1 SAMUẸLI 17
17
1DINVIE Filistini lẹ bẹ́ awhàn yetọn lẹ pli dopọ do awhànfuntẹn, yè sọ bé yé plidopọ to Soko, he yín Juda tọn, bo sọ dosla do Soko po Azeka po ṣẹnṣẹn to Efẹsidammimi mẹ. 2Yè sọ bé Sauli po omẹ Islaeli tọn lẹ po plidopọ, bo dosla do agbàdo Ela tọn mẹ, bo tò awhàn do haji do Filistini lẹ ji. 3Filistini lẹ sọ nọte to osé ji to awà ode ji, Islaeli sọ nọte to osé ji to awà awetọ ji: agbàdo de sọ tin to yé ṣẹnṣẹn. 4Agawú de sọ tọ́n jẹgbonu sọn osla Filistini lẹ tọn mẹ, he yè nọ ylọ Goliati Gati tọn, ote mehetọn yín awàgba ṣidopo po alọkikẹ dopo po. 5E sọ tindo tabudo gànvẹ̃ tọn de to ota etọn, yè sọ yí awu gànlinlọn tọn de do nẹ̃; pinpẹ̀n awu lọ tọn yín ṣẹkle gànvẹ̃ tọn fọtọ́n atón. 6E sọ tindo azàngàndánbudo gànvẹ̃ tọn lẹ to azàngàndán etọn lẹ go, podọ dludlu gànvẹ̃ tọn de to abó etọn lẹ ṣẹnṣẹn. 7Atin owhán etọn tọn tin taidi opòntin avọ̀lọntọ de tọn; ota owhán etọn tọn jlẹ ṣẹkle gànyù tọn nuọntọ̀n: awọyínuhẹntọ etọn to yìyì to nukọn nẹ. 8E sọ site bo dawhádọ hlan awhàn Islaeli tọn lẹ, bo dọ hlan yé dọ, Etẹwutu wẹ yè hen mì tọ́n jegbonu nado tò awhàn mìtọn do haji? Filistini de ma wẹ yẹn, mìwlẹ mẹmẹsi hlan Sauli? Dè omẹ de na mì, bo gbọ e ni jẹte wá dẽ. 9Eyín ewọ tin sọgan nado hòavùn hẹ mi, bo sọ hù mì, be whenẹnu míwlẹ na yín mẹmẹsi mìtọn lẹ: ṣigba eyín yẹn hugán ewọ to huhlọn me, bo sọ hù i, be whenẹnu mìwlẹ na yín mẹmẹsi míwlẹ tọn lẹ, bo nọ sẹ̀n mí. 10Filistini lọ sọ dọmọ, Yẹn dèafudo awhàn Islaeli tọn to azán he gbè; na omẹ de mi, na mí ni péavùn. 11Whenuena Sauli po Islaeli lẹpo po sè ohó Filistini lọ tọn nele, yè hẹn yé DIBU, bo sọ savọ̀ gbahugbahu.
12Dinvie Davidi wẹ visunnu Eflatinu Bẹti-lehẹm-juda tọn nẹ tọn, oyín mẹhetọn yín Jesse; ewọ sọ tindo visunnu ṣinantọn: dawe lọ sọ yín omẹ yònhonọ de to azán Sauli ton lẹ me, yìnukọn to owhè lẹ mẹ to gbẹtọ lẹ ṣẹnṣẹn. 13Visunnu whinwhẹ́n Jẹsse tọn atọ̀n lẹ ko hodo Sauli yì awhànfuntẹn: oyín visunnu etọn atọ̀n he yì awhànfuntẹn tọn lẹ wẹ Eliabi oplọnji lọ, podọ he bò do e go Abinadabi, podọ atọ̀ntọ Samma 14Davidi wẹ agọ̀gbọnẹn: atọ̀n whinwhén lẹ ko hodo Sauli 15Dinvie Davidi to yìslọyì sọn Sauli de nado yìn lẹngbọ otọ́ etọn tọn le to Beti-lehẹm. 16Filistini lọ sọ: to dìndòn sẹpọ́ to afọnnu po whèjai po, bosọ ede hia azán kànde.
17Jesse sọ dọ hlan Davidi visunnu etọn dọ, Yí dinvie na mẹmẹsunnu towe lẹ efa dopo gbadó sisọ he tọn, po akla mlìnmlin ao helẹ po, bo hẹn yé yì ola mẹ plaun jẹ mẹmẹsunnu towe lẹ de; 18bo sọ hẹn yìnnóhihò ao helẹ wá jẹ awhàngan fọtọ́n yetọn tọn de, bo pọ́n nawẹ mẹmẹsunnu towe lẹ te, bo yí gòdenú yetọn. 19Dinvie Sauli, po yé po, po omẹ Islaeli tọn lẹpo po, tin to agbadò Ela tọn mẹ, to avùnhò hẹ Filistini lẹ. 20Davidi sọ fọ́nṣite to afọnnufù, bo jó lẹngbọ lẹ do yìnyìntọ de de, bo yí, bo yi, dile Jẹsse ko degbè-nẹ do, ewọ sọ wá otẹn kẹkẹgbó lẹ tọn mẹ, le awhànpa he tọ́n jei nado hòavùn dabobo na awhàn lọ. 21Islaeli po Filistini lẹ po yí awhàn do haji, awhàn pànnukọn awhàn 22Davidi sọ jó awhàngban etọn do alọ hihọtọ awhàngban tọn tọn mẹ, bo dowezun yì awhàn, bo wá bo dọnudo mẹmẹ sunnu etọn lẹ. 23Le é to hódọ hẹ yé, dayi e go, finẹ agàwú lọ hẹji wá, Filistini Gati tọn lọ, Goliati gbọn oyín dali, sọn ogbé Filistini lẹ tọn lẹ mẹ, bo to hódọ kẹdẹdi ohó doponẹ lẹ lọ: Davidi sọ sè yé. 24Omẹ Islaeli tọn lẹpo, whenuena yé mọ dawe lọ, họ̀nyì sọn e de, bo to avosà badabada. 25Omẹ Islaeli tọn lẹ sọ dọmọ, Mìwlẹ ko mọ dawe he he yè hẹn hẹji wá mí de? nugbonugbo nado dèafudo Islaeli wẹ ewọ do hẹji wá: é na sọ yín, dọ omẹ lọ he hù i, ahọlu na yí adọkun daho do doadọkunna ewọ, bo na sọ na viyọnnu etọn ẹn, bo sọ hẹn owhé otọ́ etọn tọn vò to Islaeli mẹ. 26Davidi sọ dọhó hlan omẹ he site to e dali lẹ, dọmọ, Onú tẹwẹ na yín wiwà hlan omẹ lọ he hù Filistini he, bo dè ovlẹ sọn Islaeli? na mẹnu wẹ Filistini whẹ̀magbonọ he, bọ ewọ na do dèafudo awhàn Jiwheyẹwhe ogbẹ́nọ tọn lẹ? 27Gbẹtọ lẹ sọ gblọn nẹ̃ di ehe hunkọ, dọmọ, Mowẹ é na yín wiwà do hlan omẹ lọ he hù i. 28Eliabi nọvisunnu etọn dahopete sè whenuena é to hódọ hlan omẹ ewlẹ; yè sọ hẹn adi Eliabi tọn jimiyọn yọn do Davidi ji, é sọ dọmọ, Etẹwutu wẹ yè hẹn we jẹte wá? podọ mẹnu de wẹ hiẹ jó lẹngbọ pẹde nẹlẹ do to zùngbo mẹ? Yẹn yọ́n gòyíyí towe, po danuwiwà ayiha towe tọn po; na yè hẹn we jẹte wá na hiẹ nido mọ awhàn lọ wẹ. 29Davidi sọ dọmọ, Eté yẹn ko wà to dinvie? Whẹ̀hó de ma tin? 30E sọ lẹ́ sọn e de hlan mẹawetọ de, bo sọ dọhó kẹdẹdi doponẹ nkọ: gbẹtọ lẹ sọ vọ́ gblọnna ẹn kẹdẹdi nukọntọn nkọ. 31Whenuena yè sè ohó he Davidi dọ lẹ, yé yí yé dọ to Sauli nukọn; ewọ sọ do omẹ hlan ẹn. 32Davidi sọ dọ hlan Sauli dọ, A dike ayiha omẹ de tọn kusiọ na e tọn wutu blo; mẹmẹsi towe na yì bo hòavùn hẹ Filistini he. 33Sauli sọ dọ hlan Davidi dọ, Hiẹ ma tin sọgan nado yì Filistini he ji nado hòavùn hẹ ẹ gba na omẹ ovu de wẹ hiẹ, podọ ewọ omẹ awhàn tọn de sọn ovú etọn gbọ̃n. 34Davidi sọ dọ hlan Sauli domọ, Mẹmẹsi towe to lẹngbọ otọ́ etọn tọn lẹ yìn; whenuena kinnikinni de wá finẹ, kavi ogbépọẹ de, bo yí lẹngbọ de sọn kanlinpa mẹ, 35Yẹn tón domọ nẹ̃ yì, bo hò e, bo sọ whlẹn ẹn sọn onù etọn mẹ: whenuena é sọ tite do oji e, yẹn wle e gbọn ogbì etọn dali, bo hò e, bo sọ hù i. 36Mẹmẹsi towe hù kinnikinni lọ po ogbépọẹ lọ po: Filistini whẹmagbonọ he na tin di dopo yé tọn, mimọ ewọ dèafudo awhàn Jiwheyẹwhe ogbẹ̀nọ tọn lẹ. 37Davidi sọ dọmọ, OKLUNỌ he whlẹn mì sọn ofẹ́n kinnikinni tọn si, podọ sọn ofẹ́n ogbépọẹ tọn si, ewọ na whlẹn mi sọn alọ Filistini he tọn mẹ. Sauli sọ dọ hlan Davidi dọmọ, Yì, OKLUNỌ na sọ tin to de we. 38Sauli sọ yí awu etọn do na Davidi, é yí otabudo gànvẹ̃ tọn de do ota etọn, é sọ yí agawu gànlinlọn tọn de donẹ. 39Davidi sọ bla ohi etọn do awu etọn ji, é sọ zépọ́n nado yì; na ewọ ma ko whle e pọn gba. Davidi sọ dọ hlan Sauli dọmọ, Yẹn ma sọgan yì pò ehelẹ po gba; na yẹn ma ko whle yé pọ́n gba. Davidi sọ dè yé sọn ogo. 40Ewọ sọ yí opò etọn do alọ etọn mẹ, bo ṣinyan owàn zannu atọ́n sọn otọ̀tó, bo yí yé do sẹ́gẹ lẹngbọyintọ tọn he e tindo mẹ, yèdọ do sakotó etọn mẹ; akòtopẹ́ etọn sọ tin to alọ etọn mẹ: ewọ sọ dọ̀n sẹpọ́ hlan Filistini lọ de. 41Filistini lọ sọ ja bo dọ̀n sẹpọ́ hlan Davidi de; omẹ he hẹn awọyínú sọ to yìyì to nukọn etọn. 42Whenuena Filistini lọ pọ́n hlan, bo mọ Davidi, é kò e: na ewọ yín yọ̀pọ de wutu bo sọ bia, podọ gọna enẹ nukunta whànpẹnọ tọn de. 43Filistini lọ dọ hlan Davidi dọmọ, Avún de wẹ yẹn, bọ hiẹ dò ja dẽ po opò lẹ po? Filistini lọ sọ hodẹ̀do Davidi gbọn yẹwhe etọn lẹ dali. 44Filistini lọ sọ dọ hlan Davidi dọmọ, Wá dẽ yẹn na sọ na agbasalan towe ohẹ̀ aga tọn lẹ, podọ hlan kanlin danji tọn lọ. 45Whenẹnu wẹ Davidi dọ hlan Filistini lọ dọmọ, Hiẹ ja dẽ po ohi de po, pọ owhán de po, po dludlu de po: ṣigba yẹn ja de we to oyín OKLUNỌ awhànpa lẹ tọn mẹ, Jiwheyẹwhe awhàn Islaeli tọn lẹ tọn, he hiẹ dèafudo. 46Azán he gbè wẹ OKLUNỌ na jó we do alọ ṣie mẹ; yẹn na hò we, bo sọ yí ota towe sẹ̀ sọn ogo we; yẹn na sọ yí osiọ awhànpa Filistini lẹ tọn tọn lẹ na hlan ohẹ̀ aga tọn lọ, podọ hlan kanlin adúadú aigba tọn lẹ; na aihọn lẹpo nido yọnẹn dọ Jiwheyẹwhe de tin to Islaeli mẹ: 47podọ na agùnpipli he lẹpo nido yọnẹn dọ OKLUNỌ ma nọ yí ohi po owhán po do whlẹnmẹ gba: na OKLUNỌ tọn wẹ awhàn lọ, ewọ na sọ jó mì do alọ mìtọn mẹ. 48E sọ wá jọ, whenuena Filistini lọ fòntite, bo ja bo dòn sẹpò yakẹ nado pé Davidi, wẹ Davidi yawu bo dowezun jlọdo awhàn lọ ji nado pé Filistini lọ. 49Davidi sọ yí alọ etọn do adọpò etọn mẹ, bo dè zannu de tọ́n sọn finẹ, bo yìn in, bo hò Filistini lọ to nukọngángán etọn mẹ; zannu lọ sọ siọ do nukọngángán etọn mẹ, bọ é jai jẹ nukunmẹ etọn ji hlan aigba. 50Mọwẹ Davidi yí akòtopé de po zannu de po do gbawhàn to Filistini lọ ji, bo hò Filistini lọ, bo sọ hù i; ṣigba ohi de ma tin to alọ Davidi tọn mẹ gba. 51Whenẹnu wẹ Davidi dowezun, bo nọte to Filistini lọ ji, bo yí ohi etọn, bo dọ̀n ẹn tọ̀n sọn apà etọn mẹ, bo hù i, bo yí do sán ota etọn to finẹ. Whenuena Filistini lẹ mọ dọ agàwú yetọn yín oṣiọ, yé họ̀nyì. 52Omẹ Islaeli tọn lẹ po Juda tọn lẹ po sọ tite, bo dabobo, bo domọna Filistini lẹ, kaka hiẹ do wá jẹ Gai, podọ jẹ họngbo Eklọni tọn lẹ ji. Alántọ Filistini tọn lẹ to aijẹ to aliho jẹ Saalaimi, yèdọ jẹ Gati, podọ jẹ Eklọni. 53Ovi Islaeli tọn lẹ sọ lẹ sọn mọyanna to Filistini lẹ godo mẹ, yé sọ hẹn osla yetọn gble. 54Davidi sọ yí ota Filistini lọ tọn, bo hẹn ẹn wá Jelusalẹm; ṣigba é yi awhàngbaja etọn do gohọ̀ etọn mẹ.
55Whenuena Sauli mọ Davidi tòn yì Filistini lọ ji, é dọ hlan Abneli awhàngán awhànpa etọn tọn dọ, Abneli, visunnu mẹnutọn wẹ vivú he? Abneli sọ dọmọ, Le alindọn towe to ogbẹ̀, Ahọlu, yẹn ma sọgan dọ gba. 56Ahọlu sọ dọmọ, Hiẹ ni kanbiọ visunnu mẹnutọn wẹ yọpọdẹpẹ he. 57Le Davidi lẹ́gọ̀ sọn huhù Filistini lẹ tọn gbémẹ, Abneli yí i, bo hẹn ẹn wá Sauli nukọn po ota Filistini lọ tọn po to alọ etọn mẹ. 58Sauli sọ dọ hlan ẹn dọ, Visunnu mẹnutọn wẹ hiẹ, hiẹ dẹpẹmọ? Davidi sọ gblọn dọ, Visunnu Jẹsse Bẹti-lehẹminu mẹmẹsi towe tọn wẹ yẹn.
Currently Selected:
1 SAMUẸLI 17: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.