Jénesii̱s 14
14
Abra̱n bi̱ tsꞌén tsꞌaxiéꞌá Loo̱t
1-2Kui ni̱xtjinján jó tjín já re xi kisꞌińdo kui ngu̱i̱ndiéján xi askjanjo̱ xkjín, ngo ndié katsꞌén yojoo̱ kui já re xi̱ꞌbi̱:
Amrafee̱l ree̱ nangui Babilonia̱,
Arioo̱k ree̱ nangui Elasaa̱r,
Kendorlaómee̱r ree̱ nangui Elaa̱n,
ko̱jo Tindaa̱l ree̱ nangui Ngoii̱n.
Kó xi ingo ndieé kuí bí xi̱ꞌbi̱:
Beraa̱ ree̱ nangui Sondoma̱,
Birsaa̱ ree̱ nangui Ngomorra̱,
Sinaa̱b ree̱ nangui Andma̱,
Semébee̱r ree̱ nangui Seboi̱n,
ko̱jo ree̱ nangui Sóaa̱r.
3-4Tiejó nó kamaá kui já re xi uún nga nda̱ re Kendorlaómee̱r atíxomaa̱, ta̱nga xi ma tieján noó katsꞌénxchán, kó kondra̱ kijií kui ree̱. Kósꞌe̱ ki̱a̱ kamátikó ki̱a̱ nangui nínga soón Ndáchíkón Kꞌiee̱n. 5Kó nga jachó nó xi tienijoón, nda̱ re Kendorlaómee̱r ko̱jo re xi nijan maa̱ jachókjánjo̱ nga ún re xi kondraa̱. Kó ki̱a̱ nangui Astaroo̱t Karnaii̱n katsꞌeén xota̱ Refaa̱, sꞌe̱ jaskan ki̱a̱ nangui Aa̱n katsꞌeén xota̱ Suu̱, kó ki̱a̱ nangui Sabe Kiriataii̱n katsꞌeén xota̱ Ee̱n. 6Ngu̱i̱jin na̱xi̱ Seii̱r katsꞌeén xota̱ Oreoo̱, kó ki̱a̱ tsangatji̱nguii̱ ngaskande ngu̱i̱ndie nínga són xi ꞌmí Paraa̱n xi tikón tꞌa nangui kixií. 7Jaskan nguije kamá kui nii̱, jachó nguiní nangui Kadee̱, kó katsꞌeén tꞌananguii̱ xota̱ Amalee̱k nga askjanjo̱, kó ki̱a̱ nangui Aseson-Tamaa̱r ti̱ katsꞌeén nga askjanjo̱ xota̱ tji̱e̱e̱ Amoo̱r xi kisꞌińdo ki̱a̱a̱ nga.
8Kó já re xi chji̱a̱ni nangui Sondoma̱, nangui Ngomorra̱, nangui Andma̱, nangui Seboi̱n ko̱jo nangui Bela̱ jachó ki̱a̱ nangui nínga soón Ndáchíkón Kꞌiee̱n, kó ki̱a̱ jachókjánjo̱ 9já ree̱ nangui Elaa̱n, ko̱jo nangui Ngoii̱n, ko̱jo nangui Babilonia̱, ko̱jo nangui Elasaa̱r. Nijón kamá ngo tjín, kó ún kamá xi ingo tjiín xi askjanjo̱ xkjín. 10Kó ki̱a̱ nangui nínga soón Ndáchíkón Kꞌiee̱n, achichí kjín ndańchꞌi̱ nínga tjo tjingóxkja tjín, kó nga ndyi̱monga kui já re xi chji̱a̱ni Sondoma̱ ko̱jo Ngomorra̱, ki̱a̱ ixó ngu̱i̱yaa̱ kui ndańchꞌií, kó já jún xi ngasee̱ ngu̱i̱jin kꞌijñáján tsanga. 11Kósꞌe̱ nga nijón kui já re xi katsꞌén kui kjo̱a̱xcha̱án, iskjíbé ngayeje to̱nsinié ko̱jo ni chinie xi kisꞌiee̱ kui xotaa̱, sꞌe̱ kijí. 12Kó nga ki̱a̱ Sondoma̱ kisꞌijña Loo̱t, ndií ntsꞌi̱e̱ Abra̱n, kachjábé kuí ko̱jo ngayeje ni xi kisꞌiee̱, kó tsanguínjo̱ nga.
13Kui ni̱xtjinján, kisꞌijña ngo nda̱ xi kiꞌmí Abra̱n nda̱ ebreoo̱ xi kisꞌijña tꞌa kꞌijñaá ngo nda̱ xi ꞌmí Mamre̱, kui nda̱a̱ xota̱ tji̱e̱e̱ Amoo̱r chji̱a̱ni kó jó kamá ntsꞌi̱e̱, ngo xi kiꞌmí Eskoo̱l, sꞌe̱ ngo xi kiꞌmí Anee̱r, kó nga jaán nga amingo̱ kamaá Abra̱n. Ta̱niján má ngo kui jaá xi tsangaa̱ kjo̱a̱xcha̱án, xi jachókoón Abra̱n kó katsóyaá nga 14ndií ntsꞌi̱e̱ tsanguínjo̱ ꞌniú, kó Abra̱n ítikó ngayeje mosoo̱ xi maa̱ kján, ján úchán ko̱jo tjiꞌún ján kamá, kó kui jaá ko̱jo Abra̱n tsangatji̱nguii̱ nga nijón já ree̱ ngaskande nangui Ndaa̱n. 15Nga kjimajñoó kui ni̱xtjii̱n, Abra̱n jó tjín katsꞌén xotaa̱, kó askjanjo̱ nga nijón kui já ree̱, katsꞌeén, kó tsangatji̱nguii̱ ngaskande na̱xi̱ńdá Oba̱ kui xi tikón xtji̱e̱e̱n taꞌii̱n na̱xi̱ńdá Ndamasko̱. 16Kó bo̱a̱ tsꞌén Abra̱n íjñandé nguiní Loo̱t, ndií ntsꞌi̱e̱, kó kasako nguinií ni xi kachjaꞌáxiín, ko̱jo ínchjiín ko̱jo xota̱ xi ngasee̱.
17Nguije jeꞌeꞌoyá nguiní Abra̱n, nguije katsꞌeén nga askjanjo̱ nda̱ re Kendorlaómee̱r ko̱jo já re xi nijan kamájo̱, nda̱ re xi chji̱a̱ni Sondoma̱ kijíkjaꞌáyíndi̱ya ki̱a̱ nínga Nangui Nínga Soón Nda̱ Re kiꞌmií. 18Kui ngu̱i̱ndiee̱ Melkisedee̱k ree̱ nangui Salee̱n ko̱jo chináꞌmii̱ Néná xi tikón nkꞌaján tsꞌaxié pan ko̱jo bino̱ xi yaꞌa, kó katsjaá Abra̱n, 19sꞌe̱ katsꞌénchikonñé nga bi̱ katsoó:
«Abra̱n,
Néná xi tikón nkꞌaján,
kui xi katsꞌénda ndiꞌakꞌajmii̱ ko̱jo tꞌananguii̱
ngatsꞌenchíkonñeé ji.
20Kui Néná xi tikón nkꞌaján,
kuí xí tsoboaá ngayeje kjo̱a̱niꞌántsjaá,
ngatꞌa̱ kuí boá xi katsjaá nga kiniꞌín ji
nga ikixkánje̱ ji kondraa̱».
Ti̱ kjiꞌa Abra̱n katsjaá Melkisedee̱k tie nga úchaán ngayeje ni xi katsꞌén kui kjo̱a̱xcha̱án. 21Kó nda̱ re xi chji̱a̱ni Sondoma̱, bi̱ katsoó Abra̱n:
—Chjábé jí ngayeje ni to̱nsinieé, ta̱nga teꞌéꞌoyé nguiní xotaa̱.
22Ta̱nga Abra̱n bi̱ katsoó:
—Jè íjñangui an énna nga bi̱ kixiáa̱n Néná xi tikón nkꞌaján, kui xi katsꞌénda ndiꞌakꞌajmii̱ ko̱jo tꞌananguii̱, 23nga ngojín ni tse̱ skjíbé án, nde ngo ńchjón, ti̱ nde ngo ńꞌniuú tji̱xin ndié xí tse̱ skjíbéjín an, tsi̱ꞌe̱ nga án xí katsꞌen cho̱n an Abra̱n sejín ji, 24ta̱ kuí tsí ni xi je iskjinie já xi tsoꞌbájo̱na xi chjábéjne̱, ko̱jo ni xi tsoboaá nga skjíbé Anee̱r, Eskoo̱l ko̱jo Mamree̱, kui já xí nijan tjimájo̱na.
Currently Selected:
Jénesii̱s 14: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
