jě-e jǔgbèlà due nɛ̀ ɔ̍ tè i̍ dǒ ɛ̍ di̍na̍ fɔ̌ we̍. Ɔ̍ pa̍ plɛ̀i̍ plǔ-u. Sɔ ɛ̍ tlɛ̍-ɛ u̍h-a ku̍.

6Wɛ̀ ɔ̍ la̍a̍ dě u̍h we̍, “Mɔ̀-a ku̍ bɔ̌ tlɛ̍-ɛ, ǐn juo ɛ̍-ɛ Jusu ɔ̀ sɔ-a dǒ Naaslɔɛ ɔ̀ u̍h kɔ̍-a dǒ gbàɛ̍ kɛ̍n i̍ tu̍ wlì-ɛ, ɔ̍-ɔ bo mɔ̀-a pɔ̀n i̍. Jɛ ɔ̍ wlǔh-e wɛ̀, ɔ̍ se̍ da̍a nɛ dɛ. Mɔ̀ ji̍ tà u̍h pɛ̌n-ɛa ɔ̍ i̍ de-ɛ jě. 7Ɛ̍ tìh-ɛ, mɔ̀ mu̍, mɔ̀ iě ɔ̍ kòà Pitɛ tè-ae di̍i̍-ɛ wlùh sèàɛ̍, ɔ̍ mu̍ la̍ u̍h jǔ dě Kaladii fɔɔ. Dě u̍h-a mu̍ ɔ̍ jě-e, kǎ ɔ̍ dǎ se̍e̍ dě u̍h we̍.”

8Wɛ̀ u̍h sǐ sɔ̀n, u̍h sà ple̍-ɛ dǒ gbàlɔ̍ biě wɔ̍i̍n. Nɛ̀ dɛ̍-a wa̍ u̍h we̍, iě u̍h-a ku̍-a tlɛ̍. Nɛ̀ u̍h-u sèàɛ̍ wɔ̍i̍n dě nyɔ̍-o-nyɔ̍ we̍, dɛ̍nu̍ɛ, faɔn-a nu̍ u̍h-i.

Jusu wlǔh-i Mɛle Makalin i̍

(Matio 28.9-10; Chɔɔn 20.11-18)

[ 9Ti̍ Jusu wlǔh-ae Sɔnde̍-a klàɛ̍we̍ gbàìn-ɛ, Mɛle Makalin ɔ̍ sà-a jeědih mɛ̀sɔɔ̌n de̍e̍-ɛ, ɔ̍-ɔ bo ɔ̀ nu̍ sàǐtòò nyɔ̍ ɔ̍ wlǔh-i i̍. 10Ùh ke ɔ̍ na-aɛ, u̍h nɛ dǒ sùàɛ̀n pa̍ la̍ u̍h-a fìn, wɛ̀ Mɛle mu̍ iě ɔ̍ sèàɛ̍ u̍h wlùh. 11Nyɔ̍ laa̍ u̍h wɔ̌n i̍h ka ɔ̍ nɛ-a kmɔ̌ wɛ̀ Mɛle jě-a ɔ̍-ɛ, jɛ u̍h se̍ ɛ̍ tìh chɛ̀ po̍.

Jusu wlǔh-i ɔ̍ kòà sɔɔ̌n i̍

(Luu 24.13-35)

12Ɛ̀ la ɛ̍ wɔ̀-a nɛ-ɛ, wɛ̀ Jusu wlǔh-i ɔ̍ kòà sɔɔ̌n kɛ̍n dě tu̍ dɛɛ di̍i̍, nɛ̀ u̍h-a mu̍ dě u̍h blǐ fɔɔ. 13Wɛ̀ u̍h mu̍ de̍ iě u̍h sèàɛ̍ u̍h ba̍ᵻ sie-a dǒ de̍-ɛ wlùh. Jɛ u̍h se̍ u̍h-a wlu̍ tìh chɛ̀ po̍.

Jusu wlǔh-i ɔ̍ kòà-a pùè jɔɛ̍ due kɛ̍n

(Matio 28.16-20; Luu 24.36-49; Chɔɔn 20.19-23; Nu̍-dɛ̍ᵻ 1.6-8)

14Jɛ bɔ̌ɛ-a doǒ-ɛ, u̍h nu̍-a pùè jɔɛ̍ due-ɛ sǐi dǒ dɛ̍ di̍ la̍ sǔh wɛ̀ Jusu wlǔh-i u̍h kɛ̍n. Wɛ̀ ɔ̍ nui u̍h tɛ̀n dǒ u̍h-a nɛ̀ po̍ dɛ̍ tìh chɛ̀ ke dlǔ ku̍ dɛ we̍. Dɛ̍nu̍ɛ, ti̍ ɔ̍ wlǔh-aeɛ, nyɔ̍ ùh jě-a ɔ̍-ɛ bo u̍h se̍ tìh chɛ̀ po̍. 15Wɛ̀ ɔ̍ la̍a̍ dě u̍h we̍, “Mɔ̀ mu̍, mɔ̀ ple̍ kmɔ̌ la we̍, mɔ̀ iě pɔ̀n chɛ̀ la ɛ̍ tìh we̍i̍ bla̍ dě nyɔ̍ kli̍hgbɛ̍ we̍. 16Nyɔ̍ ɔ̀ po̍-a ɛ̍ tìh chɛ̀ wɛ̀ ɔ̍ iě nǐ dlǔ po̍-ɛ, nɛ̀ ɔ̍ mu̍ pǔh. Jɛ nyɔ̍ ɔ̀ se̍-a ɛ̍ tìh chɛ̀ po̍-ɛ, nɛ̀ kɛ̀n-a mu̍ ɔ̍ kwa̍a̍ sɔ. 17Jbaɛdih la bo wlùh gbaɛ blě nyɔ̍-a mu̍ po̍. U̍h-a mu̍ jeědih i̍ nu̍ dǒ ǎn nynɛ̌ kɛ̍n, u̍h-a mu̍ wlu̍ diih po̍, 18u̍h-a mu̍ sɛ̍ᵻ i̍ gbɛ̍n, nɛ̀ pò u̍h nǎ kanɛa nǐ ɛ̀ dbǎ-a nyɔ̍-ɛ, ɛ̍ se̍ u̍h dɛ̍ nui mu̍. Nɛ̀ pò u̍h tè poa-nyɔ̍ sɔ̍n dlǔ-ɛ, nɛ̀ u̍h-a mu̍ pǔh.”

Jusu-a de̍ ja̍i̍wlɔ̀ mu̍-ɛ

(Luu 24.50-53; Nu̍-dɛ̍ᵻ 1.9-11)

19Ti̍ Joi Jusu wɔ̀-a ɔ̍ kòà we̍ wlu-ɛɛ, wɛ̀ ɔ̍ gba̍-ɛ dě ja̍i̍wlɔ̀. Iě ɔ̍ tè i̍ dǒ Nyɔsoa-a di̍na̍ we̍. 20Wɛ̀ u̍h mu̍ tà kli̍hgbɛ̍ u̍h-a bla̍ Nyɔsoa tìh. Nɛ̀ kǎ Joi-a po̍ u̍h sɔ̍n we̍ dǒ jbaɛdih po̍ la̍, wɛ̀ u̍h-a bla̍-a tìh iě gbɔ̀ i̍ ku̍.]

Currently Selected:

Maɛ 16: KDNT

Highlight

Copy