Jénesii̱s 30

Ndií Jakoo̱b xi kisꞌiee̱ na̱ Bilaa̱

1Kó nga kamábe na̱ Rakee̱l nga jmí ndí kisꞌiejiín, kamáꞌonkon kjo̱a̱a̱ ndichja, kó bi̱ katsoó Jakoo̱b:

—Tsi jmí ndí ko̱e̱ꞌéjínní, ta̱sá ngatꞌien an.

2Kó Jakoo̱b katsꞌénxchánjo̱ na̱ Rakee̱l, nga bí katsoó:

—A Néná boá an nga bo̱a̱ se kon ji. ¡Kuí boá xi jmí ndí tsjájiín!

3Kósꞌe̱ bi̱ katsó na̱ Rakee̱l:

—Tsjajnije̱ ji na̱ moso̱na Bilaa̱, tsi̱ꞌe̱ nga kꞌuieé ngo ndí jí ko̱jo kui naa̱, kó nga stse̱n kuí ndií, xikónií tsi tsa̱ꞌa̱n ngatama.

4Kó bo̱a̱ tsꞌén na̱ Rakee̱l katsjaá Jakoo̱b nga kjojñájo̱ na̱ Bilaa̱, kó Jakoo̱b kisꞌiejo̱ kui naa̱, 5kó na̱ Bilaa̱ kisꞌiee̱ ngo ndí xí tsi̱ꞌe̱ Jakoo̱b. 6Sꞌe̱ na̱ Rakee̱l, Ndaa̱n ítꞌa jaꞌén, kui jaꞌeén «Kjo̱a̱kixi̱» tsó. Ngatꞌa̱ bi̱ katsó: «Kixi̱ Néná, ngatꞌa̱ nga kamábe nga jmí ni xi ndajínkjiꞌi tjítsꞌen an, katsjána ngo ndí».

7Na̱ Bilaa̱ ti̱ tsaꞌá nguinií ingo ndí, kó katsen ndií xi ma jó xi tsi̱ꞌe̱ Jakoo̱b. 8Kó na̱ Rakee̱l Neftali̱ ítꞌa jaꞌén, ngatꞌa̱ kui jaꞌeén «Kjo̱a̱bixkán» tsó. Ngatꞌa̱ bi̱ katsó: «ꞌNiú askjanjo̱na ndichja án, kó án boá xi katsꞌée̱n».

Ndií Jakoo̱b xi kisꞌiee̱ na̱ Silpaa̱

9Nga kamábe na̱ Líaa̱ nga nguiti̱ jmí ndí kisꞌiejiín kui, katsꞌénkꞌasꞌiee̱n Jakoo̱b na̱ mosoo̱ xi ꞌmí Silpaa̱ tsi̱ꞌe̱ nga kjojñájo̱. 10Kó na̱ Silpaa̱, kisꞌiee̱ ngo ndí xí tsi̱ꞌe̱ Jakoo̱b. 11Kó na̱ Líaa̱ Ngaa̱d ítꞌa jaꞌén, ngatꞌa̱ kui jaꞌeén «Kjo̱a̱ndani̱xtjin» tsó. Ngatꞌa̱ bi̱ katsó kui naa̱: «¡Achichí nda kamá ni̱xtjinna!»

12Jaskan na̱ Silpaa̱ ti̱ kisꞌie nguinií ingo ndí xí tsi̱ꞌe̱ Jakoo̱b, 13kó na̱ Líaa̱ Asee̱r ítꞌa jaꞌén, ngatꞌa̱ kui jaꞌeén «Kjo̱a̱tsjatjín» tsó. Ngatꞌa̱ bi̱ katsó: «Achichí tsjátjínna, kó ínchjiín achichí ra tsjaa kui ka̱tso̱na».

Jakoo̱b kisꞌie ngase ndí ko̱jo na̱ Líaa̱

14Ngo ni̱xtjin nga je kjimaxchá to ndso̱ko̱a̱n ṉño̱pan, kijí Rubee̱n ngu̱i̱jin kꞌijñáján, kó ki̱a̱ kasakoo̱ to xi ꞌmí mandrángora̱#30:14 Kui to xi ꞌmí «mandrángora̱» kui ni̱xtjinján katsó xotaa̱ nga kuí xó too̱ xi asíko̱jo ínchjín xi ndi̱ kamá tsi̱ꞌe̱ nga kisꞌiee̱ ndí., kó kijíjoo̱ na̱ Líaa̱, kó nga kamábe kui too̱ na̱ Rakee̱l ꞌniú tsíꞌaá na̱ Líaa̱ nga tsja̱á joó kui too̱, 15ta̱nga na̱ Líaa̱ bi̱ katsó:

—Jè kachjeꞌéxínní xi̱ꞌinna, a kó ngaskande to xi yaꞌa ndína mejeén chje̱ꞌéxínní nga.

Kó bi̱ katsó na̱ Rakee̱l:

Tsi ko̱e̱ꞌéní to mandrángora̱ xi yaꞌa ndíi̱, kui ni̱xtji̱e̱e̱n, ka̱ma kjojñájoo Jakoo̱b.

16Kó nga kamájñoó nga jachó Jakoo̱b nga kjindiboáni ngu̱i̱jin kꞌijñáján, na̱ Líaa̱ kijíkjaꞌáyíndi̱ya, kó bi̱ katsoó: «Chjiéngá án tsjajníje̱ní kuí ni̱xtji̱e̱e̱n, ngatꞌa̱ to mandrángora̱ xi yaꞌa ndína ngoye ichjítjéñaa̱».

Kó Jakoo̱b kisꞌiejo̱ na̱ Líaa̱ kui ni̱xtji̱e̱e̱n. 17Néná tsintꞌieé na̱ Líaa̱ nga tsíchji̱a̱a̱, kó tsaꞌa nguiní ingo ndí, xi ma uún xi tsi̱ꞌe̱ Jakoo̱b. 18Kó na̱ Líaa̱ Isakaa̱r ítꞌa jaꞌén. Kui jaꞌeén «ni xi niꞌán» tsó. Ngatꞌa̱ bi̱ katsó «Néná katsjána ngo ni xi niꞌán, ta̱ngatꞌanii̱ nga na̱ moso̱na katsjáa̱ xi̱ꞌinna».

19Jaskan ti̱ kisꞌie nguinií ingo ndí na̱ Líaa̱ xi tsi̱ꞌe̱ Jakoo̱b, ndí xi ma juu̱n. 20Kó na̱ Líaa̱ Sabulo̱n ítꞌa jaꞌén «Ni xi ta̱ boeꞌéná» tsó kui jaꞌeén. Ngatꞌa̱ bi̱ katsó: «Néná boá xi ta̱ katsjána ngo ni xi ta̱nisién tsjákjiꞌi, ngotꞌe̱ ꞌne̱ nda ngase sa̱ꞌínjo̱na xi̱ꞌinna, ngatꞌa̱ jè jun ndí katsjáa̱».

21Jaskan nguije jaꞌa ni̱xtjin na̱ Líaa̱ kisꞌiee̱ ngo ndí chjo̱on, kó na̱ Ndina̱ ítꞌa jaꞌén.

Bi̱ tsꞌén katsen Kosiee̱

22Kó Néná kamáni̱ma̱a̱ na̱ Rakee̱l, kó tsintꞌieé nga tsíchji̱a̱a̱, kó katsjaá ngu̱i̱ndie nga tsaꞌa ndí, 23-24kó nguije katsen ndií bi̱ katsó: «Néná jè jaꞌáxínna kjo̱a̱soboána nga jmí ndí ꞌbéjínna katsaki». Kó Kosie̱ ítꞌa jaꞌén «Néná ngatsjána ingo ndí» tsó kui jaꞌeén. Ngatꞌa̱ bi̱ katsó: «¡Achichí ra ndakjiꞌi tsi Néná tsja̱ána ingo ndí!»

Bi̱ tsꞌén tsꞌenṉcha̱jo xkjín Jakoo̱b ko̱jo Labaa̱n

25-26Nguije jaꞌa ni̱xtjin nga katsen ndií na̱ Rakee̱l kui xi ꞌmí Kosiee̱, Jakoo̱b bi̱ katsoó Labaa̱n:

—Teꞌéní ínchjínna, ko̱jo ndína, ngatꞌa̱ ta̱ngatꞌanií kui nga je katsꞌenxá kjo̱a̱ndaa̱ ji, kó teꞌéndiéní nga kjuín nguiñá an nanguina.

27Kó Labaa̱n bi̱ katsoó:

—Ngo kjo̱a̱nda kuíꞌaá, ngata̱ ꞌmijín ji, ta̱sá ti̱ndyin ra ji kꞌi̱e̱e̱, jè kamábe an nga ta̱ngatꞌanii̱ ji nga Néná katsꞌéncho̱nna, 28ta̱sá tꞌíyéní kótjín mejeén si̱ꞌin ji, kó án kꞌuichjií xikó kjiꞌi chji̱e̱ꞌéní.

29Kó Jakoo̱b bi̱ katsó:

—Jè ye ji kókjiꞌi je katsꞌenxá kjo̱a̱ndaa̱ ji, kó kótsꞌén nga nda askóo̱n cho̱ xi tjiín. 30Nguindiee̱ nga kjoéꞌe̱ an chiboa tsí kamá cho̱ xi kisꞌiee̱ ji, kó ngotꞌe̱ ꞌne̱ achichí jè cho̱n ji, ngatꞌa̱ ndeskande koó nga jéꞌe̱ an Néná tjítsꞌénchíkonñé ngayeje ni xi niꞌín ji, ta̱nga ti̱ chjiéngá sa̱ꞌinxá an nganda tsi̱ꞌe̱ ndína ko̱jo tsi̱ꞌe̱ ínchjínna nga.

31Kó bi̱ katsó Labaa̱n:

—Mí xí mejeén nga tsjaa.

Kó Jakoo̱b bi̱ katsó:

—Jmí ni mejénjínna, tsi mejeén skónráa̱ cho̱o̱ tsi si̱ꞌinjo̱ꞌo ji ngo ni xi xiaán. 32Teꞌéndiéní nga ngotꞌe̱ kjoaꞌa an ngu̱i̱jii̱n nínga síndo cho̱ xi tjiín, kó xín kꞌuijñá an cho̱tsa̱nga̱ ko̱jo tindso̱ xi indoó, ko̱jo ngayeje ndií cho̱tsa̱nga̱ xi jmaá, kó kui teꞌéní xikoó tsi chjína. 33Nga kjo̱a̱ꞌa ni̱xtjii̱n xche̱ ji nga ndakjiꞌi ni xi tꞌíxiaán. Kó ni̱xtjin nga mejeén stsitsíjìi̱n cho̱ xi tsa̱ꞌa̱n, ka̱ma tsitsíjìi̱n, kó tsi tjín tindso̱ ko̱jo tsi cho̱tsa̱nga̱ xi indójín ko̱jo tsi ndií cho̱tsa̱nga̱a̱ xi jmájín, ka̱ma bo̱a̱ se jí nga katsꞌenchejeé.

34Kó Labaa̱n katsꞌénjo̱ꞌo kui nii̱, 35kó ti̱ kui ni̱xtjin Labaa̱n índotꞌaxín tindso̱ xi̱ꞌin xi indoó ko̱jo tindso̱ ínchjín xi indoó, ko̱jo ngayeje cho̱ xi chií tiboa jin, ko̱jo ngayeje cho̱tsa̱nga̱ xi jmaá, kó jaá katsꞌénkꞌasꞌiee̱n tsi̱ꞌe̱ nga kui skoón. 36Kósꞌe̱ kui xtín cho̱tsa̱nga̱a̱ ichítié kilometro̱ nga kjinnii̱ nínga tikón Jakoo̱b katsꞌénkjí.

Kó Jakoo̱b to̱kó ki̱a̱ kisꞌijña ra nga askoo̱n cho̱o̱ Labaa̱n. 37Ta̱nga Jakoo̱b tsatie tjiaa yáꞌálamo̱, ko̱jo tjiaa yáꞌabeyano̱ ko̱jo yáńchja̱, kó itjiájón kui yaá, kó kamábe nga ndi̱ya xí tiboa tjiín. 38Jaskan nguije tsitjia kui yaá ki̱a̱ índo kje̱n nínga ꞌbi ndójoa cho̱o̱, ki̱a̱ ka̱maa̱ kjiꞌa nga kjo̱chókꞌi ndójoa sku̱i̱e̱ kui yaá. Kó bo̱a̱ tsꞌén kjiꞌa nga cho̱ xi je mejeén xi̱ꞌii̱n jachókꞌi ndójoaa̱, 39ki̱a̱ ixánjo̱ xkjín kje̱n kui yaá, kó ndí xí kisꞌiee̱ kui cho̱o̱, ndí ndi̱ya xí tiboa kisꞌiee̱ ko̱jo tjín xí indó kamá. 40Kó Jakoo̱b índotꞌaxín ndií cho̱tsa̱nga̱a̱, kó ki̱a̱ índojii̱n cho̱ xi tsi̱ꞌe̱, kó cho̱ xi ngasee̱ kje̱n cho̱ xi tjiín ndi̱ya xí tiboa ko̱jo xi jmaá índo ko̱jo ngayeje cho̱ xi jmá xi chji̱a̱ni Labaa̱n. Kó bo̱a̱ tsꞌén xín tji̱e̱n índo xi tsi̱ꞌe̱, kó ki̱a̱jín índojii̱n xi tsi̱ꞌe̱ Labaa̱n. 41Kó kjiꞌa nga fochó cho̱ xi ma mejeén xi̱ꞌin xi ꞌniú yiꞌii̱, Jakoo̱b índo tjiaa yaá kje̱n nínga ꞌbi ndójoa, ki̱a̱ ka̱maa̱ nga ki̱a̱ ku̱i̱xanjo̱ xkjín kje̱n nínga síndo kui tjiaa yaá, 42ta̱nga nga jachó cho̱tsa̱nga̱ xi xkꞌieén jaꞌáxín Jakoo̱b tjiaa kui yaá, ki̱a̱ ka̱maa̱ nga cho̱ xi yiꞌii̱ tsi̱ꞌe̱ Jakoo̱b kamá, kó cho̱ xi xkꞌieén tsi̱ꞌe̱ Labaa̱n kamá. 43Kó bo̱a̱ tsꞌén nga achichí kamácho̱n Jakoo̱b, kó kisꞌiee̱ kjín cho̱tsa̱nga̱, ko̱jo já moso̱, ko̱jo ínchjín moso̱ ko̱jo cho̱toꞌoyitsꞌén, ko̱jo bórró.

Currently Selected:

Jénesii̱s 30: MAIX

Highlight

Copy