Chɔɔn 9

Jusu pǔh-i jɔ̍gbau ɔ̀ wlǔh-ia dɔ̌-ɛɛ

1Ti̍ Jusu-a sì-aɛ, dǒ ɔ̍ jě-e jɔ̍gbau due ɔ̀ sà-a dɔ̌-ɛ dě ɔ̍ de̍ di̍i̍-ɛ. 2Wɛ̀ ɔ̍ kòà tèle ɔ̍ i̍, u̍h la̍a̍, “Dlǔtu, jɔ̍gbau la ɔ̀ sà-a dɔ̌-ɛ dě ɔ̍ de̍ di̍i̍-ɛ, nɛ̀ nyɔ̍ kɔn gblɛ̍n sɔ̀ɛ̀n-a tìh bo ɛ? Ɔ̍ chɛ̀-a gblɛ̍n sɔ̀ɛ̀n bo ɛɛ, àe̍e̍ ɔ̍ de̍ bei-a gblɛ̍n sɔ̀ɛ̀n bo ae?”

3Jusu la̍a̍, “Ɔ̍ dɔ̌-ɛ se̍ dě ɔ̍ chɛ̀-a gblɛ̍n sɔ̀ɛ̀n ke ɔ̍ de̍ bei-a gblɛ̍n sɔ̀ɛ̀n we̍ dɛ̍ i̍ po̍. Jɛ ɔ̍ dɔ̌-ɛ wɛ̀ ka Nyɔsoa-a gbǐh-a nu̍-a dbo̍-ɛ, iě nyɔ̍ɔ iě ɛ̍ jě dǒ ɔ̍ pùn. 4Nyɔ̍ ɔ̀ dbo̍-a m-ɛ, à kɔn à iě ɔ̍ dbo̍ nu̍ duedɛ, ka sɔ̀n sɛ̀n-a ke̍-ɛ. Wlù-a mu̍ ka wɔ̀ tiɔ, nɛ̀ nyɔ̍ se̍ dbo̍ nu̍-ɛ bɛ̌ɛ dɛ. 5Ka ǐn nɛ-a nɔ̌ kmɔ̌ we̍-ɛ, nɛ̀ mɔ̍ bo ɔ̀ nyǐ kmɔ̌ la sɔ̀npli.”

6Ɔ̍ wɔ̀-a dɛ̍ la wlu-ɛɛ, wɛ̀ ɔ̍ po̍ tɔ̍n dǒ bloɔ̍, iě ɔ̍ pla̍ pɔlɔ̌ dǒ tɔ̍n laa̍ we̍. Wɛ̀ ɔ̍ tli̍ ɛ̍ dǒ jɔ̍gbau laa̍ jlǐh kɛ̍ɛ̍n i̍. 7Iě ɔ̍ sèàɛ̍ ɔ̍ wlùh ɔ̍ iě jua̍a̍ i̍ dle la̍ mu̍ dǒ dle-wloo kɔn nynɛ̌ nu̍-a Sailowɔun-ɛ kɛ̍n. (Nynɛ̌ la ɛ̍ gbɔ̀ nu̍ Dbo̍.) Iě jɔ̍gbau mu̍ ɔ̍ dle jua̍a̍ i̍. Ɔ̍ ji̍-a de̍-ɛ, nɛ̀ ɔ̍ jě la̍ i̍.

8Wɛ̀ ɔ̍ ba̍ᵻ ke juh jě-a ɔ̍ slɔ̀ la̍ wɛ̀ sàì-ɛ, iě u̍h la̍a̍, “Jɔ̍gbau ɔ̀ tè-a i̍ ɔ̀ bɛ̌ɛ-a nyɔ̍ we̍ slɔ̀ dɛ laa̍, ɛ̍ se̍ ɔ̀ la ae?”

9Duuh la̍a̍, “Ɔ̍-ɔ bo.” Jɛ duuh la̍a̍, “Iěe, ɛ̍ se̍ ɔ̍ mɔ, ɔ̍ ke ɔ̍ wɔ̀ɛ-ɛ sǔh.”

Iě jɔ̍gbau-a chɛ̀ la̍a̍, “Mɔ̍ bo.”

10Wɛ̀ u̍h la̍a̍ dě ɔ̍ we̍, “Nɛ̀ ka àn jlǐh nu̍ iě i̍h pɔ̀ni ɛ?”

11Ɔ̍ la̍a̍, “Jɔ̍gbau due u̍h-a dǎɛ-a Jusu-ɛ, ɔ̍ bo ɔ̀ pla̍ pɔlɔ̌ iě ɔ̍ tli̍ i̍h dǒ ǐn jlǐh kɛ̍ɛ̍n i̍. Wɛ̀ ɔ̍ sèàɛ̍ ǐn wlùh iě jua̍a̍ i̍ dle la̍ mu̍ dě Sailowɔun kɛ̍n. Iě ǐn mu̍ wɛ̀ ǐn dle jua̍a̍ i̍, sɔ ǎn jě la̍ i̍ sǔh.”

12Wɛ̀ u̍h la̍a̍, “Tà ɔ̍ nɛ ɛ?”

Ɔ̍ la̍a̍, “Ǐn se̍-o juo.”

Fɛlesii nyɔ̍-a pɔ̀n nyɔ̍ pǔh-ia jɔ̍gbau-ɛ juo-ɛ i̍

13Jɔ̍gbau ɔ̀ dɔ̌-a de-ɛ, wɛ̀ u̍h gba̍ ɔ̍ dě Fɛlesii nyɔ̍ we̍. 14Ti̍ Jusu iě-a pɔlɔ̌ laa̍ pla̍ wɛ̀ ɔ̍ pɔ̀ni-a jɔ̍gbau-a jlǐh-ɛ, nɛ̀ ɛ̍ nu̍ dǒ Juu nyɔ̍-a wlè-weɛ̍ di̍i̍. 15Wɛ̀ Fɛlesii nyɔ̍ tèle ɔ̍ i̍ dɛ ke, ka ɔ̍ jlǐh nu̍-a iě i̍h pɔ̀ni-aɛ. Ɔ̍ la̍a̍, “Ɔ̍ po̍ pɔlɔ̌ dǒ ǐn jlǐh kɛ̍ɛ̍n, wɛ̀ ǐn dle jua̍a̍ i̍, sɔ ǎn jě la̍ i̍ sǔh.”

16Fɛlesii nyɔ̍-a duuh la̍a̍, “Jɔ̍gbau la ɔ̍ se̍ dě Nyɔsoa we̍ sɔ ka̍ nɛ, dɛ̍nu̍ɛ, ɔ̍ se̍ wlè-weɛ̍ dɛ̍ɛ̍ jě.”

Wɛ̀ duuh la̍a̍, “Nɛ̀ gblɛ̍n sɔ̀ɛ̀n nyɔ̍we̍ bo ɔ̀ bɛ̌ɛ ɔ̀ iě jbaɛdih kaɛn la po̍ ɛ?” Sɔ u̍h-a wlu̍ se̍ due nɛ dɛ.

17Wɛ̀ u̍h tèle jɔ̍gbau laa̍ i̍ dɛ, u̍h la̍a̍, “Mɔ̀ jɔ kɔn jlǐh ɔ̍ pɔ̀ni-aɛ, ka ìn dǎ ɔ̍ tìh ɛ?”

Ɔ̍ la̍a̍, “Nyɔsoa-a tu̍owli po̍ nyɔ̍ bo.”

18Jɔ̍gbau la ka ɔ̍ dɔ̌-a de wɛ̀ ɔ̍ iě-a ka i̍ jě-ɛ, Juu nyɔ̍-a nyɔ̍ klaaᵻá chɛ̀ se̍ i̍h tìh chɛ̀ po̍ de. Wɛ̀ u̍h dǎ ɔ̍ de̍ ke ɔ̍ baa. 19Wɛ̀ u̍h tèle u̍h i̍, u̍h la̍a̍, “Ɔ̀ la mɔ̀-a jǔ bo ae? Na̍ mɔ̀ la̍ ɔ̍ sà dɔ̌-ɛ dě ɔ̍ de̍ di̍i̍ de lě. Ka ɛ̍ nu̍ wɛ̀ ɔ̍ jě ka i̍ ɛ?”

20Ɔ̍ de̍ ke ɔ̍ baa la̍a̍, “À jǔ nɔ̀ɔ̍ bo gbàkla̍a̍, ɔ̍ iě-a wlǔh-ɛ nɛ̀ ɔ̍ dɔ̌-ɛ. 21Jɛ ka ɛ̍ nu̍-a wɛ̀ ɔ̍ jě-a ka i̍-ɛ, à se̍ ɛ̍ juo. Nyɔ̍ ɔ̀ pɔ̀ni-a ɔ̍ jlǐh-ɛ, à se̍ ɔ̍ juo. Mɔ̀ tèle ɔ̍ chɛ̀ i̍, ɔ̍ se̍ jǔwɛ dɛ. Ɔ̍ mu̍ ɔ̍ chɛ̀-a tìh we̍ i̍ sèàɛ̍.” 22Ɔ̍ de̍ bei-a ple̍ Juu nyɔ̍-a nyɔ̍ klaaᵻ jǔ dɛbo ɛ̍ kɔn u̍h dǎ laǎn. Dɛ̍nu̍ɛ, u̍h la̍ nyɔ̍ mu̍-a Jusu-a Nyɔsoa-a Chèɛ̀ Tba̍ju tìh i̍ sà-a, nɛ̀ ɔ̍ bɔ̌ dě Juu nyɔ̍-a wɛɛ sà gbò sɔ̀n i̍ sǐ-ɛ dɛ. 23Ɛ̍ kɔn ɔ̍ de̍ bei la̍a̍, “Ɔ̍ se̍ jǔwɛ dɛ, mɔ̀ tèle ɔ̍ i̍.”

24Wɛ̀ u̍h dǎ-ɛ jɔ̍gbau ɔ̀ dɔ̌-a de-ɛ de̍ dɛ. U̍h la̍a̍, “Ji̍ ìè slɛ̀ɛ̀n, ka àn mu̍-a tìh-a taǐn sà da̍a Nyɔsoa jǔ-ɛ. Dɛ̍nu̍ɛ, jɔ̍gbau la ɔ̀ pɔ̀ni-a àn jlǐh-ɛ, à juo ɛ̍-ɛ gblɛ̍n sɔ̀ɛ̀n nyɔ̍ bo.”

25Jɔ̍gbau la̍a̍, “Pò ɔ̍-ɔ gblɛ̍n sɔ̀ɛ̀n nyɔ̍ iě pò ɔ̍ se̍ gblɛ̍n sɔ̀ɛ̀n nyɔ̍, ǐn se̍ ɛ̍ juo. Dɛ̍ due ǐn juo-a sǔh-ɛ, ɛ̍ nu̍, ǐn dɔ̌-ɛ de, jɛ ǎn jě la̍ i̍.”

26Wɛ̀ u̍h tèle ɔ̍ i̍, u̍h la̍a̍, “Ka ɔ̍ nu̍ àn jlǐh pɔ̀ni ɛ?”

27Ɔ̍ la̍a̍, “Ǐn sèàɛ̍ mɔ̀ wlùh wɛ̀ sàǐtòò, iě mɔ̀ se̍ nɔ̌ ǐn we̍ dounᵻ po̍-ɛ i̍ pɔ̀n. Nɛ̀ dɛ̍ mɔ̀-a pɔ̀n-ɔ wɔ̌n-ɛ i̍ dɛ dode̍ ɛ? Mɔ̀-a pɔ̀n mɔ̀ iě ɔ̍ kòà nu̍ ke ae?”

28Wɛ̀ u̍h chlèe ɔ̍, iě u̍h la̍a̍, “Mɔ̀ bo ɔ̀ iě ɔ̍ kòà nu̍ sǔh, àɔ̀ nɔ̀ɔ̍, àɔ̀ Mose-a kòà. 29À juo ɛ̍-ɛ, Nyɔsoa wlu dě Mose we̍, jɛ jǔ jɔ la tà ɔ̍ sɔ-aɛ, à se̍-o juo.”

30Jɔ̍gbau la̍a̍, “Mɔ̍ɔ, nɛ̀ ǐn se̍ ɛ̍-ɛ sà ka̍ juo dɛ. Mɔ̀ la̍ mɔ̀ se̍ ɔ̍ sɔ la̍ juo, jɛ mɔ̍ɔ, ɔ̍ pɔ̀ni ǎn jlǐh. 31À juo ɛ̍-ɛ, ka Nyɔsoa nɔ̀ɔ̍, ɔ̍-ɔ po̍-a dě gblɛ̍n sɔ̀ɛ̀n nyɔ̍ we̍ dounᵻɛ́. Jɛ pò nyɔ̍ nu̍ ɔ̍ wɛɛ sà nyɔ̍ wɛ̀ ɔ̍ iě ɔ̍ wlùh nu̍-ɛ, nɛ̀ ɔ̍ po̍ dě ɔ̍ we̍ dounᵻ. 32Sɔ dě kmɔ̌-a gbɔ̀ tè la̍-ɛ, nyɔ̍ ɔ̀ sà-a dɔ̌-ɛ dě ɔ̍ de̍ di̍i̍-ɛ, nyɔ̍-ɔ se̍a ɔ̍ jlǐh pɔ̀ni sàǐtòò wɛ̀ à iě i̍h wɔ̌n. 33Jɔ̍gbau la pò ɔ̍ se̍ dě Nyɔsoa we̍ sɔ de-ɛ, nɛ̀ ɔ̍ se̍ dɛ̍ wɛ-a chɛ̀ nu̍-ɛ bɛ̌ɛ de.”

34Wɛ̀ u̍h la̍a̍, “Mɔ̀ jɔ wlǔh-ia dě gblɛ̍n sɔ̀ɛ̀n di̍i̍-ɛ, mɔ̀ bo ɔ̀ pɔ̀n à nǎ po̍-ɛ i̍ ae?” Iě u̍h sà ɔ̍ dě wɛɛ sà gbò sɔ̀n, u̍h po̍ ɔ̍ sɔ̀n.

Jusu ji̍-i wɛ̀ dɔ̌-nyɔ̍ iě i̍ jě

35Ka u̍h po̍-a jǔ laa̍ sɔ̀n-ɛ, i̍h bo Jusu wɔ̌n. Ɛ̍ kɔn ɔ̍ jě-a ɔ̍-ɛ, iě ɔ̍ la̍a̍, “Ɔ̀ nu̍-a Nyi̍ɔ̍-a Jǔ-ɛ, ìn gbaɛ ɔ̍ wlùh ae?”

36Jɔ̍gbau la̍a̍, “Nyɔ̍ klaa, nyi̍ɔ̍tu we̍ bo ɛ? Sèàɛ̍ ǐn wlùh, wɛ̀ iě ɔ̍ wlùh gbaɛ.”

37Jusu la̍a̍ dě ɔ̍ we̍, “Ìn jě ɔ̍ wɛ̀, ɔ̍ bo ɔ̀ wlu-a dě ìn we̍.”

38Jɔ̍gbau la̍a̍, “Joi, ǐn blě wlùh gbaɛ-ɛ.” Wɛ̀ ɔ̍ chlìi i̍ ɔ̍ sà Jusu wɛɛ.

39Jusu la̍a̍, “Ǐn ji̍-i gblɛ̍n sɔ̀ɛ̀n iě kɛ̍n nyɛ nɔ̌ kmɔ̌ we̍. Wɛ̀ dɔ̌-nyɔ̍ iě i̍ jě, iě juh-a jě-a i̍-ɛ, u̍h iě dɔ̌.”

40 Fɛlesii nyɔ̍-a duuh nɛ-a dǒ ɔ̍ we̍-ɛ, sɔ u̍h wɔ̌n ɔ̍ wlu̍ laa̍, iě u̍h tèle ɔ̍ i̍, u̍h la̍a̍, “Nɛ̀ àɔ̀ bo à dɔ̌ àn dǎ ae?”

41Wɛ̀ Jusu la̍a̍ dě u̍h we̍, “Pò mɔ̀ dɔ̌ de-ɛ, nɛ̀ mɔ̀-a gblɛ̍n sɔ̀ɛ̀n se̍ mɔ̀ kɛ̀n sà mu̍ de. Jɛ ka mɔ̀ la̍ mɔ̀-a jě-a i̍-ɛ, nɛ̀ mɔ̀ se̍ kɛ̀n gba̍ bo ke̍.”

Currently Selected:

Chɔɔn 9: KDNT

Highlight

Copy