Eksọdusi 6

1OKLUNỌ sọ dọ hlan Moṣe dọmọ, Dinvie wẹ hiẹ na mọ onú he yẹn na wá do Falo: na gbọn alọ huhlọnnọ dali wẹ ewọ na gbọ yé ni yì, podọ gbọn alọ huhlọnnọ dali wẹ ewọ na yàn yé tón sọn aigba etọn ji.

2Jiwheyẹwhe sọ dọhó hlan Moṣe, bo dọ hlan ẹn, dọmọ, Yẹn Jehova wẹ: 3yẹn sọawúhia hlan Ablaham, hlan Isaki, podọ hlan Jakobu, di Jiwheyẹwhe Ganhunupo, ṣigba gbọn oyín ṣie Jehova: dali wẹ yen ma yín mẹyinyónẹn hlan yé gba. 4Podọ yẹn ko hen alènu ṣie li hẹ yé ga, nado na aigba Kenani tọn yé, aigba wási yetọn tọn lẹ, ehemẹ yé wáwási te. 5Podọ humọ yẹn ko sè winwèn ovi Islaeli tọn lẹ tọn, mẹhe Egiptinu lẹ hẹndote do mẹglọnọ mẹ le; yẹn ko sọ flin alènu ṣie. 6Enẹwutu dọ hlan ovi Islaeli tọn lẹ, dọ, Yẹn Jehova wẹ, podọ yẹn na hẹn mí tón sọn agbàn Egiptinu lẹ tọn glọ, yẹn nasọ whlẹn mì sọn mẹglọnọ yetọn mẹ, yen na yí awà dindlẹn do fli mì, po whẹ̀dida daho lẹ po: 7Podọ yẹn na yí mì hlan dẽ na gbẹtọ de, yẹn nasọ yín Jiwheyẹwhe de hlan mì: mìwlẹ nasọ yónẹn dọ yẹn wẹ Jehova Jiwheyẹwhe mìtọn, he hẹn mì tón sọn agbàn Egiptinu lẹ tọn glọ. 8Yẹn nasọ hen mì yì aigba lọ ji, ehetọn dali yẹn zé alọ ṣie daga nado na ẹn hlan Ablaham, hlan Isaki, podọ hlan Jakobu: yẹn nasọ yí i na mì na ogú de. Yẹn Jehova wẹ.

9Moṣe sọ dọhó mọ hlan ovi Islaeli tọn lẹ: ṣigba yé ma tùntóai hlan Moṣe gba na awúfiẹsa ayiha tọn podọ na yinylan mẹglọnọ lọ tọn.

10OKLUNỌ sọ dọhó hlan Moṣe, dọmọ, 11Yi hònmẹ, dọhó hlan Falo ahọlu Egipti tọn, dọ é ni gbọ ovi Islaeli tọn lẹ ni tónyì sọn aigba etọn ji. 12Moṣe sọ dọhó to OKLUNỌ nukọn, dọmọ, Dayi e go, ovi Islaeli tọn lẹ ma tùntoai hlan mi; nawẹ ahọlu Egipti tọn na sè ṣie do, mẹhe yín whẹmagbo nùflo le tọn?

13OKLUNỌ sọ dọhó hlan Mosẹ podọ hlan Aalon, bo sọ na yé gbèdide de hlan ovi Islaeli tọn lẹ, podọ hlan Falo ahọlu Egipti ton, nado hẹn ovi Islaeli tọn lẹ tón sọn aigba Egipti tọn ji.

14Ehelẹ wẹ owhénọ owhé otọ́ yetọn lẹ tọn tọn: visunnu Lẹubeni oplọnji Islaeli tọn tọn lẹ; Hanoki po Pali po, Hẹzloni po Kalmi po: ehelẹ wẹ ohẹnnu Lẹubeni tọn lẹ.

15Ovisunnu Simeoni tọn lẹ, Jẹmueli po Jamini po, Ohadipo Jakini po, Zohali po Ṣauli visunnu yọnnu Kenaninu tọn po: ehelẹ wẹ ohẹnnu Simeoni tọn lẹ.

16Ehelẹ wẹ oyín ovi Levi tọn lẹ tọn, kẹdẹdi whẹndo yetọn lẹ: Gelsoni po Kohati po, po Mẹlali po: owhè ogbè Levi tọn tọn lẹ wẹ owhè kantọ̀nfọtọ̀nnukunawe. 17Ovisunnu Gelsoni tọn lẹ; Libni po Simẹi po, kẹdẹdi whédo yetọn lẹ. 18Ovisunnu Kohati tọn lẹ; Amlami po Izhali po, Hẹbloni po Uzieli po: owhè ogbó Kohati tọn tọn lẹ wẹ owhè kantọ̀nwiatòn. 19Ovisunnu Mẹlali tọn lẹ; Mahlipo Muṣi po. Ehelẹ wẹ ohẹnnu Levinu lẹ tọn kẹdẹdi whẹndo yetọn lẹ.

20Amlami yí Jokẹbẹdi nọviyonnu otọ́ etọn tọn na asi; ewọ sọ ji Aalon po Moṣe po nẹ: owhè ogbé Amlami tọn tọn lẹ wẹ owhè kantọ̀nfọtọ̀nnukunawe.

21Ovisunnu Izhali tọn lẹ; Kolahi po Nẹfegi po, po Zikli po. 22Ovisunnu Uzieli tọn lẹ; Misaeli po Ẹlzafani po, po Sitli po. 23Aalon sọ yí Eliṣẹba, viyọnnu Aminadabi tọn nọviyọnnu Nahsoni tọn do do asi; ewọ sọ ji Nadabi po Abihi po, Ẹlẹazali po Itamali po nẹ́. 24Ovisunnu Kolahi tọn lẹ; Àsili po Ẹlkana po, po Abiasafi po; ehelẹ wẹ ohẹnnu Kolahinu lẹ tọn. 25Ẹlẹazali visunnu Aalon tọn yí dopo to viyọnnu Putieli tọn lẹ tọn mẹ do do asi; ewọ sọ ji Finẹhasi nẹ́. Ehelẹ wẹ whénọ owhé otọ́ Levinu tọn lẹ tọn tọn kẹdedi ohẹnnu yetọn lẹ.

26Ehelẹ wẹ Aalon po Moṣe nẹ po, mẹhe OKLUNỌ dọ hlan, dọ, Hẹn ovi Islaeli ton lẹ tón sọn aigba Egipti tọn ji kẹdẹdi awhànpa yetọn lẹ. 27Ehelẹ wẹ yé mẹhe dọhó hlan Falo ahọlu Egipti tọn, nado hẹn ovi Islaeli tọn lẹ tón sọn Egipti: ehelẹ wẹ Moṣe po Aalon nẹ po.

28E sọ wá jọ to azán lọ ji whenuena OKLUNỌ dọhó hlan Moṣe to aigba Egipti tọn ji, 29wẹ OKLUNỌ dọhó hlan Moṣe, dọmọ, Yẹn OKLUNỌ wẹ: dọhó he yẹn dọ hlan we lẹpo hlan Falo ahọlu Egipti tọn.

30Moṣe sọ dọ to OKLUNỌ nukọn, dọ, Dayi e go, whẹmagbo nùflo lẹ tọn wẹ yẹn, nawẹ Falo na tùntóai hlan mi do?

Currently Selected:

Eksọdusi 6: BWL23

Highlight

Copy