Chɔɔn 17

Jusu ba̍le dǒ ɔ̍ kòà-a tàà

1Ti̍ Jusu wɔ̀-a wlu̍ la bla̍-aɛ, wɛ̀ ɔ̍ gbɛ̀n dě ja̍i̍wlɔ̀ iě ɔ̍ la̍a̍, “Baa, ti̍ nyni̍ wɛ̀, bɛ̌-ɛ àn Jǔ-a nynɛ̌ i̍, wɛ̀ Jǔ iě àn nynɛ̌ i̍ bɛ̌-ɛ ke. 2Dɛ̍nu̍ɛ, ìn nyǐ ɔ̍ gbǐh ɔ̍ iě nyɔ̍ kli̍hgbɛ̍ wlu̍ i̍ kɔn, ɔ̍ iě nyɔ̍ kli̍hgbɛ̍ ìn nyǐ-a ɔ̍-ɛ kmɔ̌ sie feɛ nyǐ. 3Ɛ̀ nu̍-a kmɔ̌ sie feɛ-ɛ, ɛ̍ nu̍ u̍h iě mɔ̀ due gbài̍ ɔ̀ nu̍-a tìh-a taǐn Nyɔsoa-a juo, ɛ̍ ke Jusu Klai ìn dbo̍-a ke. 4Dbo̍ ìn nyǐ m iě-a nu̍-ɛ, ka ǐn wɔ̀-a ɛ̍ i̍-ɛ, nɛ̀ ǐn bɛ̌-ɛ àn nynɛ̌ i̍ wɛ̀ nɔ̌ bloɔ̍. 5Nɛ̀ɛ̍, Baa, bɛ̌-ɛ ǎn nynɛ̌ i̍ kaka dǒ ìn jlǐhwai, ɛ̀ nu̍-a nynɛ̌-a i̍ bɛ̌-ɛ à blě-a se̍e̍ wɛ̀ kmɔ̌ iě-a nui-ɛɛ ɛ̍ bo ǎn dǎ.

6“Nyɔ̍ ìn sà-a kmɔ̌ ìn nyǐ-a m-ɛ, ǐn nu̍ ɛ̍ iě u̍h juo m̀ wɛ̀. U̍hɔ̍ɔ̍ àn nyɔ̍, iě ìn nyǐ u̍h m, wɛ̀ u̍h nu̍ àn wlu̍. 7Nɛ̀ u̍h juo ɛ̍-ɛ kaka dɛ̍ᵻ kli̍hgbɛ̍ ìn nyǐ-a m-ɛ, i̍h sɔ dě ìn we̍. 8Tu̍owli ìn nyǐ-a m-ɛ, ǐn po̍ i̍h dě u̍h we̍, wɛ̀ u̍h gbɛ̍n i̍h i̍. Dě ìn we̍ bo ǐn sɔ-ɔ, iě u̍h juo ɛ̍ ka ɛ̍ nu̍-a tìh-a taǐn-ɛ. Ka ìn dbo̍-a m-ɛ, iě u̍h po̍ ɛ̍ tìh chɛ̀.

9“Ǎn ba̍le dǒ u̍h-a tàà, ǐn se̍ dǒ kmɔ̌-a tàà ba̍le. Jɛ nyɔ̍ ìn nyǐ-a m-ɛ, dǒ u̍h-a tàà bo ǎn ba̍le. Dɛ̍nu̍ɛ, u̍hɔ̍ɔ̍ àn nyɔ̍. 10Ùh kli̍hgbɛ̍ ǐn blě-aɛ, u̍hɔ̍ɔ̍ àn nyɔ̍. Nɛ̀ ùh kli̍hgbɛ̍ ìn blě-aɛ, u̍hɔ̍ɔ̍ ǎn nyɔ̍. Dě u̍h ja̍a̍ bo ǎn nynɛ̌-a bɛ̌-ɛ i̍. 11Ǐn se̍ nɔ̌ kmɔ̌ la we̍ nɛ mu̍ dɛ, ǎn mu̍ la̍ dě ìn we̍ ji̍. Jɛ u̍h nɔ̀ɔ̍, u̍h-a mu̍-ɔn nɛ. Baa Nyɔsoa, mɔ̀ ɔ̀ Wɛ̀-a Nɛi̍-ɛ, àn nynɛ̌ ìn nyǐ-a m-ɛ, dě ɛ̍ gbǐh blě-ɛ di̍i̍ bo ìè u̍h kɛ̍n kaɛn. Wɛ̀ ka ìn ke ǐn ke à nu̍-a due nɛ-ɛɛ, u̍h iě laǎn due nɛ-ɛ nu̍ ke. 12Ti̍ ǐn nɛ-a da̍a u̍h we̍-ɛ, ǐn kaɛn u̍h kɛ̍n dě àn nynɛ̌-a gbǐh blě-ɛ ìn nyǐ-a m-ɛ di̍i̍. Wɛ̀ ǐn gbɛ̀n dǒ u̍h we̍ i̍, iě u̍h-a nyɔ̍ se̍-e gbɔ̀lɔ. Jɛ jɔ mu̍-a gbɔ̀lɔ se̍e̍ wɛ̀ ɛ̍ iě-a àn wlu̍ kɛ̀ǐn po̍-ɛ, ɔ̍ kɔn tɛ̀ ǐn sà-o. 13Ǎn ji̍ la̍ dě ìn we̍, jɛ ǐn nɛ nɔ̌ kmɔ̌ we̍ iě ǎn sà ìh la-a, wɛ̀ ǎn nmɔ-ɛ iě kwlǎ wɛ̀ dě u̍h ja̍a̍. 14Ǐn po̍ àn tu̍owli wɛ̀ dě u̍h we̍, iě kmɔ̌ faɛn u̍h ka. Dɛ̍nu̍ɛ, ɛ̀ kɔn ba̍ ǐn se̍-a dǒ kmɔ̌ we̍ kɔn-ɛ, kǎ u̍h nɛ wɛ̀ ke. 15Ǐn se̍ ba̍le ìè u̍h nɔ̌ kmɔ̌ we̍ sà, jɛ ǎn ba̍le-e ìè u̍h kɛ̍n kaɛn u̍h iě Nyɔ̍ Sɔ̀n we̍ i̍ ti̍ɛ̍ɛn. 16Ɛ̀ kɔn ba̍ ǐn se̍-a nɔ̌ kmɔ̌ we̍ kɔn-ɛ, kǎ u̍h nɛ wɛ̀ ke. 17Tè-e u̍h pɔ̌ dǒ àn wlu̍ ɛ̀ nu̍-a tìh-a taǐn-ɛ we̍. 18Ka ìn nu̍-a ǐn dbo̍-ɛ nɔ̌ kmɔ̌ we̍-ɛ, kǎ ǐn nu̍ u̍h dbo̍-ɛ wɛ̀ ke dě kmɔ̌ we̍. 19U̍h-a tìh bo ǐn tè-e ǎn chɛ̀ pɔ̌, wɛ̀ ǎn tìh-a taǐn iě u̍h pɔ̌ tè-e ke.

20“Ǐn se̍ dǒ u̍h nɛ due-a tàà ba̍le, jɛ nyɔ̍ ùh gbaɛ-a ǐn wlùh dǒ u̍h-a wlu̍ kɛ̍n-ɛ, u̍h kɔn tàà bo ǎn ba̍le ke, 21wɛ̀ u̍h kli̍hgbɛ̍ iě due nɛ. Baa, ka ìn nɛ-a m, iě ǐn nɛ-a m̀-ɛ, kǎ u̍h iě à-a nɛ-ɛ nu̍ ke. Wɛ̀ kmɔ̌ iě ɛ̍ tìh chɛ̀ po̍ ka ìn dbo̍-a m-ɛ. 22Nynɛ̌-a i̍ bɛ̌-ɛ ìn nyǐ-a m-ɛ, ǐn nyǐ ɛ̍ u̍h wɛ̀, wɛ̀ u̍h iě due nɛ ka ìn ke ǐn ke à nu̍-a due nɛ-ɛ. 23Ǐn nɛ u̍h-u iě ìn nɛ m, wɛ̀ u̍h-a due nɛ-ɛ iě gblɛ̍ja̍i̍ wɛ̀. Wɛ̀ kmɔ̌ iě ɛ̍ juo ka ìn dbo̍-a m, iě ìn jbɛɛ-a u̍h-u ka ìn nu̍-a ǐn jbɛɛ-ɛ.

24“Baa, nyɔ̍ ìn nyǐ-a m-ɛ, ǎn pɔ̀n tà ǐn nɛ-aɛ, u̍h iě-o nɛ ke. Wɛ̀ u̍h iě ǎn tìh-a i̍ bɛ̌-ɛ ìn nyǐ-a m-ɛ jě. Ìn nyǐ ɛ̍ m, dɛ̍nu̍ɛ, ìn jbɛɛ m wɛ̀ kmɔ̌ la ɛ̍ dǔ nui-ɛɛ. 25I̍ Slɛ̌ Baa, kmɔ̌ se̍ ìn juo, jɛ mɔ̍ɔ ǐn juo m̀, iě juh la u̍h juo ɛ̍ ka ìn dbo̍-a m-ɛ. 26Ǐn nu̍ ɛ̍ u̍h juo àn nynɛ̌ wɛ̀. Nɛ̀ ɛ̍-ɛ bo ǎn mu̍ dluwe̍ i̍ gba̍ wɛ̀ ka ìn nu̍-a ǐn i̍ jbɛɛ-ɛ u̍h iě laǎn nyɔ̍ duuh jbɛɛ nu̍ ke, wɛ̀ iě u̍h-u nɛ ke.”

Currently Selected:

Chɔɔn 17: KDNT

Highlight

Copy