Jénesii̱s 31

Bi̱ tsꞌén Jakoo̱b tsangaa̱ Labaa̱n

1Kó jaá Labaa̱n tsíchji̱a̱jo xkjín nga bo̱a̱ katsoó nga Jakoo̱b achichí jè kjimacho̱n ta̱ngatꞌanii̱ Labaa̱n. 2Kó Jakoo̱b tsintꞌié kuí nii̱, kó ti̱ kamábe nga kje̱ꞌe kisꞌie kje̱n Labaa̱n, nguiti̱ bo̱a̱jín tsꞌén katsꞌénseén xikoó ngasꞌe̱. 3Kósꞌe̱ Néná bi̱ katsoó Jakoo̱b: «Tꞌen nguiní ji nangui nínga síndo xi xcháa̱ ko̱jo xota̱ xingu̱i̱ ji, kó án ki̱a̱ kjótsoꞌbájoo̱».

4Kó Jakoo̱b tsíchji̱a̱a̱ na̱ Rakee̱l ko̱jo na̱ Líaa̱ ki̱a̱ nínga tjimá nga ndyi̱koo̱n cho̱tsa̱nga̱, 5-7kó bi̱ katsoó:

—Na̱ꞌmijnú jè nguiti̱ bo̱a̱jín tsꞌén tsꞌenseénna xikoó ngasꞌe̱. Jún yajnú nga ta̱nisién ꞌniú nda katsꞌenxájo̱ an na̱ꞌmijnú, ta̱nga kuí ta̱ ngo nga tsꞌénꞌboṉcha̱jona, ngatꞌa̱ kjín ndi̱ya asíkjo xikó kjiꞌi ꞌbíchjína, ta̱nga Néná xí tsi̱ꞌe̱ na̱ꞌmina asíko̱jona, kó katsjandiéjiín nga ndajínkjiꞌi ni xi sa̱ꞌínjo̱na. 8Tasá kjiꞌa nga Labaa̱n cho̱ xi indoó xi íchjína, ngayeje cho̱tsa̱nga̱a̱ ndí xí indó kisꞌiee̱, kó tsi cho̱ xi tjiín ndi̱ya tiboa boá xi íchjína, ngayeje cho̱tsa̱nga̱a̱ nga ndi̱ya tiboa kisꞌiee̱ ndí xí yeꞌé. 9Kó bo̱a̱ tsꞌén nga cho̱ xi tjiín na̱ꞌmijnú Néná jaꞌáxiín, kó an katsjána.

10Ngo ndi̱ya tseꞌéna ngo chi̱ni. Kó ngu̱i̱jii̱n kui chi̱nii̱ kamábe an cho̱tsa̱nga̱ xi mejeén xi̱ꞌii̱n, kó kamábe an nga cho̱tsa̱nga̱ xi jaꞌatji ndi̱ja̱a̱ xi xi̱ꞌin xi ixánjo̱ cho̱ xi ínchjiín, cho̱ xi indó ko̱jo xi tjiín ndi̱ya tiboa boá. 11-12Kó Néná bi̱ katsóna ngu̱i̱jin ńjñáján: Jè kamábe an ngayeje ni xi ndajínkjiꞌi xi tjitsꞌénjoo̱ chiꞌyáa̱, kó kuíni nga tsitsíjin ji ngotꞌe̱ kó xche̱ ji nga ngayeje cho̱ xi̱ꞌin xi bixanjo̱ cho̱ ínchjiín, cho̱ xi indó ko̱jo xi tjiín ndi̱ya tiboa boá. 13Án boá kui Ne xi kamáyé ji ki̱a̱ Betee̱l, nínga kachjatjénjen ji isti̱ ngo ndi̱jo̱, kó katseꞌéní ndso̱ꞌboe nga si̱ꞌinkjatjosénní. Kó ngotꞌe̱ ꞌne̱ ti̱sítji̱n ji, kó tja̱tje ji kui ngu̱i̱ndiee̱, kó tꞌen nguiní ji nangui Kanaa̱n nínga katsen ji.

14Kó na̱ Rakee̱l ko̱jo na̱ Líaa̱ bi̱ katsó:

—Ji̱n jè nguiti̱ ka̱májín xchiyájne̱ nga tjín ni xi sa̱kójne̱ nga tsja̱ájne̱ na̱ꞌmijne̱, 15ngatꞌa̱ jè xikoó tsi xota̱ xi xín nangui maa̱ ji̱n. Jmí tsi ta̱ atíñá tsí ji̱n xikoó ni xi stiñá, ngaskande kiniꞌínxé kjo̱a̱ndée ta̱ngatꞌanii̱ ji̱n. 16Ngayeje kjo̱a̱cho̱n xi Néná jè jaꞌáxiín na̱ꞌmijne̱, tsa̱ñá boá ko̱jo tsi̱ꞌe̱ ndí ixtíná boá katsaki, kó kuíni nga ti̱ꞌin ji ngayeje ni xi je katsoó Néná nga si̱ꞌin ji.

17-19Kó kui ni̱xtjii̱n tji̱e̱nga Labaa̱n tsja̱a̱ cho̱tsa̱nga̱a̱ kijíkatie, na̱ Rakee̱l katsꞌénchejeé ne xi tsꞌénda xotaa̱ xi kisꞌiee̱ na̱ꞌmii̱. Sꞌe̱ Jakoo̱b iskjíbé ndií ko̱jo ínchjiín, kó katsꞌénkꞌíndosoón cho̱toꞌoyitsꞌén, kó iskjíbé ngayeje cho̱ xi tsi̱ꞌe̱ ko̱jo ngayeje ni xi kisꞌiee̱, ngayeje cho̱ xi katsꞌén nga kisꞌijña Padan Araa̱n, kó kijíjo̱ xtji̱e̱e̱n nangui Kanaa̱n nínga kisꞌijña Isa̱ na̱ꞌmii̱. 20-21Kó kijíjo̱ ngayeje ni xi kisꞌiee̱, tsꞌenṉcha̱jo Labaa̱n ngatꞌa̱ jmí ni katsójiín nga je tsꞌénfí. Kó nguije jaꞌatio ndejé Éufratee̱, kijí xtji̱e̱e̱n na̱xi̱ Ngalaa̱d.

Bi̱ tsꞌén Labaa̱n kijítji̱nguii̱ Jakoo̱b

22Kó xi ma ján ni̱xtjin kamábe Labaa̱n nga je tsanga Jakoo̱b. 23-25Kósꞌe̱ Labaa̱n tsíchji̱a̱a̱ xota̱ xkjín, kó kijítji̱nguii̱ Jakoo̱b, kó xi ma yito ni̱xtjin jachótji̱nguii̱ ki̱a̱ na̱xi̱ Ngalaa̱d, nínga tjítsꞌénkjaꞌyá Jakoo̱b, kó Labaa̱n ti̱ ki̱a̱ katsꞌénkjaꞌyá ndatsa kui ko̱jo xota̱ xkjín xí tsoꞌbájo̱ nga. Kó kui ni̱xtji̱e̱e̱n Néná jatjokjaá ngu̱i̱jin ńjñaá Labaa̱n nda̱ arameoo̱, kó bi̱ katsoó nga tsíchji̱a̱jo: «Laba̱n, ngata̱ ꞌniújín ndokjo̱a̱je ji Jakoo̱b».

26Ta̱nga Labaa̱n bi̱ katsoó Jakoo̱b:

—Ánní nga kichꞌíṉche̱jení. Ánní nga kjindibéje̱ ji ndí ínchjínna xikoó tsi xota̱ ndo̱bo̱a̱ya xi nanguiya kjo̱a̱xchán. 27Ánní nga ꞌma ꞌma ikiyi kon ji, kó jmí ni kasejínní. Tsi kiꞌmíyéní, ta̱ sa ra ngo sꞌué katsꞌeen tsi̱ꞌe̱ nga katsꞌenkixotꞌaa. 28¡Kjo̱a̱tsabé boá ni xi kiniꞌín ji! ¡Nde katseꞌéndiéjín ji nga katsjáa̱ ngo ndsó ndí ínchjínna ko̱jo ndíndena! 29Tjínna ngaꞌniú nga ngo ni xi ndajínkjiꞌi sa̱ꞌinjo̱jnúꞌun, ta̱nga ngoye jñó tsíchji̱a̱jona Ne xi tsi̱ꞌe̱ na̱ꞌmíi̱, kó bo̱a̱ katsóna nga ꞌniújín xó kuichjiájoo ji. 30Tsi je tsá mejeén nga kꞌuin nguiní ji ndiꞌaa̱ na̱ꞌmíi̱, chjiénjín nga kjindibéje̱chejé ji ne xi tsꞌendikón an.

31-32Kó nga Jakoo̱b kamábejín nga na̱ Rakee̱l katsꞌénchejé kuí nii̱, bi̱ katsoó Labaa̱n:

—Nga ja̱koxi̱ katsakjonña an nga tsi ta̱ kachjeꞌéxín kjo̱a̱ꞌniúní ndí ínchjíi̱n. Ta̱nga kjo̱a̱a̱ kui ni xi niꞌíndikín, ti̱tje jí, kó ti̱ndyi̱sé so̱bo̱e̱ ji. Tsi tjín ni xi tse̱ xi síndo kꞌi̱e̱e̱, chjábé jí. Kó tsi tjín xí síndo kꞌi̱e̱e̱ xi iskjíbé ne xi tse̱, chjiéngá ko̱ya. Xota̱ xingu̱i̱ ñá xí chistiko̱ ni xi tꞌíxián an.

33Kó Labaa̱n tsꞌasꞌien ndiꞌa xi tji̱xi̱ín cho̱ niꞌándani xi tsi̱ꞌe̱ Jakoo̱b, ko̱jo xi tsi̱ꞌe̱ na̱ Líaa̱, ko̱jo xi tsi̱ꞌe̱ nga jó ínchjín xí chji̱ni̱e̱ꞌboo̱, kó jmí ni kasakojiín, sꞌe̱ jataxie ndiꞌa nínga tikón na̱ Líaa̱, sꞌe̱ tsꞌasꞌien ndiꞌa xi tji̱xi̱ín cho̱ niꞌándani xi tsi̱ꞌe̱ na̱ Rakee̱l. 34-35Ta̱nga na̱ Rakee̱l iskjíbé kuí nee̱, kó nguindie xiri̱e̱ xi ꞌbísoón cho̱toꞌoyitsꞌeén ki̱a̱ índonguí, kósꞌe̱ ki̱a̱ kisꞌijñasón, kuíni nga bi̱ katsoó na̱ꞌmii̱: «Ngata̱ niꞌínxchínjín ji na̱ꞌmi tsi kjo̱stjíe̱njín an kꞌi̱e̱e̱, kjo̱a̱a̱ nga ni xi maa̱ xki̱ sá ínchjiín kjimana».

Kó Labaa̱n tsangase kui nee̱ ngayeje ngu̱i̱ndie, kó jmí ni kasakojiín. Kó nga kamábe Jakoo̱b nga jmí ni kasakojiín, 36katsꞌénxchánjo̱, kó bi̱ katsoó Labaa̱n:

—Mí ni xi katsꞌenkjatson án. Mí jé xí katsꞌen an nga tsꞌentje̱tji̱nguíní xikoó tsi ini̱ma̱ katsꞌenkꞌién an. 37Ja̱ jè ikindyisé ji ngu̱i̱jii̱n ngayeje ni xi tjínna, kó mí ni xi kasakoo̱ xi tse̱. Ja̱ kꞌi̱e̱ tꞌínde ji kje̱n xota̱ xingu̱i̱ ñá, tsi̱ꞌe̱ nga ka̱ma ku̱i̱chji̱a̱, kó ka̱tso̱ya ꞌyání nga jó ñá xi tjiín ngakixi̱.

38Kui xi kan nó katsꞌenxájoo̱ ji, ngojín ndií cho̱tsa̱nga̱a̱ xi iskjíni̱e̱ an, ti̱ nde ngojín cho̱tsa̱nga̱a̱ ko̱jo tsi tindso̱o̱ xi tsijén xtió ngo ndií. 39Tsi ngo cho̱ tamá katsꞌénkꞌién ngo cho̱ xi tse̱, an íchjií, ta̱nga kjiꞌa nga tjín xí katsꞌénchejeé ngo cho̱ tsi nga jñó ko̱jo tsi nga ni̱xtjin, an kachjeꞌéchjíní. 40-41Kui xi kan nó jaꞌa an ndiꞌáa̱, achichí kjo̱a̱ni̱ma̱ jaꞌa an, nga ni̱xtjii̱n ndoboaá katsꞌénchjánna, kó nga ni̱xtji̱e̱e̱n nchꞌaán ndajín katsꞌénkáféna. Tienijón nó katsꞌenxá kjo̱a̱nda an ta̱ngatꞌanii̱ nga jó ínchjíi̱n, kósꞌe̱ jun nó askóo̱n cho̱ xi tjiín, ¡kó ta̱ tiejín ra ndi̱ya akasíkje ji chjína! 42¡Achichí ndakjiꞌi nga kui Néná xí tsi̱ꞌe̱ na̱ꞌmindyiboana Abraa̱n asíko̱jona! Kui Ne xi katsꞌéndikón na̱ꞌmina Isaa̱ nda katsꞌénjo̱na, ngatꞌa̱ kamábe kjo̱a̱ndasenna ko̱jo nga je jenda an, kuíni nga katsꞌénxchánjo̱nii̱ ngoye jñó. Tsi bo̱a̱jín katsꞌen Néná kiniꞌínkjítiyerani.

43Kósꞌe̱ Labaa̱n bi̱ katsoó Jakoo̱b:

—Kui ínchjiín, ndína boá, kó kui jákjíndií ndíndena boá, kó kui cho̱tsa̱nga̱a̱ tsi̱ꞌe̱ cho̱tsa̱nga̱na boá. ¡Ngayeje kui nii̱ tsa̱ꞌa̱n boá! ¡Ta̱nga ka̱májín ngo ni xi ndajínkjiꞌi sa̱ꞌinjo̱jnúꞌun! 44Tasá ngo ni kꞌuíndá ji ko̱jo an.

45Kósꞌe̱ Jakoo̱b iskjíbé ngo ndi̱jo̱ je xi íjñá nguindiee̱ nínga chjaninkꞌa ngo xó, xikoó tsi ngo chi̱bo̱a̱, 46kó bo̱a̱ katsoó nga tsíchji̱a̱jo xota̱ xkjín tsi̱ꞌe̱ nga kjo̱a̱ꞌáꞌyá ngase ndi̱jo̱. Kó bo̱a̱ katsꞌén kui jaá, sꞌe̱ katsꞌénda ngo xó, kó ki̱a̱ iskjinie ṉño̱ nga ngo foaꞌatjiyajoo̱n kui xoó. 47Kó Labaa̱n «Jenga̱r Sadutaa̱» katsoó kui ngu̱i̱ndiee̱ nga én arameo̱, kó Jakoo̱b «Ngalaa̱d» katsoó nga én ebreoo̱. 48-50Kósꞌe̱ bi̱ katsó Labaa̱n:

Ngotꞌe̱ ꞌne̱ kui ndi̱jo̱ xi síndo tikoó, kuí boá xi chistiko̱ ka̱ma kjo̱a̱a̱ ni xi ndyi̱ꞌbínda nga jó ñá. Nguije kjin tindyionñáa xingu̱i̱, Néná boá xi nga kotsijenná nga jó ñá nguije kja̱ xín kja̱ xín tsanguín nga ngo nga ngo. Tsi ndajín si̱ꞌinje̱ ji ndí ínchjínna, kó tsi kje̱ꞌe ínchjín ku̱i̱ndyinje̱ ji, nda tsi jmíjín xi chistiko̱ ka̱maná ñá, Néná xí ngatama kui chistikoo̱.

Kuíni nga kuí ngu̱i̱ndiee̱ nguije Ngalaa̱d kisitꞌa jaꞌén, ti̱ Mispa̱ kiꞌmí nga «Néná tsꞌénkotsijénná» tsó kuí jaꞌeén.

51Jaskan Labaa̱n bi̱ katsó ngasee̱ Jakoo̱b:

«Kui xó ndi̱jo̱o̱, kuí boá xi ka̱ma ngo chi̱bo̱a̱ xi kachjaninkꞌá ji ko̱jo an. 52Kó kuí boá xi ngatama ngo chi̱bo̱a̱ ko̱jo chistiko̱ kjo̱a̱a̱ ni xi ndyi̱ꞌbínda. Ti̱ nde ji ku̱i̱tjátjénjíi̱n kuí chi̱bo̱a̱a̱, kó ti̱ nde an kjo̱a̱ꞌatjónjáa̱n tsi̱ꞌe̱ nga ndajín si̱ꞌanjo̱ xingu̱i̱. 53Kó kui Néná xí tsi̱ꞌe̱ Abraa̱n ko̱jo xi tsi̱ꞌe̱ Naoo̱r na̱ꞌmindyiboaná, kuí xí ngatamabe tsi nda ko̱jo tsi ndajín ndyi̱niꞌán».

Kó Jakoo̱b nguiboanéná katsó nga katsꞌénkie kui Néná xí katsꞌéndikón Isa̱ na̱ꞌmii̱. 54Sꞌe̱ katsꞌénkꞌién ngo cho̱ xi katsꞌénkꞌasꞌiee̱n Néná ki̱a̱ na̱xi̱i̱, sꞌe̱ tsíchji̱a̱a̱ xota̱ xkjín tsi̱ꞌe̱ nga iskjinie ni chinie, kó ki̱a̱ kisꞌiyojo kui na̱xi̱i̱ kui ni̱xtji̱e̱n xi̱ꞌba̱.

55Nga kamánguindyiojón Labaa̱n ꞌniú ta̱jñó jastjíe̱n, katsjaá ngo ndsó tꞌanijon ndíndee ko̱jo ndí ínchjiín, katsꞌénchikonñé, sꞌe̱ kijí nguiní ndiꞌaa̱.

Currently Selected:

Jénesii̱s 31: MAIX

Highlight

Copy