Chɔɔn 8

Nyɔ̍gbei gba̍ nynɛ̌à nu̍ nynɔ̌ dǒ Jusu we̍

[ 1Wɛ̀ nyɔ̍ kli̍hgbɛ̍ mu̍ gbòᵻ we̍ i̍, iě Jusu mu̍ dě Ɔle-Tu̍ᵻá tlu̍h kɛ̍n. 2Sɔ̀n sɛ̀n-aɛ, iě ɔ̍ tlùìn ɔ̍ mu̍ dě de̍ Nyɔsoa-a slaǎ sà gbò sɔ̀n, iě nyɔ̍ɔ kli̍hgbɛ̍ gbòe i̍ dǒ ɔ̍ we̍. Wɛ̀ ɔ̍ tè i̍, iě ɔ̍ po̍ u̍h nǎ. 3Dǒ u̍h nɛ wɛ̀ telě nǎ poe nyɔ̍ ke Fɛlesii nyɔ̍ ja nynɔ̌ u̍h gbɛ̍n-a dǒ nynɛ̌à nu̍ la̍-ɛ dǒ ɔ̍ we̍. Iě u̍h nyna-ɛ ɔ̍ i̍ dǒ u̍h jǔ. 4Wɛ̀ u̍h la̍a̍ dě Jusu we̍, “Dlǔtu, nynɔ̌ la à gbɛ̍n-ɛ ɔ̍ dǒ nynɛ̌à nu̍ la̍-a. 5Nɛ̀ɛ̍, Mose-a telě sèàɛ̍ à wlùh à iě nynɔ̌ kaɛn laa̍ sɔɔ̌ᵻ i̍ tbaɛ ɔ̍ iě mɛ̌. Ka ìn dǎ ke ɛ?” 6Ɛ̀ u̍h-a nu̍-aɛ, nɛ̀ u̍h-a tǐhlɔ Jusu wɛ̀ u̍h iě ɔ̍ tìh pùn tù. Sɔ ɔ̍ bla̍ jii̍ wlù sǔh, iě ɔ̍ nu̍ chèɛ̀ ɔ̍ chlǐh dǒ bloɔ̍. 7Jɛ dɛ̍ u̍h-a nu̍-a ɔ̍ i̍ tèle-ɛ, wɛ̀ ɔ̍ sà jii̍ wlù, iě ɔ̍ la̍a̍ dě u̍h we̍, “Nyɔ̍ ɔ̀-ɔ se̍a gblɛ̍n sɔ̀ɛ̀n nu̍ dě mɔ̀ nynɛ̌-ɛ, ɔ̍ bo ɔ̀ iě sàǐtòò nyɔ̍ nu̍ ɔ̀ iě ɔ̍ sɔɔ̌ gbo̍ po̍-e.” 8Iě ɔ̍ bla̍ jii̍ wlù dode̍ ɔ̍ nu̍ chèɛ̀ ɔ̍ chlǐh dǒ bloɔ̍. 9Jɛ u̍h wɔ̌n-a wlu̍ la-ɛ, sɔ u̍h-a due due-a mu̍ la̍-ɛ sǔh. U̍h-a nyɔ̍ klaa bo ɔ̀ mu̍ sàǐtòò. Wɛ̀ nynɔ̌ nyna i̍ te̍e̍ iě ɔ̍ ke Jusu nɛ due sie-o. 10Jusu sà-a jii̍ wlù-ɛ, wɛ̀ ɔ̍ la̍a̍ dě nynɔ̌ we̍, “Nynɔ̌ chɛ̀, tà u̍h nɛ wɛ̀ ɛ? Nyɔ̍ se̍ da̍a nɛ dɛ ɔ̍ iě ìn tìh gbɛ̍n-ɛ ae?”

11Ɔ̍ la̍a̍, “I̍i̍n, nyɔ̍ klaa, u̍h-a nyɔ̍ se̍ da̍a nɛ dɛ.”

Wɛ̀ Jusu la̍a̍, “Ǎn chɛ̀ ǐn se̍ ìn tìh gbɛ̍n-ɛ ke. Mu̍, jɛ bɔ̌ gblɛ̍n sɔ̀ɛ̀n nu̍-ɛ dɛ o.”]

Jusu bo ɔ̀ nyǐ nyɔ̍ sɔ̀npli

12Wɛ̀ Jusu wlu dě Fɛlesii nyɔ̍ we̍ dɛ, ɔ̍ la̍a̍, “Mɔ̍ bo ɔ̀ nu̍ kmɔ̌ la ɛ̍ sɔ̀npli. Nyɔ̍ jɔ mu̍-a dǒ ǐn de̍e̍ gbǎ-ɛ, nɛ̀ ɔ̍ se̍ dě kwile-e na-ɛ mu̍, jɛ nɛ̀ ɔ̍ mu̍ sɔ̀npli ɛ̀ nyǐ-a nyɔ̍ feɛ-ɛ blě.”

13Fɛlesii nyɔ̍ la̍a̍ dě ɔ̍ we̍, “Ka àn nu̍-a àn chɛ̀-a sàànsi̍i̍h-ɛ, nɛ̀ dɛ̍ àn sà-aɛ, ɛ̍ se̍ tìh-a taǐn.”

14Jusu la̍a̍, “Pò ǎn jɛ ja ǎn chɛ̀-a sàànsi̍i̍h nu̍-ɛ, dɛ̍ ǐn sà-aɛ, nɛ̀ tìh-a taǐn bo. Dɛ̍nu̍ɛ, ǐn juo tà ǐn sɔ-aɛ ke tà ǎn mu̍-aɛ. Jɛ tà ǐn sɔ-aɛ ke tà ǎn mu̍-aɛ, mɔ̀ se̍-o juo. 15Mɔ̀-a chɛ̍n tìh i̍ ka wlɔ̀ nyi̍ɔ̍-ɛ, wɛ̀ mɔ̍ɔ, nɛ̌ pa̍ nyɔ̍-a taɔ. 16Pò ǎn jɛ ja nyɔ̍-a taɔ pa̍ de-ɛ, nɛ̀ ɛ̍ mu̍ tìh-a taǐn nu̍ ke de. Dɛ̍nu̍ɛ, ǐn se̍ due nɛ, ǐn Baa jɔ dbo̍-a m-ɛ, ɔ̍ ke ǐn ke à tǐn. 17Ɛ̍ chlǐh-ɛ dě mɔ̀-a telě di̍i̍ ka pò sàànsi̍i̍h sɔɔ̌n-a wlu̍ nɛ due-ɛ, nɛ̀ ɛ̍ nu̍-a tìh-a taǐn-ɛ. 18Ǎn nu̍ ǎn chɛ̀-a sàànsi̍i̍h, iě Baa jɔ dbo̍-a m-ɛ, wɛ̀ ɔ̍ nu̍ ǎn sàànsi̍i̍h ke.”

19Wɛ̀ u̍h la̍a̍, “Tà ìn Baa nɛ ɛ?”

Jusu la̍a̍, “Ka mɔ̀ se̍-a ǐn juo-ɛ, nɛ̀ mɔ̀ se̍ ǐn Baa juo ke. Pò mɔ̀ juo m de-ɛ, nɛ̀ mɔ̀-a mu̍ ǐn Baa juo ke de.”

20Jusu iě-a ìh kli̍hgbɛ̍ la wlu-ɛ, nɛ̀ ɔ̍ po̍ nǎ dě Nyɔsoa-a slaǎ sà gbò sɔ̀n dě fɔ̌ kɔn we̍ Nyɔsoa dɛ̍ nyǐ gblòùn tè-a i̍-ɛ. Jɛ nyɔ̍ se̍ ɔ̍ gbɛ̍n, dɛ̍nu̍ɛ, nɛ̀ ɛ̍ ti̍ se̍-o nyni̍ ke̍.

Jusu sèàɛ̍ nyɔ̍gbei wlùh ɔ̍ chɛ̀-a tìh

21Jusu la̍a̍ dě u̍h we̍ dɛ, “Ǎn mu̍ la̍ ǎn dɛ̍, wɛ̀ mɔ̀ iě ǐn i̍ pɔ̀n. Jɛ nɛ̀ mɔ̀-a mu̍ mɛ̌ dě mɔ̀-a gblɛ̍n sɔ̀ɛ̀n di̍i̍. Tà ǎn mu̍-aɛ, mɔ̀ se̍-e mu̍-ɛ bɛ̌ɛ mu̍.”

22Wɛ̀ Juu nyɔ̍-a nyɔ̍ klaaᵻ la̍a̍, “Ka ɔ̍ la̍ tà ɔ̍ mu̍-aɛ, à se̍-ae mu̍-ɛ bɛ̌ɛ-ɛ, nɛ̀ ɔ̍ mu̍ ɔ̍ chɛ̀ dbǎ kɔ̌ɔ o.”

23Jusu la̍a̍, “Mɔ̀ sɔ nɔ̌ kmɔ̌ we̍ nɔ̌ sɔ̀n, iě ǐn sɔ dě dlǔwèàì dě ja̍i̍wlɔ̀. Mɔ̀ kɔn nɔ̌ kmɔ̌ la we̍, jɛ ǐn se̍ nɔ̌ kmɔ̌ la we̍ kɔn. 24Ɛ̍ kɔn ǐn sèàɛ̍ mɔ̀ wlùh na̍ mɔ̀-a mu̍ dě mɔ̀-a gblɛ̍n sɔ̀ɛ̀n di̍i̍ mɛ̌-ɛ. Ka mɔ̀ se̍-a ɛ̍ tìh chɛ̀ po̍ ka ‘Mɔ̍ bo ɔ̀ nu̍-a Ɔ̍-ɛ,’ nɛ̀ mɔ̀-a mu̍ mɛ̌ dě mɔ̀-a gblɛ̍n sɔ̀ɛ̀n di̍i̍.”

25U̍h la̍a̍ dě ɔ̍ we̍, “Mɔ̀ nyɔ̍we̍ ɛ?”

Iě Jusu la̍a̍, “Mɔ̍ nyɔ̍ ɔ̀ kɔn tìh ǐn sèàɛ̍-a mɔ̀ wlùh se̍e̍-ɛ, ɛ̍ bo ǎn gba̍ kɛ̍n i̍ ke̍. 26Ǐn blě tìh dɔu iě mɔ̀ i̍ bla̍-ɛ, iě ǐn blě dɔu iě mɔ̀ dlǔ po̍. Nyɔ̍ ɔ̀ dbo̍-a m-ɛ, tìh-a taǐn nyɔ̍ bo. Dɛ̍ ǐn wɔ̌n-a dě ɔ̍ wɔ̍ɔ̍n-ɛ, ɛ̍ bo ǎn sèàɛ̍ kmɔ̌ nyɔ̍ wlùh.”

27Sɔ u̍h se̍ ɛ̍-ɛ i̍ wɔ̌n ka ɔ̍ wlu-a dě u̍h we̍ ɔ̍ Baa tìh-ɛ. 28Wɛ̀ Jusu la̍a̍, “Pò mɔ̀ pèle Nyi̍ɔ̍-a Jǔ ja̍i̍ dǒ tu̍ wlì-ɛ, nɛ̀ mɔ̀-a mu̍ ɛ̍ juo ka ‘Mɔ̍ bo ɔ̀ nu̍-a Ɔ̍-ɛ.’ Nɛ̌ nu̍ dɛ̍ dǒ ǎn chɛ̀-a gbǐh we̍, jɛ dɛ̍ ǐn Baa poe-a ǐn nǎ-ɛ, ɛ̍ bo ǎn bla̍. 29Nyɔ̍ ɔ̀ dbo̍-a m-ɛ, ɔ̍ nɛ ǐn we̍. Ɔ̍-ɔ se̍a ǐn gbo̍ka̍a̍ sie, dɛ̍nu̍ɛ, dɛ̍ tè-ea ɔ̍ wlùh i̍-ɛ, ɛ̍ bo ǎn nu̍ ma̍u̍.”

30Ɔ̍ bla̍-a ìh la-ɛ, iě nyɔ̍ dɔu gbaɛ ɔ̍ wlùh.

Jusu sèàɛ̍ nyɔ̍gbei wlùh u̍h-a chɛ̀-a tìh

31Wɛ̀ Jusu la̍a̍ dě nyɔ̍ juh gbaɛ-a ɔ̍ wlùh-ɛ we̍, “Pò mɔ̀ gbɛ̍n ǎn nǎ po̍ wlu̍ la i̍-ɛ, nɛ̀ mɔ̀ɔ̍ ǎn kòà-a gblangbai̍. 32Nɛ̀ mɔ̀-a mu̍ tìh-a taǐn juo, wɛ̀ tìh-a taǐn iě mɔ̀ sèìe.”

33U̍h la̍a̍, “Àɔ̀ Eblaɛɛn-a nynuu̍, à-a se̍a nyɔ̍-a kèi̍ nu̍ sàǐtòò. Ka ɛ̍ iě nu̍ wɛ̀ nàa̍ nɛ̀ à mu̍ sèìe-ɛ ɛ?”

34Jusu la̍a̍, “Tìh-a taǐn ǎn sèàɛ̍ mɔ̀ wlùh, nyɔ̍-o-nyɔ̍ ɔ̀ nu̍-a gblɛ̍n sɔ̀ɛ̀n-ɛ, nɛ̀ ɔ̍-ɔ gblɛ̍n sɔ̀ɛ̀n-a kèi̍. 35Kèi̍ se̍ dǒ chɛǐ kɔn, jɛ jǔ nɔ̀ɔ̍, ɔ̍ kɔn dǒ chɛǐ kleǐnklein. 36Nɛ̀ pò Jǔ sèìe mɔ̀-ɛ, nɛ̀ mɔ̀ sèìe-ɛ slèěslè. 37Ǐn juo ka mɔ̀ nu̍-a Eblaɛɛn-a nynuu̍-ɛ, jɛ mɔ̀-a pɔ̀n ǐn dbǎ-a i̍. Dɛ̍nu̍ɛ, mɔ̀ se̍ ǎn nǎ po̍ wlu̍ i̍ gbɛ̍n. 38Dɛ̍ ǐn wɔ̌n-a dě ǐn Baa wɔ̍ɔ̍n-ɛ, ɛ̍ bo ǎn bla̍. Jɛ dɛ̍ mɔ̀ baa sèàɛ̍-a mɔ̀ wlùh-ɛ, ɛ̍ mɔ̀-a nu̍.”

39U̍h la̍a̍, “Eblaɛɛn bo ɔ̀ nu̍ à baa.”

Wɛ̀ Jusu la̍a̍ dě u̍h we̍, “Pò mɔ̀ tù Eblaɛɛn-a nynuu̍ de-ɛ, nɛ̀ dɛ̍ ɔ̍ nu̍-aɛ, ɛ̍ mɔ̀-a mu̍ nu̍ ke de. 40Tìh-a taǐn ǐn wɔ̌n-a dě Nyɔsoa we̍-ɛ, ɛ̍ bo ǐn sèàɛ̍ mɔ̀ wlùh. Jɛ mɔ̀-a pɔ̀n ǐn dbǎ-a i̍. Ìh la mɔ̀-a nu̍-aɛ, Eblaɛɛn se̍ i̍h nu̍. 41Mɔ̀ baa we̍ dɛ̍ᵻ bo mɔ̀-a nu̍.”

Iě u̍h la̍a̍, “Nyɔsoa due bo ɔ̀ nu̍ à Baa, àɔ̀ ɔ̍ chɛ̀-a tèkɛ̍n gbe̍i̍n.”

42Jusu la̍a̍, “Pò Nyɔsoa nu̍ mɔ̀ Baa de-ɛ, nɛ̀ mɔ̀-a mu̍ ǐn jbɛɛ de, dɛ̍nu̍ɛ, ǐn sɔ dě Nyɔsoa we̍ wɛ̀ ǐn nɛ da̍a. Ǐn se̍ dǒ ǎn chɛ̀-a sɔ̍n kɛ̍n jii, ɔ̍-ɔ bo ɔ̀ dbo̍ m. 43Dɛ̍nu̍ mɔ̀-ɔ wɔ̌n ǎn wlu̍ i̍ ɛ? Dɛ̍nu̍ɛ, mɔ̀ se̍ dɛ̍ ǎn bla̍-a dounᵻ we̍ po̍-ɛ i̍ pɔ̀n dɛbo. 44Mɔ̀ kɔn dǒ mɔ̀ baa Kǔ we̍. Ɛ̍ wlùh nu̍ tìh bo mɔ̀-a sì. Ɛ̍ nu̍ nyɔ̍ gbe̍ja̍a̍ poe nyɔ̍ ma̍u̍. Ɛ̍ dounᵻ se̍-e tìh-a taǐn we̍ nɛ, dɛ̍nu̍ɛ, tìh-a taǐn se̍ dě ɛ̍ ja̍a̍ nɛ. Ɛ̍ ja la̍ si̍h tmɔ̌-ɛ, nɛ̀ ɛ̍ tè-e ɛ̍ chɛ̀-a wlùh i̍. Dɛ̍nu̍ɛ, ɛ̍-ɛ si̍h tmɔ̌ nyɔ̍, iě ɛ̍ nu̍ si̍h tmɔ̌-ɛa baa. 45Ǎn sà tìh-a taǐn, ɛ̍ kɔn mɔ̀-ɔ dǎɛ ǎn wlu̍ tìh. 46Mɔ̀-a nyɔ̍we̍ bo ɔ̀ jě ǐn gblɛ̍n sɔ̀ɛ̀n nu̍ la̍ wɛ̀ sàì ɛ? Dɛ̍nu̍ pò ǐn sà tìh-a taǐn-ɛ, wɛ̀ mɔ̀-ɔ dǎɛ ǎn wlu̍ tìh ɛ? 47Nyɔ̍ ɔ̀ kɔn-a dǒ Nyɔsoa we̍-ɛ, nɛ̀ ɔ̍ wɔ̌n Nyɔsoa-a wlu̍. Ɛ̀ kɔn mɔ̀-ɔ wɔ̌n-a ɔ̍ wlu̍-ɛ, ɛ̍ nu̍ mɔ̀ se̍ dǒ ɔ̍ we̍ kɔn dɛbo.”

Jusu sèàɛ̍ nyɔ̍gbei wlùh dɛ ɔ̍ chɛ̀-a tìh

48Wɛ̀ nyɔ̍ laa̍ u̍h sà Jusu-a wlu̍ pɔ̀n we̍, u̍h la̍a̍, “Pò à la̍ mɔ̀ Sɛmewlea jǔ iě jeědih nɛ dǒ ìn de̍e̍-ɛ, nɛ̀ à sì ɛ̍ i̍ ae?”

49Jusu la̍a̍, “Jeědih se̍ ǐn de̍e̍ nɛ. Jɛ ǎn tè ǐn Baa ja̍, iě mɔ̀ se̍ ǐn ja̍ tè. 50Ǐn se̍ ǎn chɛ̀-a nynɛ̌ i̍ bɛ̌-ɛ i̍ pɔ̀n, jɛ nyɔ̍ ɔ̀ pɔ̀n-a ɛ̍ i̍-ɛ, ɔ̍ nɛ-o. Ɔ̍ bo ɔ̀ mu̍ ǎn taɔ nu̍. 51Tìh-a taǐn ǎn sèàɛ̍ mɔ̀ wlùh, nyɔ̍ jɔ mu̍-a ǎn wlu̍ nu̍-ɛ, nɛ̀ ɔ̍ se̍ gba̍ mɛ̌.”

52Wɛ̀ u̍h la̍a̍ dě Jusu we̍, “Jɛwɛ̀ à juo i̍h ka ìn blě-a jeědih dǒ ìn de̍e̍-ɛ. Eblaɛɛn mɛ̌-ɛ, iě Nyɔsoa-a tu̍owli po̍ nyɔ̍ mɛ̌. Iě mɔ̀ɔ̍ nàa̍ nyɔ̍ jɔ mu̍-a àn wlu̍ nu̍-ɛ, nɛ̀ ɔ̍ se̍ gba̍ mɛ̌. 53Bɔ̌ ke̍, àn pɔ̀n ìè wɔ̍n ku̍ ìè à baa Eblaɛɛn sìì ae? Ɔ̍ mɛ̌-ɛ, iě Nyɔsoa-a tu̍owli po̍ nyɔ̍ mɛ̌ ke. Nyɔ̍ àn dǎɛ àn chɛ̀ ɛ?”

54Jusu la̍a̍, “Pò ǐn ja ǎn chɛ̀-a nynɛ̌ i̍ bɛ̌-ɛ de-ɛ, nɛ̀ ɛ̍ mu̍ pɔ̀ɔ̍pìe̍ nynɛ̌ nu̍. Jɛ ǐn Baa ɔ̀ mɔ̀ la̍ ɔ̀ nu̍-a mɔ̀-a Nyɔsoa-aɛ, ɔ̍ bo ɔ̀ bɛ̌-ɛ ǎn nynɛ̌ i̍. 55Jɛ mɔ̀ se̍ ɔ̍ juo, mɔ̍ bo ɔ̀ juo ɔ̍. Pò na̍ ǐn se̍ ɔ̍ juo de-ɛ, nɛ̀ ǎn mu̍ si̍h tmɔ̌ nyɔ̍ nu̍ ka mɔ̀ɔ̍-ɛ. Jɛ ǐn juo ɔ̍-ɛ, iě ǎn nu̍ ɔ̍ wlu̍. 56Mɔ̀ baa Eblaɛɛn la̍ pò ɔ̍ jɛɛ ǎn ti̍ kɛ̍n-ɛ, nɛ̀ ɔ̍ mu̍ nmɔ. Iě ɔ̍ jɛɛ ɛ̍ kɛ̍n, wɛ̀ ɔ̍ pɔluh pɛ̌n i̍.”

57Wɛ̀ u̍h la̍a̍, “Nɛ̀ se̍a sɔ̀nᵻá kwela m̀m̌-a (50) chɛ̀ nu̍-ɛ, dǒ ìn jě-e Eblaɛɛn ae?”

58Jusu la̍a̍, “Tìh-a taǐn ǎn sèàɛ̍ mɔ̀ wlùh, Eblaɛɛn iě-a wlǔh-ɛ, nɛ̀ ‘Ǐn Nɛ Wɛ̀.’ ”

59Sɔ u̍h dǔ sɔɔ̌ᵻ sǔh u̍h iě ɔ̍ i̍ tbaɛ. Iě Jusu mǎ-ɛ dě u̍h nynɛ̌ i̍, wɛ̀ ɔ̍ sɔ dě Nyɔsoa-a slaǎ sà gbò sɔ̀n.

Currently Selected:

Chɔɔn 8: KDNT

Highlight

Copy