Chɔɔn 18

Kǎ u̍h nu̍ ka Jusu gbɛ̍n-ɛ

(Matio 26.47-56; Maɛ 14.43-50; Luu 22.47-53)

1Ti̍ Jusu wɔ̀-a ba̍le-ɛɛ, wɛ̀ ɔ̍ ke ɔ̍ kòà mu̍ dě tɔ̀ùn dlǔ u̍h-a dǎɛ-a Kedlɔn-ɛ de̍e̍. Nɛ̀ dě tù-dɛ̍ᵻá klè due nɛ, iě u̍h mu̍ dě ɛ̍ di̍i̍. 2Nɛ̀ Juda ɔ̀ sà-a Jusu kwlǎ-a, ɔ̍ juo dě tà-a chɛ̀ ke, dɛ̍nu̍ɛ, dě Jusu ke ɔ̍ kòà-a po̍ wìè-i. 3Wɛ̀ Juda mu̍ deě. Ɔ̍ wɔ̌an mu̍-u tìh-ɛ, ɔ̍ gba̍ Wloma nyɔ̍-a fledlǔ-a gbɔ̀ù ke Nyɔsoa-a slaǎ sà gbò kɛ̍ɛ̍n fuo nyɔ̍ ùh sɔ-a dě slaǎ sà nyɔ̍ klaaᵻ ke Fɛlesii nyɔ̍ we̍-ɛ. U̍h gba̍ nape̍ᵻ ke tàùᵻ ke fɔ̀n-dɛ̍ᵻ. 4Jɛ Jusu juo dɛ̍ᵻ ìh-a mu̍-a ɔ̍ jii̍ nɛ-ɛ, wɛ̀ ɔ̍ mu̍ u̍h wlì. Wɛ̀ ɔ̍ la̍a̍ dě u̍h we̍, “Nyɔ̍ mɔ̀-a pɔ̀n i̍ ɛ?”

5U̍h la̍a̍, “Jusu ɔ̀ sɔ-a dǒ Naaslɔɛ wlɔ̀ di̍i̍-ɛ bo à pɔ̀n i̍.”

Ɔ̍ la̍a̍, “Mɔ̍ la.”

Juda jɔ nu̍-a nyɔ̍ kwlǎ sà nyɔ̍-ɛ, nɛ̀ ɔ̍ nyna u̍h pùn. 6Ti̍ ɔ̍ wlu-a dě u̍h we̍ ɔ̍ la̍a̍, “Mɔ̍ la-ɛ,” wɛ̀ u̍h sàɛ̀ kɛ̍n iě u̍h kèàɛ i̍ dǒ bloɔ̍. 7Wɛ̀ Jusu tèle u̍h i̍ dɛ. Ɔ̍ la̍a̍, “Nyɔ̍ mɔ̀-a pɔ̀n i̍ ɛ?”

U̍h la̍a̍, “Jusu ɔ̀ sɔ-a Naaslɔɛ bo à pɔ̀n i̍.”

8Wɛ̀ Jusu la̍a̍, “Ǐn sèàɛ̍ mɔ̀ wlùh, na̍ mɔ̍ la. Pò mɔ̀ ja ǐn i̍ pɔ̀n-ɛ, nɛ̀ mɔ̀ tǎli juh la i̍ o.” ( 9Ti̍ Jusu la̍a̍, “Baa, nyɔ̍ ìn nyǐ-a m-ɛ, u̍h-a nyɔ̍ se̍-e gbɔ̀lɔ-oɛ,” ɛ̍ kɔn ɔ̍ bla̍ dɛ̍ la, wɛ̀ ɛ̍ iě ɔ̍ wlu̍ kɛ̀ǐn po̍.)

10Ɛ̍ ti̍ laa̍ nɛ̀ Samo Pitɛ blě plàn chlɛ̀n. Wɛ̀ ɔ̍ chlì ɛ̍, iě ɔ̍ tba̍ slaǎ sà nyɔ̍-a dlǔtu-a kèi̍ dɛ̍, wɛ̀ ɔ̍ chɛ̍n ɔ̍ di̍na̍ doun i̍. Pòi̍ju-a chɛ̀ ɔ̍ nynɛ̌ bo Makɔɔ. 11Wɛ̀ Jusu la̍a̍ dě Pitɛ we̍, “Po̍ àn plàn chlɛ̀n laa̍ dě de̍ gbla̍-a. Ìn jajeɛ̍ kàu̍n la ǐn Baa nyǐ-a m-ɛ, ǐn se̍ ɛ̍ di̍i̍ nǎ-ɛ mu̍ de ae?”

Jusu nɛ dǒ Anna jǔ

12Wɛ̀ fledlǔ-a gbɔ̀ù ke u̍h-a chape nyɔ̍ ke Juu nyɔ̍-a slaǎ sà gbò we̍ i̍ gbɛ̀n nyɔ̍ gbɛ̍n Jusu, iě u̍h sa̍n ɔ̍. 13Wɛ̀ u̍h gba̍ ɔ̍ dě Anna we̍ sàǐtòò, dɛ̍nu̍ɛ, Kaifa ɔ̀ nu̍-a slaǎ sà nyɔ̍-a dlǔtu dǒ sɔ̀n laa̍ di̍i̍-ɛ, ɔ̍ nynɔ̌ baa bo. 14Kaifa laa̍ bo ɔ̀ sà ɛ̍-ɛ dě Juu nyɔ̍-a nyɔ̍ klaaᵻ we̍ ka ɛ̍ nmɔ-a jii̍ nyɔ̍ due iě-a mɛ̌ dǒ blǔh nyɔ̍-a tàà-ɛ.

Pitɛ tòlo Jusu-a tìh-i

(Matio 26.69-70; Maɛ 14.66-68; Luu 22.55-57)

15Wɛ̀ Samo Pitɛ ke Jusu-a kòà dɔɔ wɔ̀ dǒ Jusu de̍e̍. Nɛ̀ kòà jɔ laa̍ ɔ̍ ke slaǎ sà nyɔ̍-a dlǔtu ju̍o̍e i̍ se̍e̍. Sɔ ɔ̍ bo ɔ̀ ke Jusu pa̍ dě slaǎ sà nyɔ̍-a dlǔtu-a gbò-a gbàɛ̍gbà di̍i̍. 16Wɛ̀ Pitɛ sie dǒ gbàɛ̍gbà-a wɔ̍n we̍. Iě jɔ ke slaǎ sà nyɔ̍-a dlǔtu ju̍o̍e-a i̍-ɛ ji̍ de̍. Wɛ̀ ɔ̍ wlu dě nynɔ̌gbaɔ jǔ ɔ̀ tù-a gbàɛ̍gbà-a wɔ̍n jlǐhɛ̍-ɛ we̍. Iě ɔ̍ pa̍-ɛ Pitɛ dě gbò. 17Wɛ̀ nynɔ̌gbaɔ jǔ-a chɛ̀ la̍a̍ dě Pitɛ we̍, “Na̍ mɔ̀ jɔ̍gbau la ɔ̍ kòà-a due lě.”

Pitɛ la̍a̍, “Sakǒ, ɛ̍ se̍ mɔ̍.”

18Ɛ̍ ti̍ laa̍ nɛ̀ seɔn-a ji̍-i, wɛ̀ pòi̍nynuu̍ ke slaǎ sà gbò-a kɛ̍ɛ̍n fuo nyɔ̍ tbà kɔɔn-a nɛ̍, iě u̍h nyna i̍ u̍h-a wěla. Wɛ̀ Pitɛ mu̍ dǒ u̍h we̍, ɔ̍ wěla ke.

Slaǎ sà nyɔ̍-a dlǔtu chlɛ̌ Jusu wɔ̍ɔ̍n i̍

(Matio 26.59-66; Maɛ 14.55-64; Luu 22.66-71)

19Nɛ̀ kǎ slaǎ sà nyɔ̍-a dlǔtu-a chlɛ̌ Jusu wɔ̍ɔ̍n i̍ dǒ ɔ̍ kòà dɛ we̍, ɛ̍ ke dɛ̍ ɔ̍ poe-a nyɔ̍ nǎ-ɛ ke. 20Wɛ̀ Jusu la̍a̍, “Dǒ gbaɛ̍we̍ bo ǎn wlu-i dě kmɔ̌ nyɔ̍ kli̍hgbɛ̍ we̍. Nɛ̀ dě wɛɛ sà gbòᵻ ke slaǎ sà gbò kɔn sɔ̀n nyɔ̍-a gbǎ-ɛa tàdùè-ɛ, dě ǎn poe nǎ. Nɛ̌ sà dɛ̍-ɛ dě kwile-e. 21Dɛ̍nu̍ àn tèle ǐn i̍ ɛ? Nyɔ̍ ùh wɔ̌n-a ǎn wlu̍ wɛ̀ sàì-ɛ, u̍h bo ìè i̍ tèle, u̍h juo dɛ̍ ǐn sà-aɛ.”

22Ti̍ Jusu wlu-a dɛ̍ la-ɛ, slaǎ sà gbò-a kɛ̍ɛ̍n fuo nyɔ̍ due nɛ-a doǒ-ɛ, sɔ ɔ̍ tba̍ ɔ̍ gbǎ sǔh. Ɔ̍ la̍a̍, “Kǎ nyɔ̍-a nu̍ dě slaǎ sà nyɔ̍-a dlǔtu we̍ wlu-ɛ ae?”

23Wɛ̀ Jusu la̍a̍, “Pò dɛ̍ ǐn sà-aa ɛ̍ klǐ-ɛ, nɛ̀ ìn sà ɛ̍-ɛ sǔh. Jɛ pò ɛ̍ slɛ̌ i̍-ɛ, nɛ̀ dɛ̍-ɛ tìh àn tba̍ ǐn gbǎ ɛ?”

24Iě ka due ɔ̍ nɛ-a dě dbǔᵻáɛ, kǎ ɔ̍ nɛ iě Anna dbo̍ ɔ̍ dě slaǎ sà nyɔ̍-a dlǔtu Kaifa we̍.

Pitɛ tòlo Jusu-a tìh-i dɛ

(Matio 26.71-75; Maɛ 14.69-72; Luu 22.58-62)

25Nɛ̀ kǎ Samo Pitɛ nyna i̍ ɔ̍ wěla. Wɛ̀ nyɔ̍ tèle ɔ̍ i̍, u̍h la̍a̍, “Na̍ mɔ̀ jɔ̍gbau la ɔ̍ kòà-a due lě.”

Jɛ Pitɛ tòlo ɛ̍-ɛ, ɔ̍ la̍a̍, “Sakǒ, ɛ̍ se̍ mɔ̍.”

26Wɛ̀ slaǎ sà nyɔ̍-a dlǔtu-a pòi̍ju due ɔ̀ kɔn wloa̍ nyɔ̍-a doun Pitɛ chɛ̍n-a i̍-ɛ, iě ɔ̍ la̍a̍, “Ɛ̍ se̍ mɔ̀ ǐn se̍ jě dǒ Jusu we̍ dě tù-dɛ̍ᵻá klè di̍i̍ ae?”

27Wɛ̀ Pitɛ tòlo ɛ̍-ɛ dɛ, sɔ suuh slò-e sǔh.

Jusu sì sàwi̍h dǒ Pale jǔ

(Matio 27.1-2, 11-14; Maɛ 15.1-5; Luu 23.1-5)

28Wɛ̀ u̍h sà Jusu dě Kaifa blǐ gbò, iě u̍h gba̍ ɔ̍ dě kɔ̀mla̍ Pale blǐ gbò. Nɛ̀ ɛ̍ nu̍ klàɛ̍we̍ gbàìn. Jɛ Juu nyɔ̍-a nyɔ̍ klaaᵻ nɔ̀ɔ̍, u̍h se̍ dě gbò laa̍ pa̍, dɛ̍nu̍ɛ, u̍h-a pɔ̀n u̍h iě dě Nyɔsoa jlǐh i̍ nmɔ, wɛ̀ u̍h iě Sììkɛ̍n Peě-a di̍-dɛ̍ᵻ di̍-ɛ bɛ̌ɛ. 29Iě kɔ̀mla̍ Pale sǐ dě u̍h we̍ sɔ̀n i̍. Iě ɔ̍ la̍a̍, “Dɛ̍-ɛ tìh mɔ̀ blě dǒ jɔ̍gbau la pùn ɛ?”

30U̍h la̍a̍, “Pò jɔ̍gbau la ɔ̍ se̍ dɛ̍ sɔ̀n nu̍ de-ɛ, nɛ̀ à se̍ ɔ̍ ìn we̍ ja mu̍ de.”

31Pale la̍a̍, “Iě nɛ̀ mɔ̀ dǔ ɔ̍, mɔ̀-a chɛ̀ iě dě ɔ̍ tìh-a chɛ̀ di̍i̍ gbɛ̀n dě mɔ̀-a chɛ̀-a telě di̍i̍.”

Iě u̍h la̍a̍, “Jɛ à nɔ̀ɔ̍, à se̍ wlu̍ kɛ̍n sà-ɛ à iě nyɔ̍-o-nyɔ̍ dbǎ.” ( 32Ka Jusu-a mu̍-a mɛ̌-ɛ sɔɛn nu̍-ɛ, ɔ̍ sà ɛ̍-ɛ se̍e̍. Ɛ̍ kɔn ɛ̀ la ɛ̍ nɛ, ɛ̍ iě ɔ̍ wlu̍ kɛ̀ǐn po̍.)

33Wɛ̀ Pale pa̍ dě de̍ gbò, iě ɔ̍ dǎ Jusu, wɛ̀ ɔ̍ la̍a̍ dě ɔ̍ we̍, “Mɔ̀ bo ɔ̀ nu̍ Juu nyɔ̍-a blǔh baa ae?”

34Jusu la̍a̍, “Àn tèle ǐn i̍ dǒ àn chɛ̀-a sɔ̍n kɛ̍n ɛɛ, àe̍e̍ nyɔ̍ duuh sèàɛ̍ ìn wlùh dǒ ǎn dɛ we̍ ae?”

35Wɛ̀ Pale la̍a̍, “Àn dǎɛ ǐn Juu jǔ ae? Àn chɛ̀-a nyɔ̍ ke slaǎ sà nyɔ̍ klaaᵻ bo ùh sà ìn kwlǎ nɔ̌ ǐn we̍. Dɛ̍ ìn nu̍ wɛ̀ u̍h ja m̀ ɛ?”

36Iě Jusu la̍a̍, “Ǎn blǔh baa dɛ se̍ nɔ̌ kmɔ̌ la we̍ kɔn. Pò ɛ̍ kɔn nɔ̌ kmɔ̌ la we̍ de-ɛ, nɛ̀ ǎn pòi̍nynuu̍-a mu̍ fɔ̀n wɛ̀ Juu nyɔ̍-a nyɔ̍ klaaᵻ je̍e ǐn gbɛ̍n de. Jɛ ǎn blǔh baa dɛ se̍ nɔ̌ kmɔ̌ la we̍ kɔn dɛbo.”

37Pale la̍a̍, “Iě nɛ̀ mɔ̀ blǔh baa lě.”

Jusu la̍a̍, “Nàa̍, mɔ̍ blǔh baa. Ɛ̍ kɔn tìh ǐn wlǔh iě ǐn ji̍ da̍a kmɔ̌ la we̍, wɛ̀ iě tìh-a taǐn-a sàànsi̍i̍h nu̍. Nyɔ̍ juh kɔn-a dǒ tìh-a taǐn we̍-ɛ, u̍h bo ùh-a wɔ̌n ǎn wlu̍-i i̍.”

38Wɛ̀ Pale la̍a̍ dě ɔ̍ we̍, “Dɛ̍ bo ɛ̀ nu̍ tìh-a taǐn ɛ?”

Pale sà Jusu-a mɛ̌ɛ wlu̍ kɛ̍n

(Matio 27.15-31; Maɛ 15.6-20; Luu 23.13-25)

Iě Pale sǐ dě nyɔ̍gbei laa̍ we̍ sɔ̀n i̍ dɛ. Wɛ̀ ɔ̍ la̍a̍ dě u̍h we̍, “Dɛ̍ sɔ̀n jɔ̍gbau la ɔ̍ iě-a nu̍-ɛ, nɛ̌ jě ɛ̍. 39Jɛ mɔ̀ blě mɔ̀-a tǐwai dɛ. Ɛ̍ nu̍ iě gbɛ̍n-nyɔ̍ due sèìe dǒ mɔ̀ we̍ dǒ Sììkɛ̍n-a Peě kɛ̍n. Mɔ̀-a pɔ̀n iě Juu nyɔ̍-a blǔh baa sèìe ae?”

40Wɛ̀ u̍h sà slɛ̀ wɔ̍n u̍h la̍a̍, “Iěe, ɛ̍ se̍ ɔ̍ mɔ. À pɔ̀n Bawlaba.” (Bawlaba bo ɔ̀ nu̍ jlǐ-nyɔ̍.)

Currently Selected:

Chɔɔn 18: KDNT

Highlight

Copy