Chhóng-sṳ Ki 31

Ngâ-kok Thò-chéu Lì-khôi Lâ-pân

1Ngâ-kok thâng-tó Lâ-pân ke-têu lai-é kóng: “Ngâ-kok yí-kîn chhióng-chéu ên-têu â-pâ ke yit-chhiet; kì só-yû ke chhòi-sán pún-lòi he su̍k ên-têu â-pâ ke.” 2Ngâ-kok ya fat-kok Lâ-pân tui kì mò chhiong thèu-pái án chhîn-chhiet. 3Liá-sṳ̀, Song-chú tui Ngâ-kok kóng: “Ngì oi chón-hi ku-hiông, to ngiâ chú-siên lâu chhîn-ngìn ke-vi hi; Ngài oi lâu ngì khiung-ha.”

4Ngâ-kok chhiu phai-ngìn chhòn-fa pûn Lùi-kiet lâu Li-â, fûn-fu kì-têu to kì chóng-yòng ke thi-fông kien-mien. 5Kì lâu kì-têu kóng: “Ngài fat-hien ngiâ-pâ tui ngài mò chhiong thèu-pái án chhîn-chhiet; chúng-he ngâ-pâ ke Song-ti yit-chhṳ̍t lâu ngài khiung-ha. 6Ngì lióng-sà tî, ngài yû chhin chhiòn-li̍t lâu ngiâ-pâ kûng-chok, 7chúng-he kì phien ngài, sṳ̍p-pái kói ngài ke kûng-chhièn; hó-tet Song-ti m̀-chún kì hoi ngài. 8Na-he Lâ-pân kóng: ‘Yû fâ-tiám ke yòng-è pûn ngì cho kûng-chhièn’, kiung ke yòng-è kûi-khiùn chhiu yû fâ-tiám; na-he kì kóng: ‘Yû fâ-long ke yòng-è pûn ngì cho kûng-chhièn’, kiung ke yòng-è kûi-khiùn chhiu yû fâ-long. 9Án-ngiòng, Song-ti chiông ngiâ-pâ ke yòng-khiùn nâ-lòi su-pûn ngài.

10“Yû yit-pái, chhai yòng-khiùn phi-chúng ke sṳ̀-chiet, ngài pot-mung khon-tó tá yòng-mà ke yòng-kâ chhiòn-phu he yû fâ-tiám, yû fâ-long ke. 11Song-ti ke sṳ́-chá chhai mung-chûng kóng: ‘Ngâ-kok â!’ Ngài en kóng: ‘Ngài chhai liá-vi.’ 12Kì kóng: ‘Ngì khon, só-yû tá yòng-mà ke yòng-kâ chhiòn-phu he yû fâ-tiám, yû fâ-long ke. Ngài pûn liá-sṳ fat-sên, yîn-vi Lâ-pân hiong ngì só-cho ke, Ngài lûng-chúng yû khon-tó. 13Ngài he chhai Pak-thi̍t-li hiong ngì hién-hien ke Song-ti. Ngì sṳt chhai ke-vi tun yit-chak sa̍k-thèu cho ki-ngiam-pî, chhai táng-kô lìm kám-lám-yù, yu chhai ke-vi tui Ngài fat-sṳ. Liá-ha ngì oi chún-phi chón ngì chhut-se ke thi-fông hi.’ ”

14Lùi-kiet lâu Li-â en Ngâ-kok kóng: “Ngài-têu kám hàn yû khó-nèn tui ngâ-pâ pûn-tó chhòi-sán mâ? 15Kì kám m̀-he chiông ngài-têu chún-cho ngoi-ngìn mâ? Kì chhut-mai ngài-têu, yu thûn-thet mai ngài-têu ke ka-chhièn. 16Song-ti tui ngâ-pâ ke-vi nâ-chéu ke chhòi-fu pún-lòi he su̍k ngài-têu lâu ngài-têu chṳ́-ńg ke. Án-ngiòng, ngì oi cheu Song-ti tui ngì kóng ke fa hi-cho.”

17-18Ngâ-kok chhiu chún-phi hó-se, oi chón Kâ-nàm kiâ-pâ Yî-sat ke-vi hi. Kì ham pû-ngiòng, chṳ́-ńg chhiòn-phu khì-sông lo̍k-thò, yu tai-tén kì só-yû ke thèu-sâng lâu chhai Mî-sok-put-tha̍t-mí-â chit-chhùn ke chhòi-sán lì-khôi. 19Tông Lâ-pân hi ngoi-poi chién yòng-mô ke sṳ̀, Lùi-kiet thêu-nâ kiâ-pâ ke-têu kâ-chhu̍k ke sṳ̀n-siong. 20Ngâ-kok phien Lâ-pân, mò pûn kì tî, chhiu thêu-thêu-é chéu. 21Kì tai-tén kì só-yû ke yit-chhiet thò-chéu, thu-ko Yu-fat-lâ-tí-hò, hiong Kî-lie̍t sân-khî hi.

Lâ-pân Tûi Ngâ-kok

22To thi-sâm ngit, yû-ngìn lâu Lâ-pân kóng, Ngâ-kok thò-chéu lé. 23Lâ-pân tai-liâng kì ke chhu̍k-ngìn khiung-ha hi-tûi Ngâ-kok. Kì-têu tûi chhit-ngit, chang chhai Kî-lie̍t sân-khî tûi-tó kì. 24Ke am-pû, Song-ti chhai Â-làn-ngìn Lâ-pân mung-chûng hiong kì hién-hien, tui kì kóng: “Ngì oi séu-sîm, m̀-hó lám-sám tui Ngâ-kok kóng khiúng-hak ke fa.” 25Ke-sṳ̀ Ngâ-kok chhai sân-táng tap chong-phùng; Lâ-pân lâu kì ke chhu̍k-ngìn ya chhai Kî-lie̍t sân-khî tap chong-phùng.

26Lâ-pân tui Ngâ-kok kóng: “Ngì cho-má-ke mò lâu ngài kóng chhiu chéu? Chhiong ngìn khià tô-é chiông ngài ke moi-é chhióng-chéu. 27Cho-má-ke phien ngài, thêu-thêu-é chéu, mò lâu ngài kóng yit-sâng? Na-he ngì yû lâu ngài kóng, ngài yit-thin voi fôn-fôn hí-hí chhong-kô, tá-kú, thàn-khìm sung ngì chéu. 28Ngì án-ngiòng cho sṳ̍t-chhai thet-ngong; lièn pûn ngài chîm yit-ha ngài ke ngoi-sûn lâu moi-é, lâu kì-têu sung-phe̍t ke kî-fi ya-mò. 29Pún-lòi ngài yû phan-fap sông-hoi ngì, chúng-he chhô-am-pû, ngiâ-pâ ke Song-ti kín-ko ngài, m̀-chún ngài lám-sám khî-fu ngì. 30Ngài ya liáu-kié ngì sióng ngiâ-pâ vuk-hâ ke sîm-chhìn, yit-sîm sióng-oi chón-hi; chúng-he cho-má-ke thêu ngài ke-têu kâ-chhu̍k ke sṳ̀n-siong nè?”

31Ngâ-kok en Lâ-pân kóng: “Yîn-vi ngài kiâng ngì voi tui ngài liá-vi khiòng-khiòng chiông ngì ke moi-é chhióng chón-hi. 32Chúng-he, ngì chhai má-ngìn ke-vi sêu-chhut ngì ke-têu sṳ̀n-siong, má-ngìn chhiu kôi-sí. Chhai ngài-têu chhîn-ngìn mien-chhièn, na-he ngì ngin-chhut yû má-ke tûng-sî he ngì ke, chhiu nâ chón-hi.” Ngièn-lòi Ngâ-kok m̀-tî Lùi-kiet thêu kiâ-pâ ke sṳ̀n-siong.

33Lâ-pân chhiu ngi̍p-hi Ngâ-kok ke chong-phùng sêu-chhà, chiap-tén to Li-â lâu lióng-ke sṳ́-ńg ke chong-phùng, mò sêu-tó má-ke; chhut-lòi heu, kì yu ngi̍p-hi Lùi-kiet ke chong-phùng. 34Lùi-kiet yí-kîn chiông ke-têu kâ-chhu̍k ke sṳ̀n-siong khong chhai lo̍k-thò ôn ke thoi-é tú, chhṳ-kâ chhô chhai táng-kô. Lâ-pân chhai chong-phùng tú tak-vi sêu, mò chhìm-tó má-ke. 35Lùi-kiet tui kiâ-pâ kóng: “Chhiáng ngì m̀-hó su-hi; ngài tú-hó chhai ngie̍t-kîn khì-kiên, mò fông-phien chhai ngì mien-chhièn khî hí-lòi.” Lâ-pân tak só-chhai chhìm theu-theu, mò chhìm-tó ke-têu kâ-chhu̍k ke sṳ̀n-siong.

36Ngâ-kok chhiu su-hi, chit-phi Lâ-pân kóng: “Ngài to-tái fam má-ke chhui, fam má-ke fap, ngì sa lòi-tûi ngài? 37Ngì yí-kîn sêu-ko ngài só-yû ke pâu-fu̍k, to-tái yû chhìm-tó ngiâ vuk-hâ ke tûng-sî mò? Nâ chhut-lòi, piong chhai ngì lâu ngài chhîn-ngìn ke mien-chhièn, pûn thai-kâ kiet-thin ngài lióng-sà oi ngióng-pân cho â! 38Ngài chhai ngiâ vuk-hâ liá ngi-sṳ̍p ngièn-kiên, ngì ke mièn-yòng ya-he sân-yòng m̀-sṳt lau-thôi; ngì ke yòng-kú ngài yit-chak ya m̀-sṳt sṳ̍t-ko. 39Pûn yâ-chhu chhá-lan ke yòng, ngài mò tai-hi pûn ngì khon, chhiòn-phu he ngài chhṳ-kâ sṳ̂-ha phòi-thet. Mò-lun ngit-sṳ̀-thèu, am-pû-sṳ̀, yòng-è pûn-ngìn thêu-chéu, ngì chhiòn-phu oi ngài phòi. 40Ngài sòng-sòng ngit-sṳ̀-thèu tù-tó fûng-chhôi ngit-chat, am-pû-sṳ̀ yu su-tó hòn-sông, kûi am-pû mò ha̍p-ngién. 41Ngài chhai ngiâ vuk-hâ cho ngi-sṳ̍p ngièn chhòng-ngièn: vi-tó thó ngì lióng-ke moi-é, ngài fu̍k-sṳ ngì sṳ̍p-si ngièn; vi-tó oi tet ngì ke yòng-khiùn, ngài fu̍k-sṳ ngì liuk-ngièn; ngì hàn sṳ̍p-pái kói ngài ke kûng-chhièn. 42Na-m̀-he ngài ke chú-siên Â-pak-lâ-hón ke Song-ti, Yî-sat só kin-vi ke Song-ti lâu ngài khiung-ha, ngì yit-thin voi kiuk ngài khûng-sú chhut-lòi. Chúng-he Song-ti khon-tó ngài ke khú-chhìn lâu lò-luk; Kì chhô-am-pû chhiu chit-phi ngì.”

Ngâ-kok lâu Lâ-pân Li̍p-yok

43Lâ-pân en Ngâ-kok kóng: “Moi-é he ngài ke, ngoi-sûn ya he ngài ke, lièn yòng-khiùn ya he ngài ke; khì-sṳ̍t ngì ngién-chhièn ke yit-chhiet lûng-chúng he ngài ke. Ngài ke moi-é lâu kì-têu só kiung ke chṳ́-ńg, ngài kîm-pû-ngit oi ngióng-pân khoán-thai kì-têu nè? 44Lòi â! Ngì lâu ngài lióng-sà li̍p-yok, ngài-têu lòi tôi sa̍k-thèu cho ngài-têu li̍p-yok ke chṳn-kí.”

45Ngâ-kok chhiu fân yit-chak sa̍k-thèu tun hí-lòi cho ki-ngiam-pî. 46Kì ham chhîn-ngìn ngiâm-têu sa̍k-thèu lòi tôi-cho yit-tôi, yèn-heu thai-kâ chhai sa̍k-tôi sùn khiung-ha sṳ̍t, khiung-ha lîm. 47Lâ-pân chiông ke sa̍k-tôi ôn-miàng Yî-kâ-ngí-Sat-ha̍p-thu-thâ#31:47 “Yî-kâ-ngí-Sat-ha̍p-thu-thâ” Â-làn-vùn ke yi-sṳ he “cho-chṳn ke sa̍k-tôi”., chúng-he Ngâ-kok chiông kì ôn-to Kâ-lui-tet#31:47 “Kâ-lui-tet” Hî-pak-lòi-vùn ke yi-sṳ he “cho-chṳn ke sa̍k-tôi”.. 48Lâ-pân tui Ngâ-kok kóng: “Kîm-pû-ngit, liá sa̍k-tôi chhai ngì lâu ngài chûng-kiên cho ngài-têu li̍p-yok ke chṳn-kí.” Só-yî liá thi-fông ôn-to Kâ-lui-tet. 49Lâ-pân yu kóng: “Ngài-têu fûn-khôi yî-heu, ngien Song-chú chhai ngì lâu ngài chûng-kiên kam-chhat.” Só-yî liá thi-fông yu ôn-to Mí-sṳ̂-pâ#31:49 “Mí-sṳ̂-pâ” yi-sṳ he “kam-chhat-thòi”..

50Lâ-pân chiap-tén tui Ngâ-kok kóng: “Ngì na-he fái tui-thai ngài ke moi-é, ya-he chhai ngài ke moi-é yî-ngoi chai-thó, sûi-yèn mò-ngìn tî, ngì oi ki-tet, Song-ti chhai kam-chhat ên-têu. 51Ngì khon ngài chhai ngì lâu ngài chûng-kiên só li̍p ke liá sa̍k-tôi lâu ki-ngiam-pî. 52Liá sa̍k-tôi lâu liá-ke ki-ngiam-pî cho chṳn-kí lòi thì-siáng ên-têu: ngài chhie̍t-tui m̀-voi chhêu-ko sa̍k-tôi hi kûng-kit ngì, ngì ya cho-m̀-tet chhêu-ko sa̍k-tôi lâu ki-ngiam-pî lòi chhîm-fam ngài. 53Â-pak-lâ-hón ke Song-ti lâu Nâ-ho̍k ke Song-ti, chhiu-he kì-têu â-pâ ke Song-ti#31:53 Â-pak-lâ-hón he Ngâ-kok ke â-kûng; Nâ-ho̍k he Lâ-pân ke â-pâ., oi chhai ngì lâu ngài chûng-kiên cho phan-ton.” Yèn-heu Ngâ-kok chhiu tui kiâ-pâ Yî-sat kin-vi ke Song-ti fat-sṳ, oi sú liá-yok. 54Kì chhai sân-táng chhṳ̀ thèu-sâng hien-chi, yêu-chhiáng chhîn-ngìn khiung-ha sṳ̍t-fan; sṳ̍t-páu heu, kì-têu chhai sân-táng ko-ya. 55Thi-ngi ngit tá-chó, Lâ-pân chhiu lâu kiâ ngoi-sûn lâu moi-é chîm-choi chuk-fuk, lì-khôi ke-vi, chón vuk-hâ hi.

Currently Selected:

Chhóng-sṳ Ki 31: THV12Rdb

Highlight

Copy