Jénesii̱s 47

Bi̱ tsꞌén jachó Jakoo̱b nguindyi̱ko̱n nda̱ ree̱ nangui Ejipto̱

1-2Kosiee̱ jaꞌájin ún já ntsꞌi̱e̱ xi jachójo̱ nguindyi̱ko̱n nda̱ ree̱, kó bi̱ katsoó nda̱ ree̱:

—Na̱ꞌmina ko̱jo já ntsꞌié án ndeskande nangui Kanaa̱n kjindiboáni, kó jè síndo nangui Ngosee̱n. Kjindiboájo̱ ngayeje cho̱tsa̱nga̱a̱ ko̱jo cho̱yojoo̱ ko̱jo ngayeje ni xi tjiín.

3Kó nda̱ ree̱, bi̱ katsoó nga asíyaá já ntsꞌi̱e̱ Kosiee̱:

—Kó jún, mí xá xí niꞌánjnú.

Kó kui jaá bi̱ katsó:

—Cho̱tsa̱nga̱ choónjne̱ nda̱ re, kuí xaá xí katsꞌén xota̱ xi xchájne̱ nga. 4Kꞌi̱e̱ jéꞌe̱kindyion ngotjónjne̱ kui ngu̱i̱ndiee̱, ngatꞌa̱ jè nguiti̱ jmí ni chiniéjín nangui Kanaa̱n, kó ti̱ jè nguiti̱ jmí ndi̱xcho̱jiín cho̱ xi tjínjne̱ nga. ꞌNiú chjiáꞌájne̱ ji nga ko̱e̱ꞌéndiéjne̱ nga ki̱a̱ ku̱i̱ndyionjne̱ nangui Ngosee̱n.

5Kósꞌe̱ nda̱ ree̱, bi̱ katsoó Kosiee̱:

—Kó nga na̱ꞌmíi̱ ko̱jo ntsꞌie ji, kꞌi̱e̱ jeꞌekꞌíndojoo̱, 6ka̱machje̱ꞌéjin ji tꞌanangui xi mejeén tsi̱ꞌe̱ nga kꞌi̱e̱ kꞌuíndo kui na̱xi̱ńdaá. Teꞌée̱ tꞌanangui xi nda ngasee̱, ki̱a̱ ngatꞌíndo nangui Ngosee̱n. Kó tsi tjín kuí jaá xi ꞌniú maá xá xí tsꞌén, teꞌéxée̱ kó kuí nga koo̱n cho̱ xi tsa̱ꞌa̱n.

7Kósꞌe̱ Kosiee̱ ti̱ kijíjo̱ na̱ꞌmii̱ nguindyi̱ko̱n nda̱ ree̱ nga, kó Jakoo̱b achichí ndikón tsꞌén katsꞌéntinde nda̱ ree̱, 8kó nda̱ ree̱, asíyaá kótjín noó Jakoo̱b. 9Kó Jakoo̱b, bi̱ katsoó nda̱ ree̱:

—Úchán ko̱jo kantié nó tjínna nda̱ re nga ja̱kꞌi̱e̱ ja̱ngaján tsꞌénfí an. Nda tsi tsie kjo̱a̱ni̱ma̱ tsꞌénfoaꞌatio an, ta̱nga kji̱e̱ fochójín an xikó kjiꞌi nó kisꞌińdo xota̱ xi xchána.

10Nga jetꞌa, Jakoo̱b ndikón tsꞌén katsꞌénkixotꞌa nda̱ ree̱, sꞌe̱ kijí nguijee̱.

11Kó Kosiee̱ katsꞌénkjatjosón ni xi katsó nda̱ ree̱, kó ki̱a̱ katsꞌénkꞌíndo na̱ꞌmii̱ ko̱jo já ntsꞌi̱e̱ tꞌanangui xi nda ngasee̱ nangui Ejipto̱. Ki̱a̱ kisꞌińdo kui xotaa̱ nangui Ngosee̱n, kui xi jaskan nangui Ramsee̱ kiꞌmí nguijee̱. 12Kó Kosiee̱ katsjaá ngayeje kui xotaa̱ ni chinie, ta̱ xikó kjiꞌi kamá ndí xí kisꞌiee̱ nga ngo nga ngo.

Bi̱ tsꞌén kamá kjindiá ki̱a̱ nangui Ejiptoo̱

13Ta̱nga kui kjindiaá jè tjítsꞌenkjié ngayeje xota̱ xi chji̱a̱ni nangui Kanaa̱n ko̱jo nangui Ejipto̱. Nguiti̱ ingojín ngu̱i̱ndie nínga kisꞌie ngase ni chinie. 14Ta̱nga Kosiee̱ to̱kó tsꞌénbotiñá ra to ndso̱ko̱a̱n ṉño̱pan, kó tjítsꞌentsié ra ngase too̱n nda̱ ree̱. Ngayeje to̱n xi kisꞌie kui na̱xi̱ńdaá, Kosiee̱ jaꞌátikó nga atíñá to ndso̱ko̱a̱n ṉño̱pan xi tsꞌatsie kui xotaa̱. 15Nguije je ngayeje to̱n xi kisꞌiee̱ xota̱ Ejiptoo̱, ngayejee̱ kui xotaa̱ kijíkoón Kosiee̱, kó bi̱ katsoó:

—Jè nguiti̱ jmí to̱njínjne̱. Teꞌénjne̱ ji ni xi xi̱ni̱e̱ji̱n, tsájmi tsá ko̱ya yejéjne̱.

16Kó Kosiee̱, bi̱ katsoó kui xotaa̱:

—Tsi nguiti̱ jmíjínjnú to̱n, ndiboájo̱jnú cho̱ xi tjínjnú, kó to ndso̱ko̱a̱n ṉño̱pan kositꞌajo̱jnúꞌun.

17Kó xota̱ Ejiptoo̱ jachójoo̱ Kosiee̱ ndi̱je̱e̱, cho̱tsa̱nga̱a̱, tindsoo̱, cho̱yojoo̱ ko̱jo bórroó, kó ni chinie asítꞌani ngayeje kui noó. 18Ta̱nga nó xí ingoo̱, ti̱ ingo ndi̱ya jachókón nguinií Kosiee̱ kui xotaa̱, kó bi̱ katsoó:

—Ji nda̱ xtitjón, ka̱májín kꞌuiꞌmájne̱ ji nga jè nguiti̱ jmíjínjne̱ to̱n, kó nga ngayeje cho̱ xi tjínjne̱ jè tse̱ ji. Jè nguiti̱ jmíjínjne̱ ni xi ka̱ma ko̱e̱ꞌéjne̱ ji xi ko̱sitꞌajne̱ ni chinie, ta̱ ngototo tꞌananguijne̱ ko̱jo yojojne̱. 19¡Tsꞌi̱tsiejne̱ tꞌananguijne̱, kó mosoo̱ nda̱ ree̱ ngatamajne̱, ta̱nga teꞌénjne̱ ni chinie! Teꞌéjne̱ xojmá xí kꞌuítji̱e̱jne̱ tꞌananguii̱. Kó bo̱a̱ tsí tsꞌén nga ko̱yajínjne̱. ¡Mejénjínjne̱ nga ji xche̱jne̱ nga ko̱ya ji̱n, kó nga tꞌananguijne̱ kꞌuíndo kjitiya xikoó nangui kixií!

20Nga ja̱koxi̱ achichí ꞌniú kamá kui kjindiaá nga ngayeje xota̱ Ejiptoo̱ atíñaá Kosiee̱ ngayeje tꞌananguii̱, kó Kosiee̱ tsꞌatsie kui tꞌananguii̱ tsi̱ꞌe̱ nda̱ ree̱ nangui Ejipto̱. Kó bo̱a̱ tsꞌén nga ngayeje tꞌanangui xi kisꞌie nangui Ejipto̱ nga tsi̱ꞌe̱ nda̱ ree̱ kamá, 21kó ngayeje xota̱ xi chji̱a̱ni nangui Ejipto̱ xi mosoo̱ nda̱ ree̱ kamá nga. Kosiee̱ boá xi katsꞌén ngayeje kui nii̱. 22Ta̱nga Kosiee̱ tsꞌatsiejín tꞌanangui xi tsi̱ꞌe̱ chináꞌmii̱, ngatꞌa̱ já chináꞌmii̱ atíñájín, kjo̱a̱a̱ nga nda̱ ree̱ ngatsjé ni̱xtjin katsanguiyaa̱ ngo tjín to ndso̱ko̱a̱n ṉño̱pan, kó ngaskande tsꞌanguii̱ ni chinie kui jaá.

23Kósꞌe̱ Kosiee̱, bi̱ katsoó xota̱ Ejiptoo̱:

—Kꞌi̱e̱ tikónjnú xojmá tsi̱ꞌe̱ nga kꞌuítji̱e̱jnú tꞌananguijnú. Ta̱nga ngatjaꞌátsjienjnú nga ngotꞌe̱ jè tsꞌatsiejnúꞌun jún ko̱jo tꞌananguijnú, kó ngotꞌe̱ ꞌne̱ jè nda̱ ree̱ ndokjo̱a̱nijnú. 24Kó kuíni nga nguije ka̱maxchá ni xi kꞌuítji̱e̱jnú, ngo nga ún tjiín kui nii̱ xi nda̱ ree̱ si̱ꞌankꞌasꞌienjnúu̱, kó xi ngui nijón nga ún tjiín, tsa̱jún ka̱ma. Ki̱a̱ chjábénijnú xojmá xí ka̱ma kꞌuítji̱e̱jnú, kó ko̱jo kui xi̱ꞌba̱ xi ka̱ma xi̱ni̱e̱jnú jún ko̱jo ndíjnú.

25Kó xota̱ Ejiptoo̱, bi̱ katsoó:

—Ji nda̱ xtitjón: ¡jí boá xi kaꞌnaxiéꞌéjne̱! ¡Kó kuíni nga ngotꞌe̱ ꞌne̱ teꞌéndiéjne̱ nga mosoo̱ nda̱ ree̱ ka̱májne̱!

26Kó kuíni nga Kosiee̱ ngo kjo̱a̱kiti katsꞌénda nangui Ejipto̱, nga ngo nga ún bo̱a̱ kjiꞌi ni xi maxchaá xi si̱ꞌankꞌasꞌiee̱n nda̱ ree̱. Kó ndeskande ni̱xtjin nga kamánda kui kjo̱a̱kitii̱, kó ngaskande ngotꞌe̱ nga tjiniꞌánkjatjosón. Ta̱ kuí tsi tꞌanangui xi tsi̱ꞌe̱ chináꞌmii̱ xi tsi̱ꞌe̱ nda̱ ree̱jín kamá.

27Kó bo̱a̱ tsꞌén nga xota̱ Israee̱l, ki̱a̱ kisꞌińdo Ejipto̱ ki̱a̱ nangui Ngosee̱n. Kó ki̱a̱ tsꞌatsie tꞌanangui, kó achichí kamá ndií.

Kosiee̱ bi̱ tsꞌén índajo̱ ngo ni na̱ꞌmii̱

28Kó Jakoo̱b tjiꞌún jó nó kamaá nga kisꞌijña nangui Ejipto̱, kó úchán ko̱jo yichán yito nó kamaá nga kisꞌijña nga̱sondie. 29Nguije makjáchó ni̱xtjin nga ko̱ya, tsíchji̱a̱a̱ Kosiee̱ kui xi ndií, kó bi̱ katsoó:

—Ngo kjo̱a̱nda kuíꞌaá xi̱ꞌin, kó nguiboanéná tꞌín ji nga si̱ꞌinkjatjosén ji. Tsi ja̱koxi̱ nga tjoó an, nguiboanéná tꞌín ji nga nguije ko̱ya an, nga kꞌi̱e̱jín kjónijínní nangui Ejipto̱. 30Nguije ko̱ya an, ꞌna̱xié ji ńdana kꞌi̱e̱e̱, kó ki̱a̱ tjanijínní nínga kjiyojonijín xota̱ xi xchána.

Kó Kosiee̱ nguiboanéná nga sa̱ꞌinkjatjosón an kui nii̱ katsoó na̱ꞌmii̱, 31ta̱nga Jakoo̱b, bi̱ katsó ngasee̱:

—¡Nguiboanéná tꞌín ji!

Kó Kosiee̱, nguiboanéná katsó. Kósꞌe̱ Jakoo̱b kisꞌijñaxtien nga̱són ṉchaa̱n, kó tsíchji̱a̱a̱ Néná.

Currently Selected:

Jénesii̱s 47: MAIX

Highlight

Copy