Jénesii̱s 13
13
Bi̱ tsꞌén índomasien xkjín Abra̱n ko̱jo Loo̱t
1Kó nga jatjo Abra̱n nangui Ejipto̱, kijí xtji̱e̱e̱n nangui kixí xi tikón xtji̱e̱e̱n na̱ngui, kó kijíjo̱ chjo̱ón ko̱jo Loo̱t ndií ntsꞌie, ko̱jo ngayeje ni xi tjiín. 2Kui ni̱xtjinján Abra̱n achichí jè cho̱n, ngatꞌa̱ kisꞌiee̱ to̱nsinié ko̱jo to̱ntiboa ko̱jo kjín to̱ko̱ya cho̱.
3Sꞌe̱ kijítsꞌén Abra̱n xaá, jatjoni nangui kixí xi tikón xtji̱e̱e̱n na̱ngui, kó chíchi̱ chíchi̱ kijí xtji̱e̱e̱n Betee̱l ngaskande nga jachó ngu̱i̱ndie nínga tjón íjñá ndiꞌa xi tji̱xi̱ín cho̱ kiniꞌándani ngasꞌe̱, xtji̱e̱e̱n na̱xi̱ńdá Betee̱l ko̱jo na̱xi̱ńdá Aii̱. 4Kó ki̱a̱ Abra̱n katsꞌéndaa̱ Néná ngo ṉchandikón, nínga katsꞌéntsjaá Néná.
5Kó Loo̱t, kui nda̱ xi tsoꞌbájo̱ Abra̱n ti̱ kisꞌiee̱ cho̱tsa̱nga̱ ko̱jo cho̱yojo ko̱jo ndiꞌa xi tji̱xi̱ín cho̱ kiniꞌándani nga. 6Loo̱t ko̱jo Abra̱n achichí tsie ni xi kisꞌiee̱ nga ngo nga ngo, kó ngaskande nguiti̱ kamájín nijan kisꞌińdo ngo ngu̱i̱ndie nga joó. 7Kui ni̱xtjinján ti̱ ki̱a̱ kisꞌińdo xota̱ Kanaa̱n ko̱jo xota̱ Feree̱ nga. Ngo ndi̱ya já xí koón cho̱tsa̱nga̱a̱ Abra̱n ko̱jo tsi̱ꞌe̱ Loo̱t ísejo̱ xkjín, 8kósꞌe̱ Abra̱n, bi̱ katsoó Loo̱t:
«Mejénjínna nga kjo̱a̱xti kꞌuiéná nga jó ñá ko̱jo nga kjo̱a̱xti kꞌuieé já xí koón cho̱tsa̱nga̱ná ngatꞌa̱ xingu̱i̱ ñá má. 9Tjín nguindie ngayeje tꞌananguii̱ nínga ka̱ma si̱ꞌankjién, kuíni nga ꞌniú míꞌaá nga ta̱sá xín tꞌen ji. Tsi xtji̱e̱e̱n ndsa̱ xí skoón kꞌuin jí, xtji̱e̱e̱n ndsa̱ xí kixii̱ kjuín án, kó tsi xtji̱e̱e̱n ndsa̱ xí kixii̱ kꞌuin jí, xtji̱e̱e̱n ndsa̱ xí skoón kjuín án. Ta̱nga chjiéngá kja̱ xín kja̱ xín konguín».
10Kó Loo̱t askotsijen nga ngo foaꞌatjiyajoo̱n, kó kamábe tꞌanangui són xi tikón tꞌa ndejé Jordaa̱n nga tjín síkijí ndójoa ki̱a̱a̱, ngatꞌa̱ nguindiee̱ nga sa̱ꞌínkjié Néná na̱xi̱ńdá Sondoma̱ ko̱jo Ngomorra̱, ngayeje kui ngu̱i̱ndie són xi ꞌmí Sóaa̱r achichí tsjáchon kamá, xikó maá Endee̱n, kui ngu̱i̱ndie nínga tjitji̱e̱ yá tjié xi tjón katsꞌénda Néná, kó achichí ni kamáxchá ki̱a̱a̱, xikó maá tꞌanangui nínga kisꞌijña na̱xi̱ńdá Ejipto̱. 11Kósꞌe̱ Loo̱t jaꞌájin kui nangui soón, kó xtji̱e̱e̱n nínga fotjo tsꞌueé kijí. Kó bo̱a̱ tsꞌén Abra̱n ko̱jo Loo̱t kja̱ xín kja̱ xín kijí nga ngo nga ngo. 12Kó Abra̱n ki̱a̱ kisꞌijña nangui Kanaa̱n, tji̱e̱nga Loo̱t ki̱a̱ kijíkꞌíjñá na̱xi̱ńdá xi síndo tꞌa ndejé Jordaa̱n, tiñaa̱ na̱xi̱ńdá Sondoma̱. 13Ta̱nga xota̱ xi chji̱a̱ni na̱xi̱ńdá Sondoma̱ achichí nga ndajín kamá, kó achichí jé katsꞌén kondraa̱ Néná.
14Nguije xín kijí Loo̱t, Néná bi̱ katsoó Abra̱n:
«Abra̱n, ngotꞌe̱ ꞌne̱ chjanínkꞌé ji kje̱n, kó ki̱a̱ nínga tindyin ji tsitsíjìi̱n xtji̱e̱e̱n ta̱ꞌin, xtji̱e̱e̱n nangui, xtji̱e̱e̱n nínga fotjo tsꞌueé, ko̱jo xtji̱e̱e̱n nínga ꞌbosꞌien tsꞌueé. 15Ngatꞌa̱ ngayeje kui tꞌanangui nínga tsꞌén be ndyikin ji, kuí boá xi ngatsjé ni̱xtjin tsjaa ji ko̱jo ngayeje xota̱ tji̱e̱ tse̱. 16Kó án boá xi sa̱ꞌin an nga kjín ka̱ma xota̱ tji̱e̱ tse̱, xikó maá nga jmíjín xi ka̱maa̱ ku̱i̱ꞌíxki̱ xa̱a̱ tꞌananguii̱, bo̱a̱ má tsꞌén jmíjín xi ka̱maa̱ ku̱i̱ꞌíxki̱ xikó kjiꞌi ka̱ma xota̱ tji̱e̱ tse̱. 17Ti̱sítji̱n ji kó tꞌentsitsíjin ji nga tiyaá ko̱jo nga ndojoó tꞌananguii̱, ngatꞌa̱ jè ji tjítsꞌenkꞌasꞌieen».
18Kósꞌe̱ Abra̱n jaꞌáxín ndiꞌa xi tji̱xi̱ín cho̱ kiniꞌándanii̱, sꞌe̱ kijíkꞌíjñá nangui Ebroo̱n, tꞌa nínga tjín yámamree̱, kó ki̱a̱ katsꞌénda ngo ṉchandikón nínga katsꞌéntsjaá Néná.
Currently Selected:
Jénesii̱s 13: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
