Jénesii̱s 26

Bi̱ kamaá Isaa̱ ko̱jo Abimelee̱k

1-6Kui ni̱xtjinján kisꞌie ngo kjindiá ngayeje nangui Kanaa̱n, xikó má kamá ni̱xtjin nga kisꞌijña Abraa̱n. Achichí ꞌniú kamá kui kjindiaá, kó katsꞌénkjó Isaa̱ nga ko̱e̱je̱ nangui Ejipto̱, ta̱nga Néná jatjokjaá Isaa̱ kó bi̱ katsoó:

«Ngata̱ ꞌmijín ji nangui Ejipto̱, ta̱sá ki̱a̱ ti̱ndyin ji ngotjón nangui Ngueraa̱r, nínga tikón Abimelee̱k, nda̱ ree̱ já Filisteaa̱, kó an ngatsjé ni̱xtjin kotíjñajoo̱, kó sa̱ꞌinchikonñé an ngayeje ni xi si̱ꞌin ji, kó ji ko̱jo xota̱ tji̱e̱ tse̱ tsjàa̱ ngayeje kui tꞌananguii̱. Kó bo̱a̱ tsꞌén sa̱ꞌinkjatjosón an ni xi kixiáa̱n na̱ꞌmíi̱ Abraa̱n nga sa̱ꞌin an. Sa̱ꞌinkjín an xota̱ tji̱e̱ tse̱, xikó maá ńño xi tjín nkꞌaján, kó ngatꞌaa̱ xota̱ tji̱e̱e̱ nga ka̱machikonñé ngayeje na̱xi̱ńdá xí tjín nga̱sondiee̱, ngatꞌa̱ Abraa̱n tsintꞌiéꞌénna, kó katsꞌénkjatjosón kjo̱a̱botíxomana, ko̱jo ni xi kixiáa̱n nga sa̱ꞌín».

Kó Isaa̱ kijí nangui Ngueraa̱r nga kijíchji̱a̱jo Abimelee̱k, kó ki̱a̱ kisꞌijña kui nanguii̱. 7Kó kjiꞌa nga já xíꞌin xi chji̱a̱ni kui nanguii̱ asíyaá kjo̱a̱a̱ na̱ Rebekaa̱, ndichja án boá katsó Isaa̱. Kó katsakjónní ngatꞌa̱ bi̱ tsꞌén katsꞌénkjó: «Na̱ Rebekaa̱ achichí tsjákjiꞌi, kó kui jaá ka̱mamejeén sa̱ꞌínkꞌiénna ta̱ngatꞌanii̱ kui».

8Ngo ndi̱ya Abimelee̱k tsꞌénkotsijen xtji̱e̱e̱n nga̱ntjo̱a̱ masienkjaá ndiꞌaa̱, kó kamábe nga Isaa̱ tjítsꞌéndájoón na̱ Rebekaa̱. 9-10Kósꞌe̱ Abimelee̱k tsíchji̱a̱a̱ Isaa̱, kó bi̱ katsoó:

—¡Ka̱májín xꞌi̱ṉche̱jení án! ¡Kui naa̱ ndichjejín bo̱a̱, chjóo̱n boá! Kó, ánní nga bo̱a̱ kjiꞌi ni xi kiniꞌínje̱jne̱. Kó tsi tjín já xi nijan síndojo̱na kꞌi̱e̱e̱ xi kisꞌiejo̱ kui naa̱, a mí tsí ngayejejne̱ nga kisꞌiniéjne̱ kui jeé.

Kó bi̱ katsó Isaa̱:

—Kjo̱a̱a̱ nga katsakjonña an nga si̱ꞌankꞌienna tsi̱ꞌe̱ nga ngo kui jaá kꞌuijñájo̱ kui naa̱.

11Kósꞌe̱ Abimelee̱k tsíchji̱a̱jo ngayeje xota̱ na̱xi̱ńdaá nga bi̱ katsoó:

—Taꞌyaní xi sa̱ꞌínxtií kui nda̱a̱ ko̱jo chjo̱ón, chjiéngá ko̱ya.

12Ti̱ kuii̱ nó, Néná katsjaá Isaa̱ nga tsie ni tjié kamáxchaá, kó úchán bo̱a̱ kjiꞌi ngase ni xi ítji̱e̱ kui tꞌananguii̱ xi jaꞌátikó. 13Kó bo̱a̱ tsꞌén Isaa̱ achichí to̱n katsꞌén, kó ꞌniú kamácho̱n. 14Kisꞌiee̱ kjín cho̱tsa̱nga̱, cho̱yojo ko̱jo moso̱, kó já filisteaa̱ ítsꞌi̱yani nga kamáꞌonkon. 15Kuíni nga já filisteaa̱ indyiándié ngayeje ndańchꞌi̱ xi katsꞌénda já mosoo̱ Abraa̱n ngasꞌe̱. 16Kó ngaskande Abimelee̱k bi̱ katsoó Isaa̱: «Tasá xín tꞌen ji, ngatꞌa̱ jè ꞌniú cho̱n ngase ji ta̱bo̱a̱jiín ji̱n».

17Kó Isaa̱ jatjoxieni kui ngu̱i̱ndiee̱, kó ki̱a̱ kisꞌijña nangui nínga soón nangui Ngueraa̱r. 18Kjiꞌa nga to̱kó tikón ngase nga̱sondie Abraa̱n, kjín ndańchꞌi̱ katsꞌénda, ta̱nga nguije kꞌien, já filisteaa̱ indyiándié kui ndańchꞌií, ta̱nga Isaa̱ ti̱ katsꞌéntsjie nguiní nga ngo nga ngo kui ndańchꞌií, kó bo̱a̱ tsꞌén ítꞌa jaꞌén nguiní xikótsꞌen ítꞌa jaꞌén na̱ꞌmii̱ ngasꞌe̱.

19Ngo ndi̱ya nga já mosoo̱ Isaa̱ ndyi̱tsꞌénda ngo ndańchꞌi̱ ki̱a̱ nangui soón, ki̱a̱ kasakoo̱ ngo ndańchꞌi̱ xi sijén má ndójoaa̱. 20Ta̱nga já moso̱ xi koo̱n cho̱tsa̱nga̱ xi chji̱a̱ni nangui Ngueraa̱r, ko̱jo já moso̱ xi koo̱n cho̱tsa̱nga̱a̱ Isaa̱ askjantjéni kui ndańchꞌií nga tsa̱ji̱n boá ndójoa xi tjitjoó katsó. Kuíni nga Isaa̱ «Xi ikixkántjéni» ítꞌa jaꞌén kuí ndańchꞌií. 21Ti̱ ingo ndańchꞌi̱ katsꞌénda nguiní, kó Isaa̱ «Kjo̱a̱xti» ítꞌa jaꞌén. 22Jaskan ngu̱i̱chí kjin kijí, kó ki̱a̱ katsꞌénda nguiní ingo ndańchꞌi̱, kó nguiti̱ jmíjín xi askjan ki̱a̱a̱, kó «Kjo̱a̱ndé» ítꞌa jaꞌén kui ndańchꞌií, ngatꞌa̱ bi̱ katsó: «Ngotꞌe̱ ꞌné nga Néná jè katsjáná kjo̱a̱ndé tsi̱ꞌe̱ nga nda ko̱e̱je̱e̱ kui xotaa̱».

23Kósꞌe̱ kijí xtji̱e̱e̱n ngo ngu̱i̱ndie xi jaskan Beersebaa̱ kiꞌmí. 24Kó Néná jatjokjaá kui ni̱xtji̱e̱e̱n, kó bi̱ katsoó: «Án boá xi Nee̱ na̱ꞌmíi̱ Abraa̱n, kó ta̱ngatꞌanií kui nga sa̱ꞌínchikonñeé jí ko̱jo nga sa̱ꞌinkjín an xota̱ tji̱e̱ tse̱, kuíni nga ngata̱ ndakínjín má ji, ngatꞌa̱ an boá xi kosiko̱joo̱ ngayeje ni xi si̱ꞌin ji».

25Kósꞌe̱ Isaa̱ ki̱a̱ katsꞌénda ngo ṉchandikón nínga katsꞌéntsjaá Néná, kó ki̱a̱ katsꞌénda ndiꞌa xi tji̱xi̱ín cho̱ kamáni, sꞌe̱ já mosoo̱ katsꞌénda ingo ndańchꞌi̱. 26Nga kamábe kui nii̱ Abimelee̱k, jatjoni nangui Ngueraa̱r kó jachókoón Isaa̱ nga kijíchji̱a̱jo kó ti̱ kijíjo̱ Ausaa̱k, ngo nda̱ xi nda yaꞌa ko̱jo Fikoo̱l ngo nda̱ xi nguito̱ko̱o̱ jájuún kamá. 27Kó Isaa̱ bi̱ katsoó kui jaá:

—Ánní nga an ndyi̱foéꞌechonjnúꞌun nga ndajín kiniꞌánjo̱jnúꞌun ngu̱i̱ndiejnú, kó ngaskande ikiyotji̱nguíjnúꞌun.

28Kó bi̱ katsó kui jaá:

—Jè kamáyájne̱ nga Néná tikónjoo̱ ji, kuíni nga mejénjne̱ nga ngo ni kꞌuíndajo̱jne̱ ji, ta̱nga chjiéngá nguindyi̱ko̱n Néná si̱ꞌán kuí kjo̱a̱ꞌbíndaa̱. 29Ji̱n jmí ni̱xtjin kiniꞌánxtíjne̱ ji, ta̱sá ngatsjé ni̱xtjin nga nda kiniꞌánjo̱jne̱ ji, kó ngaskande nda tsꞌén kiniꞌánkixotꞌa xingu̱i̱ xikoó tsi amingo̱ máná xingu̱i̱, ngotꞌe̱ ꞌne̱ mejénjne̱ nga ji jmí ni xi ndajín si̱ꞌinje̱jínjne̱, ngatꞌa̱ Néná achichí tjítsꞌénchikonñeé ji.

30Kósꞌe̱ Isaa̱ katsjaá tsie ni chinie, kó kui jaá iskjinie ko̱jo katsꞌe. 31Kó nga jñóyá ngasee̱ nga kamánguindyiojón jastjíe̱n Isaa̱ ko̱jo Abimelee̱k, kó ja̱kꞌi̱e̱ ja̱ngaján índajo̱ xkjín nga jmí ni xi ndajínkjiꞌi sa̱ꞌínjo̱, sꞌe̱ jaskan xió katsꞌénkixotꞌa xkjín.

32Ti̱ kuii̱ ni̱xtjin já mosoo̱ Isaa̱ jachókoón nga katsóyaá nga kui ndańchꞌi̱ xi ndyi̱tsꞌéndaa̱ je kasakoo̱ ndójoa. 33Kó Isaa̱ «Ni xi ikꞌínda» ítꞌa jaꞌén kui ndańchꞌií, kó ngaskande ngotꞌe̱ kui na̱xi̱ńdaá Beerseba̱ ꞌmí ngatꞌa̱ «Ndańchꞌií ni xi ikꞌíndaa̱» tsó kui jaꞌeén.

Bi̱ tsꞌén ixán Esauu̱

34Nguije kamá yichán noó Esauu̱ kisꞌijñajo̱ na̱ Judii̱t, tsa̱kji̱ín ngo nda̱ xi xota̱ tji̱e̱e̱ Ee̱t xi ꞌmí Beeri̱. Ti̱ ixánjo̱ na̱ Basemaa̱t nga, tsa̱kji̱ín ingo nda̱ xi xota̱ tji̱e̱e̱ Ee̱t xi ꞌmí Eloo̱n. 35Nga jó kui ínchjiín xi achichí kjo̱a̱xti katsjaá Isaa̱ ko̱jo na̱ Rebekaa̱.

Currently Selected:

Jénesii̱s 26: MAIX

Highlight

Copy