Luu 8
8
Nynɔ̌gbaɔᵻ gba̍ Jusu ke ɔ̍ kòà wìè-i
1Ɛ̍ se̍-o wlè wɛ̀ Jusu na tùgbàwlɔ̀ᵻ ke wlɔ̀ᵻ plìh di̍i̍ i̍. Wɛ̀ ɔ̍ bla̍ pɔ̀n chɛ̀ dǒ Nyɔsoa-a kmɔ̌ wlu̍ i̍ kɔn dɛ we̍. Nɛ̀ ɔ̍ ke ɔ̍ kòà-a pùè jɔ̌ sɔɔ̌n 2ke, nynɔ̌gbaɔᵻ duuh na, ùh ɔ̍ sà-a jeědih de̍e̍ i̍, wɛ̀ ɔ̍ bɔ̌-ɛ u̍h-a wɛ̌ᵻɛ́. U̍h-a nynɛ̌ nu̍ Mɛle ɔ̀ Jusu sà-a jeědih mɛ̀sɔɔ̌n de̍e̍ u̍h-a dǎɛ-a Makalin-ɛ, 3ɛ̍ ke Joana ɔ̀ kɔn kɔan Kusa nu̍-a Ɛlo-a kɔn-dɛ̍ᵻ we̍ i̍ gbɛ̀n nyɔ̍-a klaa-ɛ, ɛ̍ ke Susana ke. U̍h ke nynɔ̌gbaɔᵻ dɔu duuh bo ùh gbǎ Jusu ke ɔ̍ kòà we̍ dǒ u̍h-a chɛ̀-a sɔ̍n kɛ̍n.
Jusu po̍ dɛ̍ᵻ jɔ̌ gbà nyɔ̍-a nɛnǎ
(Matio 13.1-9; Maɛ 4.1-9)
4Nyɔ̍ tlùgbei̍ gbǎ tàdùè iě nyɔ̍ɔ sɔ wlɔ̀ᵻ di̍i̍ i̍ u̍h mu̍ dě Jusu we̍. Dǒ ɔ̍ poe nɛnǎ. Ɔ̍ la̍a̍,
5“Jɔ̍gbau due bo ɔ̀ mu̍ dɛ̍ᵻ jɔ̌ gbà la̍-a. Ɔ̍ gbà-a i̍h dě klè-ɛ, diih gbǎ dǒ wìè gblùh i̍. Wɛ̀ nyɔ̍gbei na i̍h kɛ̍n i̍, iě na̍wɛ̍ᵻ di̍ i̍h. 6Diih gbǎ dǒ sɔɔ̌ paɔ kɛ̍n. I̍h wlǔh-aɛ, wɛ̀ i̍h wlɔ̍. Dɛ̍nu̍ɛ, i̍h-i jě nǐ. 7Wɛ̀ diih gbǎ dě klàɛ̀n di̍i̍, iě i̍h ke wiǎᵻ ku̍-i tàdùè. Wɛ̀ i̍h mɔɛ i̍h dlǔ i̍. 8Wɛ̀ diih gbǎ dǒ gbablu̍h i̍, iě i̍h nmɔ, wɛ̀ jɛ-ɛ, nɛ̀ ɛ̍ blě jɔ̌-a kmɛ due.”
Jusu wɔ̌an chlà-a tìh-ɛ, ɔ̍ la̍a̍, “Nyɔ̍ flɔn-a dounᵻɛ́, nɛ̀ ɔ̍ po̍-e dounᵻ.”
Tìh Jusu po̍-a nɛnǎᵻɛ́ la
(Matio 13.10-17; Maɛ 4.10-12)
9Wɛ̀ Jusu-a kòà tèle ɔ̍ i̍ ɔ̍ iě nɛnǎ la gbɔ̀ sà dě u̍h we̍. 10Iě ɔ̍ la̍a̍, “Mɔ̀ɔ̍ nɔ̀ɔ̍, Nyɔsoa nu̍ ɛ̍ wɛ̀ dɛ̍ᵻ ìh nɛ-a dě kwile de dě ɔ̍ kmɔ̌ wlu̍ i̍ kɔn-ɛ di̍i̍-ɛ, wɛ̀ mɔ̀ juo i̍h. Jɛ dǒ nyɔ̍ duuh we̍-ɛ, nɛ̀ i̍h nɛ dě nɛnǎᵻ di̍i̍. Sɔ nɛ̀ u̍h-a gbèɛ̀ɛ̍n i̍, jɛ u̍h-u jě i̍. U̍h-a pu̍e̍e dounᵻ i̍, jɛ u̍h-u wɔ̌n dɛ̍ɛ̍ i̍.
Jusu sèàɛ̍ dɛ̍ᵻ jɔ̌ gbà nyɔ̍-a nɛnǎ we̍ i̍
(Matio 13.18-23; Maɛ 4.13-20)
11“Nɛnǎ-a chɛ̀ ɛ̍ gbɔ̀ la. Dɛ̍ᵻ jɔ̌ bo ìh nu̍ Nyɔsoa-a wlu̍. 12Dɛ̍ᵻ jɔ̌ ìh gbǎ-a dǒ wìè gblùh i̍-ɛ, nyɔ̍ ùh wɔ̌n-a Nyɔsoa-a wlu̍ iě Kǔ ji̍-a ɛ̍ sà-a ɛ̍ dǒ u̍h wlùh kɛ̍n-ɛ, u̍h bo i̍h wɔ̀. Wɛ̀ u̍h-u je̍e wlùh gbaɛ blě, nɛ̀ u̍h-a mu̍ la̍ pǔh. 13Jih gbǎ-a dǒ sɔɔ̌ paɔ kɛ̍n-ɛ, i̍h bo ìh wɔ̀ nyɔ̍ ùh wɔ̌n-a Nyɔsoa-a wlu̍ iě u̍h gbɛ̍n-a ɛ̍ i̍ dǒ mɔna̍ we̍-ɛ. Jɛ ɛ̍ se̍ sɛ̌n po̍ dě u̍h ku̍sɔ̀n. Ɛ̍ kɔn u̍h blě wlùh gbaɛ dǒ ti̍ gbɔ̀ di̍i̍. Jɛ nyɔ̍ i̍ tɛ̀n-ɛ ji̍-aɛ, iě u̍h ple̍. 14Jih gbǎ-a dě klàɛ̀n di̍i̍-ɛ, i̍h wɔ̀ nyɔ̍ ùh wɔ̌n-a Nyɔsoa-a wlu̍-ɛ. Jɛ ti̍ gbɔ̍ sì-aɛ, wɛ̀ kmɔ̌-a sèò ke pàn-dɛ̍ᵻ i̍ jbɛɛ-ɛ ke gbale̍e̍ gbǎ-a mɔɛ u̍h dlǔ i̍. Ɛ̍ kɔn u̍h-a buǒᵻ fǒ. 15Jih gbǎ-a dǒ gbablu̍h i̍-ɛ, i̍h bo ìh wɔ̀ nyɔ̍ ùh wɔ̌n-a Nyɔsoa-a wlu̍ iě u̍h gbɛ̍n-a ɛ̍ i̍ dǒ wlùh ɛ̀ nmɔ-a jii̍ chɛ̀ɛ̌chɛ̀-ɛ we̍-ɛ. Wɛ̀ u̍h se̍ se̍a̍, iě u̍h tlo.
Nape̍ kɔn dǒ nyɔ̍-a i̍ jě-ɛ we̍
(Maɛ 4.21-25)
16“Nyɔ̍-ɔ tba̍ nape̍ wɛ̀ nɛ̀ po̍ ɛ̍ dě too sɔ̀n, àe̍e̍ dě kɛ̍n pɛ̌n dɛ̍ sɔ̀n. Jɛ nyɔ̍-a pèle ɛ̍ ja̍i̍, wɛ̀ nyɔ̍ ùh-a pa̍-a gbò-ɛ, iě u̍h-a jě i̍.
17“Dɛ̍-o-dɛ̍ ɛ̀ sìle-aɛ, ɛ̍ mu̍ tà wlǔh. Nɛ̀ dɛ̍ ɛ̀ nɛ-a dě kwile-ɛ, ɛ̍ mu̍ dǒ gbaɛ̍we̍ ji̍.
18“Ka mɔ̀-a nu̍-a dɛ̍-ɛ wɔ̌n-ɛɛ, mɔ̀ nu̍ dǒ-a nɛnɛ̌. Dɛ̍nu̍ɛ, nyɔ̍ ɔ̀ blě-a dɛ̍-ɛ, nɛ̀ ɔ̍ mu̍ dɛ̍ dɔu nyǐ-ɛ. Jɛ nyɔ̍ ɔ̀ se̍-a dɛ̍ blě-ɛ, nɛ̀ dɛ̍ juwɛ-a chɛ̀ ɔ̍ la̍ ɔ̍ blě-a, ɛ̍ mu̍ ɔ̍ kwa̍a̍ sà-ɛ.”
Nyɔ̍ bo ùh nu̍ Jusu de̍ ke ɔ̍ de̍di̍i̍ᵻ ɛ?
(Matio 12.46-50; Maɛ 3.31-35)
19Wɛ̀ Jusu de̍ ke ɔ̍ de̍di̍i̍ᵻ jɔ̍gbauᵻ ji̍ dǒ ɔ̍ we̍. Jɛ u̍h se̍ dě ɔ̍ we̍ nyni̍-ɛ bɛ̌ɛ. Dɛ̍nu̍ɛ, nɛ̀ nyɔ̍ tìè i̍. 20Wɛ̀ nyɔ̍ sèàɛ̍ ɔ̍ wlùh, u̍h la̍a̍, “Ìn de̍ ke ìn de̍di̍i̍ᵻ nyna i̍ dě sɔ̀n u̍h-a pɔ̀n ìn jě-ɛ i̍.”
21Jɛ Jusu la̍a̍ dě u̍h kli̍hgbɛ̍ we̍, “Nyɔ̍ ùh wɔ̌n-a Nyɔsoa-a wlu̍ wɛ̀ u̍h-a nu̍-a ɛ̍-ɛ, u̍h-u bo ùh nu̍ ǐn de̍ ke ǐn de̍di̍i̍ᵻ.”
Jusu po̍ poɔ bɔ̌ i̍
(Matio 8.23-27; Maɛ 4.35-41)
22Dǒ weɛ̍ due di̍i̍ wɛ̀ Jusu ke ɔ̍ kòà gbǎ dě blǎgbè di̍i̍. Iě ɔ̍ la̍a̍ dě u̍h we̍, “Mɔ̀ à tàn à iě dě pɛ̍nu̍ klaa la ɛ̍ fɔ̌ dɛɛ we̍ mu̍.” Wɛ̀ u̍h-a mu̍-e. 23U̍h-a mu̍-a la̍-ɛ, wɛ̀ Jusu gbǎ nyinɔ̍ i̍. Iě tìlèè poɔ ji̍ dǒ pɛ̍nu̍ kɛ̍n. Wɛ̀ nǐ-a wlǎ dě blǎgbè di̍i̍. Sɔ ɛ̍ nu̍ kanɛa dɛ̍ dǒ u̍h we̍. 24Wɛ̀ ɔ̍ kòà mu̍ dě ɔ̍ we̍. Iě u̍h bla̍ ɔ̍ kɛ̍n i̍, u̍h la̍a̍, “Dlǔtu, à ji̍ mɛ̌ la̍-a wa.”
Wɛ̀ Jusu sɔ bloɔ̍, iě ɔ̍ po̍ poɔ ke pɛ̍nu̍-a je̍ɔ̍ dǒ bɔ̌ i̍. Iě poɔ ke dǒ nɛ tùàa̍n. 25Wɛ̀ ɔ̍ la̍a̍ dě u̍h we̍, “Dɛ̍nu̍ mɔ̀ se̍ wlùh gbaɛ blě ɛ?”
Sɔ ɛ̍ po̍ u̍h faɔn iě ɛ̍ wlǔh i̍ u̍h de̍e̍, wɛ̀ u̍h-a tèle-e we̍ i̍. U̍h la̍a̍, “Dɛ̍-ɛ jɔ̍gbau we̍ la ɛ? Ɔ̍ po̍ poɔ ke dǒ bei bɔ̌ i̍, wɛ̀ i̍h-a jě ɔ̍ dɛ̍ɛ̍ wa.”
Jusu pǔh-i jeědih de̍e̍ nɛ nyɔ̍
(Matio 8.28-34; Maɛ 5.1-20)
26Wɛ̀ Jusu ke ɔ̍ kòà nyni̍ dě Kɛwlasa bloa̍ kɛ̍n, ɛ̀ nɛ-a dǒ Kaladii-a blaɛjlǐh-ɛ. 27Jusu jǎ-a dǒ gbuǔh kɛ̍n ka-ɛ, wɛ̀ jɔ̍gbau ɔ̀ jeědih nɛ-a dǒ de̍e̍ ɔ̀ tǐn-a dǒ wlɔ̀ laa̍ di̍i̍ de-ɛ ji̍ ɔ̍ wlì. Nɛ̀ ɔ̍ bɔ̌-a dɛ̍ gbɔ̀ tba̍ tìh-ɛ, ɛ̍ ti̍ tɛ̀n dlǔ wɛ̀. Ɔ̍-ɔ tǐn dě gbò, dě kǔ i̍ tè wɔ̍ᵻ di̍i̍ bo ɔ̍ tǐn. 28Ɔ̍ jě-a Jusu-ɛ, wɛ̀ ɔ̍ wǐ, iě ɔ̍ chlìi i̍ dǒ ɔ̍ jǔ. Iě ɔ̍ la̍a̍, “Jusu, Nyɔ̍ Wɔ̍n Sìì Nyɔsoa-a Jǔ, ka àn pɔ̀n ìè ǎn tìh nu̍ ɛ? Ǎn ba̍le m̀, bɔ̌ ǐn kàn gbɛ̍n-ɛ.” 29Ɔ̍ bla̍ ɛ̀ la, dɛ̍nu̍ɛ, Jusu sèàɛ̍ jeědih laa̍ wlùh ɛ̍ iě dǒ ɔ̍ de̍e̍ sɔ. Dǒ ti̍ dɔu di̍i̍-ɛ, ɛ̍ sǐ ɔ̍ kɛ̍n. Nɛ̀ u̍h-a gbɛ̍n ɔ̍-ɛ, iě u̍h-a sa̍n-ɛ ɔ̍ jɔɔdbǔᵻ. Jɛ nɛ̀ ɔ̍ chɛ̍n i̍h, wɛ̀ ɛ̍ gba̍ ɔ̍ dě kwlǎslò we̍.
30Iě Jusu tèle ɔ̍ i̍, ɔ̍ la̍a̍, “Àn nynɛ̌ ɛ?”
Iě ɔ̍ la̍a̍, “Ǎn nynɛ̌ bo Sùɛ̀.” Dɛ̍nu̍ɛ, jeědih dɔu nɛ dǒ ɔ̍ de̍e̍. 31Iě jeědih ba̍le Jusu, ɔ̍-ɔ je̍e i̍h dě kàn gbɛ̍n biě di̍i̍ dbo̍.
32Nɛ̀ be̍e̍ᵻ dɔu nɛ dǒ gbɔ̍ɔ̍-a chɛ̀ i̍h-a di̍ dɛ̍ dǒ tlu̍h gbèɛ̀n i̍. Wɛ̀ jeědih ba̍le Jusu ɔ̍ iě i̍h dǒ be̍e̍ᵻ de̍e̍ po̍. Iě ɔ̍ sà i̍h wlu̍ kɛ̍n. 33Wɛ̀ i̍h sɔ dǒ jɔ̍gbau laa̍ de̍e̍, iě i̍h gbǎ dǒ be̍e̍ᵻ de̍e̍. Wɛ̀ be̍e̍ᵻ sùɛ̀ laa̍ i̍h sà ple̍-ɛ dě gbuǔh tɔ̀ɔ̀n kɛ̍n, iě i̍h wlǎ dǒ pɛ̍nu̍ klaa kɛ̍n, wɛ̀ i̍h sie niɔ̍.
34Ùh-a gbɛ̀n-a dǒ be̍e̍ᵻ laa̍ we̍ i̍-ɛ, u̍h jě-a dɛ̍ ɛ̀ nɛ-a i̍h pùn-ɛ, iě u̍h gba̍ ple̍-ɛ wlɔ̀. Wɛ̀ u̍h po̍ i̍h-a kunǎ dǒ wlɔ̀ ɛ̍ ke u̍h-a bloa̍ kli̍hgbɛ̍ kɛ̍n i̍ ke. 35Wɛ̀ nyɔ̍gbei mu̍ dɛ̍ ɛ̀ nɛ-aɛ jě la̍-a. Iě u̍h nyni̍ dǒ Jusu we̍. Wɛ̀ u̍h jě jɔ̍gbau ɔ̀ jeědih sɔ-a dǒ de̍e̍-ɛ, nɛ̀ ɔ̍ ji̍ ɔ̍ chɛ̀ we̍ wɛ̀ ɔ̍ tè i̍ dǒ Jusu jǔ. Ɔ̍ pa̍ dɛ̍-ɛ nmɔ jii̍. Sɔ ɛ̍ po̍ u̍h kli̍hgbɛ̍ faɔn. 36Nyɔ̍ ùh jě-a ka jɔ̍gbau jeědih nɛ-a dǒ de̍e̍ de-ɛ ɔ̍ nu̍-a pǔh-ɛɛ, iě u̍h sèàɛ̍ nyɔ̍gbei wlùh. 37Wɛ̀ nyɔ̍ kli̍hgbɛ̍ ùh sɔ-a dě Kɛwlasa bloa̍-a fɔ̌ la-a we̍-ɛ, u̍h sèàɛ̍ Jusu wlùh ɔ̍ iě dǒ u̍h we̍-e sɔ. Dɛ̍nu̍ɛ, ɛ̍ po̍ u̍h faɔn kaa̍. Wɛ̀ Jusu gbǎ dě de̍ blǎgbè di̍i̍ iě ɔ̍ mu̍ de̍. 38Jɔ̍gbau ɔ̀ jeědih sɔ-a dǒ de̍e̍-ɛ, ɔ̍ ba̍le Jusu ɔ̍ ke ɔ̍ iě mu̍.
Jɛ Jusu dbo̍ ɔ̍ de̍, ɔ̍ la̍a̍, 39“Mu̍ de̍ dǒ ìn blǐ wlɔ̀ wɛ̀ ìè dɛ̍ chɛ̀ Nyɔsoa nu̍-a ìn jii̍-ɛ we̍i̍ bla̍.”
Wɛ̀ jɔ̍gbau mu̍ iě ɔ̍ ple̍ wlɔ̀ kli̍hgbɛ̍ we̍, wɛ̀ dɛ̍ Jusu nu̍-a ɔ̍ jii̍-ɛ, iě ɔ̍ bla̍ ɛ̍ we̍i̍.
Jusu sà-e nynɔ̌gbaɔ jǔ iě ɔ̍ pǔh-i nynɔ̌ due
(Matio 9.18-26; Maɛ 5.21-43)
40Jusu mu̍-a de̍-ɛ, iě nyɔ̍ dɔu laa̍ u̍h gbɛ̍n ɔ̍ tìh i̍. Dɛ̍nu̍ɛ, nɛ̀ u̍h kli̍hgbɛ̍ u̍h-a fuo ɔ̍ kɛ̍ɛ̍n. 41Wɛ̀ jɔ̍gbau due ji̍, ɔ̍ nynɛ̌ bo Jaleɔ. Ɔ̍-ɔ bo ɔ̀ kɔn Juu nyɔ̍-a wɛɛ sà gbò wlu̍ i̍. Wɛ̀ ɔ̍ chlìi i̍ dǒ Jusu jǔ. Wɛ̀ ɔ̍ ba̍le ɔ̍, ɔ̍ iě dě ɔ̍ blǐ gbò mu̍. 42Dɛ̍nu̍ɛ, ɔ̍ nynɔ̌gbaɔ jǔ due gbài̍ ɔ̍ blě-aɛ, ɔ̀ kɔn sɔ̀nᵻ nu̍-a pùè jɔ̌ sɔɔ̌n-ɛ, nɛ̀ ɔ̍ bo ɔ̀ ji̍ mɛ̌ la̍-a.
Jusu-a mu̍-a deě-ɛ, nɛ̀ nyɔ̍ tlùgbei̍ po̍ ɔ̍ dě pìe̍e̍. 43Nɛ̀ nynɔ̌ due ɔ̀ nmi̍i̍wlì wɛ̌-a nu̍-a dǒ sɔ̀nᵻá pùè jɔ̌ sɔɔ̌n di̍i̍-ɛ nɛ-o. Ɔ̍ ple̍ ɔ̍ wlǐ kli̍hgbɛ̍ dě kwɛ̍i̍n nyɔ̍ we̍. Jɛ nyɔ̍ se̍ ɔ̍ pǔh-iɛ bɛ̌ɛ. 44Wɛ̀ ɔ̍ jii dě Jusu de̍e̍, iě ɔ̍ tǔh ɔ̍ plɛ̀i̍-a mlǎ i̍. Dǒ tàdùè laa̍ ɔ̍ nymɔ̍ kǎ-ɛ. 45Wɛ̀ Jusu la̍a̍, “Nyɔ̍ bo ɔ̀ tǔh ǐn i̍ ɛ?”
Nyɔ̍ kli̍hgbɛ̍ tòlo-e. Iě Pitɛ la̍a̍, “Dlǔtu, nyɔ̍ tlùgbei̍ la ùh po̍-a ìn dě pìe̍e̍-ɛ bo ùh-a tǔh ìn i̍.”
46Jɛ Jusu la̍a̍, “Nyɔ̍ tǔh ǐn i̍ tìh-àn-wlu. Dɛ̍nu̍ɛ, ǐn juo-o dɛ̍ i̍ ka gbǐh sɔ-a dě ǐn ja̍a̍-ɛ.” 47Nynɔ̌ gbɛ̀n-a ɛ̍ ja̍ ka ɛ̍ se̍-a sìle-ɛ, iě ɔ̍ ku̍ blě tlɛ̍-ɛ ɔ̍ ji̍, wɛ̀ ɔ̍ chlìi i̍ dǒ Jusu jǔ. Wɛ̀ ɔ̍ sèàɛ̍ ɛ̍ we̍ i̍ dǒ nyɔ̍ kli̍hgbɛ̍ jlǐhwai dɛ̍ kɔn tìh ɔ̍ tǔh-a Jusu i̍ wɛ̀ ɔ̍ pǔh-a dǒ tàdùè laa̍-ɛ. 48Wɛ̀ Jusu la̍a̍ dě ɔ̍ we̍, “Nynɔ̌ chɛ̀, àn wlùh gbaɛ bo ɛ̀ nu̍ ɛ̍ wɛ̀ ìn pǔh. Mu̍ pɛlɛpɛ.”
49Jusu-a bla̍-a ɛ̀ la-ɛ, iě jɔ̍gbau due sɔ dě Jaleɔ blǐ gbò, ɔ̍ la̍a̍, “Àn nynɔ̌gbaɔ jǔ mɛ̌ wɛ̀. Bɔ̌ Dlǔtu wɔ̍ɔ̍n i̍ bɛ̌ɛ dɛ.”
50Jɛ Jusu wɔ̌n-a ɔ̍ wlu̍-ɛ, iě ɔ̍ la̍a̍ dě Jaleɔ we̍, “Bɔ̌ faɔn ple̍-ɛ, wlùh gbaɛ nɛ due bo ìè blě, nɛ̀ ɔ̍ mu̍ pǔh.”
51Jusu nyni̍-a dě Jaleɔ blǐ gbò-ɛ, ɔ̍ se̍ wɔ̌n ɔ̍ ke nyɔ̍ duuh iě-e gbò pa̍. Pitɛ ke Chɔɔn ke Chiin ke nynɔ̌gbaɔ jǔ de̍ ke ɔ̍ baa bo ùh ke ɔ̍ pa̍. 52Nɛ̀ nyɔ̍ kli̍hgbɛ̍-a fìn-i u̍h-a we̍le nynɔ̌gbaɔ jǔ-a tìh. Wɛ̀ Jusu la̍a̍, “Mɔ̀ bɔ̌ fìn-ɛ, ɔ̍ se̍ mɛ̌. Jɛ ɔ̍ mɔ̌-ɛ.”
53Wɛ̀ u̍h kli̍hgbɛ̍ kǐhlɛ Jusu. Dɛ̍nu̍ɛ, u̍h juo i̍h ka ɔ̍ mɛ̌-aɛ. 54Jɛ Jusu gbɛ̍n ɔ̍ sɔ̍n i̍, wɛ̀ ɔ̍ plǎn, ɔ̍ la̍a̍, “Nynɔ̌gbaɔ jǔ, sɔ bloɔ̍.” 55Wɛ̀ ɔ̍ feɛ ji̍ ɔ̍ we̍ dode̍, iě ɔ̍ sɔ bloɔ̍ dǒ tàdùè laa̍. Wɛ̀ Jusu sèàɛ̍ u̍h wlùh u̍h iě ɔ̍ di̍-dɛ̍ nyǐ ɔ̍ iě di̍. 56Sɔ ɛ̍ wlǔh i̍ ɔ̍ de̍ ke ɔ̍ baa de̍e̍. Jɛ Jusu nɛ̌ɛ u̍h wlu̍ dounᵻ i̍ u̍h-u je̍e nyɔ̍-o-nyɔ̍ wlùh sèàɛ̍ dǒ ɛ̀ nɛ-aɛ we̍.
Currently Selected:
Luu 8: KDNT
Highlight
Share
Copy
Want to have your highlights saved across all your devices? Sign up or sign in
The New Testament in Western Krahn published as KU̍O̍ DELEE © The Bible Society in Liberia, 1999.
