1 SAMUẸLI 27

1DAVIDI sọ dọ to ayiha etọn mẹ dọ, Yẹn na dòn dinvie to gbèdopo gbọn alọ Sauli tọn mẹ: núde ma tin pónte na mi hú dọ yẹn na do hòngán biọ aigba Filistini lẹ tọn mẹ; Sauli na sọ dèji sọn dẽ, ma nado din to agbó Islaeli tọn lẹpo ji ba: mọwẹ yẹn na hòngán sọn alọ etọn mẹ. 2Davidi sọ tite, bo jugbọn gododọ̃n, ewọ po omẹ nuọntọ̀n he tin to e de lẹ po, jẹ Akisi visunnu Maoki tọn de, ahọlu Gati tọn. 3Davidi sọ tin to Akisi de to Gati, ewọ po omẹ etọn lẹ po, omẹ dopodopo po whégbètọ etọn po, yèdọ Davidi po asi etọn awe lẹ po, Ahinoami Jẹzleẹlinu-yọnnu, po Abigaili Kalmẹlinu-yọnnu po, asi Nabali tọn. 4Yè sọ dọ na Sauli dọ yè hẹn Davidi họ̀nyì Gati: ewọ ma sọ din in na mọ ba gba.

5Davidi sọ dọ hlan Akisi dọ, Eyín dinvie yẹn ko mọ nukundagbe to nukun towe lẹ mẹ, bo gbọ yé ni na otẹn de mi to tòdaho lẹ de mẹ to agbègbè ji, na yẹn nido nọnọ̀ finẹ: na etẹwutu mẹmẹsi towe na dó tòdaho whànpẹnọ mẹ hẹ we? 6Whenẹnu wẹ Akisi na ẹn Ziklagi to azán nẹ gbè: enẹwutu wẹ Ziklagi yín ahọlu Juda tọn lẹ tọn jẹ egbé.

7Osọha azán lẹ tọn he Davidi do nọ̀ agbègbè Filistini lẹ tọn ji yín owhè gìgọ́ dopo po osùn ẹnẹ po. 8Davidi po omẹ etọn lẹ po sọ yì aga, bo basi aligbò de na Gẹsulinu lẹ, po Gilzinu lẹ po, po Amalẹkinu lẹ po: na akọta nẹlẹ wẹ tòmẹnu aigba lọ tọn lẹ, he tin sọn hóhó, le hiẹ jei Ṣuli, yèdọ hlan aigba Egipti tọn dali. 9Davidi sọ hò aigba lọ, ma whlẹn sunnu kavi yọnnu do ogbẹ́, bo bé lẹngbọ lẹ yì, po oyin lẹ po, po kẹtẹkẹtẹ lẹ po, po kanklosọpóawenọ lẹ po, po avọ̀ lẹ po; ewọ sọ lẹ́gó, bo wá Akisi de. 10Akisi sọ dọmọ, Fie míwlẹ basi aligbò de te to egbé? Davidi sọ dọmọ, Do hùwaji Juda tọn ji, podọ do hùwaji Jelamẹelinu lẹ tọn ji, podọ do hùwaji Keninu lẹ tọn ji. 11Davidi masọ whlẹn sunnu kavi yọnnu de do ogbé, nado hẹn yé wá Gati gba, dọmọ, Yé nikã dèdòna mí, dọmọ, Mọ wẹ Davidi wà do, podọ mọwẹ wàlọ etọn ko yín to ojlẹ he mẹ ewọ ko tin to agbègbè Filistini lẹ tọn ji. 12Akisi sọ yí Davidi sè, dọmọ, Ewọ ko hẹn Islaeli omẹ etọn lẹ patapata nado gbẹwan nẹ̃; enẹwutu ewọ na yín mẹmẹsi ṣie kaka doi.

Currently Selected:

1 SAMUẸLI 27: BWL23

Highlight

Copy