Luu 7

Jusu pǔh-i Wloma nyɔ̍-a chape-a pòi̍ju

(Matio 8.5-13)

1Jusu wɔ̀-a ìh kli̍hgbɛ̍ la nyɔ̍ wlùh sèàɛ̍-ɛ, iě ɔ̍ mu̍ dǒ Kepanium wlɔ̀ di̍i̍. 2Nɛ̀ Wloma nyɔ̍-a fledlǔ-a chape-a pòi̍ju ɔ̀ ɔ̍ jbɛɛ-a kaa̍-ɛ bo ɔ̀ poa, nɛ̀ ɔ̍ pɔ̀n mɛ̌-ɛ i̍. 3Chape laa̍ ɔ̍ wɔ̌n-a Jusu-a nynɛ̌-ɛ, wɛ̀ ɔ̍ dbo̍ Juu nyɔ̍-a nyɔ̍ klaaᵻ dě ɔ̍ we̍ u̍h iě ɔ̍ wlùh sèàɛ̍ ɔ̍ iě ɔ̍ pòi̍ju pǔh-i la̍ ji̍. 4U̍h mu̍-a dě Jusu we̍-ɛ, wɛ̀ u̍h ba̍le ɔ̍ kaa̍. U̍h la̍a̍, “Ɛ̍ blaɛ i̍ ìè ɛ̍ nu̍ dǒ ɔ̍ we̍. 5Dɛ̍nu̍ɛ, ɔ̍ jbɛɛ à nyɔ̍-ɔ, iě ɔ̍ po̍ à wɛɛ sà gbò.”

6Wɛ̀ u̍h ke Jusu mu̍. U̍h-a kɔǎn-ɛa la̍ gbò i̍-ɛ, iě chape dbo̍ ɔ̍ ba̍ᵻ dě Jusu we̍ u̍h iě ɔ̍ wlùh sèàɛ̍. Ɔ̍ la̍a̍, “Joi, bɔ̌ àn chɛ̀ wɔ̍ɔ̍n i̍ bɛ̌ɛ. Dɛ̍nu̍ɛ, ǐn se̍ dɛ̍ i̍ blaɛ ìè nɔ̌ ǐn we̍ gbò ji̍. 7Ɛ̍ kɔn ǐn se̍ dě ìn we̍ ji̍-a chɛ̀. Jɛ wlu̍ bo ìè bla̍ sǔh, nɛ̀ ǎn pòi̍ju-a mu̍ pǔh. 8Mɔ̍ la ǎn chɛ̀ nɛ dǒ nyɔ̍ sɔ̀n, iě fledlǔ nɛ dǒ ǐn sɔ̀n ke. Pò na̍a̍ dě jɔ we̍, ‘Mu̍-ɛ,’ nɛ̀ ɔ̍ mu̍-i. Pò na̍a̍ dě dɔɔ we̍, ‘Ji̍-ɛ,’ nɛ̀ ɔ̍ ji̍-i. Nɛ̀ pò na̍a̍ dě ǎn pòi̍ju we̍, ‘Nu̍ dɛ̍ la-ɛ,’ nɛ̀ ɔ̍ nu̍ ɛ̍-ɛ.”

9Jusu wɔ̌n-a ɔ̍ wlu̍ la-ɛ, sɔ ɛ̍ wlǔh i̍ ɔ̍ de̍e̍. Wɛ̀ ɔ̍ bǐi dě nyɔ̍ tlùgbei̍ ùh wɔ̀-a dǒ ɔ̍ de̍e̍-ɛ we̍. Iě ɔ̍ la̍a̍, “Ǎn sèàɛ̍ mɔ̀ wlùh, ɛ̀ jɔ̍gbau la ɔ̍ nu̍-a wlùh gbaɛ blě-ɛ, nɛ̌ se̍a ɛ̍ we̍ nyɔ̍ jě sàǐtòò da̍a Eslɔɛ bloa̍ kɛ̍n.”

10Nyɔ̍ ùh chape dbo̍-aɛ, u̍h mu̍-a dě de̍ gbò-ɛ, nɛ̀ pòi̍ju laa̍ ɔ̍ pǔh wɛ̀.

Jusu sà-e tèwànynɔ̌-a jǔ

11Ɛ̍ se̍-o wlè wɛ̀ Jusu mu̍ dǒ wlɔ̀ ɛ̀ kɔn nynɛ̌ nu̍-a Nein-ɛ di̍i̍. Ɔ̍ ke ɔ̍ kòà ke nyɔ̍ dɔu mu̍. 12Ɔ̍ nyni̍-a la̍ dǒ wlɔ̀-a chɛ̀ ɛ̍ gbàɛ̍gbà wɔ̍ɔ̍n-ɛ, nɛ̀ u̍h-a gba̍ jɔ̍gbau due i̍ tè la̍ dě wìè-i. Ɔ̍ nɛ due nu̍ ɔ̍ de̍-a jǔ, iě ɔ̍ de̍ nu̍ tèwànynɔ̌ dɛ. Nɛ̀ nyɔ̍ tlùgbei̍ sɔ dǒ wlɔ̀ u̍h-a klui ɔ̍ we̍. 13Joi jě-a nynɔ̌ laa̍-ɛ, sɔ ɛ̍ po̍ ɔ̍ wɔɛ. Iě ɔ̍ la̍a̍ dě ɔ̍ we̍, “Bɔ̌ fìn-ɛ.” 14Wɛ̀ Jusu mu̍ iě ɔ̍ tǔh dai̍ laa̍ i̍, iě ɛ̍ blě-nyɔ̍ nyna i̍. Wɛ̀ ɔ̍ la̍a̍, “Jǔgbèlà, ǎn sèàɛ̍ ìn wlùh, sɔ bloɔ̍.” 15Iě jɔ̍gbau jǔ ɔ̀ mɛ̌-a de-ɛ sɔ bloɔ̍, iě ɔ̍ tè i̍, sɔ ɔ̍ wlu la̍-ɛ sǔh. Wɛ̀ Jusu sà ɔ̍ kwlǎ dě ɔ̍ de̍ we̍.

16Sɔ ɛ̍ po̍ nyɔ̍ kli̍hgbɛ̍ faɔn, iě u̍h-a po̍ Nyɔsoa tìhwe̍. U̍h la̍a̍, “Nyɔsoa-a tu̍owli po̍ nyɔ̍-a wɔ̍n ku̍ naɛ wlǔh tà wɛ̀ nɔ̌ àɔ̀ nynɛ̌. Nyɔsoa ji̍ wɛ̀ ɔ̍ iě ɔ̍ nyɔ̍ pǔh-i.”

17Wɛ̀ pɔ̀n la ɛ̀ kɔ̍-a dǒ Jusu pùn i̍-ɛ, iě ɛ̍ sɛ̍ Judia bloa̍ kli̍hgbɛ̍ ke bloa̍ kli̍hgbɛ̍ nɛ-a ɛ̍ de̍ i̍-ɛ kɛ̍n i̍.

Chɔɔn dbo̍ ɔ̍ kòà dě Jusu we̍

(Matio 11.2-19)

18Chɔɔn-a kòà sèàɛ̍ ɔ̍ ìh kli̍hgbɛ̍ la wlùh. 19Iě ɔ̍ dǎ u̍h-a sɔɔ̌n, wɛ̀ ɔ̍ dbo̍ u̍h dě Joi we̍ u̍h iě ɔ̍ i̍ tèle-ɛ ka dǎ, “Mɔ̀ Chɔɔn la̍ ɔ̀ mu̍-a ji̍-ɛ, mɔ̀ bo ae? Àe̍e̍ à gbàɛ̀ nyɔ̍ dɔɔ-a tìh ke̍ dɛ dǒ ìn de̍e̍ ae?”

20U̍h ji̍-a dǒ Jusu we̍-ɛ, iě u̍h la̍a̍, “Chɔɔn ɔ̀ po̍-a nyɔ̍ nǐ dlǔ-ɛ, ɔ̍ dbo̍ àɔ̀ nɔ̌ ìn we̍. Ɔ̍ la̍a̍, ‘Mɔ̀ Chɔɔn la̍ ɔ̀ mu̍-a ji̍-ɛ, mɔ̀ bo ae? Àe̍e̍ à gbàɛ̀ nyɔ̍ dɔɔ-a tìh ke̍ dɛ dǒ ìn de̍e̍ ae?’ ”

21Dǒ ti̍ due laa̍ di̍i̍ nɛ̀ Jusu pǔh-i poa-nyɔ̍ dɔu, ɛ̍ ke jeědih-a de̍e̍ nɛ nyɔ̍ ke. Wɛ̀ ɔ̍ pɔ̀ni dɔ̌-nyɔ̍ dɔu-a jlǐh. 22Wɛ̀ Jusu sà u̍h-a wlu̍ pɔ̀n we̍. Ɔ̍ la̍a̍, “Mɔ̀ mu̍ de̍ mɔ̀ iě Chɔɔn kunǎ po̍ dǒ dɛ̍ᵻ mɔ̀ jě-aɛ ke dɛ̍ᵻ mɔ̀ wɔ̌n-aɛ we̍. Dɔ̌-nyɔ̍-a jě la̍ i̍, klɔ-nyɔ̍-a na la̍-ɛ, wìèìdih-a nu̍ nyɔ̍ fɛ̍nɛ wɛ̀, sǔn-nyɔ̍-a wɔ̌n la̍ i̍, mɛ̌-nyɔ̍-a wlǔh la̍-e, iě pɔ̀n chɛ̀-a bla̍-ɛ la̍ dě nyɔ̍gbà nyɔ̍ we̍. 23Nyɔ̍ ɔ̀ se̍-a se̍a̍ dǒ ǐn wlùh gbàɛ̀ we̍-ɛ, nɛ̀ ɔ̍ nmɔ i̍.”

24Chɔɔn-a kòà-a sɔ-a la̍-oɛ, wɛ̀ Jusu tè wlu-ɛ gbɔ̀ dě nyɔ̍ tlùgbei̍ laa̍ we̍ Chɔɔn tìh. Ɔ̍ la̍a̍, “Ti̍ mɔ̀ mu̍-a dě Chɔɔn we̍ kwlǎslò we̍-ɛ, dɛ̍ mɔ̀ mu̍ i̍ jě la̍ ɛ? Dli̍h wlɔ̍nᵻ ìh poɔ-a gba̍-a, i̍h bo mɔ̀ mu̍ i̍ jě la̍ ae? 25Dɛ̍ mɔ̀ mu̍ i̍ jě la̍ ɛ? Mɔ̀ mu̍ jlii̍ chɛ̀-ɛ pa̍ nyɔ̍ i̍ jě la̍ ae? Iěe, nyɔ̍ ùh-a pa̍-a jlii̍ kaɛn la iě u̍h-a nu̍-a kmɔ̌ chɛ̀-ɛ, nɛ̀ dě blǔh baa blǐ gbò bo u̍h-a nɛ. 26Nɛ̀ dɛ̍ mɔ̀ mu̍ i̍ jě la̍-a la̍ ɛ? Nyɔsoa-a tu̍owli po̍ nyɔ̍ bo mɔ̀ mu̍ i̍ jě la̍ ae? I̍i̍n, kǎ ɛ̍ nɛ, jɛ jɔ mɔ̀ jě-a ka-ɛ, ɔ̍ sìì Nyɔsoa-a tu̍owli po̍ nyɔ̍-a chɛ̀. 27Ɔ̀ la ɔ̍ kɔn tìh bo Nyɔsoa-a wlu̍ la̍a̍, ‘Ǎn mu̍ ǎn tu̍owli po̍ nyɔ̍ nya̍ dbo̍ dě ìn jǔ, ɔ̍ iě àn wìè gba̍a̍ po̍.’ 28Ǎn sèàɛ̍ mɔ̀ wlùh, nyɔ̍ se̍ nɔ̌ kmɔ̌ la we̍ nɛ ɔ̍ iě wɔ̍n ku̍ ɔ̍ iě Chɔɔn sìì. Jɛ ɔ̀ se̍-a dɛ̍kɛ̍n gbǎ kaa̍ dě Nyɔsoa-a kmɔ̌ wlu̍ i̍ kɔn-ɛ di̍i̍-ɛ, ɔ̍ ku̍ wɔ̍n ɔ̍ sìì Chɔɔn.”

29Nyɔ̍ kli̍hgbɛ̍ wɔ̌n ìh la-a, ɛ̍ ke taa̍sìh sà nyɔ̍ ke. Chɔɔn wɔ̀-a u̍h nǐ dlǔ po̍-ɛ, ɛ̍ kɔn u̍h wɔ̌ɛn Nyɔsoa-a i̍ slɛ̌-ɛ tìh i̍. 30Jɛ Fɛlesii nyɔ̍ ke telě nǎ poe nyɔ̍ nɔ̀ɔ̍, dɛ̍ Nyɔsoa-a pɔ̀n-a u̍h iě-a nu̍-ɛ, ɛ̍ bo u̍h tba̍ chla, iě u̍h se̍ wɔ̌n Chɔɔn iě u̍h nǐ dlǔ po̍.

31Wɛ̀ Jusu la̍a̍, “Dɛ̍ we̍ bo iě ti̍laa nyɔ̍ la i̍ blaɛ ɛ? Dɛ̍ we̍ bo u̍h wɔ̀ ɛ? 32U̍h wɔ̀ nynuu̍plìh ùh nɛ-a dě dɔɔ̌-gbale̍e̍, wɛ̀ u̍h-a nu̍-a po̍-e ìn ba̍ we̍ wlu̍ ìn ba̍ po̍-e ìn we̍ wlu̍-ɛ. U̍h la̍a̍, ‘À ble̍ mɔ̀-a nynɔ̌ jla̍ ja duǐh, wɛ̀ mɔ̀ se̍ de̍le. Wɛ̀ à ble̍ kǔ-a mɛ̌-ɛ duǐh, iě mɔ̀ se̍ fìn.’ 33Chɔɔn ɔ̀ po̍-a nyɔ̍ nǐ dlǔ-ɛ ji̍-aɛ, iě ɔ̍ po̍ jlǔh, wɛ̀ ɔ̍ se̍ nmɔ̍ wɔ̍n tɛ̀n. Iě mɔ̀ la̍a̍, ‘Ɔ̍ blě jeědih dǒ ɔ̍ de̍e̍.’ 34Nyi̍ɔ̍-a Jǔ ji̍-aɛ, iě ɔ̍ di̍ dɛ̍ wɛ̀ ɔ̍ nǎ. Iě mɔ̀ la̍a̍, ‘Ɔ̍ nyni wɔ̍i̍n iě ɔ̍ sìèè ɔ̍ chɛ̀ nmɔ̍ wlì. Gbɛ̀n-e, ɔ̍ ke taa̍sìh sà nyɔ̍ ke gblɛ̍n sɔ̀ɛ̀n nyɔ̍ jbɛɛ.’ 35Jɛ Nyɔsoa-a flɔ̍nwlùh-a flɔn-ɛ ɛ̍ chɛ̀ we̍i̍ dě ɔ̍ nynuu̍ kli̍hgbɛ̍ we̍.”

Jusu mu̍ dě Samo blǐ gbò

36 Fɛlesii jǔ due dǎ Jusu ɔ̍ ke ɔ̍ iě dɛ̍ tàdùè di̍ i̍. Wɛ̀ Jusu mu̍ dě ɔ̍ blǐ gbò, iě ɔ̍ tè i̍ dǒ teble̍ gbɔ̀. 37Nɛ̀ nynɔ̌ due nɛ dǒ wlɔ̀ laa̍ di̍i̍ ɔ̍ nu̍ gblɛ̍n sɔ̀ɛ̀n nyɔ̍. Dǒ ɔ̍ wɔ̌n-ɛ pɔ̀n ka Jusu-a di̍-a dɛ̍ dě Fɛlesii jǔ blǐ gbò-ɛ. Wɛ̀ ɔ̍ gba̍ alebasla sòlɛ̀ ɛ̀ nɔ̌ chlǎn nɛ-a dě di̍i̍-ɛ. 38Wɛ̀ ɔ̍ nyna dǒ Jusu de̍e̍ i̍ dǒ ɔ̍ bu̍hᵻ we̍ ka, wɛ̀ ɔ̍ fìn. Iě ɔ̍ mǐtɛɛn wlǎ-ɛ Jusu-a bu̍hᵻ ja̍i̍. Wɛ̀ nynɔ̌ nu̍ ɔ̍ mǐ iě ɔ̍ slǎn Jusu-a bu̍hᵻ i̍, wɛ̀ ɔ̍ gblèè i̍h wlì, iě ɔ̍ tli̍ i̍h nɔ̌ chlǎn i̍. 39Fɛlesii jǔ ɔ̀ dǎ-a Jusu dɛ̍ di̍ la̍-ɛ, ɔ̍ gbɛ̀n-a nynɔ̌-a nu̍-dɛ̍ ja̍-ɛ, iě ɔ̍ la̍a̍ dě ɔ̍ chɛ̀ di̍i̍, “Pò jɔ̍gbau la ɔ̍ tù Nyɔsoa-a tu̍owli po̍ nyɔ̍ de chɛ̀ɛ̌chɛ̀-ɛ, nɛ̀ nynɔ̌ la ɔ̀ tǔh-a ɔ̍ i̍-ɛ, ka ɔ̍ nu̍-a gblɛ̍n sɔ̀ɛ̀n nyɔ̍-ɛ, nɛ̀ ɔ̍ mu̍-o dɛ̍ i̍ juo de.”

40Wɛ̀ Jusu wlu dě ɔ̍ we̍. Ɔ̍ la̍a̍, “Samo, ǐn blě dɛ̍ iě ìn wlùh sèàɛ̍.”

Iě Samo la̍a̍, “Dlǔtu, ɛ̍ nynɛ̌ ɛ?”

41Jusu la̍a̍, “Jɔ̍gbauᵻ sɔɔ̌n bo ùh gbɛ̍n gba̍ dě wlǐ gba̍a̍ po̍ nyɔ̍ due we̍. Due gbɛ̍n sebla̍ wlǐ-a kmɛ m̀m̌ (500) i̍, iě dɔɔ gbɛ̍n kwela m̀m̌ i̍. 42Jɛ u̍h se̍ i̍h de̍ pɛ̌ɛ bɛ̌ɛ-ɛ. Wɛ̀ jɔ̍gbau wa̍n ɔ̍ wlǐ-a chɛ̀ kɛ̍n. Nɛ̀ɛ̍, u̍h nɛ-a sɔɔ̌n-ɛ, nyɔ̍we̍ bo ɔ̀ mu̍ ka ɔ̍-ɔ jbɛɛ ɔ̀ iě ɔ̍ ba̍ sìì ɛ?”

43Samo la̍a̍, “Ǐn juo ɛ̍-ɛ, ɔ̀ kɔn wlǐ tìè-a i̍-ɛ bo.”

Wɛ̀ Jusu la̍a̍ dě ɔ̍ we̍, “Àn sà tìh-a taǐn.” 44Wɛ̀ Jusu fèàɛ̀ dě nynɔ̌ we̍, iě ɔ̍ la̍a̍ dě Samo we̍, “Àn jě nynɔ̌ la ae? Ǐn ji̍-a nɔ̌ ìn blǐ gbò-ɛ, ìn se̍ ǐn nǐ nyǐ iě ǎn bu̍hᵻ dle. Jɛ ɔ̍ dle ǎn bu̍hᵻ wɛ̀ dǒ ɔ̍ mǐtɛɛn we̍, wɛ̀ ɔ̍ nu̍ ɔ̍ mǐ iě ɔ̍ slǎn i̍h ja̍ i̍. 45Mɔ̀ɔ̍ ìn se̍ ǐn gblèè, jɛ sɔ dě ǎn gbò pa̍ la̍-ɛ, ɔ̍-ɔ se̍a ǎn bu̍hᵻ wlì gblèè-ɛ bɔ̌. 46Ìn se̍ ǐn chlǎn dlǔ po̍. Jɛ ɔ̍ tli̍ ǎn bu̍hᵻ nɔ̌ chlǎn i̍. 47Ɛ̍ tìh-ɛ, ǎn sèàɛ̍ ìn wlùh, ɔ̍ gblɛ̍n sɔ̀ɛ̀n dɔu la i̍h-a tìh tǎli-ɛ i̍. Ɛ̍ kɔn ɔ̍ jbɛɛ wlùh bɛ̌ i̍ kaa̍. Nyɔ̍ ɔ̀ kɔn gblɛ̍n sɔ̀ɛ̀n wei-a tìh tǎli-ɛ i̍-ɛ, nɛ̀ ɔ̍ jbɛɛ wlùh wàn i̍.”

48Wɛ̀ Jusu la̍a̍ dě nynɔ̌ laa̍ we̍, “Àn gblɛ̍n sɔ̀ɛ̀n-a tìh tǎli-ɛ i̍ wɛ̀.”

49Nyɔ̍ ùh ke ɔ̍ tè-a i̍ dǒ teble̍ gbɔ̀-ɛ, iě u̍h tè wlu-ɛ gbɔ̀ dě u̍h-a chɛ̀ we̍. U̍h la̍a̍, “Jɔ̍gbau la ka ɔ̍ ka̍ nɛ wɛ̀ ɔ̍ tǎli gblɛ̍n sɔ̀ɛ̀n-a tìh i̍ ɛ?”

50Wɛ̀ Jusu la̍a̍ dě nynɔ̌ laa̍ we̍, “Àn wlùh gbaɛ bo ɛ̀ pǔh-i m̀. Mu̍ pɛlɛpɛ.”

Currently Selected:

Luu 7: KDNT

Highlight

Copy