1 Samuel 13
13
Nalada't qodajoya'agueta jogaa'me filisteopi
1Saúl male 'yaĝaic ga'me neuo'e ca'li male nejaliaĝatelegue di'me Israel, qama'le ca'li joote yenoĝodegue dos jaa'me 'uoidi da'me lejaliaĝa, 2yauo'oe tres mil coico laje' jo'ne Israel laje'pi. Dos mil gaa'me ueteda'ajop joñe'me, ueteda'a di'me noic Micmás nataq'aen gaa'me qajoĝona'a di'me aleua lae jo'ne Betel. Gaa'me laqaya' mil qamqa'me ueteda'ajop ñe'me Jonatán, mach'e c'oĝot ñe'me Saúl, ueteda'a di'me noic jo'ne Guibeá, 'naleua di'me Benjamín. Gaa'me jiyaĝa'u laqaya', ñe'me Saúl e'n 'viyelaĝalo gaa'me 'lachaqa'te.
3Qama'le ñe'me Jonatán nomachichidiñe gaa'me filisteo laje' jo'ne coicopi ueteda'a di'me Guibeá, qama'le yemeda gaa'me filisteopi paja'a da'me nomedaye. Chane'eja Saúl damajoĝolegue da'me qoyajediyelo gaa'me lajeedel,#13:3 Qoyajediyelo gaa'me lajeedel: qoyen 'nanec da'me male qoya'uo ga'me nalada't. yema di'me aleua jo'ne Israel, qaedi paja'a qoyayatenaĝanaĝaneque da'me dojo' jogaa'me hebreopi. 4Ena'uaque jogaa'me Israel laje'pi male nomeda'a ñe'me Saúl queda'me nomachichidiñe jogaa'me coico laje' jo'ne filisteopi, nataq'aen jouaĝat da'me dojo' jogaa'me filisteopi nach'e eta't da'me niquiyatapegalo jogaa'me Israel laje'pi. Chane'eja gaa'me Israel laje' jo'ne nalada't lo'ol yitaĝa yema'a't, dajoyeda'aguet ñe'me Saúl, ueda'a di'me Guilgal.
5Jogaa'me filisteopi nach'e ena'am yema'a't qa'a jetaque deloi'ye'to jogaa'me Israel laje'pi. Nalo'taguet treinta mil gaa'me cadeeta jo'ne yelotede'eguet ga'me nalada't, seis mil gaa'me coicopi netalo'te gaa'me pe'ga, nataq'aen jogaa'me coicopi jo'ne petedañe yataqachiñe ja qoyaqanatet ta'le qonaloqoten, ena'am ga'me pogaĝanaĝa jo'ne ua'ña ga'me ñache lae. Qama'le dajotegue di'me Micmás, qama'le ueda'a da'me yauote ga'me lomachaqa't, jo'ne yauaqa'a di'me Bet-avén#13:5 Bet-avén: lenaĝat laqaya jo'ne qoyenaqatenec ca'li di'me noic Betel, jo'ne yelo'teguet da'me 'netaĝaloĝoc 'lachaqa'. da'me ua'ague ga'me nayapije'ma jañe'me ajeua. 6Jogaa'me Israel laje'pi yauata da'me yataqachiñe ja qoyaĝa'tape, qa'a nach'e ena'am qodiquetapiñilo, quiiñguilo jogaa'me filisteopi. Chane'eja uo'oe gaa'me nañoĝochidiñe, tauelo gaa'me jauaco choqogaa'me limaĝañil nataq'aen yapinouelo gaa'me qadi, nataq'aen yauo'oe naa'me lete' jena'me aleua. 7Uo'oe jogaa'me laqaya' jo'ne paedegue di'me ñache Jordán, yelotede'eguet ga'me 'naleua di'me Gad nataq'aen di'me Galaad.
Qalaĝaja ñe'me Saúl maliaĝa ue'ta di'me Guilgal, qama'le ena'uaque jogaa'me necoicopi quetedapegue' joñe'me, yataqachiñe jaqachiguilo da'me loqolanaqa't. 8Naqaedi ue'ta ñe'me Saúl jaa'me siete noloqo'ote, qa'a naq'aeta ga'me joote 'yaĝatem ñe'me Samuel. Qalaĝaja ñe'me Samuel ja paja'a da'me yovita di'me Guilgal, qama'le gaa'me jiyaĝadipi male uo'oe gaa'me queda'e jodi'me. 9Chane'eja Saúl damajoĝon, eetac ga'me 'laqatac:
«Anedoyiquena gaa'me yejidi jo'ne jegoĝouelo qomle, choqoga'me najaqajec jo'ne yelo'teguet da'me ji'iyelaĝajoqot joñe'me Jaliaĝanec.»
Qama'le nach'eñe ñe'me Saúl mach'e yegoue ga'me najaqajec.
10Mane'e da'me yamta'le yomat ga'me najaqajec da'me yegoue ñe'me Saúl, male novi' ñe'me Samuel. Qama'le ñe'me Saúl ca'aguet qaedi yep'iyen joñe'me. 11Qalaĝaja ñe'me Samuel enapega, eetac ga'me 'laqatac:
«¿Toqoch'e aua'uo da'me dojo'?»
Ñe'me Saúl 'yateguet:
«Mane'e da'me jauanalo gaa'me ñecoicopi, onolqa'tape da'me quedeuo, nataq'aen da'me am ja yepaquichigui da'me anovi' jo'me te'me adaloqo', nataq'aen jogaa'me filisteopi niyamaĝatetapega't, ueteda'a di'me Micmás, 12qama'le jetapega jogaa'me jayem nagueta da'me joue'ta jena'me Guilgal, ja ch'e ta'le ja'uo ga'me yenataĝanaĝac ñe'me Jaliaĝanec. Jouaĝat da'me dojo' jetapega mach'e jayem da'me je'et jegoue ga'me najaqajec.»
13Qalaĝaja ñe'me Samuel 'yateguet:
«¡Da'me jo'ne aua'uo yataqachiñe ja 'noota! Ta'le yataqata aua'uo da'me lamajoĝonaĝac ñe'me Jaliaĝanec mach'e Anedios jo'ne am yanem ca'li, qama'le ñe'me nale'en da'me am yanem da'me am lejaliaĝane'j gaa'me Israel laje'pi. 14Qalaĝaja nayi, ga'me adejaliaĝa ja cop'a qomle, qa'a ñe'me Jaliaĝanec joote yelaque ga'me jiyaĝaua jo'ne yiyamaĝaden. Qama'le yenaqatenec qomle da'me lajoĝola't gaa'me c'oqo'tepi, jouaĝat da'me am ja auoqo'cha ga'me lamajoĝonaĝac jo'ne joote am yanem.»
15Qama'le ñe'me Samuel paja'a ca'e di'me Guilgal qa'a queta ga'me ladiquiyaĝac. Gaa'me coicopi quetedapegue' ñe'me Saúl qa'a dajoteda'a ga'me nalada't. Qama'le chiyoqoda'ña di'me Guilgal, male yovideta di'me Guibeá, 'naleua di'me Benjamín. Naqaedi ua'a da'me naloqote'n ñe'me Saúl gaa'me necoicopi jo'ne quetedapegue' joñe'me: seiscientos ga'me liiñi gaa'me jiyaĝa'u. 16Qama'le ñe'me Saúl choqoñe'me c'oĝot Jonatán ueteda'a di'me Guibeá, choqoga'me coicopi jo'ne nalada't lo'ol. Gaa'me filisteopi qamqa'me yauote lomachaqa't di'me Micmás. 17Temaq'aen da'me tres gaa'me lapal gaa'me filisteopi queda'e di'me lomachaqa't: onole jaga'me dajoyi di'me noic Ofrá jo'ne 'naleua di'me Sual, 18jaga'me lapa laqaya yec'ata di'me noic Bet-horón, qama'le jaga'me laqaya ta'ya ga'me comadaĝa jo'ne najoya'ña ga'me c'ama'ague di'me 'naleua di'me Seboím, jo'ne ta'ya ga'me aleua jo'ne totapega't.
19Yema di'me aleua Israel qaya'te onolec ta'le ye'et ga'me 'nonataĝanaĝac jo'ne laicaua ga'me hierro, jouaĝat da'me ja qoyajen, qa'a jogaa'me filisteopi etedapega ja 'noota ta'le gaa'me hebreopi ye't jogaa'me 'leuoĝonaqa'te jo'ne nedaĝanaqa'te nataq'aen jogaa'me miyoĝol. 20Jouaĝat da'me dojo', ena'uaque jogaa'me Israel laje' nayoĝonalo jogaa'me filisteopi qaedi yiuo'j jaga'me najegaĝanaqate, ga'me 'nonataĝanaqate aleua lo'o, jaga'me qachipe nataq'aen joga'me nequejoĝonaĝat. 21Eetojo' da'me qoyejete'n ocho gramos jaga'me laicaua tayi da'me qoyeuoc jaga'me najegaĝanaqate, uotaĝa ga'me 'nonataĝanaqate aleua lo'o, nataq'aen cuatro gramos jaga'me laicaua da'me qoyeuoc jaga'me qachipe uotaĝa joga'me nequejoĝonaĝat.
22Chane'eja jogaa'me quetedapegue' ñe'me Saúl choqoñe'me Jonatán da'me nalada't, qaya'te onolec ta'le yauana ga'me nedaĝanaĝat uotaĝa miyoĝo. Nach'eñeuate' joñaa'me dojolqa da'me yauata ga'me 'leuoĝonaĝa't. 23Qaale jogaa'me filisteopi, ga'me lae gaa'me coicopi jo'ne nalada't lo'ol ec qaedi qonaua'n ga'me naq'aic jo'ne yelo'ta di'me Micmás.
Currently Selected:
1 Samuel 13: TDO
Highlight
Share
Copy
Want to have your highlights saved across all your devices? Sign up or sign in
Biblia en Toba del Oeste © Sociedad Bíblica Argentina, 2014, 2019.
