Эхин 25

Абраһаамай һүүлшын жэлнүүд ба үри һадаһадынь

1Абраһаам дахин һамга абаба, Кетураа гэжэ нэрэтэй шэнэ һамганиинь 2Зимраан, Йокшаан, Мэдаан, Мидиан, Ишбаак, Шууах гэжэ хүбүүдые түрэбэ. 3Йокшаан ехэ болоод, һамга абажа, Шээба ба Дэдаан гэжэ хүбүүдтэй болоо һэн. Дэдаанай үри һадаһадһаа ашшуур, летүүш болон леум обог зон үдэһэн юм. 4Мидианай хүбүүд: Эфаа, Ээфэр, Эноох, Абидаа ба Элдаа. Кетураагай үри һадаһад эдэ болоно

5Абраһаам бүхы эд зөөриеэ Исаак хүбүүндээ дамжуулан үгөө һэн. 6Харин бага һамгадһаа гараһан хүбүүдтээ үнэтэ бэлэгүүдые үгөөд, Исаагһаа холодуулан, зүүн зүг руу ябуулжа, һуурижуулба.

7Абраһаам зуун далан табан наһатай болоод, 8сэдьхэл дүүрэн, ажабайдалай заяае һайса үзөөд, наһа бараа бэлэй. 9-10Исаак болон Ишмаэль хүбүүдынь тэрэниие Махпелаа агы нүхэндэ хүдөөлүүлбэ. Энэ хадаа Мамре хотын зүүн тээ, хүдөө талада оршодог. Абраһаам урдань тэрэ газарые хээт обог зонһоо худалдан абаад, тэрэ агы соо Сарра һамгаяа хүдөөлүүлһэн бэлэй.

11Абраһаамай мордоһоной һүүлээр Бурхан тэрэнэй хүбүүн Исаагые үреэбэ. Исаак Бээр-Лахай-Рой, ондоогоор хэлэбэл, «Намайе наһан соом хаража байдаг Эзэнэй булаг» гэдэг газар нютагта ажаһуугаа.

12Саррын зараса эхэнэр, Египет орон нютагһаа гарбалтай Һагаарай Абраһаамда түрэһэн Ишмаэль хүбүүнэй уг удам гэбэл, иимэ. 13Ишмаэлиин хүбүүдэй нэрэ, аха захаһаань эхилхэдэ, иимэ: ууган хүбүүн Нэвайот, дараань Кэдаар, Адбээл, Мивсам, 14Мишмаа, Думаа, Массаа, 15Хадаад, Темаа, Етүүр, Нафииш болон Кэдма. 16Эдэ Ишмаэлиин хүбүүд арбан хоёр обог зоной эхи табижа, тэдэнэй нэрээр оршон һуудаг газарынь, хото һуурингуудынь нэрлэгдээ бэлэй.

17Ишмаэль зуун гушан долоон наһа наһалаад, гээгдээ һэн. 18Тэрэнэй үри һадаһад Абраһаамай бусад үри һадаһадһаа таһаржа, Египедэй зүүн хилэ болон Ассири орон түрын хоорондо оршодог Хавилаа болон Шүүр хотонуудай хоорондо һуурижаба.

Исаак ба Яков

Яков ба Эсаав

19Абраһаамай хүбүүн Исаак 20дүшэн наһатай байхадаа, араам яһатан Бэтуһээлын Ривкаа басагые һамга абаа бэлэй. Ривкаа Месопотами орон нютагтай Лаваан гэдэг ахатай һэн.

21Ривкаагай үхи хүүгэдтэй болодоггүй ушарһаа Исаак Эзэн Бурханда һамган тухайгаа зальбаран гуйба. Тиихэдэнь Эзэн Бурхан мүргэлыень анхаржа, Ривкаа хээлитэй болобо. 22Эхир хүүгэдтэй болохо байһанаа тэрэ ойлгобо. Эхынгээ гэдэһэн соо байхадаа хүүгэдынь хоорондоо тэмсэһэн мэтэ ехээр хүдэлхэдэнь, Ривкаа һанаагаа зобон, юун болохоёо байһан тухай Эзэнһээ асууба.

23Эзэн тэрээндэ иигэжэ харюусаба:

— Умай соохи хоёр хүүгэдһээш хоёр ондоо арад болбосорон бүрилдэхэ. Нэгэниинь үлүү хүсэтэй боложо, ахань дүүгэйнгээ зараса болохо.

24Ривкаагай эхир хүүгэдээ түрэхэ сагынь тулажа, 25шад улаан үһэтэй хүбүүн түрүүлэн гараба. Бүхы бэень үдхэн улаан үһөөр хушагдаһан ушарһаа тэрээндэ «Эсаав», оршуулбал, «Үһэтэй» гэһэн нэрэ үгтэбэ. 26Удаань дүүнь ахынгаа табгайһаа аһалдан гаража, «Яков»#25.26 Эндэ «Яков» гэжэ нэрэ «табгайһаа аһалдан гарагша» гэһэн удхатай; 27.36 ахань тэрэнэй нэрые «мэхэлэгшэ» гэһэн удхатайгаар оршуулна, эгээл түрүүн «Эзэн шамайе аршалаг лэ» гэһэн удхатай байгаа ха гэжэ таамаар. гэжэ нэрэтэй болобо. Тэдэнэй түрэхэдэ, Исаак жаратай ябаа.

27Хүбүүд бэеэ хүсэбэ. Эсаав хээрэ ябадаг мэргэн ангуушан боложо тодороо, харин Яков дүүниинь гэр тойроноо байжа, хони адуулдаг ажалтай, үгэ үсөөнтэй хүн болоо һэн. 28Эсаавай асардаг ангай мяханда эсэгэнь дуратай һэн тула Эсааваа үлүү сэгнэдэг, харин эхэнь Яковтаа дуратай бэлэй.

29Нэгэтэ Яковой улаан зармаар шүлэ шанаад байхада, үлэн хооһон Эсаав агнууриһаа бусаба.

30— Гэдэһэмни ехэ үлдэнэ, энэ улаан шүлэнһөө намда түргөөр хээд үгыш! — гэжэ тэрэ Яковто хэлэбэ.

Энээнһээ хойшо тэрэ «Эдоом», оршуулбал, «Улаан» гэжэ зугаа нэрэтэй болоһон юм.

31— Хэрбээ эсэгын зөөри залгамжалха ууган хүбүүнэй эрхээ намда үгөө гээшэ һааш, би шамда шүлэ хэжэ үгэхэб, — гэжэ Яковой хэлэхэдэ, 32Эсаав харюусаба:

— Зай! Үлдэжэ үхэхэ гэжэ байһан аад, тэрэ эрхээр юу хэбэ гээшэбиб! Абыш!

33— Түрүүн тангаригла! Тэрэ эрхэеэ намда тушааһан тухайгаа! Тиихэдэш шүлэ үгэхэб, — гэжэ Яковой хэлэхэдэ, Эсаав тангариглажа, ууган хүбүүнэй эсэгын эд зөөри залгамжалха эрхэеэ иигэжэ эдеэ хоолоор андалдаба. 34Эсаав Яковой улаан зармаар шанаһан шүлэ эдижэ садаад, гаража ошобо. Иигэжэ тэрэ ууган хүбүүнэй эрхэ тоонгүй алдаа бэлэй.

Currently Selected:

Эхин 25: BurOTp

Highlight

Copy