Maɛ 12

Klè i̍ gbɛ̍n nyɔ̍-a nɛnǎ

(Matio 21.33-46; Luu 20.9-19)

1Wɛ̀ Jusu wlu dě u̍h we̍ dě nɛnǎᵻ di̍i̍. Ɔ̍ la̍a̍, “Jɔ̍gbau due bo ɔ̀ nu̍ tlo-dɛ̍ᵻá klè ɔ̍ iě nmɔ̍ nu̍. Wɛ̀ ɔ̍ sìì ɛ̍ gbàɛ̍gbà de̍e̍ i̍, iě ɔ̍ blǔ biě dǒ sɔɔ̌ kɛ̍n nmɔ̍ iě-e i̍ tè. Wɛ̀ ɔ̍ nu̍ gbàsla dǒ klè jlǐhɛ̍ tù-ɛ we̍. Ɔ̍ wɔ̌an dihwa̍a̍ mu̍ tìh-ɛ, wɛ̀ ɔ̍ si̍e̍ klè laa̍ dě klè i̍ gbɛ̍n nyɔ̍ kwa̍a̍. 2Tlo-dɛ̍ᵻ laa̍ i̍h-a gbǎn-a ti̍ nyni̍-a doǒ-ɛ, iě ɔ̍ dbo̍ ɔ̍ pòi̍ju dě klè i̍ gbɛ̍n nyɔ̍ laa̍ we̍ u̍h iě ɔ̍ naɛ tlo-dɛ̍ᵻá buǒᵻ ja. 3Wɛ̀ klè i̍ gbɛ̍n nyɔ̍ gbɛ̍n pòi̍ju laa̍, iě u̍h bla̍ ɔ̍. Wɛ̀ ɔ̍ flɔn kwa̍ iě u̍h dbo̍ ɔ̍ de̍. 4Wɛ̀ ɔ̍ dbo̍ dɔɔ dɛ. Iě u̍h bɔ̍lɔ ɔ̍ dlǔ, wɛ̀ u̍h nu̍ ɔ̍ tɛ̀n dɛ̍ᵻ jii̍. 5Wɛ̀ klè joi dbo̍ dɔɔ dɛ. Iě u̍h dbǎ ɔ̍ nɔ̀ɔ̍. Kǎ u̍h nu̍ dɔu duuh ɔ̍ dbo̍-aɛ. U̍h bla̍ duuh, iě u̍h dbǎ duuh. 6Jɛ nɛ̀ nyɔ̍ due sie-o ke̍ ɔ̍ iě dbo̍. Ɔ̍ chɛ̀-a tìh kma jǔ bo ɔ̍ bɔ̌ɛ dbo̍-ɛ. Ɔ̍ la̍a̍, ‘Ǎn jǔ nɔ̀ɔ̍, u̍h-a mu̍ ɔ̍ dɛ̍ɛ̍ jě.’ 7Jɛ klè i̍ gbɛ̍n nyɔ̍ jě-a jǔ laa̍-ɛ iě u̍h la̍a̍, ‘Ɔ̍ tèwlìɛ̍ bo ɔ̀ ji̍-a dě de̍à, mɔ̀ ji̍ à iě ɔ̍ dbǎ, nɛ̀ kɔn-dɛ̍ᵻ la i̍h-a mu̍ à i̍ wɛ̀ɛ̀.’ 8Wɛ̀ u̍h gbɛ̍n ɔ̍, iě u̍h dbǎ ɔ̍. Wɛ̀ u̍h po̍ ɔ̍ kǔ kwlǎ.”

9Wɛ̀ Jusu tèle u̍h i̍, ɔ̍ la̍a̍, “Nɛ̀ dɛ̍ klè joi-a mu̍ ka nu̍ ɛ? Nɛ̀ ɔ̍ mu̍ ji̍ wɛ̀ ɔ̍ iě klè i̍ gbɛ̍n nyɔ̍ laa̍ dbǎ, wɛ̀ ɔ̍ iě klè-a chɛ̀ nyɔ̍ duuh nyǐ. 10Mɔ̀-ɔ se̍a Nyɔsoa-a wlu̍ la slè sàǐtòò ae? Ɛ̍ la̍a̍,

‘Sɔɔ̌ ɛ̀ gbò po̍ nyɔ̍ tba̍-a chla-ɛ,

ɛ̍ bo ɛ̀ bɔ̌ɛ-a gbò-a sìtù nu̍-ɛ wɛ̀.

11Joi bo ɔ̀ nu̍ ɛ̀ la.

Sɔ ɛ̍ nu̍ nyɔ̍ wɔ̍n flɔn-ɛ dɛ̍ dǒ à we̍.’ ”

12Sɔ Juu nyɔ̍ klaaᵻ laa̍ u̍h juo-o dɛ̍ i̍, u̍h bo Jusu poe nɛnǎ la i̍. Ɛ̍ kɔn u̍h-a pɔ̀n ɔ̍ gbɛ̍n-ɛ i̍ de. Jɛ nɛ̀ u̍h-a ple̍ nyɔ̍ tlùgbei̍ nɛ-a doǒ-ɛ jǔ. Iě u̍h tǎli ɔ̍ i̍, u̍h mu̍.

Nyɔ̍ bo ɔ̀ iě taa̍sìh sà ɛ?

(Matio 22.15-22; Luu 20.20-26)

13 Fɛlesii nyɔ̍ duuh ke nyɔ̍ ùh sɔ-a dě Blǔh Baa Ɛlo-a gbɔ̀ù di̍i̍-ɛ, u̍h bo u̍h dbo̍ u̍h iě Jusu dǒ ɔ̍ chɛ̀-a wlu̍ kɛ̍n gbɛ̍n-ɛ. 14Wɛ̀ u̍h ji̍ dǒ ɔ̍ we̍, iě u̍h la̍a̍, “Dlǔtu, à juo ɛ̍-ɛ mɔ̀ bo ɔ̀ sà tìh-a taǐn, dɛ̍nu̍ɛ, nɛ̀ gbǎ nyɔ̍-a wlu̍ we̍, iě nɛ̀ ple̍ nyɔ̍-a jua̍a̍ jǔ ke. Jɛ tìh-a taǐn bo àn poe nǎ dǒ Nyɔsoa dɛ we̍. Ɛ̍ kɔn à ji̍ ìè à wlùh sèàɛ̍ pò à telě sà à wlu̍ kɛ̍n à iě taa̍sìh sà dě Wloma nyɔ̍-a Bloa̍ Joi we̍ kɔ̌ɔ, àe̍e̍ ɛ̍ se̍ à wlu̍ kɛ̍n sà ae?”

15Jɛ Jusu juo u̍h-a gblàa̍ i̍, iě ɔ̍ la̍a̍, “Mɔ̍ bo mɔ̀-a pɔ̀n blu̍ja̍a̍ po̍-ɛ i̍ ae? Mɔ̀ ja wliɛ̍ jɔɛ̍-a chɛ̀ iě ɛ̍ jě.”

16Wɛ̀ u̍h ja ɔ̍ due, iě ɔ̍ la̍a̍, “Nyɔ̍ kɔn dlǔ ke nynɛ̌ bo ìh nɛ da̍a ɛ̍ kɛ̍n ɛ?”

U̍h la̍a̍, “Bloa̍ Joi bo.”

17Wɛ̀ Jusu la̍a̍, “Dɛ̍ ɛ̀ kɔn-a dǒ Bloa̍ Joi we̍-ɛ, nɛ̀ mɔ̀ nyǐ ɛ̍ Bloa̍ Joi. Nɛ̀ dɛ̍ ɛ̀ kɔn-a dǒ Nyɔsoa we̍-ɛ, mɔ̀ nyǐ ɛ̍ Nyɔsoa.”

Sɔ ɔ̍ wlǔh i̍ u̍h de̍e̍.

Jusu flɔn-ɛe wlǔh dɛ we̍i̍

(Matio 22.23-33; Luu 20.27-40)

18Wɛ̀ Sadiusii nyɔ̍ ùh la̍ nyɔ̍ se̍-ae wlǔh mu̍ dode̍-ɛ, u̍h ji̍ Jusu i̍ tèle la̍. U̍h la̍a̍, 19“Dlǔtu, Mose chlǐh telě la dǒ à we̍, ɔ̍ la̍a̍, ‘Pò jɔ̍gbau blě nynɔ̌ iě u̍h se̍ jǔ wlǔh-i wɛ̀ jɔ̍gbau iě mɛ̌-ɛ, nɛ̀ ɔ̍ de̍di̍i̍ kɔn ɔ̍ iě nynɔ̌ laa̍ blě, ɔ̍ ke ɔ̍ iě nynuu̍ wlǔh-i dǒ ɔ̍ de̍di̍i̍ we̍.’ 20Ɛ̍ nu̍ de̍di̍i̍ᵻ mɛ̀sɔɔ̌n, wɛ̀ u̍h-a klaa naɛ blě nynɔ̌, iě ɔ̍ se̍ jǔ wlǔh-i wɛ̀ ɔ̍ mɛ̌. 21Wɛ̀ jɔ tba̍-a dǒ ɔ̍ de̍e̍-ɛ blě nynɔ̌ laa̍. Iě ɔ̍ se̍ jǔ wlǔh-i ɔ̍ mɛ̌ ke. Ɛ̀ due laa̍ bo ɛ̀ nɛ u̍h-a ta̍a̍n naɛ pùn. 22Wɛ̀ u̍h nɛ-a mɛ̀sɔɔ̌n laa̍ u̍h wɛ̀ɛ̀ gblìn-biě-e dǒ nynɔ̌ laa̍ pùn, iě u̍h se̍-o jǔ si̍e̍. Jɛ bɔ̌ɛ doǒ-ɛ, nynɔ̌-a chɛ̀ mɛ̌-ɛ. 23Nɛ̀ɛ̍, ka ɔ̍ dǔ-a u̍h nɛ-a mɛ̀sɔɔ̌n-ɛ, ti̍ mɛ̌-nyɔ̍-a mu̍-ae wlǔh-ɛ, nɛ̀ nyɔ̍ kɔn nynɔ̌ ɔ̍ mu̍ nu̍ gbe̍i̍n ɛ?”

24Wɛ̀ Jusu la̍a̍ dě u̍h we̍, “Dɛ̍ mɔ̀-a bla̍-aɛ, ɛ̍ se̍-o wìè-i nɛ, jɛ mɔ̀ se̍ Nyɔsoa-a wlu̍ ke ɔ̍ gbǐh juo dɛbo. 25Ti̍ mɛ̌-nyɔ̍-a mu̍-ae wlǔh-ɛ, nɛ̀ u̍h-a mu̍ Nyɔsoa-a ǐnchɔ̀ wɔ̀ dě ja̍i̍wlɔ̀, u̍h se̍ blǐ tǐn-i mu̍. 26Nɛ̀ mɛ̌-nyɔ̍-ae wlǔh dɛ la, mɔ̀-ɔ se̍a ɛ̍ slè dě Mose-a chlǐh-dɛ̍ di̍i̍ ae? Ɛ̀ tba̍-a dǒ si̍n-i kwlǎ fàn pùn i̍-ɛ, kǎ Nyɔsoa dǎ ka dě ɔ̍ we̍, ‘Mɔ̍ Eblaɛɛn ke, Ase ke Jekɔ-a Nyɔsoa.’ 27Ɔ̍ se̍ Nyɔsoa dǒ mɛ̌-nyɔ̍ we̍. Jɛ ɔ̍-ɔ Nyɔsoa dǒ kmɔ̌ i̍ tè nyɔ̍ we̍. Ɛ̍ tìh-ɛ, mɔ̀-a dɛ̍ se̍ i̍ slɛ̌ ɛ̍ wɛ̀ nǐ de̍e̍ i̍.”

Telě-a klaa naɛ

(Matio 22.34-40; Luu 10.25-28)

28Wɛ̀ telě nǎ poe nyɔ̍ due ji̍, iě ɔ̍ wɔ̌n u̍h-a wlu̍. Sɔ ɔ̍ juo-o dɛ̍ i̍ ka Jusu sà-a Sadiusii nyɔ̍-a wlu̍ pɔ̀n we̍ nmɔ jii̍-ɛ. Iě ɔ̍ tèle ɔ̍ i̍, ɔ̍ la̍a̍, “Telě jɛwe̍ bo ɛ̀ ku̍ wɔ̍n dě telě kli̍hgbɛ̍ nynɛ̌ we̍ ɛ?”

29Wɛ̀ Jusu la̍a̍, “I̍h-a jɛ ku̍-a wɔ̍n chɛ̀ɛ̌chɛ̀-ɛ, ɛ̍ la̍a̍, ‘Eslɔɛ nyɔ̍ mɔ̀ po̍-e dounᵻ. À Joi Nyɔsoa nɛ due bo ɔ̀ nu̍ Joi. 30Nɛ̀ ìn jbɛɛ àn Joi Nyɔsoa-a dǒ àn pɔluh kli̍hgbɛ̍ we̍, dǒ àn kmɔ̌ kli̍hgbɛ̍ we̍, dǒ àn wlùh kli̍hgbɛ̍ we̍, ɛ̍ ke àn gbǐh kli̍hgbɛ̍ ke.’ 31Ɛ̀ po̍-a sɔɔ̌n-ɛ, ɛ̍ la̍a̍, ‘Jbɛɛ ìn pònyɔ̍-ɔ ka àn chɛ̀-ɛ.’ Telě dɛɛ se̍ wɔ̍n ku̍ ɛ̍ se̍ ìh la sìì.”

32Telě nǎ poe nyɔ̍ laa̍, ɔ̍ la̍a̍ dě Jusu we̍, “Dlǔtu, ɛ̀ ìn bla̍-aɛ, ɛ̍ slɛ̌ i̍. Ka nàa̍ Nyɔsoa nɛ due ɔ̀ nu̍-a Joi, Joi dɔɔ se̍-a dǒ de̍ nɛ-ɛ, nɛ̀ tìh-a taǐn bo ìn sà-a. 33Ɛ̍ se̍-o siee, nɛ̀ nyɔ̍ jbɛɛ Nyɔsoa-a dǒ ɔ̍ pɔluh kli̍hgbɛ̍ we̍, dǒ ɔ̍ wlùh kli̍hgbɛ̍ we̍, ɛ̍ ke ɔ̍ gbǐh kli̍hgbɛ̍ ke. Nɛ̀ ɔ̍ jbɛɛ ɔ̍ pònyɔ̍-ɔ ka ɔ̍ chɛ̀-ɛ. I̍h nɛ-a sɔɔ̌n-ɛ bo ìh kma ɛ̀ sìì nyǐ-dɛ̍ᵻ fɔ̍n-ɛ ke slaǎ sà-a dǒ Nyɔsoa we̍.”

34Ti̍ Jusu juo-ao dɛ̍ i̍ ka jǔ nu̍-a ɔ̍ wlu̍ pɔ̀n we̍ sà-a dǒ flɔ̍nwlùh we̍-ɛ, iě ɔ̍ la̍a̍ dě ɔ̍ we̍, “Ìn se̍ Nyɔsoa-a kmɔ̌ wlu̍ i̍ kɔn-ɛ we̍ i̍ ti̍ɛ̍ɛn dɛ.”

Sɔ dǒ ti̍ laa̍ di̍i̍-ɛ, nyɔ̍ se̍ Jusu dɛ̍ i̍ tèle-ɛ bɛ̌ɛ dɛ.

Nyɔ̍ bo ɔ̀ nu̍ Nyɔsoa-a Chèɛ̀ Tba̍ju Baa ɛ?

(Matio 22.41-46; Luu 20.41-44)

35Ti̍ Jusu-a po̍-a nǎ dě Nyɔsoa-a slaǎ sà gbò sɔ̀n-ɛ, ɔ̍ la̍a̍, “Ka ɛ̍ iě nu̍ wɛ̀ telě nǎ poe nyɔ̍ la̍ Nyɔsoa-a Chèɛ̀ Tba̍ju la Depe-a tloemlai bo ɛ? 36Dɛ̍nu̍ɛ, ti̍ Nyɔsoa-a Sùù gbǎ-a Depe kɛ̍n-ɛ, iě ɔ̍ la̍a̍,

‘Joi la̍a̍ dě ǎn Joi we̍,

Tè i̍ da̍a ǎn di̍na̍ we̍ te̍e̍

iě ɛ̍ nu̍ ìè àn nyɛ̌-nyɔ̍ kɛ̍n i̍ na.’

37Depe-a chɛ̀-a dǎɛ ɔ̍ Joi-ɛ, nɛ̀ dɛ̍ nu̍ ɔ̍ Depe-a tloemlai we̍i̍ ɛ?”

Jusu gbòɛ̀ɛ̀ telě nǎ poe nyɔ̍-a tìh

(Matio 23.1-36; Luu 20.45-47)

Nɛ̀ nyɔ̍ tlùgbei̍ ùh-a po̍-a dě Jusu we̍ dounᵻɛ́, ɛ̍ pɛ̌n-ɛ u̍h-a pɔluh i̍. 38Ti̍ ɔ̍ po̍-a u̍h nǎ-ɛ, ɔ̍ la̍a̍, “Mɔ̀ nu̍ mɔ̀-a chɛ̀-a nɛnɛ̌ dǒ telě nǎ poe nyɔ̍ we̍. U̍h jbɛɛ dɛ̍wlo̍o̍ pa̍ dɛ-ɛ dǒ wlɔ̀ i̍ nala, wɛ̀ nyɔ̍ iě u̍h ja̍ tè dǒ u̍h nyinɔ̍ i̍ sà la̍ dě dɔɔ̌ gbale̍e̍. 39U̍h jbɛɛ tà chɛ̀ i̍ tè-ɛ i̍ ma̍u̍ dě Juu nyɔ̍-a wɛɛ sà gbòᵻ sɔ̀n i̍ ke peě kɛ̍n i̍. 40U̍h-a bla̍ tèwànynɔ̌gbaɔᵻ jlǐhɛ̍ dlǔ, iě u̍h-a jǎ u̍h-a kɔn-dɛ̍ᵻ kɛ̍n. Ɛ̍ tìh u̍h-a tɛn-ɛ ba̍le-ɛ dlǔ wɛ̀ u̍h iě u̍h-a chɛ̀ dě nyɔ̍ jlǐh i̍ nmɔ-ɛ. U̍h naɛ kàn gbɛ̍n-ɛa mu̍-o dɛ̍ i̍ sìì.”

Tèwànynɔ̌-a Nyɔsoa dɛ̍ nyǐ-ɛ

(Luu 21.1-4)

41Wɛ̀ Jusu tè i̍ dǒ wlǐ di̍i̍ sà-ɛ gblòùn jua̍i̍ dě Nyɔsoa-a wɛɛ sà gbò sɔ̀n. Nɛ̀ nyɔ̍ ùh-a po̍-a wlǐ dě ɛ̍ di̍i̍-ɛ bo ɔ̍ gbɛ̀n ja̍. Pàn-nyɔ̍ dɔu po̍-e wlǐ sùɛ̀. 42Dǒ nyɔ̍gbà tèwànynɔ̌ due ji̍-i, wɛ̀ ɔ̍ po̍-e falǐ jɔ̌ sɔɔ̌n, i̍h bɛ̌ɛ kaba̍ jɔ̌ɛ due nu̍-ɛ. 43Wɛ̀ ɔ̍ dǎ ɔ̍ kòà, iě ɔ̍ la̍a̍ dě u̍h we̍, “Bɔ̌ ǐn sèàɛ̍ mɔ̀ gblangbai̍ wlùh, nyɔ̍gbà tèwànynɔ̌ la ɔ̍ po̍ dɛ̍ dɔu dě gblòùn la di̍i̍ ɛ̍ sìì nyɔ̍ kli̍hgbɛ̍. 44Dɛ̍nu̍ɛ, nyɔ̍ duuh nɔ̀ɔ̍, dǒ u̍h-a wlǐ dɔu kɛ̍n bo u̍h gba̍ sɔ̍n wɛ̀ u̍h po̍ gblòùn la wlǐ di̍i̍. Jɛ nynɔ̌ la ɔ̍ nyɔ̍gbà wliɛ̍ ɔ̍ blě-a kleǐn ɔ̍ iě-a wlì tè-ɛ, ɛ̍ bo ɔ̍ po̍-e kli̍hgbɛ̍.”

Currently Selected:

Maɛ 12: KDNT

Highlight

Copy