1 SAMUẸLI 16
16
1OKLUNỌ sọ dọ hlan Samuẹli dọ, Dẹn sọ na wẹ hiẹ na do blawu na Sauli, mimọ yẹn ko gbẹ̀ ẹ dai sọn ahọlu yínyín mẹ to Islaeli ji? Yí amì do gó lànzò towe mẹ, bo yì, yẹn na do we hlan Jẹsse Bẹti-lehẹmìnu dena yen ko wleawu ahọlu de tọn dai na mi to visunnu etọn lẹ ṣẹnṣẹn. 2Samuẹli sọ dọmọ, Na yẹ́n sọgan yì do? eyín Sauli sè e, ewọ na hù mi. OKLUNỌ sọ dọmọ, Yí yìnasiwhe de hẹn sọyi, bo dọmọ, Yè hẹn mi wá nado sánvọ́ hlan OKLUNỌ. 3Bo ylọ Jẹsse do avọ́ lọ kọ̀n, yẹn na sọ do núhe hiẹ na wà hia we: hiẹ na sọ samisisána hlan mi ewọ mẹhe yẹn ylọyìn hlan we. 4Samueli sọ wà enẹ he OKLUNỌ dọ, bo wá Beti-lehẹm. Mẹho tòdaho lọ tọn lẹ sọ wá nado pé e bo sisọsisọ, bo dọmọ, Jijọho tọn hiẹ do wá? 5Ewọ sọ dọmọ, Jijọho wẹ: yè hen mi wá nado sánvọ́ hlan OKLUNỌ: mì lẹ̀ mlde wé, bo wá avọ́ lọ kọ̀n po yẹn po. Ewọ sọ lẹ̀ Jẹsse wé po visunnu etọn lẹ po, bo ylọ yé do avọ́ lọ kòn. 6E sọ wá jọ, whenuena yè hẹn yé wá, wẹ é pọ́n Eliabi tlintlin, bo dọmọ, Nugbonugbo mẹyíamisádode OKLUNỌ tọn tin to ewọ nukọn. 7Ṣigba OKLUNỌ dọ hlan Samuẹli dọ, A pọ́n nukunta etọn ji blo, kavi agayìyì ote etọn tọn; na yẹn ko gbẹ́ ẹ dai wutu: na OKLUNỌ ma nọ mọnú dile gbẹtọ mọ do gba; na gbẹtọ nọ to awusọhia gbonu go tọn dali pọ́n ṣigba ayiha pọ́n wẹ OKLUNỌ te. 8Whenẹnu Jẹsse ylọ Abinadabi, bo hẹn ẹn gbọn Samuẹli nukọn. Ewọ sọ dọmo, OKLUNỌ ma ko sọ dè ehe gba. 9Whenẹnu wẹ Jẹsse sọ hẹn Samma nado jù wá yì. Ewọ sọ dọmọ, Mọ OKLUNỌ ma ko sọ dè ehe. 10Jẹsse sọ hẹn visunnu etọn ṣinawe lẹ nado gbọn Samuẹli nukọn. Samuẹli sọ dọ hlan Jẹsse dọ, OKLUNỌ ma ko dè ehelẹ gba. 11Samuẹli sọ dọ hlan Jẹsse dọ, Ovi towè lẹpo wẹ to ofi? Ewọ sọ dọmọ, E gbẹ́ sọ pò agọ̀gbọnẹn, bo, dayi e go, é to lẹngbọ lẹ yìn. Samuẹli sọ dọ hlan Jẹsse dọ, Do omẹ hlan bo hẹn ẹn wá: na míwlẹ ma ai na sin kaka ewọ do wá file. 12Ewo sọ do omẹ hlan bo hẹn ẹn wá whégbe. Dinvie é yín mẹvẹ̃, podọ gọ́napopo nukunta whanpenọ tọn de, bo sọ disán nado pọ́n. OKLUNỌ sọ dọmọ, Fọ́nṣite, samisisána ẹn: na ehe wẹ ewọ. 13Whenẹnu wẹ Samuẹli yí lànzò ami tọn lọ, bo samisisána ẹn to ogbla mẹmẹsunnu etọn lẹ tọn mẹ: gbigbọ OKLUNỌ tọn sọ yí hlọnhlọn do wá Davidi ji sọn azán nẹ gbè jeijei. Mowẹ Samuẹli tite, bo yì Lama.
14Dinvie gbigbọ OKLUNỌ tọn ko yìsọn Sauli de, gbigbọ ylankan de sọn OKLUNỌ de to tuklado e. 15Devi Sauli tọn lẹ sọ dọ hlan ẹn dọ, Dayi e go dinvie, gbigbọ ylankan de sọn OKLUNỌ de to tuklado we. 16Gbọ klunọ mìtọn ni degbèna devi etọn lẹ dinvie he tin to nukọn towe nado din omẹ de mọ he yín ajalẹn hòtọ ananọ de: é na sọ wá jọ, whenuena gbigbọ ylankan sọn Jiwheyẹwhe de wá oji we, wẹ ewọ na yí alọ etọn do hò, hiẹ na sọ jẹgángán. 17Sauli sọ dọ hlan devi etọn lẹ dọ, Mi wleawu mẹhe sọgan hò dagbedagbe tọn de na mi, bo hẹn ẹn wá dè. 18Whenẹnu wẹ dopo sọn yopọ dẹpẹ lẹ mẹ gblọn, bo dọmọ, Dayi e go, Yẹn ko mọ visunnu Jẹsse Bẹti-leheminu tọn de he yín ananọ to hiho mẹ, podọ sunnu hlọnhlọnnọ tudido tọn de podọ sunnu awhàn tọn de, podọ déditọ to hógbè mẹ, podọ gbẹtọ whànpẹnọ de OKLUNỌ sọ tin; hẹ ẹ. 19Enẹwutu Sauli do mẹdagun lẹ hlan Jẹsse, bo dọmọ, Dó Davidi visunnu towe hlan mi, he tin to lẹngbọ lẹ kon. 20Jẹsse sọ yí ketẹkẹtẹ yè yí akla do doagbànna de, po ogò ovẹ̃n tọn de po, po gbọgbọẹvu de po, bo yí ye hlan gbọn Davidi visunnu etọn dali hlan Sauli 21Davidi sọ wá Sauli de, bo ṣite to nukọn etọn: ewọ sọ yiwanna ẹn susutàla; é sọ lẹzùn aw, hàngbajahentọ etọn. 22Sauli sọ do omẹ hlan Jẹsse, dọmọ, Yẹn vẹ we, gbọ Davidi ni nọ ṣite to nukọn ṣie; na ewọ ko mọ nukundagbe to nukun ṣie mẹ 23E sọ wá jọ, whenuena gbigbọ ylankan sọn Jiwheyẹwhe de tin to Sauli ji, wẹ Davidi nọ yí ajalẹn, bo nọ yí alọ etọn do hò: mọwe yè sọ: nọ hẹn Sauli whiwhẹ, bo sọ nọ tin gángán, gbigbọ ylankan lọ sọ nọ yì sọn e de.
Currently Selected:
1 SAMUẸLI 16: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.