HABBAKUK 1
1
1OZỌ́NJI he Habbakuk yẹwhegán lọ mọ.
2OKLUNỌ È, nawẹ yẹn na dawhá dẹn sọ, bọ hiẹ ma na sè? Yẹn dawhá tón hlan we sọn huhlọnnú mẹ, bọ hiẹ ma na whlẹngan gba. 3Etẹwutu wẹ hiẹ do oylanwà hia mi, bo sọ hẹn mi nado pọ́n otasinyẹn? na ohẹngble po huhlọnnú po tin to nukọn ṣie: podọ nukọnwhlẹndomẹ tin finẹ, podọ nuwhlẹndomẹ sọ fọ́n daga. 4Enẹwutu wẹ yè hẹn osẹ́n túnbọ̀, podọ whẹ̀dida ma sọ jẹgbonu yì jẹ awhàngba mẹ gba: na mẹ, lankan lẹ léhla dódónọ lẹ; enẹwutu wẹ whẹ̀dida jẹgbonu yì gbigble. 5Mì pon akọta lẹ mẹ, bo hòpọ́n, awu ni bo ji mi badabada: na mẹde wà azón de to azán mìtọn lẹ mẹ he mìwlẹ ma na yise le yè tlẹ dọ na mì sọ. 6Na, pọ́n, yẹn fọ́n Kaldeanu lẹ daga, akọta vivẹ́ awuyatọ nẹ: he gó gbọn ogblo aigba lọ tọn luntón, nado yí otẹn ninọ̀ lẹ he ma yín yetọn na nutindo. 7Ewọ yín kanylantọ bo sọ dobu: whẹ̀dida yetọn po yẹyidaho yetọn po tónsọn yelọsu mẹ. 8Osọ yetọn lẹ ga yín awuyatọ hú opọ̀ lẹ, bo sọ yín núsisi hú ohia whèjai tọn lẹ; podọ osọ́nọ yetọn lẹ hẹn yéde po sakla po: mọwẹ, osónọ yetọn lẹ sọn aganu wá; yé to zinzlọn di akùn he to unklẹn nado vasúdo de. 9Yé wá popo yé tọn na huhlọnnú; kinklẹn nukunmẹ yetọn lẹ tọn tin pannukọn whèzẹtẹn dali; yé sọ ṣinyan mẹglọnọ lẹ pli di otọ̀kẹn. 10Podọ yé nọ ṣàn ahọlu lẹ kò, podọ ahọvi lẹ sọ yín avlẹdanú hlan ẹn: é nọ vlẹ figángán lẹpo; na ewọ dọ̀n kọgudu pli, bo sọ bẹ́ ẹ. 11Whenẹnu wẹ ojẹhọn na yìn wáyi ewọ bo na sọ ju wáyi, bo sọ jẹsẹ́nmẹ, bo yín whẹ́ylantọ: yèdọ ewọ hlọnhlọn mẹhetọn yẹwhe etọn yín. 12OKLUNỌ Jiwheyẹwhe ṣie È, Mẹwiwe ṣie Dopo, bé hiẹ ma tin sọnmadopodo? mí ma na kú gba. OKLUNỌ E, hiẹ ko do ewọ ai na whẹ̀dida; podọ hiẹ, Osé È, ko hẹn ewọ lódo na mẹplọnlọ. 13Hiẹ he yín nukun wiwe tọn húgan nado pọ́n oylan, podọ he ma sọgan pọ́n otasinyẹn, etẹwutu wẹ hiẹ to yé he yí danuwiwà do to zinzán lẹ pọ́n, bọ sọ nọabọẹ whenuena mẹylankan lọ to omẹ lọ he yín dódónọ hú i zé mì; 14Bo sọ basi gbẹtọ di owhèvi ohù tọn lẹ, di onú he nọ lin lẹ, he ma tindo gándùtọ de to yé ta? 15Ewọ yí omlẹn do bẹ́ popo yé tọn, é sọ wle yé to odò etọn mẹ, bo sọ bẹ́ yé pli to dòndai etọn mẹ; enẹwutu wẹ ewọ to ayajẹ bo sọ yín homẹhùnnọ. 16Enẹwutu wẹ ewọ do to avọ́sán hlan odọ etọn, bo sọ to nuyọnwan mè hlan dòndai etọn; na gbọn yé dali wẹ mimá etọn yín jonọ wutu, podọ núdùdù etọn susunọ. 17Enẹwutu bé ewọ na hẹn odọ̀ etọn jẹvọ́, bo ma na gbó nado nọ hù akọta lẹ to whepoponu?
Currently Selected:
HABBAKUK 1: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
