1 SAMUẸLI 20
20
1DAVIDI sọ họ̀nyì sọn Naiọti to Lama, bo wá bo dọ to Jonatani nukọn dọ, Eté wẹ yẹn ko wà? eté wẹ ylanwiwà ṣie? podọ eté wẹ ylando ṣie to otọ́ towe nukọn, bọ ewọ do to ogbè ṣie din? 2Ewọ sọ dọ hlan ẹn dọ, Jiwheyẹwhe dike blo; hiẹ ma na ku gba: dayi e go, otọ́ ṣie ma nọ wà núde eyín daho kavi pẹvi, adavo dọ é do e hia hlan mi: etẹwutù wẹ otọ́ ṣie whla onú he sọn dẽ? é ma yín mọ gba. 3Davidi sọ whle humọ deji, bo dọmọ, Otọ́ towe yọnẹn dagbedagbe dọ yẹn ko mọ nukundagbe to nukun towe lẹ mẹ: ewọ sọ dọmọ, A dike Jonatani yọ́n ehe blo, ewọ nikà yín adínọ: ṣigba nugbonugbo dile OKLUNỌ to ogbè, podọ dile gbigbọ towe to ogbè, afọdidè dopo wẹ tin to yẹn po okú po ṣẹnṣẹn. 4Whenẹnu wẹ Jonatani dọ hlan Davidi dọ, Nudepope alindọn towe jlo, yèdọ yẹn na wà ẹ na we. 5Davidi sọ dọ hlan Jonatani dọ, Dayi e go, osò osùn yọ́yọ́ tin, yẹn ma do na gọ̀n nado sinai hẹ ahọlu to núdùdù kòn gba: ṣigba gbọ yẹn ni yì, na yẹn nido whla dẽ to danji jẹ azán atọ̀ntọ gbè to whèjai. 6Eyín otọ́ towe bà mi pò jãnwẹ, whenẹnu dọmọ, Davidi yí sọwhiwhe do biọ ojodo sọn dẽ na ewọ nido dowezun yì Bẹti? lehemi tòdaho etọn mẹ; na é yín avọ́ whèmẹ-whèmẹ tọn gbè na whédo lẹpo. 7Eyín ewọ dọ le dọ, é yín dagbedagbe; memesi towe na tindo jijọho: ṣigba eyín ewọ yín homẹgblenọ, whenẹnu yọnẹn dọ yè ko yígona oylan gbọn e dali. 8Enẹwutu yí homẹhùn do zán hẹ mẹmẹsi towe; na hiẹ ko hẹn mẹmẹsi towe wá biọ alẹ̀nù OKLUNỌ tọn de mẹ hẹ we; ṣigba eyín ylanwiwà de tin to yẹn mẹ, hlẹlọsu ni hù mi; na etẹwutu hiẹ na do hẹn mi wá otọ́ towe de? 9Jonatani sọ dọmọ, E ni tin dẹn sọn de we: na eyín yẹn gbé sọgan yọnẹn dọ yè yígona oylan gbọn otú ṣie dali nado wá oji we, whenẹnu bé yẹn ma na dọ ẹ na we? 10Whenẹnu wẹ Davidi dọ hlan Jonatani dọ, Mẹnu wẹ na dọ na mi eyín gbọn okòsọ dali otọ́ towe yí hóbéwlu do gblọnhóna we? 11Jonatani sọ dọ hlan Davidi dọ, Wá bo gbọ mí ni tọ́n yì biọ danji. Yé sọ tọ́n yé omẹ awelẹ yì biọ danji.
12Jonatani sọ dọ hlan Davidi dọ, OKLUNỌ, Jiwheyẹwhe Islaeli tọn ni yín kunnudetọ; whenuena yẹn ko dotò otọ́ ṣie: to ojlẹ he nkọ mẹ to osò, kavi to azán atọ̀ntọ gbè, dayi e go, eyín dagbe tin finẹ hlan Davidi de, béyẹn ma na do omẹ hlan we to whenẹnu, bo do e hia hlan we? 13OKLUNỌ ni wà mọ hlan Jonatani, podọ humọ ga, eyín é hẹnhomẹhùn otọ́ ṣie nado wà oylan do we, eyín yẹn ma do e hia hlan we, bo do we hlan yì, na hiẹ nido yì to jijọho mẹ: OKLUNỌ ni tin po hiẹ po, dile é ko tin po-otú towe po do. 14E ma na yín whenuena yẹn to ogbè kẹdẹ wẹ hiẹ ni do dagbewà OKLUNỌ tọn hia, na yẹn kú blo gba: 15Ṣigba ga hiẹ ma na sán dagbèwà towe sẹ̀ sọn owhé ṣie gbè gbède gba: lala, é ma yín whenuena OKLUNỌ ko sán kẹ̀ntọ Davidi tọn lẹ sè omẹ dopodopo sọn nukun aigba tọn ji. 16Mowẹ Jonatani basi alẹ̀nù de hẹ owhé Davidi tọn, dọmọ, Podọ OKLUNỌ na kàn ẹ biọ to alọ kẹ̀ntọ Davidi tọn lẹ tọn mẹ. 17Jonalani sọ hẹn Davidi nado vọ̀ whle, na owanyi he ewọ tindo hlan ẹn: na ewọ yiwanna ẹn dile é yiwanna alindọn ede tọn do. 18Whenẹnu wẹ Jonatani dọ hlan ẹn dọ, Osùn yọ́yọ́ tin to osọ̀; na sọ bà hiẹ pò, na aisinnú towe na jẹvọ́ wutu. 19Whenuena hiẹ ko nọte azán atón, hiẹ na yawu jẹte yì, bo wá otẹn fie hiẹ whla dewe do whenuena azón lọ tin to alọ mẹ, bo na sọ nọai to zannu Ezẹli kòn. 20Yẹn na só ogá atọ̀n do adà etọn ji, di dọ yẹn sègá do ohia de. 21Bo, dayi e go, yẹn na do vidẹpẹ lọ hlan, dọmọ, Yi, din ogá lẹ mọ. Eyín yẹn dọ hlan vidẹpẹ lọ dọ, Dayi e go, ogá ewlẹ tin to adà ofi towe tọn ji: bé hiẹ, bo wá; na jijọho tin finẹ hlan we awugble de ma tin, dile OKLUNỌ to ogbẹ̀. 22Ṣigba eyín yẹn dọ hlan yọpọsunnu lọ dọ, Dayi e go, ogá ewlẹ tin to nukọnna we: yì aliho towe; na OKLUNỌ ko do we hlan yì. 23Podọ gbọn nujijọ lọ tọn dali ehe hiẹ po yẹn po dọhó e tọn, dayi e go, OKLUNỌ tin to hiẹ po yẹn po ṣẹnṣẹn kakadoi.
24Mowẹ Davidi whla ede to danji: whenuena yè hẹn osùn yọ́yọ́ lọ wá, ahọlu sinai nado dù núdùdù. 25Ahọlu sọ sìn aisinnú etọn ji, di ojlẹ devo lẹ tọn, yèdọ to aisinnú ji to adó gò; Jonatani sọ fọ́n ṣite, Abneli sọ sinai to adà Sauli tọn mẹ: ṣigba otẹn Davidi tọn tin to ovọ́. 26Ṣogàn Sauli ma dọhónu depope to azán nẹ gbè gba: na é lẹn dọ, núde flẹjẹ e ji, é ma tin wiwé gba; nugbo ewọ ma tin wiwé gba. 27E sọ wá jọ to aihọ́ngbe to osùn yọ́yọ́ godo, ehe yín azán awetọ, wẹ otẹn Davidi tọn yín ovótọ: Sauli sọ dọ hlan Jonatani visunnu etọn dọ, Etẹwutu wẹ visunnu Jẹsse tọn ma do wá núdùdù kòn, to osọ kavi to egbé? 28Jonatani sọ gblọnna Sauli dọ, Davidi vivẹ́vivẹ́ biọ ojodo sọn dẽ lado yì Bẹti-lehẹmi: 29Ewọ sọ dọmọ, Gbọ yẹn ni yì, yẹn vẹ̀ we; na whédo mìtọn tindo avọ́ de to tòdaho mẹ; nọvisunnu ṣie, ewọ ko degbèna mi nado tin to finẹ; dinvie, eyín yẹn ko mọ nukundagbe to nukun towe lẹ mẹ, gbọ yẹn ni tón yì, yẹn vè we, bo mọ mẹmẹsunnu ṣie lẹ. Enẹwutu wẹ yè ma do hẹn ẹn wá tafo ahọlu tọn kọ́n gba. 30Whenẹnu wẹ yè hẹn adi Sauli tọn jimiyọn do Jonatani ji, ewọ sọ dọ hlan ẹn dọ, Hiẹ visunnu yọnnu gbigbletọ atẹsitọ de tọn, bé yẹn ma yọnẹn dọ hiẹ ko dè visunnu Jẹsse tọn hlan winyan towe titi, podọ hlan winyan omé onọ towe tọn tọn? 31Na dẽn sọ le visunnu Jẹsse tọn tin to ogbẹ̀ to aigba ji, yè ma na hẹn we lódo kavi ahọludu towe gba. Enẹwutu do omẹ hlan bo hẹn ẹn wá dẽ, na ewọ na kú dandan. 32Jonatani sọ gblọnna Sauli otọ́ etọn, bo dọ hlan ẹn dọ, Etẹwutu wẹ yè na do yí i hlan okú? etẹ́ wẹ é ko wà? 33Sauli sọ dlẹn owhán etọn do e nado hò e: fietọndali Jonatani yọnẹn dọ é yín nuyígona sọn otọ́ etọn de nado yí Davidi hlan okú. 34Mowẹ Jonatani tite sọn tafo ji to adi daho mẹ, bo ma sọ dù núdùdù de to azán awetọ osùn tọn mẹ, na yè hẹn homẹgble e na Davidi, na otọ́ etọn ko dowinyan ẹn wutu.
35E sọ wá jọ to afọnnu, wẹ Jonatani tọ́n yì biọ danji to ojlẹ yè do hẹ Davidi ji, yọpọsunnu pẹvi de po e po. 36Ewọ; sọ dọ hlan yọpọsunnu etọn lọ dọ, Dowezun, bo din ogá lẹ mọ dinvie he yẹn sẹ́. Le yọpọsunnu lọ bẹ̀wezun, é sẹ̀ ogá dopo hlan nukọn nẹ̃. 37Whenuena yè hẹn yọpọsunnu lọ wá otẹn ogá he Jonatani ko sẹ̀ tọn mẹ, Jonatani dawhá to yọpọsunnu lọ godo, bo dọmọ, Bé ogá lọ ma tin to nukọnna we, wèzun dédé, awúdide, a nọte blo. 38Yọpọsunnu Jonatani tọn sọ ṣinyan ogá lẹ, bo wá mẹmẹnu etọn de. 39Ṣigba yọpọsunnu lọ ma yọ́n onú depope gba: Jonatani po Davidi po kẹdẹ wẹ yọ́n nujijọ lọ. 40Jonatani sọ yí adanwànú etọn lẹ na hlan yọpọsunnu etọn, bo dọ hlan ẹn dọ, Yì, hẹn yé yì tòdaho mẹ. 41Le yè hẹn yọpọsunnu lọ yì kẹdẹ, Davidi tite sọn otẹn de mẹ pannukọn hùwaji dali, bo ṣinyọn nukunmẹ etọn ji hlan aigba, bo dé ede whla atọ̀n: yé sọ donùnùgona yé nọzo, bo viavi hẹ yé nọzo, kaka Davidi do yìdẹn. 42Jonatani sọ dọ hlan Davidi dọ, To yìyì jijọho mẹ, sọle mí ko whlé mí omẹ awelẹ to oyín OKLUNỌ tọn mẹ, dọmọ, OKLUNỌ na tin to yẹn po hiẹ po ṣẹnṣẹn, podọ to okún ṣie po okún towe po ṣẹnṣẹn kakadoi. Ewọ sọ tite bo fọ́nyì; jonatani sọ yì biọ tòdaho mẹ.
Currently Selected:
1 SAMUẸLI 20: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.