Эхин 26

Исаак һамгантаяа ба Авимелех

1Абраһаамай амиды мэндэ байха үедэ орон нютагтань ехэ ган гасуур болоһон юм. Тэрэнэй наһа бараһанай удаа дахин ган гасуур тохёолдожо, үлэсхэлэн хооһон байдалай үзэгдэхэдэ, Исаак пилишт яһатанай Гэраар хото руу ошожо, Пилишт орон нютагай хаан Абимээлэхэй хажууда ерэжэ байрлаба. 2Эзэн Исаагта үзэгдэжэ, иигэжэ айладхаба:

— Ши эдеэ хоол бэдэржэ Египет бү ошо. Харин Минии шамда заажа үгэһэн нютаг орон руу зорижо байрла. 3Гэбэшье мүнөө нэгэ хэдыхэн саг эндээ бай. Би шамай хододоо анхаржа, үршөөжэ-үреэжэ байхаб. Ажаһуугааша энэ бүхы орон газарыеш хойшонхи шинии үедэ үгэнэб. Урдань шинии эсэгэ Абраһаамые найдуулжа үргэһэн тангаригаа бэелүүлхэб. 4Би шинии үри һадаһадые огторгойн одод мэтэ олон болгоод, энэ хамаг газар дайда тэдээндэш үгэхэб. Шинии уг удамаар дамжан, бүхы дэлхэйн арад зон Минии үреэл хайрада хүртэхэ. 5Энэ хадаа Абраһаамай бүхы зарлиг, тогтоол заабари, хуули ёһонуудым сахиһанай, үгэ соомни ябаһанай, хүсэлыемни бэелүүлһэнэй ушарһаа Би тэрээндэ найдуулһанаа бэелүүлхэб!

6Исаагай Гэраар нютагта ерэжэ байрлахада, 7нютагай зон Ривкаа һамган тухайнь һонирхон асууба. «Һамгамни сэбэр һайхан. Үнэн сэхыень хэлээ һаам, эндэхи эрэшүүл тэрэнииемни абаха һэдэлгэтэй намайе алажа магад» гэжэ Исаак бодоод, иигэжэ харюусаба:

— Тэрэ минии дүү басаган.

8Исаагай тэндэ нилээд удаан ажаһууһанай удаа нэгэтэ Пилишт орон нютагай хаан Абимээлэх Исаак Ривкаа хоёрой инаглажа байхые ордонойнгоо сонхоор харажархиба. 9Тэрэ Исаагые дуудажа, асууба:

— Энэшни шинии һамган ха юм! Юундэ ши дүү басагамни гэжэ хэлээбши?

Исаак харюусаба:

— Тэрэнэй түлөө намайе эндэхи эрэшүүлэй алахаһаань айгаа һэм.

10— Ши маанадые яажа байна гээшэбши? — гэжэ Абимээлэх хэлэбэ. — Хэрбэеэ манай сэрэгэй хэн нэгэн шинии һамганда хүсэрхөө һаань, ямар ехэ гэм зэмэ бидэндэ тохогдохо, Эзэнэй хэһээлтэ амасаха ёһотой болохо байгаабибди!

11Тиигээд Абимээлэх арад зондоо иимэ зарлиг соносхобо: «Энэ хүндэ гү, али тэрэнэй һамганда гар хүрэһэн хүн хороогдохо!»

12Энэ газар орондо нютаглаад, Исаак таряа таридаг һэн. Эзэн үреэжэ, урда жэлнүүдтэ орходоо зуу дахин баян ургаса нэгэ жэл тэрэ хуряаба. 13Иигэжэ Исаак бүри улам баяжажа, энэ нютагта эгээл баян хүн болобо. 14Гадна тэрээндэ мал һүрэг, зарасанар угаа олон байгаа. Энээндэнь Пилишт орон нютагай зон атаархадаг болобо. 15Урдань Абраһаам эсэгынь зарасанар олон худаг малтаһан байгаа. Атаархажа хоролхоһон Пилишт зон тэрэ худагуудыень шоройгоор булаад хаяба.

16Тиихэдэнь Абимээлэх хаан Исаагые дуудажа асараад, иигэжэ хэлэбэ:

— Шинии ехэ баян, хүсэтэй боложо байһан ушарһаа бидэ шамһаа айжа эхилээбди. Манай орон нютагһаа хулжаа һаашни, дээрэл ха.

17Исаак Гэраар хото орхижо, Гэраар гэдэг тала газарта ошожо байрлаба. 18Тэндэ Абраһаам эсэгэнь амиды мэндэ байхадаа олон худаг малтаһан, тус бүридэнь нэрэ үгэһэн юм. Наһа бараһанайнь һүүлээр пилишт зон тэрэ худагуудые шоройгоор булаа бэлэй. Исаак тэдэ худагуудые зарасануудаараа дахин малтуулба, анхан нэрэнүүдээрнь нэрлэбэ.

19Энээнһээ гадна Исаагай зарасанар Гэраарай хүнды тала газарта шэнэ худаг малтажа байтараа сэбэр тунгалаг уһатай булаг олобо. 20Зүгөөр Гэраарай хонишод «энэ уһан танай бэшэ, манай» гэжэ байгаад, Исаагай зарасанартай арсалдаба. Тиимэ арсалдаатай хадань тэрэ худагые «хэрүүл» гэһэн удхатай «Эсээк» гэжэ үгөөр Исаак нэрлэбэ.

21Зарасанарынь үшөө нэгэ худаг малтаба. Тэрэнэй түлөө мүн лэ арсалдаан гараба. Тиихэдэнь Исаак тэрэниие «эсэргүүсэл» гэһэн удхатай «Ситнаа» гээд нэрлэбэ. 22Исаак тэндэһээ нүүгээд, үшөө нэгэ худаг малтаба. Одоол тэрэнэй түлөө арсалдаан, хэрэлдээн гарабагүй. Тиимэһээ Исаак тэрэ худагтаа «Зай» гэһэн удхатай «Реховоот» гэжэ нэрэ үгэбэ, «Эзэн Бурхан одоол манда үргэн уужам зай үгэбэ, энэ газарта маанадай олошорхые үршөөбэ» гэжэ тэрэ хэлээ һэн.

23Һүүлээрнь Исаак Бэһээр-Шээбэ ошобо. 24Тэрэ һүнинь Эзэн тэрээндэ үзэгдэжэ, иигэжэ айладхаба:

— Би шинии эсэгэ Абраһаамай шүтэдэг Бурхан гээшэб. Юунһээшье бү ай. Намда үнэн сэхэ зараса Абраһаамда айладхаһанай ёһоор, би хододоо шамай анхаржа, үреэл хайраяа элирхэйлжэ, үреэжэ, уг удамыеш олошоруулхаб.

25Исаак тэрэ газарта үргэлэй шэрээ тхеэрээд, Эзэниие хүндэлэн, үргэл хэбэ. Тиигээд тэрэ гэр бүлэ, зарасанараа асараад, тэндэ шэнэ худаг малтуулаад, һуурижаба.

26Гэраарһаа Абимээлэх хаан, зүбшэгшэнь Ахузаат болон сэрэгэйнь жанжин Пихол нэгэ үдэр Исаагта ерэбэ.

27— Таанад намда дураа гутажа, орон нютагһаа үлдөө һэн бэшэ гүт? Юундэ намда ерэбэт? — гэжэ Исаак асууба.

28— Эзэн тантай нэгэн хамта байһаниинь эли. Тиимэ һэн тула бидэ хоорондоо хани барисаанай хэлсээ баталая. 29Манай орон нютагта амидаржа байхадатнай хэншье таанадые дайраагүй, амар амгалан орон нютагһаа табяа бэлэйлди. Тэрээнһээ хойшо Эзэн таниие үреэгээ. Маанадай урдаһаа добтолхогүйетнай хэлсээгээр батадхабал, һайн бэлэй, — гэжэ тэдэ харюусаба.

30Тиигээд Исаак тэдээндэ найр хэбэ. 31Тэдэ үглөө үглөөгүүр эртэ бодоод, хоёр талаһаа хани барисаанай тангариг үргэбэ. Исаак айлшадтаяа хахасажа, тэдэнь энхэ тайбан һөөргөө бусаба.

32Тэрэл үдэртөө худаг малтажа байгаа барлагууд уһан олдобо гэжэ Исаагта мэдээсэбэ. 33Исаак тэрэ худагта «Шиваа» («тангариг» гэһэн удхатай үгэ) гэжэ нэрэ үгэбэ. Мүнөө болотор тэрэ хото Бэһээр-Шээбэ гэжэ нэрэтэй хэбээрээ байгша.

Бурханай үреэлтэй хүн — Яков

34Эсаав дүшэн наһатай байхадаа, Бээриигэй Иеһудит, Элооной Басэмаат гэдэг хээт яһанай хоёр һамга абаа һэн. 35Эсаавай эдэ хоёр һамгадһаа боложо, Исаак Ривкаа хоёрой ажабайдал түбэгтэй болоо һэн.

Currently Selected:

Эхин 26: BurOTp

Highlight

Copy