Gẹnẹsisi 50

1JOSEFU sọ sìnyọnai to nukunmẹ otọ́ etọn tọn ji, bo viavi to e ji, bo sọ donùnùgo nẹ̃. 2Josefu sọ degbèna devi etọn bokọtọnọ lẹ nado sabódo otọ́ etọn; bokọtọnọ lẹ sọ sabódo Islaeli. 3Azán kande sọ pó nẹ: na mọwẹ yè nọ hẹn azán bósadomẹ tọn lẹ pé do: Egiptinu lẹ sọ viavi nẹ̃ hó azán kandegbàn. 4Whenuena azán avivivi nẹ tọn juwáyì, Josefu dọhó hlan whégbètọ Falo tọn lẹ, dọ, Eyín yẹn ko mọ nukundagbe to nukun mítọn lẹ mẹ lò, mì bo dọho, yẹn vé mì, do otọ́ Falo tọn lẹ mẹ, dọmọ, 5Otọ́ ṣie hẹn mi whlé, dọmọ, Pọ́n, yẹn kú: to yòdo ṣie mẹ he yẹn kùn na mi to aigba Kenani tọn ji, finẹ wẹ hiẹ na disiọ ṣie do. Enẹwutu dinvie gbọ yẹn ni hẹ́ji yì, yẹn vó we, bo disiọ otọ́ ṣie tọn, yẹn na sọ légó wá.

6Falo sọ dọmọ, Héji yì, bo diṣiọ otọ́ towe tọn, kẹdẹdile é hẹn we whlé do.

7Josefu sọ hẹ́ji yì nado diṣiọ otọ́ etọn tọn: devi Falo tọn lẹpo sọ hẹ́ji yì hẹ ẹ, mẹho owhé etọn gbè tọn lẹ, po mẹho aigba Egipti tọn tọn lẹpo po, 8po owhé Josefu tọn lẹpo po, po mẹmẹsunnu etọn lẹ po, po owhé otọ́ etọn tọn po: omẹ flinflin yetọn lẹ, po kanlinpa, yetọn lẹ po, po oyìnpó yetọn lẹ po sokẹdẹ wẹ yé pòdoai to aigba Gosẹni tọn ji. 9Kẹkẹ po osónọ lẹ po sọ hóji yì hẹ ẹ: ogbé daho talala de wẹ é sọ yín. 10Yé sọ wá kúndenú-gbà Atadi tọn kón, be tin to Jọdani godo, finẹ wẹ yé yi avi daho sinsinyẹn talala de do blawú te: é sọ basi hóninọ de na otọ́ etọn hò azán ṣinawe. 11Whenuena tòmẹnu aigba lọ tọn lẹ, Kenaninu lẹ mọ họ̀ninọ lọ to agbà Atadi tọn ji, vé dọmọ, Họ̀ninọ hòmẹgblenọ de wẹ ehe hlan Egiptinu lẹ: enẹwutu wẹ yè do nọ ylọ ẹ dọ Abel-mizlaimi, he tìn to Jọdani godo. 12Visunnu etọn lẹ sọ wà hlan ẹn kẹdẹdile é degbèna yé do: 13na visunnu etọn lẹ zé e sọ yì aigba Kenani tọn ji, bo disiọ etọn to aigbaslo danji Makpela tọn tọn mẹ, he Ablaham hò dogó danji lọ, na nútindo siọditẹn tọn de, sọn Ẹfloni Hittinu si, to Mamle nukọn.

14Josefu sọ lẹ́gọ́ wá Egipti, ewọ, po mẹmẹsunnu etọn lẹ po, po yé omẹ he hẹ́ji yì hẹ ẹ nado disiọ otọ́ etọn tọn lẹpo po, to ehegodo é ko disiọ otọ́ etọn tọn.

15Whenuena mẹmẹsunnu Josefu tọn lẹ mọ dọ otọ́ yetọn ko kú, yé dọmọ, E sọgan yín dọ Josefu na gbẹwánna mí, bo na yíahọsu gigọ́ oylan he mi wà do e tọn to mí go. 16Yé sọ do mẹdagun de hlan Josefu, dọmọ, Oto towe ko degbè whẹpo é do kú, dọmọ, 17Mọwẹ mì na dọ hlan Josefu, dọ, Jona lo, yẹn vè we, oylanwà mẹmẹsunnu towe lẹ tọn, po ylando yetọn po, na ehe yé do wà oylan hlan we; bé dinvie, mí vẹ́ wẹ, jona oylanwà devi Jiwheyẹwhe otọ́ towe tọn lẹ tọn tọn. Josefu sọ viavi whenuena yé dọhó hlan ẹn. 18Mẹmẹsunnu etọn lẹ ga sọ yì bo dlẹn to nukọn etọn; yé sọ dọmọ, Dayi e go, devi towe wẹ mí yín.

19Josefu sọ dọ hlan yé, dọ, Mì hanu blo: bé yen tin to otẹn Jiwheyẹwhe tọn mẹ wẹ? 20Na mì tọn, oylan wẹ míwlẹ lẹn do ogo e; ṣigba Jiwheyẹwhe hia ẹ na dagbe, nado hẹn wá jọ, dile é te to egbé he, nado whlẹn omẹ susu dogbé. 21Enẹ wutu dinvie mì hànu blo: yẹn na yìn mì, po omẹ flinflin mìton le po. E sọ miọnhòmẹna yé, bo dọhó dagbe hlan yé.

22Josefu sọ sín Egipti, ewọ, po owhe otọ́ etọn ton po; Josefu sọ nọgbè hò owhè kanwegban. 23Josefu sọ mọ whendo atontọ ovi Ẹflaimi tọn lẹ tọn: ovi Makil tọn lẹ ga visunnu Manasse tọn kligonu Josefu tọn lẹ ji yè ji yé do.

24Josefu sọ dọ hlan mẹmẹsunnu etọn lẹ, dọ, Yẹn kú: ṣigba Jiwheyẹwhe na dla mì pọ́n dándán, bo na hẹn mì hẹ́ji sọn aigba he ji hlan aigba he é whlé hlan Ablaham, hlan Isaki, podọ hlan Jakobu. 25Josofu sọ yi whiwhle de sọn ovi Islaeli lon lẹ si, dọmọ, Jiwheyẹwhe na dla mì pọn dándán, bọ mìwlẹ na sọ hẹn ohú ṣie le hẹ́ji yì sọnfi 26Mowẹ Josefu kú do, é yín owhè kanwegbàn mẹho: yé sabódo e, yè sọ yí i do ẹiọpotin de mẹ to Egipti.

Currently Selected:

Gẹnẹsisi 50: BWL23

Highlight

Copy