1 SAMUẸLI 9
9
1DINVIE dawe Bẹnjamini tọn de tin, oyín mẹhetọn nọ yín Kisi, visunnu Abieli tọn, visunnu Zelọli tọn, visunnu Bekolati tọn, visunnu Afia tọn, visunnu Bẹnjamininu de tọn, dawe huhlọnnọ tudido tọn de. 2Ewọ sọ tindo visunnu de, oyín mẹhetọn nọ yín Sauli, yọ̀pọ dẹpẹ de, whànpẹnọ de: mẹde to ovi Islaeli tọn lẹ mẹ ma yin whànpẹnọ hú ewọ gba: sọn abọ́ etọn lẹ podọ hlan aga é dite hú omẹ ewlẹ depope. 3Yè sọ hẹn kẹtẹkẹtẹ Kisi otọ́ Sauli tọn tọn lẹ bú. Kisi sọ dọ hlan Sauli visunnu etọn dọ, Yí dinvie dopo sọn devi lẹ mẹ do de we, bo tite, yì din kẹtẹkẹtẹ lẹ yì. 4Ewọ sọ gbọn otò okọta Eflaimi tọn lẹ́do, bo gbọn aigba Salisa tọn ji lẹ́do, ṣigba yé ma mọ yé gba: whenẹnu wẹ yé gbọn aigba Saalimi tọn ji lédo, Yé ma sọ tin to finẹ gba: ewọ sọ gbọn aigba Bẹnjamininu lẹ tọn ji lédo, ṣigba yé ma sọ mọ yé gba. 5Whenuena yè hẹn yé wá aigba Zufi tọn ji, Sauli dọ hlan devi etọn he tin to e de dọmọ, Wá, gbọmíni diọkọ; otọ́ ṣie nikã jó nuhiha na kẹtẹkẹtẹ lẹ do bo yí olẹnpón na míwlẹ tọn. 6Ewọ sọ dọ hlan ẹn dọ, Dayi e go dinvie, Jiwheyẹwhe gbẹtọ de tin to tòdaho he mẹ, ewọ sọ yín omẹ yè gbògbéna; ehe é nọ dọ lẹpo wẹ nọ wá jọ nugbonugbo: dinvie gbọ mí ni yì finẹ; eya é sọgan dọ na mi gbọn gbéjizọnlin mìtọn tọn dali fìeji mí gbọn jei. 7Whenẹnu wẹ Sauli dọ hlan devi etọn dọ, Ṣigba, dayi e go, eyín mí jei, etẹ́ mí na hẹn yì nẹ? na akla he to nuzinzán mìtọn lẹ mẹ yè ko zán, nunamẹ de ma sọ tin nado hẹn yì na omẹ Jiwheyẹwhe tọn lọ gba: nútẹ́ wẹ mí tindo? 8Devi lọ sọ vọ́ gblọnna Sauli, bo dọmọ, Dayi e go, yẹn tindo to alọ ṣiè mẹ Madẹnẹ ṣẹkle fataka tọn tọn de; enẹ wẹ yẹn na na hlan omẹ Jiwheyẹwhe tọn lọ, nado dọ aliho mìtọn na mí. 9(Daidai to Islaeli mẹ, whenuena omẹ de jei nado kanbiọ sọn Jiwheyẹwhe de, le wẹ é nọ dọ, dọmọ, Wá mì gbọ mí ni yì númọtọ de: na ewọ he yè to yiylọ Yẹwhegán de dinvie wẹ yè nọ ylọ dọ numọtọ de daidai.) 10Whenẹnu wẹ Sauli dọ hlan devi etọn dọ, Hiẹ dọ dagbe; wá, gbọ mí ni yì. Mowẹ yé yì tòdaho lọ mẹ fie omẹ Jiwheyẹwhe tọn lọ te. 11Le yé to jìhẹ jei aga hlan tòdaho lọ dali, yé mọ yọ̀pọ yọnnu lẹ tọ́n jei nado dòn osìn, bo dọ hlan yé dọmọ, Numọtọ lọ tin to ofi? 12Yé sọ gblọnna yé, bo dọmọ, E tin; dayi e go, ewọ tin to nukọn towe: yawu dinvie, na yè hẹn ẹn wá biọ tòdaho mẹ to egbé; na gbẹtọ lẹ tindo avọ́ de to egbé to otẹn yìaga lẹ mẹ: 13le mì yín omẹ hẹn biọ tòdaho lọ mẹ, mì na mọ ẹn titegbe, whẹpo é na do hẹji yì otẹn yìaga lọ mẹ nado dùnú: na gbẹtọ lẹ ma to na dùnú kaka é do gọ́, na ewọ wẹ nọ dona avọ́ lọ wutu; to enẹgodo wẹ yé mẹhe yè ylọ lẹ na do dùnú. Enẹwutu dinvie mì hẹaga yí; na mìwlẹ na mọ ẹn to ojlẹ he mẹ. 14Yé sọ heji yì tòdaho lọ mẹ; le yé wá tòdaho lọ hòmẹ, dayi e go, Samuẹli tọ́n do yé ji, na nado hẹaga yì otẹn yìaga lọ mẹ.
15Dinvie OKLUNỌ ko dohia hlan Samuẹli azán dopo whẹpo Sauli do wá, dọmọ, 16To osò to ojlẹ he nko mẹ yẹn na do dawe de hlan we sọn aigba Bẹnjamini tọn ji, hiẹ na sọ samisisána ẹn nado yín ahọvi to omẹ ṣie lẹ Islaeli ji, ewọ na sọ whlẹn omẹ ṣie lẹ sọn alọ Filistini lẹ tọn mẹ: na yẹn ko pọ́n omẹ ṣie lẹ dali, na awhá yetọn yè hẹn wá nukọn ṣie wutu. 17Whenuena Samuẹli mọ Sauli, OKLUNỌ dọ hlan ẹn dọ Dayi dawe ohó mẹhe tọn yẹn dọ hlan we go! ehe doponẹ wẹ na tindo asẹ to omẹ ṣie lẹ ji. 18Whenẹnu wẹ Sauli dón sẹpọ́ Samuẹli de to hòngboji, bo dọmọ, Dọ na mi, yẹn vẹ́ we, fie wẹ owhé numọtọ lọ tọn te? 19Samuẹli sọ gblọnna Sauli, bo dọmọ, Yẹn wẹ numọtọ lọ; to yìyì to nukọn ṣie jẹ otẹn yìaga lo mẹ, na míwlẹ nadùnú hẹ mi to egbé: podọ to afọnnu yẹn na gbọ a ni yì, bo na sọ dọ na we onú he tin to ayiha towe mẹ lẹpo. 20Na kẹtẹkẹtẹ towe he bú to azán atọ́n he wá yì tọn, a zé ayiha towe do yé go blo; na yè ko mọ yé. Na mẹnu wẹ onú he yín ojlotọn to Islaeli mẹ yín? E ma yín na hiẹ wẹ, podọ na owhé otọ́ towe tọn lẹpo? 21Sauli sọ gblọn bo dọmọ, E ma yín Bẹnjamininu de wẹ yẹn, sọn pẹvi talala whẹ́do Islaeli tọn tọn mẹ? podọ whédo ṣie pẹvi talala sọn whédo whẹ̀ndo Bẹnjamini tọn tọn mẹ? whenẹnu etẹwutu wẹ hiẹ dọhó le tọn nkọ hlan mi? 22Samuẹli sọ yí Sauli po devi etọn po, bo hẹn yé wá biọ gbàngàn mẹ, bo hẹn yé sinai to otẹn aga talala tọn mẹ to yé he yè ylọ lẹ ṣẹnṣẹn, he yín gbẹtọ ogbàn nkọ. 23Samuẹli sọ dọ hlan nudatọ dọmọ, Hẹn mimá he yẹn yína we wá, ehe tọn yẹn dọ hlan we dọ, A ni yí do de we. 24Nudatọ lọ sọ yí asá lọ po enẹ he tin to ẹ ji po, bo yí i do Sauli nukọn. Samuẹli sọ dọmọ, Dayi enẹ go ehe yè ko dovà! yí i do nukọn towe bo dù; na hlan ojlẹ didè lọ wẹ yè ko whla ẹ na we wutu, na yẹn dọmọ, Yẹn ko ylọgbé omẹ ewlẹ. Mọwẹ Sauli dùnú hẹ Samuẹli to gbènẹgbe. 25Whenuena yè ko hẹn yé jẹte sọn otẹn yìaga lọ mẹ biọ tòdaho mẹ, é dèpá hẹ Sauli to hóta aga. 26Yé sọ tite to fliflimẹ: é sọ wá jọ to ojlẹ wunkinkẹn tọn mẹ dali, wẹ Samuẹli yì Sauli de to hòta, dọmọ, Tite, na yẹn nido do we hlan yì. Sauli sọ tite, yé omẹ awe lẹ sọ tite jẹgbonu jei, ewọ po Sampẹli po, to họntò. 27Le yé to tejẹ jei to opòdo tòdaho lọ tọn, Samuẹli dọ hlan Sauli dọ, Degbèna devi lọ ni to yìyì to mí nukọn (ewọ sọ to yìyì), ṣigba hiẹ ni nọte pẹ̃de to ojlẹ he mẹ, na yẹn nido hẹn we nado sè ohó Jiwheyẹwhe tọn.
Currently Selected:
1 SAMUẸLI 9: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
