Gẹnẹsisi 18
18
1OKLUNỌ sọ sọawúhia ẹ to ozùn Mamle tọn ji: ewọ sọ sinai to họntonu ogohò tọn to yozò azán lọ tọn mẹ 2Ewọ sọ zé nukun etọn hlan aga bo sọ pọ́n, bo dayi e go, sunnu atọ̀n nọte to e de: whenuena é mọ yé, e họnwezun sọn ogohò hòntonu, nado yì pé yé, bo dé ede hlan aigba, 3bo dọmọ, Mẹdaho, eyín yẹn mọ nukundagbe to nukun towe mẹ, yẹn vẹ̀ we, a juwayì sọn devi towe de blo. 4Gbọ yè ni yí osìn pẹvide wá, na mì ni klọ afọ mítọn, na mì ni sọ gbọje to atin sá; 5yẹn nasọ yí akla nùdo dopo wá, na mì ni hẹn ayiha mítọn gla: to enẹgodo na mi ni juwáyì: na mì do wá devi mítọn de wutu. Yé sọ dọmọ, Basi dole hiẹ dọ do.
6Ablaham sọ gbì yì Sala de to ogoho mẹ, bo dọmọ, yawu bo yí olinfin dagbedagbe ojlẹ atọ̀n, bo fàn en, bo do sọ̀ akla to adò ji. 7Ablaham sọ dowezun yì kanlinpa mẹ, bo yí oyìnvu he whẹn bo yónwhanpẹ, bo sọ na lizọnyitọ lọ; ewọ sọ yawu dá ẹ. 8E so yí oyìnnọ hiho po yìnnọsin po, po oyìnvu he é dá po, bo zé e dai to nukọn yetọn; ewọ sọ nọte to yé de to atin lọ sá, yé sọ dù i.
9Yé sọ kanbiọ ẹ, dọmọ, Fie wẹ Sala asi towe te? E sọ dọmọ, Pọ́n, é tin to ogohò mẹ.
10E sọ dọmọ, Yẹn nasọ legò wá de we whenuena osã lọ wá; bo dayi e go, Sala asi towe na tindo visunnu de. Sala sọ sè to ogohò hòntonu he tin to godo dawe lọ tọn. 11Mọ Ablaham po Sala po ko whén bo pòyọnho; e ko doalọte nado nọ hẹ Sala dile zinzán yọnnu lẹ tọn te. 12Enẹwutu Sala kònu to ede homẹ, dọmọ, To ehegodo yẹn ko whén zùn yọnhonọ wẹ yen na mọ homẹhùn, klunọ ṣie ko sọ poyọnho ga?
13OKLUNỌ sọ dọ hlan Ablaham, dọmọ, Etẹwutu wẹ Sala to nuko, domọ, Bé yẹn na jivi dódo, yẹn mẹhe ko poyọnho pó? 14Bé núde sinyẹnawu na OKLUNỌ wẹ? to ojlẹ he yè dè mẹ yẹn na lẹ́gọ̀ wá de we, whenuena osã lọ wá, Sala na tindo visunnu de.
15Whenẹnu wẹ Sala món, dọmọ, yẹn ma konu gbà; na budi i. Ewọ sọ dọmọ, Lala; ṣigba hiẹ kònu.
16Osunnu nẹlẹ sọ fọ́n sọn finẹ, bò pọndo hlan Sọdọmi dali: Ablaham sọ hodo yé yì nado do yé jẹ aliho ji.
17OKLUNỌ sọ dọmọ, Yẹn ka na sọ ónú he yẹn na wà whlá do Ablaham wẹ; 18na Ablaham na lẹzun akọtá huhlọnnọ daho, akọta he to aigba mẹ lẹpo wẹ yè nasọ dona to ewọ mẹ? 19Na yẹn ko yón ewọ, na é ni dosẹ́n na ovi etọn lẹ, podọ na owhédo etọn to gódo etọn, na yé nido nọ dayi aliho OKLUNỌ tọn go, nado nọ wà dódo po whẹ̀dida po: ná OKLUNỌ nido hẹn wá Ablaham ji enẹ he é dọ gbọn e dali.
20OKLUNỌ sọ dọmọ, Awhá gbọn Sọdọmi po Gọmọla po dali nugbonugbo yín kiklo, podọ ylando yetọn nugbonugbo sọ yín adinu gbahú. 21Yẹn na jẹte yì lò, bo pọ́n eyín yé ko wà kẹdẹ dile awhá gbọn yé dali dì do he wa dẽ; eyín é ma yín mọ, yẹn nasọ yọ́nẹn.
22Osunnu nẹle sọ lẹ nukunmẹ yetọn sọn finẹ, bo sọkọ Sọdọmi; ṣigba Ablaham sọ gbẹ́ to ote to OKLUNỌ nukọn.
23Ablaham sọ sẹpọ́ ẹ, bo dọmọ, Bé hiẹ na và dódónọ sẹ̀ ga po mẹylankan po wẹ? 24Eya dódónọ kandeao tin to otò lọ mẹ: bé hiẹ na zà finẹ lọ sẹ̀ ga, bo ma na jo e do na dódónọ kandeao he tin to e mẹ? 25Enẹ ni dẹn do we nado wà ehe hunkọ, nado hù dódónọ po mẹylankan po: podọ na dódónọ lẹ nido taidi mẹylankan lẹ, enẹ ni dẹn do we: bé whẹdatọ aihọn lẹpo tọn ma na wà whẹdìdajijlọ?
26OKLUNỌ sọ dọmọ, Eyín yẹn mọ to Sọdọmi mẹ dódónọ kandeao to tòdaho lọ homẹ, yẹn na jona finẹ lẹpo na yetọn wutu.
27Ablaham sọ gblọn bo dọmọ, Dayi e go, yẹn ko yí do dè ji lò nado dọhó hlan OKLUNỌ, yẹn he yín kọ́gudu po afìn po: 28eya atọ́n sọgan whè sọn dódónọ kandeao lọ mẹ: bé hiẹ na hù otò pó sudo na atpn wutu? Ewọ dọmọ, Eyín yẹn mọ kandeatén to finẹ, yẹn ma na hù ì súdo gba.
29Ewọ sọ vọ́ hódọ hlan ẹn, bo dọmọ, Eya kande wẹ yè na mọ to finẹ. E sọ dọmọ, Yẹn ma na wà ẹ na kande tọn wutu.
30E sọ dọ, Yè dike OKLUNỌ gblehomẹ blo, yẹn nasọ dọhó: eya yè na mọ ogbàn to finẹ. Ewọ sọ dọmọ, Yẹn má na wà ẹ éyin yẹn mọ ogban to finẹ.
31Ewọ sọ dọmọ, Dayi e go lò, yen ko yi do dẽ jì nado dọhó hlan Oklunọ: eya oko wẹ yè na mọ to finẹ. Ewọ sọ dọmọ, Yẹn ma na hù i súdo na oko tọn wutu.
32E sọ dọmọ, Yè dike OKLUNỌ gblehomẹ bló, yẹn nasọ dọhó whladopo dogọ. Eya ao wẹ yè na mọ to finẹ. Ewọ sọ dọmọ, Yẹn ma na hù i súdo na ao tọn wutu.
33OKLUNỌ sọ lẹ́, le é jo hódọ hẹ Ablaham do: Ablaham sọ gọ̀yì otẹn etọn mẹ.
Currently Selected:
Gẹnẹsisi 18: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
