1 Samuel 14
14
Da'me 'lañaĝac ñe'me Jonatán
1'Uo jo'me nolo' Jonatán, jo'ne c'oĝot ñe'me Saúl, dojapegue' ñe'me necochoqo't, eetac:
«Am enegue, japagaĝañgui ga'me ñache qama'le qolaĝañiguilo joga'me coicopi lae 'me filisteopi jo'ne ueteda'ague ga'me lataĝaua joga'me.»
Qalaĝaja ja ch'e ta'le 'yaĝatem da'me dojo' ñe'me let'a, 2jo'ne ue'ta di'me Migrón, jo'ne qoyoqo'ta di'me Guibeá, da'me ne'tot jaga'me epaq jo'ne granado. Uo'oe seiscientos jogaa'me jiyaĝa'u jo'ne nalada't lo'o ueteda'ajop joñe'me. 3Ga'me qoyen yachi ga'me efod jo'ne degueja da'me 'lonaĝa#14:3 Efod jo'ne degueja da'me 'lonaĝa: louo ga'me tamenaĝaiqui lo'o, jo'ne 'uo ga'me Urim choqoga'me Tumim, naqaegaua jo'ne lo'ol da'me maqachaĝa qoyayaten joca'li da'me loequenataĝanaĝac ñe'me Dios. nach'eñe ñe'me Ahías, jo'ne mach'e c'oĝot ñe'me Ahitub nataq'aen la'yolec ñe'me Icabod, jo'ne c'oĝot di'me Finees, jo'ne c'oĝot di'me Elí, jo'ne lo'o ga'me netamenaĝaiqui ñe'me Jaliaĝanec ca'li di'me Siló.
Qalaĝaja gaa'me jiyaĝadipi ja yayate'n da'me ec ñe'me Jonatán. 4Qama'le joñe'me jetaque paja'a yovita ga'me ueteda'a jogaa'me filisteopi. Ga'me nadic, ueda'a gaa'me dos qadi let'adayaqa, jo'ne lenaqa'te Bosés nataq'aen Sene: 5onolec ga'me na'ña ga'me uaquiaĝaic ladic, jo'ne dajoya'ya di'me Micmás, qama'le ga'me laqaya na'ña ga'me qolauaic ladic, jo'ne dajoya'ya di'me Guibeá. 6Qama'le Jonatán dojapegue' ñe'me lecochaĝaua, eetac:
«Qolaq, jajoĝogue ga'me lajego, chayovida'a ga'me ueteda'a jogaa'me necoicopi jogaa'me niyoda'alo. Uotaĝa joñe'me Jaliaĝanec 'uo ga'me qo'mi yaloĝonalo lecochaĝac, qa'a joñe'me ja en 'te qalaq da'me qo'mi yanema da'me qadomataĝanaĝac, uotaĝa uo'oe gaa'me jalcote jiyaĝadipi uotaĝa ja lama'y.»
7Qama'le 'yateguet joñe'me necochoqo't:
«Aua'uo yema ga'me jo'ne joote auenatetapega: da'me jayem qa'a jotauan ga'me adelnataĝac.»
8Qama'le ñe'me Jonatán enaac:
«Cha'li jajoĝogue ga'me lataĝaua, joga'me ueteda'a jogaa'me filisteopi, qaedi qo'mi yauanalo jogaa'me. 9Qom qo'mi enapegalo qaedi jajoqo'talo da'me yec'adeta ga'me jouaqa'ta, qama'le cha'li jouaqa'tedi, ja jec'otaĝa ga'me jo'ne ueteda'a. 10Qalaĝaja qom qo'mi enapegalo qaedi jec'otaĝalo, jec'otaĝalo jaĝa'te, qa'a qom naq'aeta da'me dojo' qama'le yataqachiñe eja da'me naqaeñe ñe'me Jaliaĝanec da'me 'uo ga'me qo'mi yaloĝonalo queda'me qo'mi yanema da'me qadomataĝanaĝac.»
11Chane'eja joñaa'me dos male naloĝonegueta jogaa'me coicopi jo'ne filisteopi qaedi qoyauanalo. Qama'le jogaa'me, mane'e da'me qoyela'alo joñaa'me, enapega't:
«Auec'achiñe, male nenoĝotedapeguegue jogaa'me hebreo laje', chiyaqauelo gaa'me jauaco jo'ne nañoĝotaĝaiqui'.»
12Qampaja'a jogaa'me filisteopi netene'j ga'me 'laqata'j da'me yiyaĝata ñe'me Jonatán choqoñe'me necochoqo't:
«¡Oquiyije'mec jena'me jouaqa'ta, qa'a 'uo ga'me jetaque ami qa'uaĝatema!»
Qama'le Jonatán enapega ñe'me necochoqo't:
«Qolaq, jayem oquegue, qa'a joñe'me Jaliaĝanec yanouelo naa'me qadoua'.»
13Qama'le Jonatán quejeguem, naqalequetajeguem, 'yonataĝanaĝa'n naa'me lapia'te choqonaa'me loua', qama'le ñe'me necochoqo't dajota'ye joñe'me. Jogaa'me jo'ne ye'quemaqate't ñe'me Jonatán nejouoqotapelo'te da'me 'naqadañe, qama'le ñe'me necochoqo't jo'ne dajota'ye male yataqachiñe yala't jogaa'me. 14Nach'ega ua'a da'me ecalo jogaa'me, ñe'me Jonatán choqoñe'me necochoqo't da'me qampaja'a veinte gaa'me yala't. 15Ena'uaque jogaa'me filisteopi jo'ne ueteda'a ga'me lomachaqa't choqogaa'me jo'ne ja ueteda'a yataqachiñe jaqachiguilo da'me loqolanaqa't. Ga'me lae gaa'me coicopi choqogaa'me lajoĝola'te jogaa'me nalada't lo'ol nach'e ena'ama jalcote da'me loqolanaqa't. Qama'le nach'ega ua'a da'me deda jena'me aleua, qama'le yataqachiñe jalcote da'me loqolanaqa't.
16Chane'eja jogaa'me vitaĝayaqa jo'ne lalemaĝaje'te ñe'me Saúl, jo'ne ueteda'a di'me Guibeá, 'naleua di'me Benjamín, male yauanalo jogaa'me filisteopi da'me ena'uaque jogaa'me naqalegoqotayi, ja yayate'n ga'me tade'ga. 17Qama'le Saúl dojapegue'to jogaa'me coico laje'pi jo'ne naequetedapegue':
«Auec'achiñe' jogaa'me qanejoĝonaqa qaedi auañiya jach'e jogamaĝa qaya jena'me jenjo'.»
Qama'le qoyauana da'me qaya ñe'me Jonatán nataq'aen ñe'me necochoqo't. 18Queda'me 'uo ca'li jaga'me lae't daa'me Dios lamajoĝonaĝaco netauelo jogaa'me Israel laje'pi, Saúl dojapegue' ñe'me Ahías, eetac:
«Anedo'quena jaga'me lae't daa'me lamajoĝonaĝaco ñe'me Dios.»
19Mane'e da'me cha'li dojapegue' ñe'me tamenaĝaiqui lo'o ñe'me Saúl, ga'me lomachaqa't gaa'me filisteopi ma'ejama'le da'me ja niyamaĝa. Chane'eja yitaĝa enaac da'me dojapegue' ñe'me tamenaĝaiqui lo'o:
«Cha'li ena'te anedo't jaga'me.»
20Qampaja'a ñe'me Saúl choqoga'me coicopi jo'ne nalada't lo'ol yema'a't qama'le tadoue ga'me nalada't. Yataqachiñe jalcote da'me ja niyamaĝa jogaa'me filisteopi, chayovida'a da'me mach'e nalatetapega't. 21Ja nach'edata da'me dojo', qa'a jogaa'me hebreo laje' jo'ne cop'a da'me netauelo jogaa'me filisteopi, nataq'aen da'me equeguelo jogaa'me qa'a napoqotenaĝa'u jogaa'me coicopi jo'ne nalada't lo'ol, ma'te yec'atalo jogaa'me Israel laje'pi jo'ne quetedapegue' ñe'me Saúl choqoñe'me Jonatán. 22Qama'le jogaa'me Israel laje' jo'ne yapinouelo ca'li gaa'me qajoĝona'a di'me Efraín noma'alo jogaa'me filisteopi da'me dajodegue, nach'e ena'am yecaa'tape. 23Jo'me nalada't yataqachiñe jalcochiñe, chayovida'a di'me Bet-avén, qama'le ñe'me Jaliaĝanec naq'aeta da'me de'uolo'te gaa'me Israel laje'pi jo'me jojo' nolo'.
Saúl 'naĝatot ñe'me Jaliaĝanec
24Qalaĝaja jo'me nolo', gaa'me Israel laje'pi yataqachiñe jalcote da'me nelidiñi, yajouaĝat da'me qaya'te ta'le jetaque deque'e. Qa'a ñe'me Saúl joote 'yaeñi ga'me 'laqatac yanem gaa'me jiyaĝadipi, eetac: «Qom 'uo ga'me yalic qom yamta'le 'nalchiñe, yataqachiñe ja liyamaĝa, qom jona'li ñomachichidiñe gaa'me yaute'upi.»
25Qama'le gaa'me coicopi yovideta ga'me viaq jo'ne uaue ga'me ma'ague jo'ne ualegue ga'me aleua. 26Mane'e da'me tadoue gaa'me jiyaĝa'u, ga'me ma'ague yayetaye, ena'am ga'me noĝop. Qalaĝaja qaya'te ta'le yapiyen joga'me, qa'a qot'oiya ga'me 'laqatac ñe'me Saúl jo'ne joote ya'uo. 27Qalaĝaja Jonatán, jo'ne ja domachiya ca'li ga'me 'laqatac ñe'me let'a jo'ne yanema gaa'me coicopi, nodegue ga'me laje'l jo'ne lajoqot'a, yijomiñigue ga'me lejenec ga'me laje'l ga'me ma'ague qama'le yalic joga'me, qama'le paja'a nomeguet da'me 'lañaĝac. 28Qama'le 'uo ga'me coico le'ec enapega, eetac:
«Ñe'me adet'a ya'uo jenete' ga'me 'laqatac, 'naĝatot ñe'me Jaliaĝanec da'me yanema gaa'me coicopi, qama'le eetac ga'me 'laqatac gamachaqaega ga'me 'uo ga'me yalic jena'me jenjo' nolo', yataqachiñe ja liyamaĝa joga'me. Qo'oche' gaa'me coicopi yataqachiñe qaya'te 'lañaĝa'j, jouaĝat da'me ja deque'y.»
29Qama'le 'yat ñe'me Jonatán:
«Da'me ya'uo ñe'me taĝadena' yataqachiñe 'naĝat ga'me noic. Auec'aten: paja'a janomeguet da'me 'yañaĝac, da'me japiyen ga'me ma'ague. 30Nataq'aen degueja da'me 'lañaĝa'j gaa'me Israel laje' nayi, ta'le yali'j ga'me leuodaĝanaĝa't chiyaqauelo gaa'me qadaute'upi, qama'le ¡yataqachiñe jalcochiñe ta'le da'me qadomataĝanaĝac!»
31Jo'me nolo' gaa'me Israel laje' noma't jogaa'me filisteopi, jo'me nalada't chiyoĝochi'ña di'me Micmás chayovida'a di'me Aialón. Qalaĝaja gaa'me coicopi jo'ne Israel laje' yataqachiñe qaya'te 'lañaĝa'j. 32Qama'le ua'a da'me doĝotaĝatec ga'me yauata gaa'me laute'upi, jo'ne 'nanaĝate choqogaa'me uaca, nataq'aen gaa'me uaca c'oqo'te, nach'e ueda'a jodi'me da'me yala't qama'le yali'j, nach'e eda'ac da'me jona'li dato. 33Qalaĝaja uo'oe jogaa'me t'aqataĝatem ñe'me Saúl, enaa'j:
«Gaa'me coico laje' yauote da'me ja no'en jo'ne nautena ñe'me Jaliaĝanec, qa'a yali'j ga'me lapat jo'ne maliaĝa touegue.»
Chane'eja eetac ñe'me Saúl:
«¡Da'me ami yataqachiñe ja ami 'te yataqatelo'te! Anedoyiquena ga'me qa' t'adaic. 34Qama'le a'uaqataĝañiyema gaa'me jiyaĝadipi qaedi onolqa'tape nedo't ga'me yauana uaca, uotaĝa 'nanaĝate, qaedi yalat qama'le yalic. 'Noota qom ja yauo'oe gaa'me loeco jo'ne nauteta ñe'me Jaliaĝanec, da'me yali'j ga'me lapat jo'ne maliaĝa 'uo jaga'me tauo'.»
Nach'ejo jo'me pi'yaq ca'li, onolqa'tape jogaa'me yaviye't ga'me mach'e yauana uaca uotaĝa 'nanaĝate, qama'le ua'a jodi'me da'me yalat. 35Chane'eja ñe'me Saúl 'noĝojeguem ga'me c'atonaĝala', yanem ñe'me Jaliaĝanec; naqaega jo'ne 'uaechiñe ya'uo. 36Yem qama'le Saúl ya'uo ga'me 'laqatac:
«Jena'me jenjo' pi'yaq jec'otaĝalo gaa'me filisteopi qaedi qauelagaĝachiguilo chayovida'a yamta'le 'yoĝoñi. Qom male ena'uaque qoyala't, qama'le jaconaĝa yema ga'me yauata.»
Ena'uaque jogaa'me 'yadeteguet:
«Aua'uo ga'me auetapega 'noota ta'le aua'uo.»
Qalaĝaja ñe'me tamenaĝaiqui lo'o eetac:
«Cha'li 'uaeñe da'me jenataq ñe'me Dios jach'e ga'me 'noota ta'le jauoqo.»
37Chane'eja ñe'me Saúl yachimaĝata ñe'me Dios:
«¿Qo'li jeguiiñguilo jogaa'me filisteopi? ¿Qo'li auanouelo naa'me qadoua' jogaa'me?»
Qalaĝaja ñe'me Jaliaĝanec ja 'yateguet jo'me jojo' nolo'. 38Chane'eja Saúl eetac:
«Auanayiquena, ami jo'ne lajoĝola'te gaa'me coicopi, qama'le anemichiyaque jach'e ga'me ya'uo da'me loec jo'ne ja no'en jenjo' nolo' jo'ne yajouaĝat da'me ja jayem 'te 'yateguet ñe'me Dios. 39'Ñaĝatot ñe'me Jaliaĝanec jo'ne mach'e Qadec'alaĝaiqui, qo'mi jo'ne Israel lec'oqo'tepi, queda'me temaq'aen qom naqaeñe ñe'me yalec Jonatán, nach'e ena'am qoyalat qomle.»
Qalaĝaja qaya'te ta'le 'yateguet. 40Chane'eja Saúl dojapegue'to ena'uaque gaa'me Israel laje'pi, eetac:
«Da'me ami, auep'aiyigue da'me daja', qama'le da'me jayem nataq'aen ñe'me yalec Jonatán qamqa'me jep'aĝague jenjo'.»
'Yadeteguet jogaa'me:
«Aua'uo ga'me auetapega 'noota ta'le aua'uo.»
41Qama'le Saúl dojapegue' ñe'me Jaliaĝanec mach'e Nedios ga'me Israel laje'pi, enaac:
«Qo'mi auayatenaĝanaĝaneque jach'e ga'me jiyaĝaua jo'ne 'uo ga'me lajouaqataĝanaĝac.»
Queda'me tachigui qoyen ñe'me Jonatán choqoñe'me Saúl, gaa'me coicopi qaya'te ga'me laviyaĝaje't. 42Yem qama'le Saúl eetac:
«Qo'mi analichiguilo jayem choqoñe'me yalec Jonatán.»
Qama'le joga'me qonalichigui tachigui ñe'me Jonatán. 43Chane'eja Saúl yenat joñe'me:
«Jayem a'uaqataĝanem: ¿jach'e jogamaĝa aua'uo?»
Qama'le Jonatán nechoĝotot:
«Yataqachiñe eja queda'me nach'edata da'me japiyen ga'me ma'ague, jen ga'me lejenec ga'me yaje'l jo'ne yajoqot'a. Qalaĝaja joue'tena qaedi jayem aualachi.»
44Qama'le Saúl 'yateguet:
«¡'Noota qom Dios jayem yachalegue da'me lalemataic let'adaic qom ja adeleu, Jonatán!»
45Qalaĝaja gaa'me jiyaĝadipi 'yadeteguet ñe'me Saúl:
«¿Teua'atoqo' ta'le yeleu ñe'me Jonatán? Queda'me nach'eñe yanem ga'me lomataĝanaĝac jo'ne yataqachiñe jalcochiñe di'me Israel. ¡'Noota ta'le ja naq'aeta! Qa'naĝatot ñe'me Jaliaĝanec queda'me qaga'te onole jaga'me layoqote ta'le 'naqañe. Ga'me ya'uo jenjo' nolo', ya'uo ga'me joote lelnataĝac ñe'me Dios.»
Qama'le naq'aeta da'me dojo' gaa'me jiyaĝadipi nec'alaĝatedegue ñe'me Jonatán. 46Qama'le da'me Saúl yaĝañi da'me quiiñguilo gaa'me filisteopi, qama'le jogaa'me 'viyelaĝadeta ga'me 'naleua'.
47Yem da'me yiyamaĝañi da'me lejaliaĝa di'me Israel, Saúl dajoya'agueta ena'uaque gaa'me laute'u jo'ne leje'gue, jo'ne Moab laje', gaa'me Amón laje', gaa'me Edom laje', ga'me lejaliaĝanec di'me Sobá choqoga'me filisteopi. Gamachaqaega ga'me ta'ya, nach'e eta't da'me domataĝan. 48Yemata'a't ca'li gaa'me coicopi, qama'le noma't gaa'me Amalec laje', qama'le naq'aeta da'me nec'alaĝatedegue gaa'me Israel laje' jogaa'me jo'ne nach'e eta't da'me neuode'tape.
49Saúl uo'oe gaa'me cinco c'oqo'te: naa'me lenaqa'te gaa'me le'mi Jonatán, Isví choqoñe'me Malquisúa. Gaa'me yauo' Merab, jañe'me 'yaĝae, nataq'aen Mical, jañe'me jaqayi. 50Jañe'me loua ñe'me Saúl lenaĝat da'me Ahinóam, jo'ne c'oqote di'me Ahimaas. Ñe'me lajoĝola't gaa'me nalada't lo'ol lenaĝat da'me Abner, mach'e c'oĝot ñe'me Ner, jo'ne netejoqo' ñe'me Saúl. 51Ñe'me Quis, let'a ñe'me Saúl, nataq'aen ñe'me Ner, let'a ñe'me Abner, mach'e c'oqo'te di'me Abiel.
52Da'me cha'li jaliaĝanec ñe'me Saúl, nach'e eta't da'me 'uo ga'me nalada't, gaa'me laute'u jo'ne filisteopi. Jouaĝat da'me dojo', ñe'me Saúl yacone'ualo gaa'me jiyaĝa'u jo'ne nalada't lo'o jo'ne yataqachiñe 'uañaĝayaqa.
Currently Selected:
1 Samuel 14: TDO
Highlight
Share
Copy
Want to have your highlights saved across all your devices? Sign up or sign in
Biblia en Toba del Oeste © Sociedad Bíblica Argentina, 2014, 2019.
