Chhóng-sṳ Ki 32

Ngâ-kok Chún-phi lâu Yî-so Kien-mien

1Ngâ-kok ki-siu̍k kì ke hàng-chhàng; Song-ti ke sṳ́-chá chhai lu-song lòi-kien kì. 2Ngâ-kok khon-tó kì-têu chhiu kóng: “Liá he Song-ti ke kiûn-chhui!” Kì chhiu chiông ke thi-fông ôn-to Mâ-ha̍p-ngiam#32:2 “Mâ-ha̍p-ngiam” yi-sṳ he “lióng-ke kiûn-chhui”..

3Ngâ-kok phai kí-ke ngìn siên-hi Yî-tûng thi-khî kien kiâ-kô Yî-so, 4fûn-fu kì-têu kóng: “Ngì-têu oi tui ngài chú Yî-so kóng: ‘Ngì ke phu̍k-ngìn Ngâ-kok kóng: Ngài lâu Lâ-pân he̍t yit-chham sṳ̀-kiên, yit-chhṳ̍t to liá-ha chang chón-lòi. 5Ngài yû ngiù, lì, yòng-khiùn, nù-phu̍k lâu nù-pî. Liá-ha ngài siên phai-ngìn lòi po-ko ngâ chú-ngìn, hî-mong tet-tó ngì ke fôn-hí.’ ”

6Phai-hi ke-têu ngìn chón-lòi tui Ngâ-kok po-ko: “Ngài-têu tù-tó ngiâ-kô Yî-so; kì yí-kîn tai-tén si-pak sà chhut-lòi, oi-lòi lâu ngì kien-mien.” 7Ngâ-kok tông-kiâng yu tông-sèu, chiông lâu kì khiung-ha ke ngìn fûn-cho lióng-chhui, chiông yòng-khiùn, ngiù-è, lâu lo̍k-thò ya fûn-cho lióng-chhui. 8Kì sióng: “Na-he Yî-so kûng-kit thi-yit chhui, nang-ngoi yit-chhui hàn-yû kî-fi thò-chéu.”

9Ngâ-kok khì-tó kóng: “Ngâ-kûng Â-pak-lâ-hón ke Song-ti â! Ngâ-pâ Yî-sat ke Song-ti â! Khiù Ngì lòi-thâng! Song-chú â, Ngì sṳt fûn-fu ngài chón-lòi ku-hiông, to ngài kâ-chhu̍k ke-vi hi, yu-kóng oi pûn ngài sṳ-sṳ sun-li. 10Ngài khâm m̀-tet liâng-su ngì hiong phu̍k-ngìn só-cho ke yit-chhiet chhṳ̀-oi lâu sṳ̀n-sṳ̍t. Thèu-pái, ngài ke sú chṳ́-yû khià-tén yit-kî koái-kun-é ko Yok-tan-hò; liá-ha ngài pien-cho lióng-chhui. 11Khiù Ngì kiu ngài thot-lì ngâ-kô Yî-so ke sú. Ngài kiâng kì lòi kûng-kit ngài; lièn pû-ngiòng chṳ́-ńg chhiòn-phu voi pûn kì chhṳ̀-thet. 12Khì-sṳ̍t Ngì sṳt kóng: ‘Ngài yit-thin oi pûn ngì sṳ-sṳ sun-li, ya oi su-pûn ngì tô-chṳ́ tô-sûn, chhiong hói-sùn ke sâ-lia̍p, tô-to mò-ngìn son tet-chhut.’ ”

13Ngâ-kok chhai ke-vi ko-ya. Kì thi̍t-phe̍t tho̍k yit phu-fun thèu-sâng cho sung-pûn kiâ-kô Yî-so ke lî-vu̍t: 14sân-yòng-mà lióng-pak chak, sân-yòng-kú ngi-sṳ̍p chak; mièn-yòng-mà lióng-pak chak, mièn-yòng-kú ngi-sṳ̍p chak; 15tai-tén se lo̍k-thò, vi-nen ke lo̍k-thò mà sâm-sṳ̍p chak; ngiù-mà si-sṳ̍p chak, ngiù-kú sṳ̍p-chak; lì-mà ngi-sṳ̍p chak, lì-kú sṳ̍p-chak. 16Kì chiông liá-têu thèu-sâng yit-khiùn yit-khiùn fûn-khôi, tak-khiùn phai yit-ke phu̍k-ngìn kón-lî. Kì fûn-fu kì-têu kóng: “Ngì-têu siên-hàng, yit-khiùn lâu yit-khiùn chûng-kiên oi lì kha-yén têu-é.” 17Kì chṳ́-sṳ tai-thèu ke phu̍k-ngìn kóng: “Ngâ-kô Yî-so tù-tó ngì ke sṳ̀, na-he mun ngì: ‘Ngì ke chú-ngìn he má-ngìn? Ngì oi-hi nai-vi? Ngì thèu-chhièn liá-têu thèu-sâng he má-ngìn ke?’ 18Ngì chhiu en-kóng: ‘Liá-têu chhiòn-phu he ngiâ phu̍k-ngìn Ngâ-kok ke; kì oi sung pûn kiâ chú-ngìn Yî-so cho lî-vu̍t. Kì pún-ngìn chhiu chhai ngài-têu heu-poi.’ ” 19Kì ya chṳ́-sṳ thi-ngi khiùn, thi-sâm khiùn, lâu só-yû kiuk thèu-sâng ke ngìn kóng: “Ngì-têu tù-tó Yî-so ke sṳ̀ ya oi lâu kì kóng khiung-yong ke fa; 20ya yit-thin oi kóng: ‘Ngiâ phu̍k-ngìn Ngâ-kok chhiu chhai ngài-têu heu-poi.’ ” Ngâ-kok sîm-tú sióng: “Ngài oi yung liá-têu lî-vu̍t lòi-sêu kì ke hi, kien-mien ke sṳ̀, kì chhiu khó-nèn voi ngièu-sa ngài.” 21Án-ngiòng, kì ham sung lî-vu̍t ke siên-hàng, chhṳ-kâ liù chhai chong-phùng tú ko-ya.

Ngâ-kok lâu Song-ti Nám Yêu-kâu-é

22Ke am-pû Ngâ-kok hong-hí-lòi, tai-tén lióng-ke pû-ngiòng, lióng-ke se-chiá-è, lâu sṳ̍p-yit ke lai-é thu-ko Ngâ-pok-hò. 23Kì-têu ko-hò yî-heu, kì yu chiông só-yû ke yit-chhiet sung ko-hò, 24chhṳ-kâ yit-sà liù chhai heu-poi.

Yû yit-ke ngìn lòi lâu Ngâ-kok nám yêu-kâu-é, yit-chhṳ̍t to lìm-thiên-kông. 25Ke-sà ngìn khon chhṳ-kâ m̀-voi yàng kì, chhiu tá kì ke thai kiok-pí ke kut-lùn, Ngâ-kok ke kiok-pí chhiu lut-vón. 26Ke-ngìn kóng: “Voi thiên-kông lé! Piong ngài chéu â!”

Ngâ-kok kóng: “Ngì na-he m̀ chuk-fuk ngài, ngài chhiu m̀ piong ngì chéu!”

27Ke-ngìn mun: “Ngì ôn-to má-ke miàng?”

Kì en-kóng: “Ngâ-kok.”

28Ke-ngìn yu-kóng: “Chhiùng-kîm yî-heu, ngì m̀-he ôn-to Ngâ-kok. Ngì lâu Song-ti pin lâu ngìn teu-li̍t, chhiòn-phu yàng, án-ngiòng ngì ke miàng oi kói-cho Yî-set-lie̍t#32:28 “Yî-set-lie̍t” yû “kì lâu Song-ti teu-li̍t” ya-he “Song-ti teu-li̍t” ke yi-sṳ..”

29Ngâ-kok mun: “Chhiáng ngì lâu ngài kóng, ngì ôn-to má-ke miàng?”

Ke-ngìn en-kóng: “Ngióng-sṳ́ mun ngài ke miàng nè?” Kóng-so̍t, chhiu lâu Ngâ-kok chuk-fuk.

30Ngâ-kok kóng: “Ngài mien-tui-mien khon-tó Song-ti, chúng-he hàn sâng-sâng!” Án-ngiòng, kì chhiu chiông ke thi-fông ôn-to Pí-nú-yî-le̍t#32:30 “Pí-nú-yî-le̍t” yû “Song-ti ke mien” ke yi-sṳ.. 31Ngâ-kok lì-khôi Pí-nú-yî-le̍t ke sṳ̀, ngit-thèu tú-tú chhut-lòi. Yîn-vi thai kiok-pí ke kut-lùn lut-vón, kì chhiu pâi-kiok. 32Yit-chhṳ̍t to kîm-pû-ngit, Yî-set-lie̍t ke heu-thoi chhiòn-phu m̀ sṳ̍t thai kiok-pí ke kîn, yîn-vi Ngâ-kok thai kiok-pí ke kîn sṳt ngiú-sông.

Currently Selected:

Chhóng-sṳ Ki 32: THV12Rdb

Highlight

Copy