Eksọdusi 7

1OKLUNỌ sọ dọ hlan Moṣe, dọ, Pọ́n, yẹn ko yí we do basi yẹwhe de hlan Falo: Aalon nọvisunnu towe na yín yẹwhegan towe. 2Hiẹ na dohó he yẹn degbè etọn na we lẹpo: Aalon nọvisunnu towe na dọhó hlan Falo, dọ é ni gbọ ovi Islaeli tọn lẹ ni tọ́nyì sọn aigba etọn ji. 3Yẹn nasọ hẹn ayiha Falo tọn sinyẹn, bo sọ hẹn azón ohia tọn ṣie lẹ po nújawu ṣie lẹ po zùn susu to aigba Egipti tọn ji. 4Ṣigba Falo ma na tuntóai hlan mì gba, yẹn nasọ zé alọ ṣie do Egipti ji, bo hẹn awhànpa ṣie lẹ jẹgbonu, omẹ ṣie ovi Islaeli tọn lẹ, sọn aigba Egipti tọn ji gbọn whẹ̀dida daho lẹ dali. 5Egiptinu lẹ nasọ yónẹn dọ yẹn wẹ OKLUNỌ, whenuena yẹn dlẹn alọ ṣie jẹgbonu do Egipti ji, bo hẹn ovi Islaeli tọn lẹ tón sọn ṣẹnṣẹn yetọn.

6Moṣe po Aalon po sọ wà mọ; dile OKLUNỌ degbèna yé do, mọwẹ yé wà do. 7Moṣe yín owhè kanwe mẹho, Aalon sọ yín owhè kanwenukunatọ̀n mẹho, to whenuena yé dọhó hlan Falo.

8OKLUNỌ sọ dọhó hlan Moṣe podọ hlan Aalon, dọmọ, 9Whenuena Falo na dọhó hlan mì, dọmọ, Do nújawu de hia na mì: whenẹnu hiẹ na dọ hlan Aalon, Yí opò towe, bo zé e dlẹn aigba to Falo nukọn: é na lẹzùn odàn de. 10Moṣe po Aalon po biọ hònmẹ yì Falo de, yé wà mọ, dile OKLUNỌ degbèna yé do: Aalon sọ zé opò etọn dlan aigba to Falo nukọn po to devi etọn lẹ po nukọn, é sọ lẹzùn odàn de.

11Whenẹnu Falo ga ylọ gbẹtọ núyónẹntọ lẹ po owọntọ lẹ po: yé ga, nújlẹtọ Egipti tọn lẹ yí nújijlẹ yetọn do wà mọkẹkẹdẹkẹ. 12Na dopodopo yetọn zé opò etọn dlẹn aigba, yé sọ lẹzun odàn lẹ: ṣigba opò Aalon tọn zé opò yetọn lẹ mì. 13Ayiha Falo tọn sọ zun sinsinyẹn, é ma sọ tùntóai hlan yé; dile OKLUNỌ ko dọhó do.

14OKLUNỌ sọ dọ hlan Moṣe, dọmọ, Ayiha Falo tọn yín adingbannọ é kó nado gbọ gbẹtọ ewlẹ ni yì, 15Tónyì Falo de to afọnnu; pọ́n, é tón jei tòpa; hiẹ na site to otọ́ tó, nado pé e; opò he yè diọ zùn odàn wẹ hiẹ na yí hẹn to alọ towe mẹ. 16Hiẹ nasọ dọ hlan ẹn, dọmọ, OKLUNỌ, Jiwheyẹwhe Heblu lẹ tọn lọ, ko do mi hlan we, dọmọ, Gbọ omẹ ṣie lẹ ni yì, na yé nido sẹ́n mi to zùngbo mẹ: bo, dayi e go, kaka jẹ dinvie hiẹ ma ko nató gba. 17Le wẹ OKLUNỌ dọ, Ehe mẹ wẹ hiẹ na yónẹn dọ yẹn wẹ OKLUNỌ: dayi e go, yẹn na yí opò he tin to alọ ṣie mẹ li osìn he tin to otọ̀ mẹ ji, yè nasọ diọ yé zùn ohùn 18Whevi he tin to otọ̀ mẹ na kú, otọ̀ nasọ lunwan; Egiptinu lẹ nasọ gbẹwánna nado nù osìn sọn otọ lọ mẹ.

19OKLUNỌ sọ dọ hlan Moṣe, dọ, Dọ hlan Aalon, dọ, Yi opò towe, bo dlẹn alọ towe do osìn Egipti tọn lẹ ji, do otọ̀ yetọn lẹ ji, do tòsisá yetọn lẹ ji, podọ do otándo yetọn lẹ ji, podọ do avundoe osìn yetọn lẹpo tọn ji, na yé nido lẹzùn ohùn; bọ ohùn na tin lédo aigba Egipti tọn lẹpo, to núzinzán atin tọn lẹ mẹ, podọ to núzinzán zannu tọn lẹ mẹ.

20Moṣe po Aalon po sọ wà mọ, dile OKLUNỌ degbèna yé do: ewọ sọ zé opò lọ daga bo li osìn he tin to otọ́ lọ mẹ lẹ, to Falo nukunmẹ, podọ to devi etọn lẹ nukunmẹ: osìn he tin to otọ̀ lọ mẹ lẹpo tte yè diọ zùn ohùn. 21Whevi he tin to otò lọ mẹ sọ kú: otọ́ lọ sọ to wanlùn, Egiptinu lẹ ma sọ sọgan nù osìn sọn otò lọ mẹ: ohùn lọ sọ tin lẹ́do to aigba Egipti ton lẹpo ji.

22Nújlẹtọ Egipti tọn lẹ bọ yí nújijlẹ yetọn lẹ do basi mọkẹkẹdẹkẹ: yè bọ hẹn ayiha Falo tọn sinyẹn, é ma sọ tùntóai hlan yé gba; dile OKLUNỌ dọhó do. 23Falo sọ ló bo yì owhó etọn gbè, yèdọ mọ é ma tlẹ sọ yí do ayiha mẹ lẹnpọ́n. 24Egiptinu lẹpo sọ kundò lédo otò lọ na osìn nado nù: na yé ma sọgan nù sọn osìn otò lọ tọn mẹ gba 25Yè hẹn azán ṣinawe lọ pó, to godo na OKLUNỌ ko linú otọ́ lọ.

Currently Selected:

Eksọdusi 7: BWL23

Highlight

Copy