JOB 1
1
1DAWE de tin to aigba Uzi tọn mẹ, oyín mẹhetọn yín Job; podọ dawe nẹ yín pipé jlọjlọ, podọ omẹ he dibusi Jiwheyẹwhe, bo sọ hònsí oylan. 2Yè sọ ji visunnu ṣinawe po viyọnnu atọ̀n po hlan ẹn. 3Kanlinyìnyìn etọn lẹ ga yín lẹngbọ fọtọ́n ṣinawe, kanklosọpóawenọ lẹ fọtọ́n atọ̀n, oyín glepònú tọn lẹ fowekanweko, kẹtẹkẹtẹasi lẹ fowekanweko, pọ whédo daho talala de po; sọmọ bọ dawe he yín mẹkiklo pete to ovi whèzẹtẹn tọn lẹpo mẹ. 4Visunnu etọn lẹ sọ nọ yì bo nọ basi hùnwhè de to owhé omẹ dopodopo tọn gbè to azán etọn ji; yé sọ nọ domẹhlan bo nọ ylọ nẹ viyọnnu yetọn atọ̀n lẹ nado dù podọ nado nù hẹ yé. 5E sọ yín mọ, whenuena yè hẹn azán hùnwhẹ̀wiwà yetọn tọn yì pétó, wẹ Job nọ domẹhlan bo lẹ̀ yé wé, bo sọ nọ fọ́n afọnnufũ bo na avọ́ nunina mimẹ̀ lẹ kẹdẹdi osọha yé mẹpó tọn: na Job nọ dọmọ, E sọgan yín dọ visunnu ṣie lẹ ko wàylando, bo sọ zánnù do Jiwheyẹwhe go to ayiha yetọn mẹ. Lewẹ Job nọ wà do whẹ̀whẹ̀.
6Azán de tin lò whenuena ovi Jiwheyẹwhe tọn lẹ nọ wá nado sọ yéde hia to OKLUNỌ nukọn, mẹglatọ lọ sọ wá ga to yé ṣẹnṣẹn. 7OKLUNỌ sọ dọ hlan Satani dọmọ, Fle wẹ hie sọn wá? Whenẹnu wẹ Satani gblọnna OKLUNỌ, bo dọmọ, Sọn yìyì nukọn po godo po to aigba ji, podọ sọn zọnlinzinzin to jihé bo tejẹ to e mẹ mẹ. 8OKLUNỌ sọ dọ hlan Satani dọmọ, Hiẹ ko glo Job devi ṣie pọ́n? dọ mẹde ma tin di i to aigba ji, omẹ pipé de podọ jlọjlọ de, ode he dibusi Jiwheyẹwhe, bo sọ hònsí oylan. 9Whenẹnu wẹ Satani dọ hlan OKLUNỌ, bo dọmọ, Bé Job dibusi Jiwheyẹwhe na ovò wẹ? 10Hiẹ ma ko basi osópa de lédo e, podọ lẹ́do owhé etọn, podọ lẹ́do ehe é tindo lẹpo, to adà lẹpo ji? hiẹ ko dona azọ́n alọ etọn lẹ tọn, podọ yè hẹn nubẹ́pli etọn sudeji to aigba lọ ji. 11Ṣigba dè alọ towe jẹgbonu lò, bo doalọ popo he é tindo go, é bo na sọ gbẹ́ we dai to nukun towe mẹ. 12OKLUNỌ sọ dọ hlan Satani dọmọ, Dayi e go, popo he é tindo tin to alọ towe mẹ; ewlọsu kẹdẹ go wẹ hiẹ dè alọ towe jẹgbonu do blo Mowẹ Satani tọn yì sọn nukọn OKLUNỌ tọn.
13E sọ jẹ azán de ji whenuena visunnu etọn lẹ po viyọnnu etọn lẹ po to núdù bo sọ to ovẹ̃n nù to owhé nọvisunnu yetọn pete tọn gbè, 14wẹ mẹdagun de wá Job de, bo dọmọ, Oyín lẹ to whẹ̀npò, kẹtẹkẹtẹ lẹ sọ to amadù to adà ye tọn mẹ: 15Sabeanu lẹ sọ jẹ, yé ji, bo bé yé yì; mọwẹ, yé ko yí onù ohi tọn do hù dópẹ lẹ; podọ yẹn dopo akàn wẹ yè hẹn họ̀ngán nado dọ na we. 16Whenuena ewọ gbẹ́ sọ to hódọ, dẽvo sọ wá ga, bo dọmọ, Yè hẹn miyọn Jiwheyẹwhe tọn flẹ sọn olọn, bo ko sọ fiọ lẹngbọ lẹ pó, po dẹ̀pẹ lẹ lọ po, bo sú yé do; podọ yẹn dopo akàn wẹ yè hẹn họ̀ngán nado dọ na we. 17Whenuena ewọ gbẹ́ sọ to hódọ, dèvo sọ wá ga, bo dọmọ, Kaldeanu lẹ basi ogbẹ́ atọ̀n, bo jẹ kanklosọpóawenọ lẹ ji, bo ko sọ bẹ́ yé yì, mọwẹ, bo sọ yí onù ohi tọn do hu dẹ́pẹ lẹ; podọ yẹn dopo akàn wẹ yè hẹn hòngán nado dọ na we. 18Whenuena ewọ gbẹ́ sọ to hódọ, dẽvo sọ wá ga, bo dọmọ, Visunnu towe lẹ po viyọnnu towe lẹ po to núdù bo sọ to ovẹ̃n nù to owhè nọvisunnu yetọn pete tọn gbè: 19bo, dayi e go, jẹhọn daho de wá sọn zùngbomẹ, bo hò olọnglọnẹn ẹnẹ ohọ̀ lọ tọn lẹ, é sọ họ́ jẹ dẹ́pẹ lẹ lọ ji, yé sọ yín oṣiọ; podọ yẹn dopo akàn wẹ yè hẹn họ̀ngán nado dọ na we. 20Whenẹnu wẹ Job tite, bo tlẹn awugbó etọn, bo lùn odà etọn, bo họ́ flẹ jẹ aigba ji, bo sẹ̀n; 21é sọ dọmọ, Omẹ́ yẹ́n zọn tón wá sọn ohò onọ ṣie tọn mẹ, omẹ́ yẹn na sọ lẹ́gọ̀ dofìnẹ, OKLUNỌ wẹ na, OKLUNỌ wẹ sọ bẹ́ yì: donanọ wẹ oyín OKLUNỌ tọn. 22To ehe lẹpo mẹ Job ma wàylando, kavi yí onúlu do dowhẹ̀ Jiwheyẹwhe gba.
Currently Selected:
JOB 1: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.