Éksondo̱ 2

Bi̱ tsꞌén katsen Moisee̱

1Ngo nda̱ ko̱jo ngo na̱ xi chji̱a̱ni xota̱ tji̱e̱e̱ Lebii̱ ixánjo̱ xkjín. 2Kó kui naa̱ tsaꞌa ndí, kó jaskan katsen kui ndií. Nga kamábe kui xota̱chjo̱on nga achichí tsjákisꞌie ndií, ján sá kamaá nga íjñaꞌma. 3Kó nga nguiti̱ kamájiín íjñaꞌma ngase kui ndií, iskjíbé ngo ni̱se̱nyá xi indyiaá tjingóxkja ko̱jo brea̱ nga̱xto̱n, kósꞌe̱ ki̱a̱ íyá kui ndií, sꞌe̱ ngu̱i̱jii̱n nínga tjín yánaxo̱o̱ ki̱a̱ tꞌa ndejé Niloo̱, ki̱a̱ katsꞌénkjíjin kui ni̱se̱nya̱á. 4Ta̱nga ngo ndichja kui ndií ta̱ kjin askotsijenni mí ra ni xi ka̱maa̱.

5Ngui̱chí sájín tsa̱kji̱ín nda̱ ree̱ nangui Ejipto̱ kijíngoyá ndejeé, kó tji̱e̱nga tjimá ki̱a̱ tꞌa ndejeé kui ko̱jo ínchjín chji̱ni̱e̱ꞌboo̱, kamábe kui ni̱se̱nya̱á ki̱a̱ ngu̱i̱jin nínga tjín yánaxoo̱, kó katsanguiya ngo chji̱ni̱e̱ꞌboo̱ tsi̱ꞌe̱ nga ko̱e̱je̱kjaꞌá. 6Nga iskjíxꞌaá kui ni̱se̱nya̱á kamábe nga tsꞌénkjandá kui ndií, kó ni̱ma̱kamaá, kósꞌe̱ bi̱ katsó: «¡Ndií xota̱ Israee̱l boá kui ndií!»

7Kósꞌe̱ kjiꞌá boá nga ndichja kui ndií, bi̱ katsoó tsa̱kji̱ín nda̱ ree̱:

—Tsi mejeén kjuinkjáꞌa an ngo xota̱chjo̱on Israee̱l xi ka̱ma sa̱ꞌínkí ko̱jo ka̱ma sa̱ꞌínxchá kuí ndií.

8Kó tsa̱kji̱ín nda̱ ree̱ bi̱ katsoó:

—Ja̱ tꞌen ji, kó tꞌenchje̱ꞌé.

Kó ndichja kui ndií kijíkjaꞌá na̱aa̱n. 9Nga jachó kui xota̱chjo̱ón, tsa̱kji̱ín nda̱ ree̱, bi̱ katsoó:

—Tꞌenje̱ chií ji kui ndií ndiꞌáa, ti̱ꞌinki ji, kó ti̱ꞌinxchéní, kó an kꞌuichjií.

Kó kui xota̱chjo̱ón kijíjo̱ kui ndií, kó askoo̱n. 10Nguije kamáxchá kuí ndií, kijíjoo̱ tsa̱kji̱ín nda̱ ree̱, kó kui tsa̱kji̱ín katsꞌén tsi̱ꞌe̱ kui ndií, kó «Moise̱» ítꞌa jaꞌén, «Án boá xi tsꞌaxié an ngu̱i̱jin ndójoaa̱» tsó kui jaꞌeén.

Bi̱ tsꞌén tsangani Moisee̱ nangui Ejipto̱

11Nguije jaꞌa kjín nó, nguije xchá Moisee̱, ngo ndi̱ya kijí nínga ndyi̱tsꞌénxá xota̱ nanguii̱, nínga achichí ꞌniú xá moso̱ xi katsꞌén, kó ta̱niján má kamábe nga ngo nda̱ Ejipto̱ tsꞌénbeꞌeé ngo nda̱ Israee̱l, 12kó Moisee̱ askotsijen nga ngo foaꞌatjiyajoo̱n, kó nga taꞌyajín xi kamábe, katsꞌénkꞌién nda̱ Ejiptoo̱, kó ki̱a̱ íjñaꞌma yojoo̱ kui nda̱a̱ ki̱a̱ ngu̱i̱jin tsomií.

13Nga kamánguindyiojón ti̱ jatjo nguiní Moisee̱, kó kamábe nga jó já Israee̱l ndyi̱kján, kó bi̱ katsoó kui nda̱ xi tsꞌénbeꞌeé nda̱ xi ingoo̱:

—Ánní nga tiꞌbékóo̱n nda̱ xi ngo nangui manijnú xingu̱i̱jnú.

14Kó bi̱ katsó kui nda̱a̱:

—ꞌYá xi katsjaá xá nga ji xi nguito̱ko̱jne̱, axa̱ ꞌyá xí ne ndiꞌamasien katsꞌeén nga ji ko̱tixomejne̱. A bo̱a̱ tsꞌén mejeén si̱ꞌinkꞌínní xikótsꞌen kiniꞌínkꞌín ji nda̱ Ejiptoo̱ nga.

Nga tsintꞌié kuí nii̱ Moisee̱ achichí katsakjónní, kó bi̱ tsꞌén katsꞌénkjó: «Nga ja̱koxi̱ jè kamáyá nga an xi katsꞌénkꞌién an nda̱ Ejiptoo̱».

15Ja̱ bo̱a̱ jè be kui nii̱ nda̱ ree̱, kó kuíni nga katsanguiyakjaꞌá Moisee̱ tsi̱ꞌe̱ nga sa̱ꞌínkꞌién, ta̱nga Moisee̱ tsanga, kó ki̱a̱ kijíkꞌíjñá ngo nangui xi ꞌmí Madiaa̱n. Nga jachó kui ngu̱i̱ndiee̱ ki̱a̱ katsꞌénkjaꞌyá tꞌa ngo ndańchꞌi̱.

16Ngui̱chí sájín jachó ki̱a̱ kui ndańchꞌií yito ínchjín kjíndí xí kijíkꞌaxié ndójoa, tsi̱ꞌe̱ nga ku̱i̱ndyiákitsie ngu̱i̱ndie nínga ꞌbi ndójoa cho̱tsa̱nga̱a̱. Ngayeje kui ínchjiín, ínchjiín Jetroo̱ boá, kui nda̱ xi chináꞌmii̱ nangui Madiaa̱n. 17Ti̱ jachó ki̱a̱a̱ já xí koón cho̱tsa̱nga̱, kó katsꞌénxchánjo̱ kui ínchjiín tsi̱ꞌe̱ nga xín ko̱e̱je̱, kósꞌe̱ Moisee̱ jastjíe̱n, kó tsꞌaxiéꞌá kui ínchjiín, kó kui katsjaá ndójoa cho̱tsa̱nga̱a̱.

18Kó nga jachó ndiꞌaa̱ kui ínchjiín, na̱ꞌmii̱ bi̱ tsꞌén asíyaá:

—Ánní nga tá xotí jéꞌe konjnú.

19Kó bi̱ katsó kui ínchjiín:

—Kjo̱a̱a̱ nga ngo xota̱ Ejipto̱ tsꞌaxiéꞌájne̱ nga ísejo̱jne̱ xota̱ xi koo̱n cho̱tsa̱nga̱a̱, kó jmí tsi ta̱ kuí tsí ni, ¡ngaskande tsꞌaxié ndójoa ndańchꞌií, sꞌe̱ katsjaá ndójoa cho̱tsa̱nga̱jne̱ nga!

20—Kó ñá tikón kui nda̱a̱ —katsó na̱ꞌmii̱. Kó ánní nga jánján ikꞌíjñásoboákonjnú. ¡Ndokjoájnúu̱ tsi̱ꞌe̱ nga kji̱ndi̱bákjiniejo̱ná ni chinie!

21Kjiꞌa nga ndyi̱kjinie ni chinie, Jetroo̱ tsíchji̱a̱jo Moisee̱ kó bo̱a̱ katsoó nga ki̱a̱ ngatꞌíjñá nínga tikón ndiꞌaa̱, kó jo̱ꞌo katsó Moisee̱. Jaskan nguije jaꞌa ni̱xtjin Jetroo̱ katsꞌénkixanjo̱ Moisee̱ tsa̱kji̱ín, kui xi ꞌmí na̱ Séforaa̱. 22Kó kui naa̱ ngo ndí kisꞌiee̱, kó Moisee̱, Nguersoo̱n ítꞌa jaꞌén, ngatꞌa̱ bi̱ katsó: «Xota̱ xi xín nangui án kꞌi̱e̱e̱».

Néná bi̱ tsꞌén nda̱ kamaá xota̱ Israee̱l

23Nguije jaꞌa kjín nó, kꞌien nda̱ re xi chji̱a̱ni nangui Ejipto̱, kó xota̱ Israee̱l achichí ni̱ma̱ katsó kjo̱a̱a̱ nga moso̱ kamá ki̱a̱a̱, ngatꞌa̱ tsie kjo̱a̱ni̱ma̱ jaꞌa. 24-25Ta̱nga Néná kamábe kjo̱a̱ni̱ma̱ xi ndyi̱foaꞌatio, kó tsintꞌieé nga ndyi̱kjandáyá nga on kjimaa̱ ni xi kjimataꞌin kui xotaa̱, kó kjiꞌa boá nga jaꞌátsjiee̱n Néná ni xi índajo̱ xota̱ xi xchaá xota̱ Israee̱l, kui xi Abraa̱n, Isaa̱ ko̱jo Jakoo̱b.

Currently Selected:

Éksondo̱ 2: MAIX

Highlight

Copy