2 SAMUẸLI 5

1WHENẸNU wẹ whẹndo Islaeli tọn lẹpo wá Davidi de to Heblọni, bo dọhó, dọmọ, Dayi e go, ohú towe wẹ mí po agbasalan towe po. 2To ojlẹ hóhó lẹ mẹ, whenuena Sauli yín ahọlu to Islaeli ji, hiẹ wẹ ewọ he nọ plan Islaeli jẹgbonu bo sọ nọ hẹn en wá whégbe: OKLUNỌ sọ dọ hlan we dọ, Hiẹ wẹ na yìn Islaeli omẹ ṣie lẹ, podọ hiẹ na sọ yín ahọvi to Islaeli ji. 3Mowẹ mẹho Islaeli tọn lẹpo wá ahọlu de to Heblọni; ahọlu Davidi sọ basi alẹ̀nù de po yé po to Heblọni mẹ to OKLUNỌ nukọn: Ye sọ samisisána Davidi do dahọlu to Islaeli ji. 4Davidi yín owhè ogbàn mẹho whenuena é ṣẹ́ nado duahọlu, é sọ dùahọlu owhè kande. 5To Heblọni mẹ é dùahọlu to Juda ji owhè ṣinawe po osùn ṣidopo po: podọ to Jelusalẹm me é dùahọlu owhè ogbàn po osùn atọ̀n po to Islaeli po Juda po ji. 6Ahọlu po omẹ etọn lẹ po sọ yì Jelusalẹm do Jebusinu lẹ ji, tòmẹnu aigba lọ tọn lẹ: he dọhó hlan Davidi, dọmọ, Adavo hiẹ dè nukuntọ́nnọ lẹ po sẹ́kunọ lẹ po sẹ́, hiẹ ma na biọ whegbe wá file gba: linlẹn dọ Davidi ma sọgan biọ whégbe wá file gba. 7Ṣogãn Davidi yí figángán Ziọni tọn; doponẹ wẹ todaho Davidi tọn lọ. 8Davidi sọ dọ to azán nẹ gbè dọ, Mẹdepope he hò Jebusinu lẹ, gbọ é ni fọ́n yì sinmọji, bo hò sékunọ lẹ po nukuntọnnọ lẹ po, he yè gbẹwanna sọn alindọn Davidi tọn de. Enẹwutu yé dọmọ, Nukuntónnọ le po sékunọ lẹ po tin to finẹ; ewọ ma sọgan biọ owhé gbè wá gba. 9Davidi sọ nọ̀ ofi gángán lọ mẹ, bo nọ ylọ ẹ todaho Davidi tọn. Davidi sọ dóhọ lẹ́do pé sọn Milo podọ hlan, nhomẹdali. 10Davidi so to kiklo dejideji; na OKLUNỌ, Jiwheyẹwhe awhànpa lẹ tọn, tin po e po.

11Hilami ahọlu Tile tọn do mẹdagun lẹ hlan Davidi, po kedalitin lẹ po, po atinpatọ lẹ po, po hòtlẹtọ lẹ po: yé sọ dó ohò de na Davidi. 12Davidi sọ mọhlan dọ OKLUNỌ ko yí i do dè ahọlu do Islaeli ji, podọ é ko zé ahọludu etọn daga na omẹ etọn lẹ na Islaeli tọn wutu.

13Davidi sọ yí yọnnuyiyi lẹ po asi lẹ po nẹ sọn Jelusalẹm, godo he yè hẹn ẹn sọn Heblọni wá: yè sọ vọ́ visunnu lẹ po viyọnnu lẹ po ji hlan Davidi. 14Ehelẹ yín oyín enẹlẹ tọn he yè ji hlan ẹn tó Jelusalẹm mẹ lẹ; Sammua, po Sobabi po, po Natani po, po Sọlomoni po, 15po Ibhali po, po Ehsua po; po Nẹfegi po, po Jafia po; 16po Elisama po, po Eliada po, po Elifẹlẹti po.

17Whenuena Filistini lẹ sè dọ yé ko samisisána Davidi do dahọlu do Islaeli ji, Filistini lẹpo hẹji yì nado din Davidi; Davidi sọ sè linlin e tọn, bo jẹte yì agbómẹ. 18Dinvie Filistini lẹ ko wá bo tó yéde do agbadò Lefaimi tọn mẹ. 19Davidi sọ kanbiọ sọn OKLUNỌ de, dọmọ, Yẹn ni hẹji yì pehẹ Filistini lẹ? hiẹ na jó yé do alọ ṣie me? OKLUNỌ sọ dọ hlan Davidi dọ, Hẹji yì: na yẹn na jó Filistini lẹ do alọ towe mẹ dodo. 20Davidi sọ wá Baali-pẹlazimi, Davidi sọ hò yé to finẹ; é sọ dọmọ, OKLUNỌ ko gbà kẹ̀ntọ ṣie lẹ to nukọn ṣie, di gbàgbìgbo osìn lẹ tọn. Enẹwutu wẹ é ylọ oyín ofi nẹ tọn dọ Baali-pẹlazimi. 21Yé sọ jó boṣiọ yetọn lẹ dai to finẹ, Davidi po omẹ etọn lẹ po sọ bé yé yì.

22Filistini lẹ sọ vọ́ jihẹ wá, bo tẹ́ yéde do agbado Lefaimi tọn mẹ. 23Whenuena Davidi kanbiọ sọn OKLUNỌ de, é dọmọ, Hiẹma na hẹji yì gba: basi gbigbò de to yé godo, bo wá yé ji pànnukòn mulbeli-tin lẹ. 24E na sọ yín, whenuena hiẹ sè ogbè afọdidè tọn to adadanu mulbeli-tin lẹ tọn mẹ, dọ whenẹnu wẹ hiẹ na fọ́nadan dewe: na whenẹnu wẹ yè hẹn OKLUNỌ jẹgbonu yì to nukọn towe nado hò awhànpa Filistini lẹ tọn. 25Davidi sọ wà mọ, dile OKLUNỌ degbèna en do; bo hò Filistini lẹ sọn Geba kaka hiẹ do wá jẹ Gezẹli.

Currently Selected:

2 SAMUẸLI 5: BWL23

Highlight

Copy