Gẹnẹsisi 19

1ANGẸLI awe sọ wá Sọdọmi to whèjai; Loti sọ sinai to hòngbo Sọdọmi tọn ji; Loti mọ yé, bo fọ́n nado pó yé; é sọ dẹ́ ede po nukunmẹ etọn po hlan aigba. 2E sọ dọmọ, Dayi é go dinvie, mì mẹdaho emi, yẹn vẹ mì, mì gò biọ owhé devi mítọn tọn gbè, ná mì ni gbọsi ofi to ozán he mẹ, bo klọ àfọ mítọn, mì nasọ fọ́n to afọnnufù bo gbọn aliho mítọn yì. Yé sọ dọmọ, Lala; ṣigba to alihogboji lẹ wẹ míwlẹ na sin to ozán he mẹ. 3Ewọ sọ davà yé talala; yé sọ gò biọ họmẹ yì e de, bó biọ owhé etọn gbè; é sọ basi núdùdù na yé, bo sọ̀ akla madotọn, yé sọ dù.?

4Sigbà whẹpo yé mlọnai, omẹ otò lọ mẹ tọn lẹ, yèdọ sunnu Sọdọmi tọn lẹ, lédo owhé lọ pé, mẹho po yọ̀pọ po, gbẹtọ lẹpo sọn kọmẹkọmẹ: 5yé sọ ylọ Loti, bo kanbiọ ẹ dọmọ, Fie wẹ sunnu he wá de we to tenu he lẹ te? hẹn yé jẹgbonu wá mí de, na mí nido yọn yé.

6Loti sọ tọ́n jẹ hòngboji yi yé de bo súhọ̀n do ede do gbonu. 7E sọ: dọmọ, Mẹmẹsunnu emi, yẹn vẹ mì, mì wàdanu blo. 8Dayi e go lò, yẹn tindo viyọnnu awe he ma ko yọ́n sunnu; mì gbọ, yẹn vẹ mì, na yẹn ni hẹn yé jẹgbonu wá mì dè; mì bo wà hlan yé dile é yon do to mì nukunmẹ: ṣigbà sunnu helẹ yen vẹ mì wà núde do blo; na yé do wá yẹtẹn ohòta ṣie tọn glọ wutu.

9Yé dọmọ, Jagọ̀. Yé sọ dọmọ, Dawe hen dopo Wá otò mẹ nado wáwási, bọ é na yín whẹdatọ de: lohè wẹ mí na zán gbigble hẹ we húgan, hú hẹ yéwlẹ. Yé sọ yẹ́njẹ dawe lọ ji, yèdọ Loti, bo sẹwa nado gbà ohòn lọ. 10Ṣigba sunnu ewlẹ dlẹn alọ yetọn, bo dòn Loti do whégbè do yé de, bo súhọ̀n. 11Ye sọ yi nukuntintón ajiji do ho sunnu he tin to họ̀ngboji lẹ, pẹvi po daho po: sọmọ bọ yé hẹn awuku yéde nado din ohun mọ.

12Sunnu ewlẹ sọ dọ hlan Loti, dọmọ, Be hiẹ tindo mẹde to ofi dogó ehelẹ? Yónwhẹn towe sunnu, po visunnu towe lẹ po, po viyọnnu towe lẹ po, po núdepope he hiẹ tindo to todaho lọ mẹ po; bẹ́ yé tọ́n sọn ofi lọ: 13na míwlẹ na và ofi he súdo, na awhá gbọn dali yetọn gbahú to OKLUNỌ nukọn wutu: OKLUNỌ sọ do mi han nado hù i súdo.

14Loti sọ tọ́njẹgbonu, bo dọ hlan yónwhẹn etọn sunnu lẹ, he na wlealọhẹ viyọnnu etọn lẹ, dọmọ, Mì fọ́n, bo tọn sọn oto he mẹ; na OKLUNỌ na và otò lọ súdo. Ṣigba é di mẹṣànkotọ to yónwhẹn sunnu etọn lẹ nukunmẹ:

15Whenuena afọnnu wá, whenẹnu wẹ angẹli lẹ domìzọnmìzọn na Loti, bo dọmọ, Fọ́n, yi asi towe, po viyọnnu towe awe lẹ po, he tin to ofi, yè nikã sú we do to ylankan oto lọ tọn mẹ. 16Ṣigba é whleawu: sunnu ewlẹ sọ dlẹn alọ bo hẹn alọ etọn, po alọ asi etọn tọn po, po alọ viyọnnu etọn awe lẹ tọn po, gbọn lẹblanu OKLUNỌ tọn hlan ẹn dali: yé hẹn ẹn jẹgbonu, bo dó e jẹ otò lọ godo.

17E sọ wá jọ, whenuena yé ko dè yé tón jẹ dokọgodo vọ́, wẹ é dọmọ, Hónyìgán na ogbẹ̀ towe, a lẹ́kọ pọ́n godo towe blo; mọ a sọ nọte to Danfafa nẹlẹ depope ji blo; hónyì osé ji, yè nikã sú we do.

18Loti sọ dọ hlan yé, dọmọ, Ṣó, mọ ma gba, mẹdaho ṣie: 19dayi e go lò, devisunnu towé ko mọ nukundagbe nukun towe mẹ, hiẹ ko zé dagbewanyi towe yìaga, he hiẹ dohia hlan mi to whinwhlẹn ogbẹ̀ ṣie mẹ; yẹn ma sọgan họ̀nyì osé ji gba, oylan lọ nikã pla mi to finẹ, yẹn bo nasọ kú; 20dayi e go lò, otò he sepó nado hónyì finẹ mẹ; pẹvi sọ wẹ, Ṣó, gbọ ma hónyì finẹ; (bé é ma yín pẹvi wẹ?) ayiha ṣie bo nasọ nọ̀ ogbẹ́.

21E sọ dọ hlan ẹn dọmọ, Pọ́n, yẹn ko kẹalọyi we gbọn onú he tọn dali ga, dọ yẹn ma na gbà otò lọ he hiẹ dọhó etọn súdo. 22Yawu họ̀nyì finẹ, na yẹn ma sọgan wà núde kaka hiẹ nado jẹ finẹ. Enẹwutu wẹ yè do nọ ylọ oyín otò lọ tọn dọ Zoali.

23Owhè ko vẹ́ do aigba ji whenuena Loti biọ otò Zoa tọn mẹ. 24Whenẹnu wẹ OKLUNỌ jajikun whemí tọn po miyọn tọn po sọn olọn sọn OKLUNỌ de do Sọdọmi po Gọmọla po ji, 25Ewọ sọ gbà otò nẹlẹ súdo, po Danfafa lẹpo po, po tòmẹnu otò lọ tọn lẹpo po, po enẹ he wú to aigba lọ ji po.

26Ṣigba asi etọn lẹ́kò pọ́n godo to godo etọn, é sọ lẹzùn kọ́dòtin ojẹ́ tọn de.

27Ablaham sọ fọ́n to afọnnufù bo yì fie é nọte te to OKLUNỌ nukọn. 28E sọpóndò hlan Sọdọmi po Gomọla po dali, podọ hlan aigba Danfafa tọn lẹpo dali, bo sọ pọ́n ẹn, dayi e go, azọ̀ otò lọ tọn ti yì aga di azọ̀ ozòhọ̀ de tọn.

29E sọ wá jọ, whenuena Jiwheyẹwhe hù otò Danfafa tọn lẹ súdo, we Jiwheyẹwhe flin Ablaham, bo sọ dè Loti jẹgbonu sọn otò gbigbà lọ ṣẹnṣẹn, whenuena é gbà otò lẹ súdo ehe mẹ Loti nọnọ̀;

30Loti sọ hẹji yì sọn Zoali; bo nọnọ̀ osé ji; podọ viyọnnu etọn awe lẹ po e po, na é dibu nado nọ̀ Zoali: é sọ nọnọ̀ aigbaslo de mẹ, ewọ po viyọnnu etọn awe lẹ po.

31Oplọnji sọ dọ hlan yọ̀pọ dọmọ, Otọ́ mítọn ko pòyọnho, sunnu de ma sọ tin to aigba mẹ ba he na biọ họmẹ wá mí de, kedẹdi zinzán aigba lẹpo tọn. 32Wá, gbọ mí ni hẹn otọ́ mítọn nù ovẹ̃n, míwlẹ nasọ mlọnai hẹ ẹ, na mí nido plá okún otọ́ mítọn tọn. 33Yé sọ hẹn otọ́ yetọn nù ovẹ̃n to ozán nẹ mẹ: oplọnji biọ họmẹ bo mlọnai hẹ otọ́ etọn; ewọ ma sọ yón whenuena é mlọnai, kavi whenuena é fọ́n. 34E sọ wá jọ to aihọngbe bọ oplọnji dọ hlan yọ̀pọ, dọmọ, Dayi e go, yẹn mlọnai hẹ otọ́ ṣie to zánmẹsọ: gbọ mí ni sọ hẹn ẹn nù ovẹ̃n to ozán he mẹ ga; na hiẹ ni biọ họmẹ bo mlọnai hẹ ẹ, na mí nido plá okún otọ́ mítọn tọn. 35Yé sọ hẹn otọ́ yetọn nù ovẹ̃n to ozán nẹ mẹ ga, yọ̀pọ lọ sọ fọ́n, bo mlọnai hẹ ẹ; ewọ ma sọ yón whenuena é mlọnai kavi whenuena é fọ́n. 36Le wẹ viyọnnu Loti tọn awe lẹ mọho na otọ́ yetọn do 37Oplọnji ji visunnu de, bo ylọ oyín etọn dọ Moabu: enẹ wẹ otọ́ Moabunu lẹ tọn kaka jẹ egbó. 38Podọ yọ̀pọ, ewọ ga ji visunnu de, bo sọ ylọ oyín etọn dọ Bẹn-ammi: enẹ wẹ otọ́ ovi Ammoni lẹ tọn kaka jẹ egbó.

Currently Selected:

Gẹnẹsisi 19: BWL23

Highlight

Copy