JOB 40
40
1HUMỌ OKLUNỌ sọ gblọnna Job bo dọmọ,
2Bé ewọ he nọ dònnú na ka hòavùn hẹ Ganhunupo wẹ?
Ewọ he to hódọ̀n hẹ Jiwheyẹwhe, gbọ ewọ ni gblọn ẹn.
3Whenẹnu wẹ Job gblọnna OKLUNỌ, bo dọmọ,
4Dayi e go, yẹn ma yín nútalala de gba: etẹ́ wẹ yẹn na gblọnna we? Yẹn yí alọ ṣie do onù ṣie ji.
5Whladopo wẹ yẹn ko dọhó, yẹn ma to na sọ gblọn gba;
Mowẹ, whlawe, ṣigba yẹn ma na sọ yìnukọn deji ba gba.
6Whenẹnu wẹ OKLUNỌ gblọnna Job sọn ojẹbọnahizi mẹ, bo dọmọ,
7Yí homẹbla do bla adaja towe lẹ dinvie taidi sunnu de:
Yẹn na biọ sọn de we, hiẹ ni bo sọ dọtón hlan mi.
8Yèdọ bé hiẹ na hẹn whẹ̀dida ṣie vó wẹ?
Bé hiẹ na gblewhódo mi, na hiẹ nido yín whẹ̀sunanọ wẹ?
9Kavi hiẹ tindo awà taidi Jiwheyẹwhe wẹ?
Podọ bé hiẹ sọgan yí ogbè de do yẹnwán taidi ewọ wẹ?
10Yí gigodaho dinvie po kiklodaho po do và dewe;
Bo sọ yí ogbégbo po yẹyidaho po do doasọna dewe.
11Kọ̀n ogófla adi towe tọn lẹ jẹgbonu:
Bo sọ pọ́n omẹ dopodopo he yín Saklanọ, bo hòwhiwhẹ ẹ.
12Pọ́n omẹ dopodopo he yín saklanọ bo hẹn ẹn wá odò;
Bo tunafọ mẹylankan lọ ji to fie e ṣite te.
13Whla yé do kọ́gudu mẹ dopọ;
Bla nukunmẹ yetọn lọ to otẹn whiwhla mẹ.
14Whenẹnu wẹ yẹn ga na yigbè hiẹ tọn,
Dọ alọ adusi towe sọgan whlẹn we.
15Dayi dẹ́gbo go dinvie, he yẹn basi dogọ́ we;
Ewọ to ogbé dù di oyín de.
16Pọ́n dinvie, huhlọn etọn tin to adaja etọn lẹ mẹ,
Podọ hlọnhlọn etọn sọ tin to hlọnhlọnkàn ohòto etọn tọn lẹ mẹ.
17E nọ whàn osi etọn taidi kedali de;
Okan asapada etọn lẹ tọn yín titò dopọ.
18Ohú etọn lẹ tin di ovángo gànvẹ tọn lẹ;
Adajahú etọn lẹ tin di opatin ogànyũ tọn lẹ.
19Ewọ wẹ otado aliho Jiwheyẹwhe tọn lẹ tọn:
Ewọ he basi i ko yí ohi etọn do nanú in.
20Nugbonugbo osé lẹ to núdùdù hẹn jẹgbonu wá né;
Fie ogbékanlin danji tọn lẹpo nọ daihun te.
21Ewọ nọ mlọn atin lotusi lẹ glọ,
To avàli ofán tọn, po abàbá po.
22Atin lotusi lẹ yí oyẹ̀ yetọn do ṣinyọn ẹn;
Atin wilo tọ̀pẹsẹ tọn lẹ lẹ́do e pé.
23Dayi e go, eyín otò lẹ yín huhlọnnọ, ewọ ma nọ sisọ:
Tudotọ wẹ ewọ, le Jọdani tlẹ to sisa yèdọ jẹ ọnù etọn.
24Bé mẹdepope sọgan wle e whenuena ewọ tin to alihihó mẹ,
Kavi yí owhándido de do sọnú awọntin etọn lùntọ́n?
Currently Selected:
JOB 40: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.