LUKU 24
24
1ṢIGBA to azán tintan osé lọ tọn, to afọnnu fliflimẹ, yé wá oyòwhé lọ kòn, bo hẹn nuwhẹnwán he yé ko wleawu etọn lọ wá. 2Yé sọ mọ yè ko bli ozannu sọn oyòwhé go. 3Yé sọ biọ e mẹ, yé ma sọ mọ osiọ Oklunọ Jesu tọn. 4E sọ wá jọ, le yé jẹflu talala na onú he wutu, pọ́n, dawe awe site to yé de to awu sisé mẹ: 5le obu to yé di, bọ yé sọ ṣinyọn nukunmẹ yetọn do do aigba, yé dọ hlan yé dọmọ, Etẹwutu wẹ mìwlẹ to mẹhe to ogbẹ din to osiọ lẹ mẹ? 6E ma tin to ofi gba, ṣigba é ko fọ́n; mí ni flin le é dọhó hlan mì do whenuena é tin to Galili, 7dọmọ, Yè ma sọgan nọ ma dè Ovi gbẹtọ tọn jo do alọ gbẹtọ ylandonọ lẹ tọn mẹ gba, yé nasọ whè e do satin go, to azán atọ̀ntọ gbè, é nasọ fọ́n. 8Yé sọ flin ohó etọn lẹ, 9ye sọ le sọn oyòwhé lọ kòn, bo sọ dọ onú he lẹpo hlan omẹ widopo lẹ, podo hlan mẹdevo he pò lẹpo. 10Malia Magdaleni, po Jóana po, po Malia onọ Jakobu tọn po, po yọnnu devo lẹ po po yé po, dọ onú helẹ hlan apọsteli le 11Oho yetọn lẹ sọ sọawúhia di ohó fusa, yé ma sọ yí yé se. 12Ṣigba Pita tite, bo dowezun yì oyòwhé lọ kòn; fifẹ po pinpọ́n e mẹ po, é mọ ala vò lẹ lọ to àigba to ola na yéde, é sọ fọ́nyì, awuji ewlọsu do onú he jọ go.
13Bo pọ́n, omẹ awe to yé me jei gbeta to gbèdoponẹ, he yè nọ ylọ Emausi he yì stade kandeko sọn Jelusalẹm. 14Yé sọ to didọ hẹ yénọzo gbọn onú he jọ helẹ tọn dali. 15E sọ wá jọ, le yé to hódọ hẹ yénọzo, bo sọ to onú lẹnpọn, wẹ Jesu lọsu dòn sẹpọ́, bo sọ to yìyì po yé po. 16Ṣigba yè hẹn nukun yetọn lẹ go, dọ yé ma na do yón ẹn. 17E sọ dọ hlan ye, dọmọ, Ohó té hunkọ wẹ mìwlẹ to didọ hẹ mìnọzo, le mì to zọnlinzin. Yé sọ nọte abọẹ, bo to nupọn sù? 18Dopo to ye mẹ, mẹhe oyín etọn yín Kleopasi, gblọn dọ hlan ẹn, dọmọ, Hiẹ wáwási to Jelusalẹm mẹ kẹdẹwẹ, bo ma yón onú he jọ to finẹ to azán helẹ mẹ? 19E sọ dọ hlan yé, dọmọ, Onú tewẹ? Yé sọ dọ hlan ẹn, dọmọ, Gbọn Jesu Nazalẹti tọn dali, he yín yẹwhegán huhlọnnọ de to azón mẹ, podọ to ohó mẹ, to Jiwheyẹwhe nukọn, podọ to gbẹtọ lẹpo nukọn: 20le ogán yẹwhenọ lẹ tọn, po nukọntọ mìtọn lẹ po ko yí i bo gblewhè okú tọn do e do, bo sọ whè e do satin go. 21Ṣigba mìwlẹ dotódido dọ ewọ wẹ mẹhe na fli Islaeli: mọwẹ dogó ehe lẹpo, egbé wẹ azán atọ̀ntọ sọn whenuena onú helẹ ko jọ. 22Nugbo, yọnnu delẹ ga sọn ogbé mìtọn lẹ mẹ, he yì oyòwhé lọ kòn to afọnnu fliflimẹ hẹn mí savọ̀; 23whenuena yé ma mọ osiọ etọn, yé wá, dọmọ, yé mọ númimọ angẹli lẹ tọn ga, he dọ hlan ye, dọ é tin to ogbè. 24Yé mẹhe tin to mí de delẹ so yì oyòwhé lọ kòn, bo sọ mọ ẹn kẹdẹdile yọnnu lẹ dọ do: ṣigba ewlọsu wẹ yé ma mọ. 25E sọ dọ hlan yé dọmọ, Gbẹtọ gugutọ lẹ, podọ awuwhletọ ayiha tọn nado yíse to núhe yẹwhegán lẹ ko do mẹ 26Be é ma jẹ dọ Klisti ni jiya onú helẹ tọn, podọ nado biọ gigo etọn mẹ? 27E sọ hen ẹn sọn Moṣe, po yẹwhegán lẹpo po ji, é sọ detana onú he yè dọ gbọn ewlọsu tọn dali lẹ hlan yé to Owé wiwe lẹpo mẹ. 28Yé sọ dọn sẹpọ́ gbeta fie je jei: é sọ basi di é jlo na yì nukọn. 29Yé sọ dava ẹ dọmọ, Nò mí de; na tenu to dido, azán sọ vò. E sọ biọ whégbè nado nò hẹ yé. 30E sọ wá jọ, whenuena é jagla to núdùdù kòn po yé po, é yí akla, bo dona ẹn, bo sọ kán ẹn, bo yí na yé. 31Nukun yeton sọ hùn, yé sọ yon en; é sọ bú sọn nukun yeton me. 32Yé sọ to didọ hlan yenọzo, dọmọ, Be ayiha mìtọn ma hunzo to oho mìtọn mẹ, whenuena é to hódọ hẹ mí to aliho, podọ whenuena é hùn Owé wiwe hlan mí? 33Yé sọ fọ́n to ojlẹ doponẹmẹ, bo sọ lẹ́gọ̀ do Jelusalẹm, bo sọ mọ omẹ widopo lẹ plidopọ, po mehe tin to yé de lẹ po, 34dọmo, Oklunọ fọ́n nugbo, bo sọawúhìa Simọni 35Yé sọ dọ onú he jọ to aliho na yé, podọ le ewọ zùn yinyọnẹn to yé de do to kinkán akla lọ tọn mẹ.
36Le yé sọ to onú hele dọ, Jesu lọsu site to ye ṣẹnṣẹn, boso dọ hlan yé, dọmọ, jijọho hlan mì. 37Ṣigba yé dibu, bo sọ to sisọsisọ, bo lẹn dọ yé mọ obló. 38E sọ dọ hlan yé, domọ, Etẹwutu awú ma jai na mì? Etẹwutu linlẹn fon to ayiha mìtọn mẹ? 39Mi pọ́n alọ ṣie, po afọ ṣie po, dọ yẹn lọsu wẹ; mì do alo ogo e, na mì ni mọ; na obló ma tindo olàn po ohu po, dile mìwlẹ mọ yẹn tindo do gba. 40Whenuena é dọ le, é yí alọ etọn po afọ etọn po hia. 41Le yé ma yise na ayajijẹ, bọ avọ̀ to yé sa, é dọ hlan yé, dọmọ, Mì tindo núdùdù depope to ofi 42Yé sọ yí whevi hihi kinkán, pò owinja pẹvide po nẹ. 43E sọ yí Ì, bo dù i to nukun yetọn me.
44E sọ dọ hlan yé, dọmọ, Ehele we ohó he yẹn ko nọ dọ hlan mì, whenuena yẹn tin mì de, na onú lẹpo ma sọgan nọ ma di gba, heyè kò wlan to osẹ́n Moṣe tọn mẹ podọ to yẹwhegán lẹ mẹ podọ to Psalm lẹ mẹ na yon tọn wutu. 45Whenẹnu wẹ é hùn ayi yeton, na yé nido tunwun Owé wiwe. 46E sọ dọ hlan ye dọmọ, Le wẹ yè wlanwe eton, mọwẹ é sọ jẹ do dọ Klisti ni jiya, bo so fon sọn okú to azán atọ̀ntọ gbè. 47Podọ na yẹwheho ovọjọ po odèsè ylando le tọn po ni yín didọ to oyìn etọn me hlan akọta lẹpo, hinhẹn sọn Jelusalẹm. 48Mìwlẹ wẹ kunnudetọ onu helẹ tọn. 49Bo do ayi e go, yẹn do pagbe Otọ́ ṣie tọn hlan mì ji: ṣigba mì ni dòngbàn to tòdaho lọ me, kaka yè na do yí huhlọn sọn aga do ṣinyọn mì.
50E sọ plan yé jẹgbonu kaka yé do je Bẹtani titegbe, é sọ zé alọ etọn lẹ daga, bo dona yé. 51E sọ wá jọ le é to didona yé, yè klán en sọn ye de, bo sọ zé e yì olọn aga. 52Yé sọ litai nẹ̃, bo lẹ́gọ̀ do Jelusalẹm po ayajijẹ daho po. 53Bo sọ tin to whepoponu to tẹmpli me, to didona Jiwheyẹwhe. Niṣẹ.
Currently Selected:
LUKU 24: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.