Jénesii̱s 48

Bi̱ tsꞌén katsꞌénchikonñé Jakoo̱b Manasee̱ ko̱jo Efraii̱n

1Nguije jaꞌa ni̱xtjin kiꞌmíyaá Kosiee̱ nga je ꞌniú oón na̱ꞌmii̱, kó iskjíbé Manasee̱ ko̱jo Efraii̱n nga jó ndií, kó kijíkoón na̱ꞌmii̱. 2Nga kiꞌmíyaá Jakoo̱b nga Kosiee̱ jachókatsijee̱n, Jakoo̱b katsꞌén ngo kjo̱a̱ꞌniú nga kisꞌijñandoni ṉchan xi kjiꞌijñasón, 3kó bi̱ katsoó Kosiee̱:

—Kui Néná xi tjiín ngayeje ngaꞌniuú, ki̱a̱ jatjokjána ki̱a̱ na̱xi̱ńdá Betee̱l ki̱a̱ nangui Kanaa̱n, kó ki̱a̱ katsꞌénchikonñéna, 4kó bi̱ katsóna: Án boá xi sa̱ꞌin an nga kjín ka̱ma ndíi̱ ko̱jo xota̱ tji̱e̱ tse̱, kó xota̱ tji̱e̱e̱ boá xi kjín na̱xi̱ńdá ka̱ma. Kó kuí boá xi tsjàa̱ kui tꞌananguii̱, kó kui tsi̱ꞌe̱ ka̱ma ngatsjé ni̱xtjin.

5Kó ngotꞌe̱ ꞌne̱ Efraii̱n ko̱jo Manasee̱, nga jó kui ndí xí kisꞌiee̱ nangui Ejipto̱ nguindiee̱ nga kꞌi̱e̱ kjoéꞌe̱ an kui na̱xi̱ńdaá, xikónií tsi ndína ka̱ma, xikótsꞌen ndína má Rubee̱n ko̱jo Simeoo̱n. 6Ndí xí jaskan kꞌuieé jí, kuí bo̱a̱ xi̱ꞌba̱ xi tse̱ ka̱ma, kó ta̱ngatꞌanii̱ nga ntsꞌie ji ma Efraii̱n ko̱jo Manasee̱ ngotꞌe̱ ꞌne̱, kuíni nga sa̱kónii̱ kui ni xi kꞌuijñaá ji.

7Ngatꞌa̱ achichí ndasen kamána nga kjiꞌa nga je kjindiboá nguiñá an nangui Padan Araa̱n nga ngu̱i̱ya ndi̱ya̱á kꞌientaꞌinna na̱áa̱n na̱ Rakee̱l ki̱a̱ nangui Kanaa̱n, kó ki̱a̱ yinijín an mejeén nguije makjáchó Efrata̱, kui ngu̱i̱ndie xi Belee̱n ꞌmí ngotꞌe̱.

8Kó nga kamábe Jakoo̱b ndií Kosiee̱, bi̱ katsó nga asíyaá:

—Kó kui ndií, ꞌyání bo̱a̱.

9-10Kó Kosiee̱ bi̱ katsoó na̱ꞌmii̱:

—Ndína boá, kui ndí xí katsjána Néná kꞌi̱e̱ nangui Ejipto̱.

Kó nga Jakoo̱b nguiti̱ ndajín tsijen kamaá, ngatꞌa̱ jè ꞌniú xchá kamá, bi̱ katsoó Kosiee̱:

—Ndibéje̱boeꞌéní, sa̱ꞌinchikonñé má ra an.

Kó Kosiee̱ kijíjo̱ boaꞌaá ndií na̱ꞌmii̱, kó Jakoo̱b janíkjá ko̱jo atíndsoꞌá. 11Kósꞌe̱ Jakoo̱b, bi̱ katsoó Kosiee̱:

—Jè nguiti̱ katsꞌenkjójín an tsi skuie ngase an kje̱n ji, kó ngotꞌe̱ ꞌne̱ Néná ngaskande ndíi̱ je akóna.

12Kósꞌe̱ Kosiee̱ jaꞌáxín boaꞌá ndií nínga tikón tikoó na̱ꞌmii̱, sꞌe̱ asién tikoó Kosiee̱ kje̱n na̱ꞌmii̱ ngaskande nga kisitꞌaa̱ kje̱n tꞌananguii̱. 13Kó Kosiee̱ iskjíbé nga jó ndií, Efraii̱n íjñá nga kixii̱ kó Manasee̱ íjñá nga skoón Jakoo̱b, kó ki̱a̱ indó nínga tikón na̱ꞌmii̱, kó bo̱a̱ tsꞌén Efraii̱n nga skoón Jakoo̱b kisꞌijña kó Manasee̱ nga kixii̱ Jakoo̱b kisꞌijña. 14Ta̱nga Jakoo̱b yejéntie tsja xi kixii̱ kó to̱ko̱ Efraii̱n íjñasoón kui ndí xi kjindií Kosiee̱, kó tsja xi skoón to̱ko̱ Manasee̱ íjñasoón, ta̱ xá bo̱a̱ katsꞌénní nda tsi be nga Manasee̱ boá xi ndí xí tjoón Kosiee̱. 15Kósꞌe̱ katsꞌénchikonñé Kosiee̱ nga bi̱ katsó:

Kui Néná xi Nee̱ na̱ꞌmindyiboana Abraa̱n,

ko̱jo Nee̱ na̱ꞌmina Isaa̱,

kui Néná xi tsꞌénbokóna ndi̱ya ngayeje ni̱xtjin nga tikòn an nga̱sondie.

16Kuí boá xi katsanguiya ndítsjiee̱,

tsi̱ꞌe̱ nga xín katsꞌénkjaꞌána ngayeje ni xi ndajiín.

Kui tsꞌénmíꞌáa̱ nga sa̱ꞌínchikonñé

kui já xo̱ngo̱ó,

kó nga ta̱ngatꞌanii̱ kui nga ngatjaꞌátsjien jaꞌénna,

ko̱jo jaꞌeén na̱ꞌmindyiboana Abraa̱n,

ko̱jo na̱ꞌmina Isaa̱.

¡Kjín ngatama ndí xí nga sꞌiee̱!

17Tsjájín kamaá Kosiee̱ nga kamábe nga na̱ꞌmii̱ tsja xi kixii̱ íjñasoón to̱ko̱ Efraii̱n, kó jaꞌáxín tsja na̱ꞌmii̱ tsi̱ꞌe̱ nga ko̱síkjo, kó nga tsja xi kixii̱ ku̱i̱ꞌíjñasoón to̱ko̱ Manasee̱, 18kó bi̱ katsoó Na̱ꞌmii̱:

—¡Bo̱a̱jín tsꞌén na̱ꞌmi! ¡Manasee̱ boá xi ndí tjónna! ¡Kó kuí boá xi chjiéngá kꞌuíjñisée̱n, ndse̱ xi kixii̱!

19Ta̱nga Jakoo̱b kamámejénjiín bo̱a̱ katsꞌén, kó bi̱ katsó kui:

—Jè be an xi̱ꞌin, jè be an. Manasee̱ ti̱ bo̱a̱ ti̱ tsꞌén ngo na̱xi̱ńdá xi je ka̱ma ndií nga, ta̱nga ndíi̱ xi kjindí ngasee̱ ꞌniú ngase xcha̱ndikón kuí, ta̱bo̱a̱jiín xi ingoo̱, kó xota̱ tji̱e̱e̱ kui, ngo xtín na̱xi̱ńdá ka̱ma.

20Kó bo̱a̱ tsꞌén kui ni̱xtjii̱n Jakoo̱b, Efraii̱n katsjaá ngu̱i̱ndie xi tsoboaá Manasee̱, kósꞌe̱ bi̱ katsó:

—Kjiꞌa nga xota̱ tji̱e̱na tjín xí sa̱ꞌínchikonñé, bi̱ ngatsoó:

Néná ngatsꞌenchíkonñeé

xikótsꞌen katsꞌénchikonñé Efraii̱n ko̱jo Manasee̱.

21Jaskan Jakoo̱b, bi̱ katsoó Kosiee̱:

—Jè ta̱ chiboa tsí ni̱xtjin chajana nga ko̱ya án, ta̱nga Néná kꞌuijñájo̱jnú, kó kuí boá xi kjo̱jo nguinií nanguii̱ na̱ꞌmindyiboáa. 22Kó nga jí boá xi tindyintjée̱n já ntsꞌie ji, ji tsꞌéntsjaa na̱xi̱ Sikee̱n, kui tꞌanangui xi jaꞌaxíi̱n xota̱ tji̱e̱e̱ Amoo̱r kjiꞌa nga askjanjo̱ an kui.

Currently Selected:

Jénesii̱s 48: MAIX

Highlight

Copy