ZEKALIA 8
8
1OHÓ OKLUNỌ awhànpa lẹ tọn sọ wá jẹ dẹ̃, dọmọ, 2Le wẹ OKLUNỌ awhànpa lẹ ton dọ. Yẹn yí awuwhàn daho do yín awuwhànnọ na Ziọni, podọ yẹn sọ yí homẹwlu daho do yín awuwhànnọ na ẹn, 3Le wẹ OKLUNỌ dọ: Yè hẹn mi lẹ́gọ̀ do Ziọni de, bo na sọ nọnọ̀ gblagbla Jelusalẹm tọn mẹ: podọ Jelusalẹm na sọ yín yiylọ dọ Tòdaho nugbo tọn lọ; po osé OKLUNỌ awhànpa lẹ tọn po dọ Osó wiwe lọ. 4Le wẹ OKLUNỌ awhànpa lẹ tọn dọ: Sunnu yọnhónọ lẹ po yọnnu yọ́nhónọ lẹ po na gbé sọ sinai aligbo Jelusalẹm tọn lẹ mẹ, omẹ dopodopo po opò etọn po to alọ etọn me na ogégé azán lẹ tọn. 5Podọ aligbo tòdaho lọ tọn lẹ na sọ tin gọ́ na yọpọsunnu lẹ po yọpọyọnnu lẹ po to aihúnda to aligbo etọn lẹ ji. 6Le wẹ OKLUNỌ awhànpa lẹ tọn dọ: Eyín é yín awujinú to nukun pipòtọ omẹ he lẹ tọn lẹ mẹ to azán nẹlẹ mẹ, bé é do yín awujinú ga to nukun yẹn tọn lẹ mẹ? wẹ OKLUNỌ awhànpa lẹ tọn dọ. 7Le wẹ OKLUNỌ awhànpa lẹ tọn dọ: Dayi e go, Yẹn na whlẹn omẹ ṣie lẹ sọn oto whìzẹtẹn ji tọn mẹ, podọ sọn otò whèyihọ ji tọn mẹ: 8Yẹn na sọ hẹn yé wá, yé na sọ nọnọ̀ gblagbla Jelusalẹm tọn mẹ; Yéwlẹ bo na yín omẹ ṣie, yẹn bo na sọ yín Jiwheyẹwhe yetọn, to nugbo mẹ podọ to dódó mẹ. 9Le wẹ OKLUNỌ awhanpa lẹ tọn dọ: Mì gbọ alọ mìtọn lẹ ni yin huhlọnnọ; mì sè ohó helẹ to azán helẹ mẹ sọn onù yẹwhegán lẹ lọ tọn mẹ, he tin to azán he mẹ yè do dòdonu ohọ̀ OKLUNỌ awhànpa lẹ tọn tọn ai, yèdọ tẹmpli lọ, na é ni do yín didó. 10Na jẹnukọnna azán nẹlẹ opàdido de ma tin na gbẹtọ gba, mọ opàdido depope ma sọ tin na kanlin; mọ jijọho depope ma sọ tin finẹ hlan ewọ he to gbonujẹ yìkavi wá whégbè na mẹglatọ lọ tọn wutu: na yẹn zé gbẹtọ lẹpo omẹ dopodopo do kọmẹnu etọn ji. 11Ṣigba dinvie yẹn ma na tin hlan pipòtọ omẹ he lẹ tọn di to azán nukọntọn le mẹ gba, wẹ OKLUNỌ awhànpa lẹ tọn dọ. 12Na okún jijọho tọn na tin finẹ; ovẹntin na jó osinsẹ́n etọn, podọ aigba lọ na sọ jó jideji etọn, podọ olọn lẹ na jó ahún yetọn; yẹn bo na sọ hẹn pipòtọ omẹ he lẹ tọn nado yí onú he lẹpo do dùgú. 13E na sọ wá jọ dọ, le míwlẹ yín dẹ̀hodo de to akọta lẹ ṣẹnṣẹn, mì owhé Juda tọ́n po owhé Islaeli tọn po emi, mọ wẹ yẹn na whlẹn mì do, mìwlẹ bo na sọ yín odona de: mì dibu blo, ṣigba mì gbọ alọ mìtọn lẹ ni yín huhlọnnọ. 14Na le wẹ OKLUNỌ awhànpa lẹ tọn dọ. Le yẹn lẹn nado wà oylan hlan mì do, whenuena otọ́ mìtọn doadihomẹna mi jẹ homẹgble, wẹ OKLUNỌ awhànpa lẹ tọn dọ, bọ yẹn ma diọlinlẹn gba; 15Mọ wẹ yẹn ko sọ vọ lẹn to azán helẹ mẹ nado wà dagbe hlan Jelusalẹm podọ hlan owhé Juda tọn: mì dibu blo. 16Ehelẹ wẹ onú he mìwlẹ na nọ wà; Mì nọ dọhó nugbo omẹ dopodopo hẹ kọmẹnu etọn; dawhẹ́ nugbo po whẹ̀dida jijọho tọn po to họ̀ngbo mìtọn lẹ mẹ: 17Bo ma sọ dike mẹde mì tọn lẹn oylan to ayiha mìtọn lẹ mẹ do kọmẹnu etọn go blo; bo sọ yiwanna asẹtúndo lalo de blo: na ehe lẹpo wẹ onú he yẹn gbẹwanna, wẹ OKLUNỌ dọ.
18Podọ ohó OKLUNỌ awhànpa lẹ tọn sọ wá jẹ dè, dọmọ, 19Le wẹ OKLUNỌ awhànpa lẹ tọn dọ: dọ Nùbibla osùn ẹnẹtọ tọn, po nùbibla atọ̀ntọ tọn po, po nùbibla ṣinawetọ tọn po, po nùbibla aotọ tọn po, na yín ayajẹ po homẹhùn po hlan owhé Juda tọn, podọ ohùnwhẹ wàlẹnọ lẹ; enẹwutu mì ni yiwanna nugbo po jijọho po. 20Le wẹ OKLUNỌ awhànpa lẹ tọn dọ: E na gbẹ́ sọ wá jọ, dọ gbẹtọ lẹ na wá finẹ, po tòmẹnu tòdaho gbò lẹ tọn lẹ po: 21podọ tòmẹnu tòdaho de tọn lẹ na nọ yì jẹ awetọ de, dọmọ, Mì gbọ mí ni yí doteji nado vẹ̀vẹ̀na nukundágbe OKLUNỌ tọn podọ nado din OKLUNỌ awhànpa lẹ tọn yì: Yẹn na yì ga. 22Mowẹ, gbẹtọ susu po akọta huhlọnnọ lẹ po na wá nado din OKLUNỌ awhànpa lẹ tọn yì Jelusalẹm mẹ, podọ nado vẹvẹ́na nukundágbe OKLUNỌ tọn. 23Le wẹ OKLUNỌ awhànpa lẹ tọn dọ: To azán nẹlẹ mẹ é na wá jọ, dọ omẹ ao na tẹ́do e go, sọn akọgbè akọta lẹ tọn lẹpo mẹ, yèdọ na tẹ́dọ avọ̀tónu ewọ he yín Ju de tọn go, dọmọ, Míwlẹ na yì hẹ mì, na mí ko sè dọ Jiwheyẹwhe tin to mì de.
Currently Selected:
ZEKALIA 8: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
