Maɛ 11

Jusu sǐ Juluslɛn i̍

(Matio 21.1-11; Luu 19.28-40; Chɔɔn 12.12-19)

1Ti̍ u̍h-a kɔǎɛn-a la̍ Juluslɛn wlɔ̀ i̍-ɛ, nɛ̀ u̍h nɛ dǒ Bɛfaji ke Bɛtani wlɔ̀ gbɔ̀ wɛ̀ dǒ Ɔle-Tu̍ᵻá Tlu̍h kɛ̍n. Wɛ̀ Jusu dbo̍ ɔ̍ kòà sɔɔ̌n nya̍. 2Ɔ̍ la̍a̍, “Mɔ̀ mu̍ dǒ wlɔ̀ nɛ-a dǒ mɔ̀ jǔ-ɛ di̍i̍. Pò mɔ̀ sǐ wlɔ̀ i̍ ka-ɛ, mɔ̀-a mu̍ soo̍pà jǔ jě ɛ̍ mɔɛ i̍, nyɔ̍-ɔ se̍a dǒ ɛ̍ kɛ̍n gbǎ sàì. Mɔ̀ pɔ̀ni ɛ̍ mɔ̀ iě ɛ̍ ja. 3Pò nyɔ̍ tèle mɔ̀ i̍, ‘Dɛ̍nu̍ mɔ̀-a pɔ̀ni ɛ̍ ɛ?’ Nɛ̀ mɔ̀ la̍a̍, ‘Dlǔtu-a pɔ̀n ɛ̍, ɔ̍ mu̍ ɛ̍ de̍ dbo̍ suei̍.’ ”

4U̍h mu̍-aɛ, wɛ̀ u̍h jě soo̍pà jǔ laa̍ dǒ wlɔ̀gbàɛ̀, nɛ̀ ɛ̍ mɔɛ i̍ dǒ gbò due wɔ̍i̍n. U̍h nɛ dǒ ɛ̍ pɔ̀ni la̍ 5wɛ̀ nyɔ̍ ùh nyna-a doǒ i̍-ɛ, iě u̍h tèle u̍h i̍, u̍h la̍a̍, “Dɛ̍nu̍ mɔ̀-a pɔ̀ni soo̍pà jǔ la ɛ?”

6Iě u̍h bla̍ ɛ̀ kɔn taǐn Jusu sèàɛ̍-a u̍h wlùh-ɛ. Wɛ̀ u̍h dǔ u̍h i̍ tǎli-ɛ, iě u̍h mu̍. 7Wɛ̀ u̍h gba̍ soo̍pà jǔ laa̍ Jusu, iě u̍h slo̍ u̍h-a plɛ̀i̍ᵻ dǒ ɛ̍ kɛ̍n i̍. Wɛ̀ ɔ̍ jǎ dǒ ɛ̍ kɛ̍n ɔ̍ tè i̍. 8Iě nyɔ̍gbei-a slo̍ u̍h-a plɛ̀i̍ᵻ i̍ dǒ wìè-i, nɛ̀ kǎ duuh-a chɛ̍n kǎfanᵻ u̍h-a slo̍ i̍h ke dǒ wìè-i. 9Nɛ̀ ùh wɔ̀-a nya̍-ɛ ke juh wɔ̀-a de̍-ɛ, u̍h-a wǐi i̍. U̍h la̍a̍, “Nyɔsoa bo ɔ̀ nu̍ tìhwe̍ po̍ nyɔ̍. Pɔ̀ìě dǒ nyɔ̍ ɔ̀ ji̍-a dǒ Joi-a nynɛ̌ kɛ̍n-ɛ we̍. 10Kmɔ̌ wlu̍ i̍ kɔn-ɛ ɛ̀ mu̍-a ji̍ ɛ̀ iě-a baa Depe naɛ wɔ̀-ɛ, pɔ̀ìě dǒ ɛ̍ we̍. Nyɔsoa bo ɔ̀ nu̍ tìhwe̍ po̍ nyɔ̍ dě ja̍i̍wlɔ̀.”

11Jusu sǐ-a dǒ Juluslɛn i̍-ɛ, wɛ̀ ɔ̍ mu̍ dě Nyɔsoa-a slaǎ sà gbò sɔ̀n. Iě ɔ̍ gbèɛ̀ɛ̍n dɛ̍ᵻ kli̍hgbɛ̍ ja̍ i̍, jɛ nɛ̀ jlǔh-a mu̍ la̍-ɛ. Wɛ̀ ɔ̍ ke ɔ̍ kòà-a pùè jɔ̌ sɔɔ̌n laa̍ u̍h mu̍ dǒ Bɛtani wlɔ̀ di̍i̍.

Jusu po̍ fei-tu̍ wlu̍we̍i̍

(Matio 21.18-19)

12Sɔ̀n sɛ̀n-a u̍h-a sɔ-a la̍ dǒ Bɛtani wlɔ̀-ɛ, nɛ̀ mɔ̌-a nu̍ ɔ̍-ɛ dǒ de̍ Juluslɛn mu̍ la̍. 13Dǒ ɔ̍ jě-e fei-tu̍ dě nya̍, nɛ̀ ɛ̍ wlɔ̍nᵻ nɛ sìkɛ̀ɛ̀. Wɛ̀ ɔ̍ mu̍ dě ɛ̍ we̍ tèle la̍ pò buǒᵻá mu̍ dě ɛ̍ ja̍ nɛ kɔ̌ɔ. Jɛ wlɔ̍nᵻá sǔh bo ɔ̍ jɛɛ dě ɛ̍ ja̍. Dɛ̍nu̍ɛ, ɛ̍ se̍ fei-a tlo-o nɔ̀ɔ̍ ke̍. 14Wɛ̀ ɔ̍ la̍a̍ dě ɛ̍ we̍, “Nyɔ̍ se̍ gba̍ àn buǒ di̍ dɛ o.”

Nɛ̀ ɔ̍ kòà-a wɔ̌n ɔ̍ wlu̍.

Jusu po̍ pɛlǔh po̍ nyɔ̍ sɔ̀n i̍

(Matio 21.12-17; Luu 19.45-48; Chɔɔn 2.13-22)

15Ti̍ u̍h sǐ-a dǒ Juluslɛn i̍-ɛ, wɛ̀ Jusu pa̍ dě Nyɔsoa-a slaǎ sà gbò sɔ̀n. Iě ɔ̍ po̍ dɛ̍ᵻ ple̍-nyɔ̍ ke dɛ̍ᵻ tɛ̀n-nyɔ̍ nɛ-a dě ɛ̍ di̍i̍-ɛ sɔ̀n i̍. Wɛ̀ ɔ̍ chlìi wlǐ we̍ sìi̍ nyɔ̍-a teble̍ᵻ i̍, ɛ̍ ke pawo̍o̍ᵻ ple̍-nyɔ̍-a kɛ̍n tè dɛ̍ᵻ ke. 16Nɛ̀ ɔ̍-ɔ wɔ̌n nyɔ̍-ɔ blě dɛ̍ wɛ̀ ɔ̍-ɔ jaɛ ɛ̍ dě slaǎ sà gbò sɔ̀n dɛ. 17Ti̍ ɔ̍ po̍-a nyɔ̍ nǎ-aɛ, wɛ̀ ɔ̍ la̍a̍, “Ɛ̍ chlǐh-ɛ dě Nyɔsoa-a wlu̍ di̍i̍. Nyɔsoa la̍a̍, ‘Ǎn gbò kɔn ɛ̍ iě bloa̍ kli̍hgbɛ̍-a ba̍le gbò nu̍.’ Jɛ mɔ̀-a nui ɛ̍ jlǐ-nyɔ̍-a tè la̍ we̍i̍.”

18Wɛ̀ Nyɔsoa-a slaǎ sà nyɔ̍ klaaᵻ ke telě nǎ poe nyɔ̍-a wɔ̌n ɛ̍ pɔ̀n, iě faɔn-a nu̍ u̍h. Dɛ̍nu̍ɛ, ɔ̍ naɛ nǎ po̍-ɛa wlǔh i̍ nyɔ̍ tlùgbei̍ de̍e̍. Ɛ̍ kɔn u̍h-a pɔ̀n jiila̍ u̍h iě ɔ̍ dbǎ.

19Ti̍ ɛ̍ nu̍-a flìwe̍-ɛ, wɛ̀ Jusu ke ɔ̍ kòà sɔ dǒ tùgbàwlɔ̀ di̍i̍.

Blě wlùh gbaɛ dǒ ba̍le la̍

(Matio 21.20-22)

20Klàɛ̍we̍ u̍h-a sì-a dǒ wìè-iɛ, dǒ u̍h jě-e fei-tu̍ laa̍, nɛ̀ ɛ̍ sà klǎn-a dě ja̍i̍ wɛ̀ ɛ̍ jɛɛ ɛ̍ sɛ̌n. 21Sɔ ɛ̍ tìh sǐ dǒ Pitɛ wlì i̍ sǔh, iě ɔ̍ la̍a̍ dě Jusu we̍, “Dlǔtu, gbɛ̀n-e, fei-tu̍ la ìn po̍-a wlu̍we̍i̍-ɛ, ɛ̍ klǎn wɛ̀ wa.”

22Wɛ̀ Jusu la̍a̍ dě u̍h we̍, “Mɔ̀ gbaɛ Nyɔsoa wlùh. 23Bɔ̌ ǐn sèàɛ̍ mɔ̀ tìh-a taǐn wlùh, nyɔ̍ jɔ mu̍-a dě tlu̍h la we̍ wlu, ‘Sɔ bloɔ̍ ìè jbǒ kɛ̍n gbǎ,’ pò ɔ̍ wlùh se̍ kɛ̍ i̍ nɛ wɛ̀ ɔ̍ iě ɛ̍ wlùh gbaɛ dɛ̍ ɔ̍ dǎ-aɛ ɛ̍ mu̍ nɛ-ɛ, nɛ̀ ɛ̍ mu̍ nɛ dǒ ɔ̍ we̍. 24Ɛ̍ kɔn ǎn sèàɛ̍ mɔ̀ wlùh, pò mɔ̀ tèle dɛ̍-a tìh i̍ dě ba̍le-ɛ di̍i̍-ɛ, nɛ̀ mɔ̀ gbaɛ ɛ̍ wlùh ka mɔ̀-a mu̍-a ɛ̍ jě-ɛ, nɛ̀ ɛ̍ mu̍ mɔ̀ kwa̍a̍ gbǎ. 25Nɛ̀ pò mɔ̀ nyna i̍ mɔ̀ iě ba̍le-ɛ, nɛ̀ dɛ̍ sɔ̀n nyɔ̍ nu̍-a mɔ̀ pùn-ɛ, mɔ̀ tǎli ɛ̍ tìh i̍. Nɛ̀ mɔ̀ Baa nɛ-a dě ja̍i̍wlɔ̀-ɛ, ɔ̍ mu̍ mɔ̀ naɛ gblɛ̍n sɔ̀ɛ̀n-a tìh i̍ tǎli ke. [ 26Jɛ pò mɔ̀ se̍ nyɔ̍ duuh naɛ i̍ tǎli-ɛ, nɛ̀ mɔ̀ Baa nɛ-a dě ja̍i̍wlɔ̀-ɛ, ɔ̍ se̍ mɔ̀ naɛ gblɛ̍n sɔ̀ɛ̀n-a tìh i̍ tǎli mu̍ ke.]”

Nyɔ̍ bo ɔ̀ nyǐ Jusu tùn ɛ?

(Matio 21.23-27; Luu 20.1-8)

27Wɛ̀ u̍h sǐ dǒ Juluslɛn i̍ dode̍. Jusu nɛ dǒ Nyɔsoa-a slaǎ sà gbò we̍ na la̍ sǔh, wɛ̀ Nyɔsoa-a slaǎ sà nyɔ̍ klaaᵻ ke, telě nǎ poe nyɔ̍ ke, nyɔ̍ klaaᵻ duuh ji̍ dǒ ɔ̍ we̍. 28Iě u̍h la̍a̍ dě ɔ̍ we̍, “Nyɔ̍we̍ bo ɔ̀ nyǐ ìn tùn wɛ̀ àn nu̍ ìh la ɛ? Nyɔ̍ ɔ̀ nyǐ-a ìn tùn-ɛ, sǐ ɔ̍ nynɛ̌.”

29Wɛ̀ Jusu la̍a̍, “Ǎn mu̍ mɔ̀ dɛ̍ due i̍ tèle ke. Pò mɔ̀ sà ɛ̍ pɔ̀n we̍-ɛ, nyɔ̍ ɔ̀ nyǐ-a ǐn tùn wɛ̀ ǎn nu̍-a ìh la-ɛ, nɛ̀ ǎn mu̍ ɔ̍ nynɛ̌ sǐ. 30Nyɔ̍ bo ɔ̀ nyǐ Chɔɔn tùn wɛ̀ ɔ̍ po̍ nyɔ̍ nǐ dlǔ ɛ? Nyɔsoa bo ɛɛ, àe̍e̍ wlɔ̀ nyi̍ɔ̍ bo ae? Mɔ̀ sèàɛ̍ ǐn wlùh.”

31Sɔ u̍h-a sǔh-a pu̍e̍e la̍ ɛ̍ wɔ̍ɔ̍n i̍ sǔh. U̍h la̍a̍, “Pò à la̍a̍, ‘Nyɔsoa bo-ɛ,’ nɛ̀ ɔ̍ mu̍ ka nu̍, ‘Dɛ̍nu̍ mɔ̀ se̍ ɔ̍ tìh chɛ̀ po̍ la̍ ɛ?’ 32Iě pò à la̍a̍, ‘Wlɔ̀ nyi̍ɔ̍ bo-ɛ,’ nɛ̀ à ple̍ nyɔ̍ la u̍h-a faɔn, dɛ̍nu̍ɛ, u̍h kli̍hgbɛ̍ u̍h-a slè-e Chɔɔn Nyɔsoa-a tu̍owli po̍ nyɔ̍.” 33Iě u̍h la̍a̍ dě Jusu we̍, “À se̍ ɔ̍ juo.”

Wɛ̀ Jusu la̍a̍ dě u̍h we̍, “Iě nɛ̀ nyɔ̍ ɔ̀ nyǐ-a ǐn tùn wɛ̀ ǎn nu̍-a ìh la-ɛ, nɛ̀ ǐn se̍ ɔ̍ nynɛ̌ sǐ mu̍ ke.”

Currently Selected:

Maɛ 11: KDNT

Highlight

Copy