2 SAMUẸLI 3
3
1DINVIE awhàn dindẹnaì tin to owhẹ́ Sauli tọn po owhé Davidi tọn po ṣẹnṣẹn: Davidi sọ to, sinsinyẹn deji, ṣigba Sauli to ogán depò deji. 2Yè sọ ji visunnu lẹ hlan Davidi to Heblọni mẹ: plọnji etọn wẹ Ammọni, sọn Ahinoami Jẹzleẹlinu-yọnnu homẹ; 3awetọ etọn Kileabi, sọn Abigaili asi Nabali Kalmẹlinu tọn homẹ; atọ̀ntọ, Absalomi visunnu Maaka tọn viyọnnu Talmai ahọlu Gẹṣuli tọn tọn homẹ; 4ẹnẹtọ, Adonija visunnu Hagiti tọn; atóntọ, Ṣefatia visunnu Abitali tọn; 5ṣidopotọ, Itleami, sọn Egla asi Davidi tọn homẹ. Ehelẹ wẹ yè ji hlan Davidi to Heblọni mẹ.
6E sọ wá jọ to ojlẹ he mẹ awhàn tin to owhé Sauli tọn po owhé Davidi tọn po ṣẹnṣẹn, wẹ Abneli hẹn ede sinyẹn to owhé Sauli tọn gbè. 7Dinvie Sauli tindo yọnnuyiyi de, oyín mẹhetọn yín Lizpa, viyọnnu Aia tọn: Iṣi-bosẹti sọ dọ hlan Abneli dọmọ, Etẹwutu wẹ hiẹ biọ họmẹ yì yọnnuyiyi otọ́ ṣie tọn de? 8Whenẹnu wẹ Abneli yín homẹgblenọ talala na ohó Iṣi-boṣẹti tọn lẹ, bo dọmọ, Bé ota avún he yín Juda tọn de tọn yẹn yín? Egbé wẹ yẹn do dagbewà hia hlan owhé Sauli otọ́ towe tọn, hlan mẹmẹsunnu etọn lẹ, podọ hlan họ́ntọ̀n etọn lẹ, bo ma jó we do álọ Davidi tọn mẹ gba, gãnṣo hiẹ yí lalo de do dowhẹ́ mi gbọn nawe he tọn dali. 9Jiwheyẹwhe ni wà mọ hlan Abneli, podọ humọ ga, eyín yẹn, dile OKLUNỌ ko whle hlan Davidi do, ma wà yèdọ mọ hlan ẹn; 10nado diọ ahọludu sọn owhé Sauli tọn gbè, podọ nado zé ofìn Davidi tọn daga do Islaeli ji podọ do Juda ji, sọn Dani yèdọ jẹ Beẹli-seba. 11Ewọ ma sọ sọgan gblọn ohó devo na Abneli gba, na é dibuna ẹn wutu.
12Abneli sọ do mẹdagun lẹ hlan Davidi na etọn wutu, dọmọ, Mẹnutọn aigba lọ yín? didọ ga dọmọ, Basi dòndopọ towe do dẽ, bo, dayi e go, alọ ṣie na tin to de we, nado hẹn Islaeli lẹpo diọkọ wá de we. 13Ewọ sọ dọmọ, Ẹyin; yẹn na basi dọ̀ndopọ de do de we: ṣigba onú dopo yẹn na biọ sọn de we, enẹ wẹ, dọ hiẹ ma na mọ nukunmẹ ṣie adavo hiẹ hẹn Mikali viyọnnu Sauli tọn wá whẹ, whenuena hiẹ ja nado mọ nukunmẹ ṣie. 14Davidi sọ do mẹdagun lẹ hlan Iṣi-boṣẹti visunnu Sauli tọn, dọmọ, Jó asi ṣie Mikali na mi, mẹhe yẹn biọmọ hlan dẽ na ayútintan kanweko Filistini lẹ tọn. 15Iṣi-boṣẹti sọ do omẹ hlan, bo yí i sọn asú etọn de, yèdọ sọn Paltiẹli visunnu Lalẹi tọn de. 16Asú etọn sọ yì po e po, bo to avivi le é to yìyì, bo hodo e jẹ Bahulimi. Whenẹnu wẹ Abneli dọ hlan ẹn dọ, Lẹ́gó, yì: ewọ sọ gọ́yì.
17Abneli sọ dowé po mẹho Islaeli tọn lẹ po, dọmọ, To ojlẹ hóhó lẹ mẹ míwlẹ to Sauli din nado yín ahọlu to mì ji: 18Enẹwutu basi i lò: na OKLUNỌ ko dọhó Davidi tọn, dọmọ, Gbọn alọ Davidi devi ṣie tọn mẹ yẹn na whlẹn Islaeli omẹ ṣie lẹ sọn alọ Filistini lẹ tọn mẹ, podọ sọn alọ kẹ̀ntọ yetọn lẹpo tọn mẹ. 19Abneli sọ dọhó ga to otó Bẹnjamini tọn lẹ mẹ: Abneli sọ yì ga nado dọhó to otó Davidi tọn lẹ mẹ to Heblọni mẹ popo he sọawuhia dagbe hlan Islaeli, podọ hlan owhé Bẹnjamini tọn pete. 20Mowẹ Abneli wá Davidi de to Heblọni, po omẹ okò po po e po. Davidi sọ basi núdùdù de na Abneli po omẹ he tin to e de lẹ po. 21Abneli sọ dọ hlan Davidi dọ, Yẹn na tite bo yì, bo na bẹ́ Islaeli lẹpo pli hlan klunọ ṣie ahọlu, dọ yé nido basi alẹ̀nù de po hiẹ po, podọ hiẹ nido dùahọlu do popo he alindọn towe jlo ji. Davidi sọ jó Abneli hlan yì; ewọ sọ yì jijọho mẹ. 22Bo, dayi e go, mẹmẹsi Davidi tọn lẹ po Joabi po ja sọn ogblangbo de mẹ, bo hẹn ogblannu daho de wá po yé po: ṣigba Abneli ma tin to Davidi de to Heblọni mẹ gba; na ewọ ko jó e hlan yì, yè ko sọ hẹn ẹn yì jijọho mẹ. 23Whenuena yè hẹn Joabi po awhànpa he tin to e de lẹpo po wá, yé dọ na Joabi, dọmọ, Abneli visunnu Nẹli tọn wá ahọlu de, ewọ ko sọ jó e hlan yì, yè sọ hẹn ẹn yì jijọho mẹ. 24Whenẹnu wẹ Joabi wá ahọlu de, bo dọmọ, Eté hiẹ ko wà? dayi e go, Abneli wá de we; etẹwutu wẹ hiẹ jó e do yì, bọ yè hẹn ẹn yì patapata? 25Hiẹ yọ́n Abneli visunnu Nẹli tọn, dọ é wá nado klọ we, podọ nado yọ́n tintọ́n jẹgbonu towe po gigọ̀wá whégbe towe po, podọ nado yọ́n popo he hiẹ to wiwà lẹ. 26Whenuena yè hẹn Joabi tọ́n sọn Davidi de, é do mẹdagun lẹ hlan Abneli, yé sọ hẹn ẹn gò sọn odòtó Sila tọn kọ̀n: ṣigba Davidi ma yón ẹn gba 27Whenuena yè hẹn Abneli lẹ́gọ̀ do Heblọni, Joabi yí i jẹapadopo biọ gblagbla họ́ngbo tọn mẹ nado dọhó po e po abọẹabọẹ, bo sọ hò e to finẹ sọn hoto, bọ ewọ kú, na ohùn nọvisunnu etọn Asahẹli tọn. 28To godomẹ whenuena Davidi sè e, é dọmọ, Yẹn po ahọludu ṣie po tin matinwhẹ́yínylan to OKLUNỌ nukọn kakadoi sọn ohùn Abneli visunnu Nẹli tọn tọn mẹ: 29gbọ é ni flẹ jẹ ota Joabi tọn, podọ jẹ owhó otọ́ etọn tọn lẹpo ji; a sọ dike yè din sọn owhó Joabi tọn gbè omẹ he tindo azọ́n ohùn tọn, kavi he yín opòtọnọ de, kavi he dó do opò de ji, kavi he jai gbọn ohi dali, kavi he akla whèdo bapò blo. 30Mọwẹ Joabi po Abisai nọvisunnu etọn po hù Abneli, na ewọ ko hù Asahẹli nọvisunnu yetọn to awhànfuntẹn mẹ to Gibeoni wutu.
31Davidi sọ dọ hlan Joabi, podọ hlan omẹ he tin to e de lẹpo po dọmọ, Mì tlẹn avọ̀ mìtọn lẹ, bo yí odẹ́vọ̀ do blagbajana mì, bo blawu to Abneli nukọn. Davidi ahọlu sọ hodo ṣiọján. 32Yé sọ di Abneli to Heblọni mẹ: ahọlu sọ zé ogbè etọn daga, bo viavi to yọdò Abneli tọn kòn; gbẹtọ lẹpo sọ viavi. 33Ahọlu sọ viavi na Abneli, bo dọmọ, Bé Abneli ni kú dile klenọ de kú do wẹ? 34Yè ma bla alọ towe lẹ, mọ yè ma do afọ towe lẹ afọgàn lẹ mẹ: Dile omẹ de nọ jai to ovi ylanwiwà tọn lẹ nukọn do, mọwẹ hiẹ jai do. Gbẹtọ lẹpo sọ vọ́ avivi do e ji. 35Gbẹtọ lẹpo sọ wá nado hẹn Davidi dù akla whenuena okle gbẹ́ sọ tin to ai; ṣigba Davidi whle, dọmọ, Jiwheyẹwhe ni wà mọ hlan mi, podọ humọ ga, eyín yẹn dọ́ akla pọ́n, kavi onu devo de, kaka owhè do tin to odò. 36Gbẹtọ lẹpo sọ yí ayidonugo e tọn, é sọ hẹnhomẹhùn yé: dile nudepópe ahọlu wà nọ hẹnhomẹhùn yé do. 37Mowẹ gbẹtọ lẹpo po Islaeli lẹpo po tunwun to gbenẹgbe dọ é ma sọn ahọlu de nado hù Abneli visunnu Nẹli tọn gba. 38Ahọlu sọ dọ hlan mẹmẹsi etọn lẹ dọ, Bé míwlẹ ma yọnẹn dọ yè hẹn ahọvi de po omẹ daho de po jai to egbé to Islaeli mẹ? 39Bọ yẹn to egbé yín madogánnọ, tlẹ yín ahọlu meyíamisisádodènọ; podọ omẹ helẹ visunnu Zeluia tọn lẹ yín sinsinyẹn hugán na mi: OKLUNỌ ni suahọ ylanwàtọ kẹdẹdi ylanwiwà etọn.
Currently Selected:
2 SAMUẸLI 3: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.