Eksọdusi 5

1TO godo Moṣe po Aalon po wá, bo dọ hlan Falo, dọmọ, Le wẹ OKLUNỌ Jiwheyẹwhe Islaeli tọn, dọ, Gbọ omẹ ṣie lẹ ni yi, na yé ni wàhùnwhẹ hlan mi zùngbo mẹ.

2Falo sọ domọ, Menu we OKLUNỌ, bọ yẹn na do dotóai hlan ogbè etọn nado gbọ ovi Islaeli tọn lẹ ni yi? Yẹn ma yọ́n OKLUNỌ gba, podọ humọ yẹn ma to na gbọ Islaeli ni yi gba.

3Yé sọ dọmọ, Jiwheyẹwhe Heblu lẹ tọn ko pla mí: gbọ mí ni yì, mí vè wẹ azán atọ̀n gbejizọnlin biọ zùngbo mẹ, bo sánvọ́ hlan OKLUNỌ Jiwheyẹwhe mítọn; ewọ nikã yí azọ̀n do hò mí, kavi yí ohi do hò.

4Ahọlu Egipti tọn sọ dọ hlanyé, dọmọ, Etẹwutu wẹ mì, Moṣe po Aalon po, tún gbẹtọ lẹ sọn azón yetọn lẹ kọ́n? mì tónyì agbàn mítọn lẹ kọ̀n. 5Falo sọ dọmọ, Dayi e go, gbẹtọ aigba lọ tọn le yín mẹsusu dinvie, mìwlẹ sọ hen yé gbojẹ sọn agbàn yetọn lẹ mẹ. 6To azán doponẹ gbè, Falo degbèna azóngán gbẹtọ lẹ lọ tọn lẹ po azọngánpẹvi yetọn lẹ po, dọmọ, 7Mì ma to nasọ na ogbé gbẹtọ lẹ nado basi bliki ba gba, dile é te sọndò; gbọ yé ní yì bo dà ogbé na yéde. 8Sọha bliki lẹ tọn, he yé ko nọ basi sọndòj wẹ mì na dodoagbàn do yé ji: mì ma na dè núde pò sọn e mẹ: na yé yín adidọnọ; enẹwutu wẹ yé awhádo, dọmọ, Gbọ mí ni yì bo sánvọ́ hlan Jiwheyẹwhe mítọn. 9Gbọ azón he pènhú ni yín núdodoagbàn do gbẹtọ ewlẹ ji, na yé nido jiya to e mẹ; mì dike yé hò ohó lalo lẹ pọ́n blo. 10Azọngán gbẹtọ lẹ tọn sọ tónyì, po azóngánpẹvi yetọn lẹ po, bo dọhó hlan gbẹtọ lẹ, dọmọ, Le wẹ Falo dọ, dọmọ, Yẹn ma to ogbé na na mì gba. 11Mìlọsu yì dà ogbé na mìde fie mì sọgan mọ ẹn te: na onú azón mítọn tọn de ma na yín whiwhe. 12Mowẹ gbẹtọ ewle vúnvún pé gbọn aigba Egipti tọn lẹpo ji nado dà zinkán na ogbé. 13Azọngán lẹ yín fìfiẹtọ, bo dọmọ, Mì hẹn azón mítọn lẹ pé, gbèdopo-zón mìtọn lẹ, di whenuena ogbé tin. 14Azóngánpẹvi ovi Islaeli tọn lẹ tọn, he azóngán Falo tọn lẹ dè do yé jí, yè nuli yé, bo to kinkanbiọ yé, dọmọ, Etẹwutu wẹ mì ma hẹn azón mítọn pé to osọ po egbé po, to bliki bibasi mẹ dile é te sọndò?

15Whenẹnu wẹ azóngánpẹvi ovi Islaeli tọn lẹ tọn wá bo dawhá dọ hlan Falo, dọmọ, Etẹwutu wẹ hiẹ to zinzán he devi towe lẹ dole? 16Yè ma na ogbé devi towe lẹ, yé sọ dọ na mí, dọ, Mì basi bliki: bo, dayi e go, yè to núli devi towe lẹ; podọ hiẹ na wàylan do omẹ towe go. 17Ṣigba ewọ dọmọ, Adidọnọ wẹ mì, adidọnọ wẹ mì: enẹwutu wẹ mì do dọmọ, Gbọ mí ni yì bo sánvọ́ hlan OKLUNỌ. 18Enẹwutu dinvie mì yì, bo wàzón; yè ma to ogbé de na na mì, gãnṣo mì na jo sọha bliki lẹ tọn.

19Azóngánpẹvi ovi Islaeli tọn lẹ tọn mọ dọ yéwlẹ lọsu tin to owù ylankan mẹ, whenuena yè dọmọ, Mì ma na dè núde pò sọn bliki mìtọn lẹ mẹ, gbèdopo-zón mítọn lẹ. 20Ye sọ pe Moṣe po Aalon po, mehe site to aliho ji, le yé tón son Falo de ja: 21yé sọ dọ hlanyé, dọmo, OKLUNỌ ni pọ́n mì bo dawhè; na mìwlẹ hẹn wánvivi mítọn nado yín núgbẹwánna to nukun Falo tọn mẹ, podọ to nukun devi etọn lẹ tọn mẹ, nado yí ohi do alọ yetọn mẹ nado hù mí.

22Moṣe sọ gò do OKLUNỌ de, bo dọmọ, OKLUNỌ, etẹwutu wẹ hiẹ hẹn oylan pla omẹ helẹ? etẹwutu wẹ hiẹ ko do mi hlan? 23Na sọn whenu yẹn ko wá Falo de nado dọhó to oyín towe mẹ, wẹ ewọ ko to oylan hẹn pla omẹ hele; mọ hiẹ ma ko sọ whlẹn omẹ towe lẹ lala gba.

Currently Selected:

Eksọdusi 5: BWL23

Highlight

Copy